الصيــف والتكــييف

[ابو شجاع]

السلام عليكم ورحمة الله وبركاتة:


الى اخوانى اعضاء مكشات


دخل الصيف وجت مشاكل التكييف بالسيارات انا من الناس اللى عانوا من تكييف السيارة لمدة سنة ونصف
طبعا سيارتى باترول ربع ماخليت ولا ورشة بالرياض مامريتها حتى الوكالة رحت لها وكل واحد يعطينى
مشكلة غير الاوله.
وبالصدفة وانا بالدوام نتكلم عن الصيف وتكييف السيارات وشرحت مشكلتى ونصحنى زميلي بورشة او


دكيكين:D لواحد سعودى بالرياض يقولى مايحتاج مرة ويفيدك مريت الرجال وبسماع الصوت ونظرة خاطفة
للكمبروسر عطانى مشكلته وتم اصلاحة ولله الحمد ولهذى الساعه زى الوكالة شغال يعنى جديييييييييد
وانصـح اخوانى بمن يعانى اي مشكلة فى التكييف بالمرور علية ويتدعون لى وترى السعوووودى غير


(الاجنبى) ينصحلك ويبي يكسب زبون:good:
مهوب همه الدررراهم
موقعة فى الرياض

رقم جواله:0564779879
اسم صاحب المحل:ابـــو نــايف

[دله وفنجال]

السلام عليكم...


يعطيك العافيه اخوي ابوشجاع جيت بوقتك...

[VIP-503]

السلام عليكم...


يعطيك العافيه اخوي ابوشجاع جيت بوقتك...

جزاك الله خير

[الوسم]

طيب يا أبو شجاع !!!!

وش رأيك تتكرم علينا وتعلمنا ما ذا كانت المشكلة ؟؟؟

وكيف جت عندك ؟؟

وكيف تم الأصلاح ؟؟

وكم كانت التكاليف من إلى مع القطع وأجور العمل ؟؟

عشان ماندوخ مثل مادخت في اللف على الورش ولا نخليهم يستغلون جهلنا في ها الموضوع ؟

[ابن سليمان .]

متى تلقى السعودي ؟؟

شكرا لك

وبنستفيد منه أكيد

[rpk]

بس يخوي مشكله السعوديين الا من رحم ربي انه اول ما يفتح وش حليه ثم بعد مده يجيك راز خشمه وسعره نااااااااااااار

[العود&& الازرق]

يعطيك العافيه اخوي ومشكورررررررررررر

[ابو شجاع]

عليكم السلام ورحمة الله وبركــاتة

مشكورين على مروركم
عسى الله ينفعبة لكم ولغيركم
واااااسف انى تاخرت بالرد عليكم
لعدم تواجدى.....

[ابو مكازي2002]

ابو شجاع سوال صغير بس
س موترك حق تشغل المكيف لمس ولا فرارات
تحياتي

[خيام الندم]

السلام عليكم ... رحت له وللأسف سعره غالي قال بأصلح لك المكيف وبطلع لك وين مكان التهريب للغاز وبغير ربلات المواصير بسعر 1400 ريال ؟؟ وديورت مع الإشاره ورجعت ......

[حسين2002]

السلام عليكم ... رحت له وللأسف سعره غالي قال بأصلح لك المكيف وبطلع لك وين مكان التهريب للغاز وبغير ربلات المواصير بسعر 1400 ريال ؟؟ وديورت مع الإشاره ورجعت ......
هذي مشكلة الميكانيكي السعودي ..............
يجيك من آخر السلم ..................
يبي يتجر بسرعه ..................

[ابو شجاع]

ياهلا ومرحبا:

اخوى: ابومكازى2002 المكيف الكترونى (لمــس)
اخوى:خيام الندم انا دليتكم للأفادة وبالنسبة للسعر ماأقدر اقول شيء لاانا كهربائي ولاغيرة وهو ابخص:D
اخوى:حـســين2002 لاتعليق:confused:

[rpk]

ما قلت لكم هذا عيب السعودي

[محنك]

السلام عليكم ....... يااخوان يجب علي التنبيه والحذر من مما وقع فيه صديقي من طريقة تعامل
ابونايف ....... مع أحد زبائنه ....... وسأنقل لكم القصه قريبا

[ابو شجاع]

وعليكم السلام ورحمة الله وبركاته



اخوى rpk: كل واحد منا فيه عيبه ارجو توضيح العيب اذا كان يضر او استر على المسلمين......

