قصتي مع الصل الي جبته لبيتي... وكاد يقضي على عائلتي...!!!

[((( الحر)))]

بسم الله الرحمن الرحيم

مقدمـــــــــه
الصل وما ادراك مالصل ... الصل على مايقولون قرصته والقبر لان السم الي يفرغه بالجسم عند اللدغه يتعامل مع الجهاز العصبي فيصيبه بالشلل ويغمى على الملدوغ خلال بضع دقائق...!!!

http://www.mekshat.com/pix/upload/images5/mk1112_alseel1.JPG


القصـــــــــــه .... الجزء الاول...
في احد الايام طلب مني صاحب معرض في مدرسة متوسطه ان احضر له ثعبان في قفص علشان يعرضه بالمعرض من باب الاثارة وشد انتباه الزوار شايفني شقردي على الحاجه:D.... وليت الله فكنا منه ومن معرضه ومن وزواره...!!!

ذهبت الى استراحة حول الديره فيها شباب من الربع وسالتهم عندهم من البضاعة شي ، لانهم يشتهرون بجمعها قصدي الثعابين قالو ان عندنا صل تونا صايدينه من العبله.. والصراحة اني اعرف خطورته واعرف طريقة التعامل معه وسبق ان ذهبت مع هالشباب في كثير من رحلات صيد الثعابين ... المهم جابوا لي البضاعة صل داخل قفص وحطيته بحوض السياره وتوكلت علة الله وسميت وعلى طول للبيت ... والكلام هذا كان قبل نصف الليل وحطيته في مدخل البيت ودخلت انام ... يوم قمت للفجر وانا اروح اصلي ولا انتبهت هو فيه او لا وبعد الصلاة قلت يالود خل امر اشوف البضاعة هو نايم او طول الليل سهران مشتاق للحبايب... يوم طالعت بالقفص :eek: والا والله طلعت عدوك... يديني والخلاء ... والذيب بالقليب ... والصل بالبيت... ياليل ماطولك ... ابن الحرام قايم وضاغط على الشبك لين انفك وطلع... قلت ياولد الله يستر.... وانا اقعد اتلفت حولي اخاف انه تحت رجليني... بسم الله الرحمن الرحيم... وانا اقراء والله مادري وش اقراء بعض ايات من القران... موقف عصيب وعجيب... والله من القراده جبت الموت لبيتي وعيالي ... يالربع والله انها لحظة وموقف لا احسد عليه...
المهم بعد شوي راحت السكره وجت الفكره وش السوات يالولد وانا افكر :rolleyes: قلت اول شي خل اروح لعيالي وانا امشي على هوني واتلفت وكل خطوه اقول ابلقاه المهم وصلت لغرفة عيالي وصحيتهم وعلمتهم وقلت كل واحد يمشي سيده من الغرفه الى الصاله ثم الى باب الشارع وعلى طول لبيت الوالده ...
وبعد كذا خطمت لي فكره :light: قلت خل ارقب حركاته الى الظهر لاني هالحين ابروح للدوام والظهر يكون خير قمت واخذت سطل وعبيته من الرمل وقمت احط عند كل باب بحيث اي شي يزحف داخل او خارج يمر على الرمل واشوف جرته وعند كل الغرف حتى باب الشارع وخليت عيالي عند الوالده ورحت للدوام ويوم رجعت الظهر وانا امر على البيت وصراحة شفت العجب يوم دققت بخطوط الرمل اول ماوصلت باب الشارع لقيت الصل ماشي معه وباب الصاله ايضا ماشي معه وباب آخر غرفة بالبيت ماشي معه وانا اقعد اشوف وشلون حركته هي خروج او دخول.... وصارالصل يوم طلع من القفص بالليل دخل البيت وزبن في آخر غرفه بالبيت وفك الله غرف النوم مادخلها والصبح بعد مارحت للدوام طلع من الغرفه على باب الصاله ثم على باب الشارع... ولا راح لا يمين ولا يسار- مسوي خير الله يسلمه- لانه لو راح كان بانت جرته بالرمل وتبعت جرته واثره بالشارع لانه ترابي طبعاً (( شوارع قريه)) الى ان وصل ارض مسوره ودخل في مجموعة اشجار حولها صراحة لم تسعني الارض من الفرحه:) يوم الله فكنا وسلمنا والله كأني مولود من جديد....!!!

