المساعد الشخصي الرقمي

مشاهدة النسخة كاملة : تمرين السيارة الجديدة ؟


الرسيفر
03/04/2009, 09:33 AM
أولا الحمد لله الذي قدرني أشتري جيب وتعرفون الواحد دافع 200 ألف وده يحافظ على السيارة .

وإن شاء الله الموتر بيطلع السبت بس ودي أعرف هل فيه طريقة لتمرين السيارة الجديدة وإلا عب بنزين وطيران على أطول نفود .

رأيكم يهمني
عاشق السيل
03/04/2009, 09:54 AM
أولا ألف مبروك الموتر الجديد عسى الله يطعمك من خيره ويكفيك شره ويجعله معين لك على طاعته ،،

ثانيا وراك ماعلمتنا وش نوع الجيب ومواصفاته ؟؟!!!

ثالثا بقولك رأيي الشخصي وإن شاء الله تبي تدعيلي ،، وأكيد بيطلع من يخالفني لكن كلن له راي !!

السيارة مرت على تجارب وتمرين قبل تجيك فكن مطمئناً !!
حاول إنك ماتزر الموتر يعني إنبير الضغط لايتعدى 3 لمدة أسبوعين على الأقل ،،
السرعة مالها دخل يعني ممكن تمشي 140 من أول يوم إذا الأنبير ماتعدى 3 !!
تشغيل المكيف طبيعي جدا وماله أي تأثير سلبي فخذ راحتك ولا يهمك أحد ،،
لابد من تشغيل الدبل ( الخفيف والثقيل ) علشان يتمرن أكثر وما يلك ( يدقر أو يعاند ) معك بعدين وخاصة التويوتا ،،
ادخل البر بشكل طبيعي جدا واستمتع بس زي ماقلت لك لاتزر الموتر !!

أتمنى إني قدمت المفيد والله يوفقك ويبارك لك فيما رزقك وتقبل مروري يالغالي ...
بيق مان
03/04/2009, 10:03 AM
خلك طبيعي :cool:
وانتبه من الجور الله يجيرك
وجرب كل شيء في السيارة خلال فترة التمرين
وألف مبرووك :)
ابو ساره 999
03/04/2009, 10:30 AM
صباح الخير اخوي كاتب الموضوع الاخ عاشق السيل جاب المفيد تقبل مرور اخوك
قطب 999
03/04/2009, 01:55 PM
أولا ألف مبروك الموتر الجديد عسى الله يطعمك من خيره ويكفيك شره ويجعله معين لك على طاعته ،،


السيارة مرت على تجارب وتمرين قبل تجيك فكن مطمئناً !!
...

مالك لوا السياره بعد ما تصنع لا تمرين ولا شي بس تشييك على السريع والسياره شغاله
صوت مكينه وخلافه حتى ان العداد اذا استلمت السياره ما فيه الا 2-3 كم عشان التحميل والتنزيل في الباخره
ويقال ان كل وكيل يشيك على سياراته يسمى PD
الأسمري 2009
03/04/2009, 02:14 PM
الف مبروك السياره واهم شي السياقه لمسافة 1000 كيلو وشيك في الوكاله ولا تستهون بالصيانه الدوريه
قناص خلاوي
03/04/2009, 02:19 PM
امش بالموتر عادي مع الرفق ولا تزر الموتر
المكيف مانتب محتاجة مع هالجو والامطار اللهم لك الحمد
لا تسرع بالموتر على الاقل اول 1000 كيلو
واهم شي لا تسحب موتر ثاني لين يتمرن موترك
مقلع الرمث
03/04/2009, 02:24 PM
والله انا عن نفسي شريت جديد واول مااطلعها اشغل المكيف وعادي لكن السرعه الزايده ماتصلح مثلا كحد اقصى 140 وعاشق السيل كفى ووفى
قرم العيال
03/04/2009, 02:29 PM
التمرين عطه احد الشباب