اخوى محنك: انتظرنا قصتك ولم ترويها لنا...............؟؟؟؟؟

[asd0505]

السلام عليكم خواني انا اتصلت على الرجال وكلمته وقلت له مشكلتي بالتهريب وفصل المكيف مؤقتا واستعد لكشف التهريب واصلاح المكيف والضمان لمدة سنه ...
جينا للمهم ولابراء الذمة قلت له الاخوان يشتكون من سعرك الغالي وانت مواطن والتشجيع واجب لك وامثالك لكن السعر يكون حاجز بينك وبين الزبون وذكرت له مشكلة العضو خيام الندم وذكره انه طلب 1400 ريال لكشف التهريب والجلد مما ذكره .. الحقيقه استغرب ولا عرف وش المشكله قال لا يمكن انا في اخر الصناعية من شرق واجاري غير مكلف واحب اني اكسب زبون وسعري عادي جدا لكن يمكن عند الاخ مشكله اخرى .
المهم قال انا اصلح لك التهريب بـ 300 ريال والتعبئة ما قال قيمتها وهي ليست مشكله معروفه والضمان لمدة سنه وشلون الرجال واثق كثير وقال انه متعهد باصلاح سيارات الدوريات ويعطيهم سنه ضمان وهي على مدار الساعه تشتغل .
للامانه انا نقلت ما قال وامني اني انقله رد على لاخ الكريم .
لكن المية تطلع الغطاس انا ابرسله السياره واعلمكم بالنتيجه ان ضبطت الامور يبشر بالخير والا كل يعد ما واجه .

[ابو شجاع]

السلام عليكم ورحمة الله وبركاتة:

اخوى:asd0505 شكرا على ردك الجميل وتوضيحك لنقطة مهمة انا قد غفلت عنها بقصد وهى اصلاحه لسيارات الحكومة من الامن العام بوجة كامل سواء من الشرطة او المرور او اي سيارة للامن الداخلي
وهو قد اطلعنى على خطاب الامير (محمد بن نايف) لصيانة سيارات الامن العام خطاب رسمى موجه له شخصي بأسمة

وانا ارى ان اسعاره مع الضمان لمدة سنة معقووووووووله جدا خصوصا اذا رجعنا لوكالات السيارات لا نجد
عندهم مدة هذا الضمان والاسعار كذلك

ارجو بمن رد على ان يذكر لى مشكلته مع صاحب الورشة وانا راح اكون الوسيط له من بعد الله لو ادفع له قيمة الاصلاح........
استغرب من ردود البعض الغير مبررة
الرجل ليس بحاجة ان يفتح ورشة خاصة الله منعم علية لاكن (هوايته حب ان يستفيد منها)

وللعلم
ولله ثم ولله لاتربطنى فيه اي علاقة لا من قرابة ولاصداقة ولا منفعه
الموظوع هذا طرحتة للاستفادة
وغير هذا لاتعليق........................................... ........................

[عز الدواسر]

الله يعطيك العافيه

[asd0505]

هلا ابو شجاع والاخوان جميعا ما لكم بالطويلة
انا عندي مشكله في :
http://up.joreyat.org/13May2009/10052009603.jpg (http://www.joreyat.org)

المكيف طبعا
لانه كل 3 اشهر يفضي الغاز يعني تهريب بسيط جدا ووديته كم واحد وللاسف ما عرفوا المشكله كذلك بعد كل فترة وانا ماشي يفصل لمدة 15 دقيه الى 30 وبعدين يرجع يشتغل
والمكيف الخلفي براده لك عليك
المهم اني رحت الى :
http://up.joreyat.org/13May2009/10052009601.jpg (http://www.joreyat.org)

http://up.joreyat.org/13May2009/10052009602.jpg (http://www.joreyat.org)

ابو نايف حسب التوصية والله طلع الرجال ونعم واستقبال طيب وحجاج يضحك وعلمته المشكله وقال تجيني بعد المغرب ويكون خير ان شاء الله
ما لكم بالطويله جيت عنده والمكيف ثلج الامامي والخلفي وقال لاتشره ان جاك زكام من قوة التبريد وفعلا تبريده غير طبيعي .
ابو نايف عمل التالي :
لقلى تنسيم في الاديتر ولحمه بــــــ 20 ريال
تعبئة فريون امريكي اصلي مع وزن الترومستات وكشفية التنسيم 250 ريال
الاجمالي 270 وضمان لمدة سنه
والله يستاهل والله يرزقه وشكرا لك ابو شجاع الي دليتنا عليه وانا انصخ اي واحد يروح له احسن من واحد يتعلم في سيارتك ولا تستفيد شي .