وعقبها حرمت اتعامل مع الخطر لو كان وراه منافع كثيره...!!!

القصه مانتهت لان هالصل ماهوب معديها على خير ... اكمل لكم بالجزء الثاني...!!!

[الضاري]

الحمد لله على السلامة .. أخي الحر

[المسفهل]

الحمد لله على السلامة يا أبو محمد ..
ذكرتني بالمثل الذي يقول شايل حتفه على كتفه ..
عجل علينا بالجزء الثاني فنحن إليه بالأشواق .

[ابو زايد]

أولاً الحمد لله على السلامة

بس والله اني أكره هالأسلوب

تشدنا تشدنا تشدنا وفي الأخير يطلع فيه جزاء ثاني

بس يالله الموقف العصيب المنشود من القصة ذكرته

ولا يسعنا إلا القول
حمداً لله على سلامتك وسلامة أبناءك

يالله عاد اعجل علينا
وش اللي صار
ذبحتوه والا مسكتوه والا أعفيتوا عنه :D

[الاجودي]

الحمد لله على السلامة

اشوى الي فكك الله وعيالك منه

الله يكفينا شرهن

[((( الحر)))]

اخواني .... الضاري........ المسفهل........ابوزايد...!!!

بارك الله فيكم ومشكورين على سرعة التفاعل مع القصه... والصراحة ماكان ودي احطه على جزئين ولا كن الوقت بين السالفتين حوالي ... شهرين ... (( فمكره اخاكم لابطل)) ..... شكل هالمثل ماهوب محله هنا لاكن خلوها تمشي!!!
الجزء الثاني

بعد ماطلع الصل ( المحروس) من بيتي ودخل بالشجر الي حول البيت وجاء قبل المغرب رحت وجبت بنزين وصبيت على هاالشجر وشبيت فيها واغلب الجيران والشباب تجمهروا عندي وش السالفه يابو محمد وعلمتهم بالسالفه قالو الحمد لله على السلامه... ومرني جاري الي بابه في بابي وسالني وش السالفه وقلتله عن سالفة الصل قال عز الله انك خبل يابو محمد:confused: قلت ليش يابوابراهيم قال الصل مايبي الحس والحساس تلقاه هالحين في الشرقيه (( الشرقيه اثل قديم جنب الديره على بعد كيلو من بيتي)).. قلت لعل الله يقلعه ان شاء الله ...!!!
انتشر الخبر بالديره واغلب الجيران كبروا السالفه وكثر الزياده بالقصه وكل يوم اسمع قصص عن هالصل بالديره حتى صار اسطوره... حتى ان اغلب الناس بالديره صابهم قلق وخوف حتى ان بعضهم - واقولها من غير مبالغه - صاروا ينامون بالدور الثاني من الخوف على الرغم ان بين بيتهم وبيتي حول الكيلو والضاهر ان كل الي بالديره صارو يدعون علي... وانا ادعي على راعي المعرض... وسبب قلق الناس وخوفهم لان الصل مايذكر بالديره الناس يتهولون من ام جنيب وش عاد صل... ماطول السالفه...!!!

بعد شهرين من الترقب وحذر الناس وخوفهم جانا الفرج...؟؟؟

ذيك الليله كنت جالس بالبيت وشفت عند اللنبه براعصه - جمع برعصي - قلت خل اروح اجيب الساكتون من عند واحد من الربع مخليها عنده واذبح هالبراعصه الي مذيتنا ... ويوم اخذتها من رفيقي ورجعت للبيت ونزلت من السياره ... ولا الي جاي يمشي مليون من عند بيتنا بندر ولد جيرانا ويوم شافني ويسفط عندي شوي والا يصدمني ... قلت له خير خير وش السالفه يابندر وش فيك وبعد مارد نسمه قال الحق الحق يابو محمد الذيب بالقليب... الصل في بيتنا :eek: :eek: وهي تولع عيوني ... قلت انت وش تقول قال اقولك الصل في بيتنا الحقنا انا طالع ادور احد يذبحه واهلي متوزين بغرفه ... قلت خله والله الي ابأشفي غليلي منه قبل فزعت معك .... وانا اركض معه وندخل البيت قلت وينه قال شفه متمدد في دريشة الصاله وادخل الصاله ويوم شفته والا والله ان هذا صلي الي قبل شهرين بعينه وعلمه وانا احط راس الساكتون فوق راسه وانا اعطيه الرصاصه وينسحل ويطيح بالحوش ويدخل تحت برادة واطلع وارميه ثانيه واسحبه بعصى واطلعه وارض راسه بحصاة كم رضه مخالطهن حقد عليه وفزعة مع جاري... واشيله وادور فيه على الجيران وعلى الربع ..... اشهّدهم واقولهم تراي ذبحت صلي واذا قرص احد تراه من صل ثاني وعسى الله يخارجنا... وتنتشر سالفة ذبحته مثل سالفه ضيعته... ويفكنا الله من شر هالصل الامحق الي لو ماجيناه ماجانا.... ولا ارتحت لين دفنته بعيد عن الديره...