يمشيه لك الـ 1000 بيوم
الربذي
03/04/2009, 02:34 PM
وانا اقول الله يطعمك خيره ويكفيك شره
بس لو خليتها تصدي افضل ........
وخصوصا تويوتا هي سبب رفع اسعار السيارات لدينا لانها غاليه مره وتبعتها بقيه الشركات لدينا هنا بالسعودية قصدي .........
مطعوس
03/04/2009, 02:34 PM
ماشاء الله مبروكـ وانا انصحك بانك لات سرع كثير 100 على الكثير والله يعطيك خيره ويصرف عنك شره
ta3b
03/04/2009, 02:36 PM
والله انا شريت سيارة عام 2005 من الوكاله في القريات مسكت خط الرياض الى طريف وانا امشي 140 وبعدها طال عمرك الين وصلت الرياض وانا امشي طبلون السيارة وعادي جدا بالعكس الحين كل ما بغيت اقاوم احد والا شيء تعطيك مع العلم ان السيارة كامري والقير تماتيك
عاشق السيل
03/04/2009, 05:46 PM
مالك لوا السياره بعد ما تصنع لا تمرين ولا شي بس تشييك على السريع والسياره شغاله
صوت مكينه وخلافه حتى ان العداد اذا استلمت السياره ما فيه الا 2-3 كم عشان التحميل والتنزيل في الباخره
ويقال ان كل وكيل يشيك على سياراته يسمى PD


عزيزي ... التمرين مهب بمسك الخطوط والمسافات الطويلة !!

التمرين يكون في تجربة المكينة لأوقات طويلة وبسرعات متفاوتة ( سرعة المكينة والسيارة واقفة ) وبأحدث أجهزة لدى المصنع ،، والقير يكون خاض التجارب قبل يركب على السيارة ،،

وإلا على أي أساس يعطونك ضمان !!!!

تحياتي العطرة لك أخي الغالي ....
قطب 999
03/04/2009, 06:13 PM
عزيزي ... التمرين مهب بمسك الخطوط والمسافات الطويلة !!

التمرين يكون في تجربة المكينة لأوقات طويلة وبسرعات متفاوتة ( سرعة المكينة والسيارة واقفة ) وبأحدث أجهزة لدى المصنع ،، والقير يكون خاض التجارب قبل يركب على السيارة ،،

وإلا على أي أساس يعطونك ضمان !!!!

تحياتي العطرة لك أخي الغالي ....

بارك الله فيك التمارين والتجارب والاختبارات اللى عليها الكلام للنسخ الاولى من الموديل الجديد حتى يتم تعديل الاخطاء اذا وجدت واختبار الجوده فقط
بعد ذللك يتم التصنيع بشكل تجاري
متفائل.1411
03/04/2009, 06:25 PM
مبروك الموتر الجديد عسى الله يطعمك من خيره ويكفيك شره ويجعله معونة لك على الطاعه
المميـز
03/04/2009, 06:53 PM
ماشاء الله تبارك الله

الله يعطيك خيره ويكفيك شره

اذا كانت السياره من تويوتا

تبي تلقا بالكاتلوووج حق الووووكااله مكتوووب نصاااائح

(( كيف تقود السياره في أول 1000 كيلو متر ))

ومن اهم النصائح

لا تتعدى سرعة 100

لا تزر على السياره يعني خلك هااااااادي مررررررره

ولاحق ان شاء الله على النفووود والجلد :)

لاتستعجل



ومبروووووووك المووووووووتر
ابو عنقا
03/04/2009, 08:58 PM
طيب يا اخوان الزيت متى اغيره اذا السيارة جديدة
الهوى جنوبي
03/04/2009, 09:15 PM
مبروك عليك السياره والله يعطيك خيرها ويكفيك شرها
بالنسبه للتمرين ما عليك متع نفسك بالسياره ولا يردك شيء
اما بالنسبه للزيت فغيره عند صيانة 1000كم وبعدين غيره حسب ما هو مكتوب في كتالوج السياره
ومره ثانيه مركب العافيه
فكسه
03/04/2009, 09:15 PM
المرين مهم جدا وانا اختلف مع الشباب ليه يقولك المصنع مرن تدري ان الزيت خفيف احمر بعد الاف يغيرونه لك والتمرين على سرعات قليله 80كم لماذ لا البساتم جديده والقمصان ايضا والعود ماخذ على السبيكه والسبيكه ماخذه على العود يعني المكينه اجزاء (عمود وبستم وقميص وسبايك شنابر)واول مره تدور المكينه الاجزاء ماخذت على بعض فالافضل تهدي لعب وتتلتزم بالتعليمات لانهم هم لي صنعو مهو حنا طبعا هذي وجه نظر ومنكم نسمع وتقبل مروري والله يعطيك خيره ويكفيك شره وناصية مباركه والسلام عليكم فوكس
حان الرحيل
03/04/2009, 09:18 PM
يا خوي..وفقك الله..وتستاهله..وهو ممرن جاهز..لكن الطعوس والمكيف..خلها شوي
سليمان911
03/04/2009, 09:46 PM
المكينه ماتركب الموتر الا واهي مشغله 24 ساعه على ماضن اختباار

