فكرة جديدة ومميزات فريدة لجميع السيارات القديمة والجديدة

[لاتكب البيالة]

بسم الله الرحمن الرحيم

حياكم الله جميعا

فكرة كانت براسي من زمن بعيد طبعا الفكرة هذي ماحصل لي اطبقة لانه تحتاج معدات وبعض الخبرة ولكني ابطرحة لكم ممكن احد يستفيد منه خاصة راعين الترهيم ومن الشي الطيب ان اللي عنده فكرة ولا يقدر يطبقة يطرحة لغيرة ليستفيد منه وانا ما اهتم ان الفكرة تنسب لي ولا لا اكثر من اهتمامي بان احد يستفيد منها ويدعي لي وممكن تعطوننا رايكم به

طبعا الفكرة بشرح بسيط هي
اني اركب بالسيارة محرك ثاني طبعا محرك صغير 1 سرندل اقرب ماله محرك مواطير الكهرباء
ثم احول على هالمحرك الجديد جميع الاحمال اللي على المحرك الاساسي وهي
1- اركب عليه كمبرسور المكيف
2- مولد الكهرباء (الدينمو)
3- ممكن المروحة اذا كانت على السير(والافضل اني احوله الى كهربائية لاني ما اقدر اغير مكانه وايضا لسبب بذكره لاحقا)

طبعا كل الدعوة نركب هالمحرك الصغير ونركب عليه الكمبرسور والمولد ونربطهن بسير ونسوي له لوحة تحكم وهذي سهلة ونخليه بالكبوت وممكن بعض السيارات مايتوفر له مان يركبه باي محل

نجي للزبدة وهي فوايد الفكرة
(بعض الفوايد مهمة وبعضه ثانوية وانا بذكر اللي يخطر ببالي)
1- الاهم اني احصل على قدرة للسيارة اقوى لانه ماعنده حمل الا الكفرات
2- احصل كفائة توليد وكفائة تكييف احسن لان المحرك الصغير يكون مستقرة سرعته
3- مثلا انا واقف احتري احد وابي المكيف اذا ما احتاج اشغل المحرك الكبير
4- قضية انه تفضى البطارية غير وارد لاننا ممكن نخلي المولد يشحن البطارية ولو كانت السيارة طافية
5- ممكن نركب حساس ببرودة السيارة واذا احترت تشتغل المكينة الصغيرة وتتكيف السيارة
6- اذا جاء الشتاء مانقول حم السيارة ولا تحمية لاننا نقدر نركب مسخن للزيت (هيتر مثل الموجود بالمولدات الكبيرة) يحفظ الزيت عند درجة حرارة معينة
7- السيارة اذا صارت محتمية ممكن تبرد نفسة لو كانت طافية
8- مثلا اذا كنت مطفي المكيف ولا فيه احمال كهربية تذكر المكينة تطفى تلقائيا
بمعنى اخر اي شي يعتمد على الكهرب او المكيف تقدر تخليه يتغل عن طريق الثرمستات او الحساسات ولو منتب عند السيارة

طبعا الفوائد كثيرة واتوقع يجي احد يقول المحرك له صوت طبعا المحرك نقدر نشبكة مع دبة السيارة ولا يطلع له صوت (وهذا ممكن يفيدنا به المكانيكيين)
احد يقول صرفية البنزين تتأثر اقول اتوقع نفس الصرفية وممكن تفكرون به ولو زادت شوي مافيه مشكلة مقابل هالمميزات

طبعا الكلام كثير وممكن تزيدون على الفكرة وممكن تبينون العذاريب وكل يدلي بدلوه لنستفيد جميعا

(رجاء خاص لا احد يتهجم على الفكرة ويقلل من شأنها الا بدليل وكلام علمي اما يجي احد يقول لو الفكرة تنفع كان سووه اليابان بقوله من الحين حنا ابخص من اليابان باللي نحتاج)

لا اسمح احد ينقل الفكرة الا بنسبها الى صاحبها

[عآشق الحره]

اقسم بالله فكره تحتاج الدراسه ومبتكره ويبغالها يعني شركه راعيه او شباب الترهيم
(قبل يوم جابو فلسطيني حول سيارته البنزين الى كهرباء بسبب ازمة الوقود) تقبل مروري

[أبوسليم]

أول الإختراعات والإبتكارات كانت خيال علمي


اشكر لك خيالك الواسع وحرصك على نفع الآخرين

وربما تكون في وقت لاحق صاحب ابتكار عالمي مدهش (أقول جاد غير مازح)


لك تحياتي

[الضرغام11]

ماشاء الله تبارك الله فكره رائعه .. وان شاء الله تطبق بطريقة صحيحه..مشكور وما قصرت..