الطريف في هذه القصه
- ان بندر الي طلب فزعتي لان الصل في بيتهم هو ولد جارنا الي مر علي قبل شهرين يوم احرق الشجر وقالي ( انت خبل يابو محمد الصل مايبي الحس والحساس تلقاه هالحين بالشرقيه ) مادرى انه في بيته:D :D

-الصل في دريشة صالة جارنا علشان يجيه براد المكيف الصحراوي الي بالصاله... صاير حساس

- بندر ولد جارنا الي مروعه زياده انه فتح الدريشه وحط يدينه عليها وجلس يطالع للحوش ولا انتبه الا راس الصل عند كوعه لاكن من حظه ان الصل نايم مع براد المكيف والا كان ((علوم ياحميدان))

- السالفه هذا والله العضيم ان فصولها صحيحة وواقعية 100×100

وجعلكم ماتشوفون شر.................. وسلامتكم...!!!

[صقر]

صل في بيتي <==== على وزن غريب في بيتي..

والله شكلك عشت ساعات عصيبة ... لكن سجل عندك واحد ذهين .. بحركة وضع الرمل.. فكرة رائعة وتدل على حكمة وتعقل أثناء معمة الحدث.

.

[المسفهل]

شدنا هالفلم بفصوله ومشاهده بشخصياته وحوادثه ...
ولكن الحمد لله كانت النهاية انتصار الخير على الشر .

[محب البر]

بسم الله الرحمن الرحيم
السلام عليكم ورحمة الله وبركاته

أخي الحر

الحمد لله على السلامة أنت والربع أجمعين

أسلوب مبدع في التعامل الحذر وأفكار خلاقة قادت للقضاء على الصل والتخلص منه

حفظك الله وجنبك كل مكروة

مع تحيات
أبو مروان

[عبدالعزيز الدباسي]

الحمد لله على السلامة يا ابو محمد .

الحقيقة قصة خيييييييييييييييييال رهيييييييييييييبة بكل فصولها ، انشديت معها بكل حواسي ،،،

قلبي يدق بسرعة ،،،، وعيني مصلبه على الشاشة ،،،، وايدي على الماوس متحمسه للنزول سطر بسطر .

اوقات عصيبة ،،،، الله يلوم اللي يلومك ،،،،،،،،،،،،،،،،،،،،،،، صل وبالبيت ،،،،، خطيييييييييير جداً .

الحمد لله اللي ابعد عنكم الشر ،،، وانتهاء المعاناة .

[نفل]

السلام عليكم ورحمة الله وبركاته

بصراحة قصة واقعية مثيرة وشيقة والف والف والف الحمد لله على سلامتك ابو محمد
وانا اقترح انك تعرضها على التلفزيون تصلح حلقة من حلقات طاش ما طاش:D
والحمد لله على السلامة مرة ثانية .

اخوك ابو محمد

[ابو شكاع]

الحمد لله على السلامة يالحر

والله ياخوي اني تحمست مع السالفة وعشت واقعها وكأني معك في هالموقف

الحمد لله على السلامة

والحذر الحذر

هلابك ولاهنت

[شاص&نص]

الأصل كُتب بواسطة محب البر
بسم الله الرحمن الرحيم
السلام عليكم ورحمة الله وبركاته

أخي الحر

الحمد لله على السلامة أنت والربع أجمعين

أسلوب مبدع في التعامل الحذر وأفكار خلاقة قادت للقضاء على الصل والتخلص منه

حفظك الله وجنبك كل مكروة

مع تحيات
أبو مروان

[سنايدي]

ومثل قلت الصل الاسود وقرصته والقبر وانا سمعت ناس كثير يقولون ان سمه اخطر من الكوبرا حمانا الله واياكم منها

[مهند]

عاد صل مررررررررررررة وحدة يابومحمد:confused:

والله يانت تحمست بقوة لذا المعرض

يابن الحلال لو جبت له سحلبه كان يكفي

صل!!!