والتمرين طال عمرك على الفرامل والمساعدات

وان كانت المعلومه خطاء صححو لي
معليش كتبت الرد على عجل
الرسيفر
03/04/2009, 10:00 PM
أشكر الجميع على التفاعل والردود وإن كانت متباينة بس ولو كل أدلى بدلوة وما قصرتو جميعا

ولاهب قصور برأي أحد بس الظاهر إني بتبع الرأي اللي يقول مرن السيارة على قولة المثل
( ينلقحت وإلا ما ضره الجمل )

أشكركم جميعا
mohd26
03/04/2009, 10:17 PM
تدري ليش التمرين لسبب بسيط ويمكن جدا تافه
قصدي من الاسباب اللي تدعوك انك تمرن السيارة
شفت عمود الشفت افرض ان الحبيب المكانيكي نسى يشد الصاموله ايش يصير في السيارة
اتطير في الهوا
او قبل لاتستلم السيارة الوكالة غيرت احدى التواير لسبب ما واخونا الهندي شد صامولتين ونسى الباقي
لانه جاته مكالمه من كيرلا
لا حد يقول ما يصير ثراه يصير ولا حد يقول السيارة مشيك عليها ومفحوصة ومضمونه
انا اقول لكم يصير لان الكمال لله عزوجل والخطأ وارد
المهم اقرأ كتيب السيارة والتمرين ضروري ولا تزيد على 100 وحط بالك لسماع اي صوت
في السيارة سواء واقفه او تسير
والله يوفقك والجميع والف مبروووووك
ابو مكازي2002
11/04/2009, 03:30 PM
انا اقولك بس الف مبروك ويعطيك من خيرها ويكفيك شرها
وبنسبه لتمرين ماعندي خلفيه لاني ما قد فكيت وكاله هههههههه
تحياتي
Nasser-ahah
11/04/2009, 05:46 PM
أولا مبروك الموتر الله يعطيك خيرها ويكفيك شرها
هذي التعليمات لأول 1000 كيلو على الطرق السريعة
1-لا تتعدى سرعة 100 كيلو متر
2-لا تشغل المكيف
3- لا تزر على الماكينة إذا جيت تتسارع تسارع ببطئ إضغط على ربع الدعسه ولا تزود عليها
4-لا يتعدى ضغط الماكينة عن 3 ولا ينقص على 1 على طول عشق
5-لا تعشق على أي نمرة ونت مامشيت لا تخلي الماكينة تطلع صوت يعني تمشي 40 ونت معشق بالثالث همن تضغط بنزين
6-لا جيت توقف لا تضغط أبو الفرامل لا شوي شوي
7-لاتمشي على سرعة وتطول
بالنسبة للتطعيس والدفع الرباعي
أولا ونصيحة لا تطب النفود إلا ونت منسم الكفرات لأنك رح تتعب الماكينة
إذا أنت راعي تسيف وتطعيس نسم على من 17 إلى 10
أما تمشية خلها 20 لكن نصيحة 15 أفضل شيء

لا جيت تعشق الدبل وقف وفضي همن إشبك وإمش عليه
وإشبكه على الثقيل وإمش عليه لا تزر على الماكينة

والسلام عليكم
Nasser-ahah
11/04/2009, 05:53 PM
نصيحة بعد إقرا كتاب دليل تعليم المستخدم أفضل لك وسوي إلي يقولك بالحرف الواحد
وبعد أول ألف كيلو رح للوكالة خلهم يشيكون عليها

وبعدين فيه بالكاتلوج معلومات عن زيت السيارة يعيني نوعيته مثلا فيه مكتوب 10w30
أو 20w40
اللي متكوب عندك في الكتالوج سويه وماعليك من كلام أبو يمن لا جيت تغير الزيت في المدى البعيد ونصيحة لا تستخم زيت كاسترول Gtx إذا كانت سيارتك أمريكية لأن بعض الشباب أعرفهم خربت عندهم الماكينة
الرسيفر
14/04/2009, 02:38 PM
مرة ثانية أشكركم
بس اللي محيرني العالم يقولون غير الزيت بعد 1000 كم لأن الزيت خفيف
والوكالة يقولون بعد 5000كم

والله ما ندري من ناخذ براية

وأنا الظاهر بغير الزيت على قولة الرجال : ينلقحت وإلا ما ضره الجمل

وإن شاء الله ما هنا خساير كله 80 ريال