[صالح الحارثي]

السلام عليكم...

الفكرة زينة بس تحتاج شركة تسويها أو ناس فنيين في هذا المجال وأكيد مكلفة كثير..

تقبل تحياتي

[السارحي]

ما شاء الله فكره طيبه واتمنى احد يطبقها

[الدبل الثقيل]

فكرة حلوة الله يوفقك ...

[لاتكب البيالة]

اقسم بالله فكره تحتاج الدراسه ومبتكره ويبغالها يعني شركه راعيه او شباب الترهيم
(قبل يوم جابو فلسطيني حول سيارته البنزين الى كهرباء بسبب ازمة الوقود) تقبل مروري
حياك الله اخوي

الحاجة ام الاختراع يعني المحتاج لا تستغرب ان اخترع شي يسد حاجته مثل الفلسطيني اللي ذكرت
وصراحة انت ذكرت ان الفكرة يبغالة شركة او شباب الترهيم اوافقك بالثانية واخالفك بالاولى لان الشركة لو تطبق هالكلام بكم بيكون سعرة وانت عارف ان اكثر الشركات منتالي همهم شفط جيوب الناس

[لاتكب البيالة]

أول الإختراعات والإبتكارات كانت خيال علمي


اشكر لك خيالك الواسع وحرصك على نفع الآخرين

وربما تكون في وقت لاحق صاحب ابتكار عالمي مدهش (أقول جاد غير مازح)


لك تحياتي
حياك الله اخوي ابوسليم
اخوي اللي طرحته فكرة وليس اختراع جديد وقابل للتطبيق 100%

وهناك الكثير من الافكار وان شاء الله نطلع بشي مفيد

[سدير1400]

مشكور

تحياتي لك

[لاتكب البيالة]

ماشاء الله تبارك الله فكره رائعه .. وان شاء الله تطبق بطريقة صحيحه..مشكور وما قصرت..
حياك الله واشكر مرورك

السلام عليكم...

الفكرة زينة بس تحتاج شركة تسويها أو ناس فنيين في هذا المجال وأكيد مكلفة كثير..

تقبل تحياتي

طبعا الفكرة سهلة وممكن اي واحد عنده خبرة بسيطة يطبقه
ومن ناحية مكلفة مهوب كثير ممكن اقدر تكاليفة ب 1500ريال او اقل اذا سواه واحد بنفسه

ما شاء الله فكره طيبه واتمنى احد يطبقها

حياك الله ومروك اطيب واتمنى يستفاد منها


مشكور

تحياتي لك

حياك الله


فكرة حلوة الله يوفقك ...

وياك

[مكشاتي كوكتيل]

ممكن تنفيذها ليش لا؟

طيب دور لك مركز صيانة سيارات فيه مهندس وميكانيكي وكهربائي ممتازين وابدأ بتطبيق الفكرة على سيارتك وعطنا النتائج.

[mafsf64]

الله يوفقك ...... بس اه واه وبعد اه وهم اه لوني اعرف للمكانيكا...
اقول بلنسبه للفقره الثالثة
3- مثلا انا واقف احتري احد وابي المكيف اذا ما احتاج اشغل المحرك
ليتك تقول التبريد عن طريق الغاز( غاز الطبخ ) لعل الشباب عندهم فكره عناها انا بصراحة شفتها في سيارة في تايلند واستغربت اللي هي دبة الغاز في الشنطة وفيها اسلاك وليات صار عندي فضول وجيت عند راعي التاكسي وسالته ( وشيله هاذي قال للمكيف للمكيف!!! وشلون قال اركب طبعاً الموتر موشغال وداخلي السيارة ثلج من دون مبالغة ودك تجيب بطانية ام كروهات وتنام فيها )

وبلتوفيق والسداد ياشباب

[لاتكب البيالة]

ممكن تنفيذها ليش لا؟

طيب دور لك مركز صيانة سيارات فيه مهندس وميكانيكي وكهربائي ممتازين وابدأ بتطبيق الفكرة على سيارتك وعطنا النتائج.
ان شاء الله

[لاتكب البيالة]