الحمدلله على سلامتكم يابومحمد

ومره ثانيه
ابعد عن الشر ولاتغني حتى;)

[مهيلان]

الأصل كُتب بواسطة ((( الحر)))
بسم الله الرحمن الرحيم

مقدمـــــــــه
واخذت سطل وعبيته من الرمل وقمت احط عند كل باب بحيث اي شي يزحف داخل او خارج يمر على الرمل واشوف جرته وعند كل الغرف حتى باب الشارع
...!!!

الضاهر انك متعود تقص الارانب واستفدت من طريقتها

الحمدلله على السلامه ( لاعاد تتعودها )

[القناص]

كل معرض وانتم بخير

جت عوافي

فككم الله

ياكافي بك نستكفي

بس حركة الرمل تكتتيكيه استخباراتيه موفقه

الحمدلله على سلامة العيال

[مشغول]

الحمد لله على السلامة اخوي الحر

والله قصة تروع ..

ذكرتني بقصة الشباب لقولهم ثعبان دايخ في البر المهم مسكوه وحطوه في قارورة ويلعبون به

المهم بعد ما رجعوا للرياض دقوا على جامعة الملك سعود قسم (( ؟؟؟)) مدري لكن كلمهم مدير القسم قالهم برسل لكم المسئول عن الثعابين .. بعد ساعة جاء المسئول عن الثعابين ويوم شاف الثعبان طاح مصفر من الخوف تصدقون ... خااااااف ...قال هذا النوع ما يوجد منه في المملكة إلا عدد قليل وش لون لقيتوه .. هذا خطير جدا ... المهم كلموا مدير القسم وقالوله القصة .. والحمد لله بات ذيك الليلة في الجامعة

الله يستر علينا وعليكم

[ابو ايمن]

الحمد لله على السلامة

والله انها قصة روعة ومروعة بعد .

فككم الله منه . ولا تعودها خل أهل المعارض هم يدورون بأنفسهم .

تحياتـــي لك ,

[خشم الحصان]

الاخ الغالي
الحر
اخيي انت صاحي مضن والله او انك متهور او ثقتك في روحك عندك زايده واجد مهوب شوي اعذرني اخيي
بس ماكتبته علي قولك حقيقي ميه بالميه يدل علي انك ماعطية السلامه حقها الكامله مع هالنمونه ولا صل
يعني قرصته وعساك تشهد ان كتبه الله انك تشهد ياخيي هذا صل صل تعرف صل مهوب زاروق او عقرب حركة الريوس صدق ودي اني اقربلك كان اربطك في المروحه سقف وشغلها وحطها علي واحد الله يغربل بليسك احد يرقد في البيت ولا معه عياله وفي البيت صل انت متاكد انك ذبحته لايه يدخل علينا مع هالشاشه اجل هالصوره
الي انت حاطها كنها استك سيكل 26 مقصوص وشو عسي ماهوب هو اقول الله يقاصرنا ويقاصرك يالاحسان الغريبه انك تقول كبيت رمل علشان تعرف وين راح وهذي حركه تدل علي ان فيك تفكير زين بس وشلون ضاع تفكيرك في عملية تسكير عليه انت ما قريت كتاب انوع الثعابين في المملكه شف يامال الخير الصور حقة الصل وش مسوي في الرجلين تقول محموسه علي قز حق عروس اقول الله يغفرلك ولا عاد تعودها واذا بغو ازرق احد المحطات وخذ داب بلستيك .
اخوك
خشم الحصان:mad:

[((( الحر)))]