[مكشات 2007]

الله يجزاكم خير على التوضيح والله يرزق المسلمين

[asd0505]

الله يجزاكم خير على التوضيح والله يرزق المسلمين
الله يجزاك خير وشكرا على المرور

[الشمطري]

بارك الله فيك على حرصك على ابناء الوطن

وهذا يدل على طيبك وحبك للخير

تقبل مروري

[faris2006]

اخوي
ابونايف
محله في مخرج 17 الدائر الشرقي

[asd0505]

اخوي
ابونايف
محله في مخرج 17 الدائر الشرقي
نعم مخرج 17 اتجه غرب بعد محطة الدريس فيه محطه ثانية بعدها بشوي

[abc-00-abc]

جزاك الله خير على الموضوع

ممكن وصف للمحل

[تناهيت]

عندي مشكله قديمه مع مكيف موتر عندي كل شي سويته ولا ضبط (الكمبرسر يشبك ويفصل +تهريب )

بنمر ابو نايف عسى ربي يفرجها ويسخر ابو نايف لنا ويكون على فاله في الأسعار

عطونا الوصف بدقه اللي نعرفه مخرج 17 وبس

تحياتي

[sa_f15]

مخرج 17 وجهك غرب تجيك اول محطة الادريسي ونت مع الخدمة خلها
تجيك ثاني محطة خلها بعدها عمارة تجارية جديدة هم بعدها
عمارة قديمة محلات اشرعة هو محلة في الوسط
ونا موتري عندة بشوف النتيجة

[تناهيت]

مخرج 17 وجهك غرب تجيك اول محطة الادريسي ونت مع الخدمة خلها
تجيك ثاني محطة خلها بعدها عمارة تجارية جديدة هم بعدها
عمارة قديمة محلات اشرعة هو محلة في الوسط
ونا موتري عندة بشوف النتيجة
بانتظارك بارك الله فيك اذا كان شغله مضبوط راح يكون ابو نايف أولى من ابو يمن

تحياتي

[sa_f15]

اسف علي التاخير لاكن شغلة تمام ومعقول واحسن من غيرة لاكن وعدني بعد اسبوع
ليكمل تعبئة الفريون يوم الثلاثاء القادم علي حسب كلامة عمل طقم اصلاح كمبرسر وتنضيف الدورة كاملة
750 مع تاعبئة الفريون ( نصف) مدة اسبوع وثم يشيك علي شغلة ويكمل الفريون فل مع الضمان لمدة سنة
واعتقد انة مافك الثلاجات

[faris2006]

اولا ابونايف حضرمي متجنس
الثاني فيه اعضاء تعملوا معه (بذمتهم)وقالوا انه نصاب,انا اتعامل معه من ذو 1409هـ وشغله ممتاز
انا الى خلاني اتعامل مع كهربائي في الصناعية القديمه وصفه لاحد اخوياي ورحت مع خويي كان خويي يشرح له المشكله جاء صاحب مرسدس واقفه عند المحل قال وش صار في السيارة قال ابو نايف خذها ولك ضمان ستة اشهر سئلت صاحب المرسدس عن المشكله قال وديتها للوكاله وقالوا تغير كمبروسر وكمبيوتر مكيف بمبلغ كبير طلعت السيارة وفريت الصناعيه مالقيت احد يصلحها كل الكهربائين يقولوا ودها للوكاله
احد الكهربائين دلني عليه وصلها (اذكر انه قال من مفاتيح المكيف)

ممكن يكون تعامل الاعضاء مع العمل الي العمال الى يشتغلون عنده ولله الحمد ما اثر كلام الاعضاء كل وحد يسئلني ارسله لابونايف ولم اجد احد اشتكاء منه

وعيبه دائما مزحوم