الله يوفقك ...... بس اه واه وبعد اه وهم اه لوني اعرف للمكانيكا...
اقول بلنسبه للفقره الثالثة
3- مثلا انا واقف احتري احد وابي المكيف اذا ما احتاج اشغل المحرك
ليتك تقول التبريد عن طريق الغاز( غاز الطبخ ) لعل الشباب عندهم فكره عناها انا بصراحة شفتها في سيارة في تايلند واستغربت اللي هي دبة الغاز في الشنطة وفيها اسلاك وليات صار عندي فضول وجيت عند راعي التاكسي وسالته ( وشيله هاذي قال للمكيف للمكيف!!! وشلون قال اركب طبعاً الموتر موشغال وداخلي السيارة ثلج من دون مبالغة ودك تجيب بطانية ام كروهات وتنام فيها )

وبلتوفيق والسداد ياشباب

حياك الله يالحبيب

والله ما عندي فكرة عن التبريد بالغاز وانا اسمع فيه ثلاجات وبالغاز بعد لكن ما عندي اي فكرة عنه
لكن انا اتوقع ان الفريون ارخص لان البنزين عندنا رخيص اما الدول الثانية البنزين عندهم نار لذا يستخدمون الغاز احسن حتى انه فيه سيارات بكبره تشتغل على الغاز

[فكسه]

اولا ابي طلب من الاعضاء الاوهو يقلو ماشاء الله عليه تبارك الله الله يخليه لعين ترجيه ثانيايالاتكب البايله ليه ماطبقه انت ماتبي شي ارخص ددسن وشوي شو سويها لعل الله يفتحلك بها نصيبين مادي كر وكل كلامي وجه نظر وننتظر اكثر

[Abu Saad]

فكرة رائعة جدا واشد عليك بتطبيقها على الاقل المحاولة ..
وانصحك بالورش القائمين عليها سعوديين وخصوصا حقين المرهمات ..بتعرف لهم ويعرفون لك.
هل تعلم يا اخي العزيز ان شركات السيارات الان تتجه الى المحركات الهجينه!
يعني يكون في السيارة محركين واحد وقوداحتراقي والثاني كهربائي .
بحيث يدعم كل منهما الاخر .
وبالتوفيق.

[لاتكب البيالة]

اولا ابي طلب من الاعضاء الاوهو يقلو ماشاء الله عليه تبارك الله الله يخليه لعين ترجيه ثانيايالاتكب البايله ليه ماطبقه انت ماتبي شي ارخص ددسن وشوي شو سويها لعل الله يفتحلك بها نصيبين مادي كر وكل كلامي وجه نظر وننتظر اكثر
اخوي فكسه حياك الله
انا كنت ابطبق الفكرة وزي ماقلت بأول الموضوع ان الفكرة براسي من وقت لكن بما اني ما عندي امكانية مادية ولا عندي متسع من الوقت ولا عندي معدات المطوبة ولا عندي الخبرة الكافية قلت اطرح ممكن احد يستفيد منه وان شاء الله اني ابسوية طال الزمان اوقصر لكن ليش نحبس الفكرة لين اطبقه خل الناس تستفيد

واشكر مرورك وتعليقك:good:

[لاتكب البيالة]

فكرة رائعة جدا واشد عليك بتطبيقها على الاقل المحاولة ..
وانصحك بالورش القائمين عليها سعوديين وخصوصا حقين المرهمات ..بتعرف لهم ويعرفون لك.
هل تعلم يا اخي العزيز ان شركات السيارات الان تتجه الى المحركات الهجينه!
يعني يكون في السيارة محركين واحد وقوداحتراقي والثاني كهربائي .
بحيث يدعم كل منهما الاخر .
وبالتوفيق.
حياك الله اخوي ابوسعد
طبعا العائق بتطبيقه ذكرته بالرد اللي قبل
نجي للسيارات الهجينة اوافقك الكلام الان التوجه الى السيارات البتروكهربية (على الكهرب والبترول) وممكن اقولك شي غريب شوي ان محرك الكهرب ببعض السيارات يتحول الى مولد في حال مثلا التخفيف من السرعة اذا اقبلت على الاشارة او في النزلات وطبع التصاميم معقدة وانا مهتم بهالامور ومتابع لها وعندك بعد السيارات اللي يركب به خلية لانتاج الهدروجين وخلطه مع الوقود المواضيع هذي ذات شجون وممتعة والافكار مثل هاذي كثيرة جدا
وتقبل تقديري

[rfhhmad0029]

والله فكرة رائعه افكارك جهنميه ياليت احد يقدر يطبقها ونستفيد واقول لك الا الأمام

[لاتكب البيالة]