تحياتي للجميع
صقر
يعجبني مدحك تعقل وحكمة :D وين تعقل وحكمة وانا جايب صل لبيتي...تحياتي
المسفهل
اكيد انتصار الخير على الشر والا كان ماشفتني كاتب الموضوع :D تحياتي
محب البر
نعم افكار خلاقه ... الا ابعد عن الشر لاكن الحمد لله ... تحياتي
شقردي
ابو عبدالله المهم انه اعجبك .. بس اكيد الصوره واسمك عليها هو الي اثرا الموضوع.....تحياتي
ملك الكمره نفل
هين هين يالصلله او يالصلان ...الله يسلمك فكره ممتازه بس من وين نبي نجيب صل للتصوير ومن الي يبي يصور معه...تحياتي

لي عوده للرد على باقي الاعضاء ... تحياتي

[الكنور]

السلام عليكم ورحمة الله وبركاته

الحمد لله على السلامه اخوى شقردى وجت سلامات ونا اخوك ما لقيت إلا تاخذ من ربعك غير هالصل

الأملس اخطر انوع الديبان الله يكفينا شره

ويقال ان الداب ماموره حشا ماموره سنترال :D

تحياتى

[القماري]

طيب حمد الله عالسلامة ولا تعودها مرة ثانية وتمزح مع إلي ما ينذكر ( قصة جميلة وتحذير ممتاز ) ومشكور وماتشوف شر

[((( الحر)))]

ابو شكاع
هلا بك لاهنت الله يسلمك ...!!!

شاص & نص
مشكور على مرورك الكريم

سنايدي
مشكور اخوي وسمه وسم الكوبرا واحد تتعامل مع الجهاز العصبي للملدوغ...!!!

مهند
مشكور يراعي السحلبه قصدي سحبله والمعرض من خبرك دمار لان مافيه صل مثل ماوعد زواره...!!!

مهيلان
ايوالله متعود لاكن فرق بين وبين والحمد لله على كل حال وشكراً لك...!!!

القناص
الله يسلمك يالغالي والله تكتيك قديم ماينفع بهالسنين لاكن ينفع مع الغشيم مثلي... تحياتي الخاصة...!!!

لي عودة للرد على باقي اخواني الاعضاء....؟؟؟

[((( الحر)))]

اخواني
مشغول
بارك الله فيك وقصه رائعة ولاكن ماعلمتنا وش صار نوع هالثعبان الخطير.. تحياتي...!!!

ابو ايمن
بارك الله فيك ومشكور على ردك واهل المعارض الله لايعيدهم...!!!

خشم الحصان
هلا بك يالخشم الطيب كل الاوصاف الي ذكرت تنطبق علي ولاكن اذا فات الفوت ماينفع الصوت اما سالفة المروحة والله معك حق استاهل ... ولاكن سالفة قز العروس والكراعين والله يكفينا شرها لانه اذا سلم العود الحال تعود... تحياتي الخاصه...!!!

الكنور
الله يسلمك يالغالي تراي الحر مانيب شقردي وبعدين لو لقيت عند الربع غيره ماخذته ولاكن فعلا صرت انا مامور سنترال...!!!

القماري
هلا وغلا بالي له القلب يشتاق......ويامرحبا بالي له العين تالي
يشرفني ردك على الموضوع وبارك الله فيك
تحياتي الخاصه جداً...!!!

[laith]

السلام عليكم ورحمة الله وبركاته

الاخ الغالي " ((( الحر))) "....

جفلتنا يالحر ... الله يدفع البلا مالقيت الا هالماخوذ الله يكفينا شره ومن يقراء...

والحمدلله على سلامة العيال .. اما انت ايضا الحمدلله على سلامتك ..:D


هب يالحر... داب وصل بعد ! والله يالقلب اللي ماعرف الخوف ...هب.. ! ! :eek: :eek:

[((( الحر)))]

اخوي ليث الله يسلمك والله يسلم غاليك من كل شر...!!!

مشكور على هالكلمات الرائعة ;) لو الله فكنا من السطر الاخير في ردك احسن لان لازم معه ذكرالله فلا تنسى...... تحياتي...!!!

اخوك..............((( الحر))) .............ابومحمد...!!!

[الكنور]

الكنور
الله يسلمك يالغالي تراي الحر مانيب شقردي وبعدين لو لقيت عند الربع غيره ماخذته ولاكن فعلا صرت انا مامور سنترال...!!!


اخونآ عزيز اخوى الحر ولايهون اخوى شقردى والعتب على النظر ياغالى عجل الله يكفينا العجله

وعسا الله يحفظنا ويحفظك والمسلمين اجمعين من كل شر


تحياتى لك اخى الغالى