والله فكرة رائعه افكارك جهنميه ياليت احد يقدر يطبقها ونستفيد واقول لك الا الأمام
حياك الله اخوي واشكر مرورك

[wrs3975]

الفكرة جميلة ورائعة بس هل تتوقع إن محرك صغير بقدرة 1 سلندر قادر على تشغيل هذه الأشياء كلها مثل مكيف السيارة والمروحة والدينمو لشحن البطارية ودورة التبريد وغير ذلك .... تمنياتي لك بالتوفيق

[لاتكب البيالة]

الفكرة جميلة ورائعة بس هل تتوقع إن محرك صغير بقدرة 1 سلندر قادر على تشغيل هذه الأشياء كلها مثل مكيف السيارة والمروحة والدينمو لشحن البطارية ودورة التبريد وغير ذلك .... تمنياتي لك بالتوفيق
حياك الله يالغالي

طبعا المحركات تجي قدرات مختلفة حصان حصانين 5 حصان
وطبعا لو تشوف المحرك اللي بمولدات الكهرب تلقاه احياننا يدور مولد تيار متردد ممكن 1 كيلو وات واحياننا 2 كيلو وات وهذا يكفي والاحمال كله فريون المكيف والمولد

واشكرك على ملاحظتك وهي بمكانه ولازم نعرف القدرة اللي تطلبه الاحمال قبل نختار المحرك

[حيدر الو]

فكرة رائعة ولكن احس ان التنفيذ يبغاله خبير

[لاتكب البيالة]

فكرة رائعة ولكن احس ان التنفيذ يبغاله خبير
حياك الله يالغالي
كل الدعوة تبي واحد عنده معرفة بسيطة والاهم عنده عدة ولا يحتاج خبرا ولا شي حنا مهوب صانعين سيارة
(ان عرفت كيفية عمل الشيء فأنت تستطيع صيانة 70% من اعطاله):D

[مكشات الجنوب]

فكرة ممتازة وتحتاج الى دعم واطرح الفكرة على وكيل حصري بعد ما تأخذ منه الضمانات على عدم سرقة الفكرة

[saudi_saudi]

أخوي لاتكب البياله فكره جميله والله يحفظك ويكفينا انك تفكر ماتنتظر غيرك يفكر عنك وأتمنى لك التوفيق والاستمرار، ولا تردك العوائق أو كلام البعض وأنت فخر للجميع ومكسب للموقع

[لاتكب البيالة]

فكرة ممتازة وتحتاج الى دعم واطرح الفكرة على وكيل حصري بعد ما تأخذ منه الضمانات على عدم سرقة الفكرة
حياك الله اخوي مكشات الجنوب
اخوي الغالي مجرد التفكير اني اطرح الفكرة على تجار بالبلد هذا مستحيل لان التاجر على اسمه همه كم يكسب من ظهور الناس
ومن ناحية الفكرة تسرق ولا شي ما اسمية سرقة وخل الناس تستفيد

وبقولك كلام بين قوسين ترى لو تخترع شي برائة الاختراع يبيله سنين عشان تطلع ولازم تدفع لهم كل سنة رسوم بمعنى اخر تخترع وتخسر:D:D وهذي اعتبره فكرة وليس اختراع

[لاتكب البيالة]

أخوي لاتكب البياله فكره جميله والله يحفظك ويكفينا انك تفكر ماتنتظر غيرك يفكر عنك وأتمنى لك التوفيق والاستمرار، ولا تردك العوائق أو كلام البعض وأنت فخر للجميع ومكسب للموقع
اخوي سعودي اشكرك على الثناء لكن مثل كلامك يخلي راسي يكبر وخطر ينفجر وتضيع الافكار:j

فيه مثل يقولك رجع السهم 10 سم ينطلق 100 متر واعتبر اي واحد يقلل من فكرك بلا دليل مجرد التثبيط هذولا هم الترجيعة لكن ماشاء الله رجال مكشات ما شفنا منهم الا خير واعتقد لو اطرح الفكرة بمنتدى ثاني كان انواع التثبيط <<< وفيه تجارب سابقة

[my own]

اولا احييك على الفكرة ,,
ثانيا لو ما عندك القدرة على تنفيذ الفكرة تقدر تعرض الفكرة على كلية الهندسة او على احد الطلاب في هندسة الميكانيكا ويكون المشروع للتخرج بدون ما تضييع حقوقك الفكرية,,
سارع بحفض حقوقك الفكرية ولا تتاخر ودامك طرحت الفكرة في النت لا تستغرب بكرة فيه ناس تنسب الفكرة لانفسهم ,,

[لاتكب البيالة]

اولا احييك على الفكرة ,,
ثانيا لو ما عندك القدرة على تنفيذ الفكرة تقدر تعرض الفكرة على كلية الهندسة او على احد الطلاب في هندسة الميكانيكا ويكون المشروع للتخرج بدون ما تضييع حقوقك الفكرية,,
سارع بحفض حقوقك الفكرية ولا تتاخر ودامك طرحت الفكرة في النت لا تستغرب بكرة فيه ناس تنسب الفكرة لانفسهم ,,
حياك الله يالغالي
بالنسبة اني اطرحه على احد ابد وشوله اتعب نفسي انا طرحته هنا واللي يبينا يجينا
اا قولك حقوقك الفكرية يا رجال اي حقوق خل الناس تشتغل وتستفيد ولا زلت اقول هذي فكرة وليس اختراع واصلا لو فيه حقوق ابحفظة كان قعدت اراكض سنين

وكلامك اني اطرح الفكرة على طلاب الميكانيكا اباخذه بالحسبان واصلا انا ادرس بالكلية وفيها قسم ميكانيكا اغدين امر اشوف رايهم واخذ راي المدرسين بكبرهم(اغديهم يعطوننا وجه:j)
اشكرك اخوي على تعليقك المفيد وعساك دوم سعيد

[بواردي الدلم]

هل نسيت قضيه الضجيج من صوت المحرك الصغير

اخي الفاضل لا تكب البياله فاصل ونواصل لي عوده غدا إن شاء الله

[طال ليلي]

مشكور
............

[لاتكب البيالة]

هل نسيت قضيه الضجيج من صوت المحرك الصغير

اخي الفاضل لا تكب البياله فاصل ونواصل لي عوده غدا إن شاء الله
حاك الله اخوي بوادي الدلم

مهوب معقول لقينا لمحرك السيارة حل مع ضجيجه ولا نقدر نلقى للمحرك الصغير
صراحة هذي ما عندي له معلومات لكن اتوقع نقدر نشبك المحرك مع الدبة او نركب له دبة لحاله

وحياك الله وننتظر عودتك

[ذيب النجيل]

السلام عليكم ورحمة الله

اخوي اختراعك ممتاز 100% وبالنسبة لمخترعي اليابان حنا مثلهم ويمكن احسن منهم ولنا عقول مثل مالهم عقول

وبالنسبة للاختراع عندي تعديل واتمنى اني اوفق فيه وهو انك تبدل فكرة تركيب(( محرك ثاني)) بتركيب

((دينمو ثاني)) يعمل على بطارية اضافية في السياره ويمكن شحن البطارية الاضافية بتركيب دينمو شحن

بطارية على سير يمر على(( الدينمو الثاني )) او تركيب جهاز شحن البطارية المتوفر في الاسواق وفي ساكو

على مااعتقد شفته قبل فتره وتوصيله وهالشغلة يبيلها كهربائي .

وكذا صار مافيه صوت ومافيه غيار زيت ومافيه صرف بنزين لان الدينمو يعمل بالكهرباء فقط

واذا ماحصلت دينمو يعمل بكهرباء البطارية 12 فولت يمكن تركيب دينمو ماء يعمل بكهرباء 220 وتركيب محول

يحول الكهرباء من 12 فولت الى 220 فولت وهذا متوفر وبانواع كثيره بالاسواق

وطريقة تركيب الدينو حق الماء اول شي تفك المضخة الصغيرة الي تركب فيها مواسير الماء وثم تركب بكره

مكانها عشان تركب سير على هذي البكره

ارجو انك تركز في تعديلي وانا جاهز لاي استفسار

وانا الايام هذي افكر كيف اطلع كهرباء من دينمو الماء + محول كهرباء 220+ بطارية +دينمو الخ
واذا نجحت الفكرة راح اعرضها وبالصور كمان .

[داير11]

انا مع رأي انه اجمل الابتكارات تبدأ بخيال واسع

ولكن اعتقد ان الفكره نافعه فقط بالنسبة للتكييف حيث يوجد محركات في تريلات التبريد الكبيرة

او الثلاجات المتحركه ان صح التعبير لكي لا تخرب البضاعه عند اطفار السياره

وتكون الثلاجه شغاله طوال وقوف السياره

شكرا اخوي على حرصك والله يوفقك