وجه السيارة راح من العج أيش الحل ياشباب فزعتكم

[abdul2005]

السلام عليكم ,,,

الحقيقة كان عندي شغل بالشرقية مشيت الصبح كان طول الخط عجاج ولم رجعت العصر كان عجاج بزيادة.

الاظرار الى شفته علي السريع :confused: قبل ما اكتب موضوعي لـ لاندكرورز 2006

تأثر وجه السياراه وشمعات النور وطارت بوية الزيق الي تحت النور من العج.
طارت بوية الأذرعة والحديد اللي بجانب الأذرعة:eek:
الجنود صار لونهن باهت.

اذا احد من الشباب عندة حل ارجو الا يبخل علينا او محل ينصح اني اود السيارة له.

[خالدطرطوس]

السلام عليكم


عليك بالتلميع الساطع وانا اخوك وترى مايكلف

حدود 70 ريال

وماتشوف باس

[ابو فهد 1]

وعليكم السلام

مرحبا اخوي

والله مااقول الله يخلف والتلميع ماراح يفيد لان راحت اللمعة

وانا صار لي مثلك كنت راجع من الكويت ومعي يوكن 2007 ولا بعد لونة اسود

راح بوية الصدام الامامي والكبوس حقت الضباب واللوحة الامامية انمسحت

مرة صارت بيضاء راح السواد

ودرت كل محلات التلميع الي يقول يرجع وهم نصب بس يبي ياخذ منك فلوس

لانة طارت لمعة الموتر وهي (اللوكر) يعني لازم ترش الصدام

واسفين على الاطالة

[غاوي رومانس]

مالك الا ترش الوجهية من جديد

والله يكون في عونك

لان التلميع في محلات التلميع فقط للسيارات اللي ماجاها عج
وصارت للصبغة طبقة رقيقة من الغبار اللي مايروح مع الغسيل

فلذا ينظفونها بالملمعات


فلذا الله يكون في عونك على الرش من جديد

[ابو حسناء]

السلام عليكم
والله انك صادق والان قل مايجي اسبوع مافيه عج وسافي الله يعزكم
وعندي لك الحل يا عبدول
1-فيه شريط لاصق او يسمونها تجليده شفافه تحط على وجه الموتر من شبك وانوار ولحية السيارة حتى نصف الكبوت
التجليده عبارة عن ماده عازلة شفااااافه ولا تبيـّن ابد تحافظ لك على وجه الموتر من عوامل التعرية و عليها ضمان خمس سنوات لا يتاثر لا بمطر و لا عج واذا حبيت تشيلها تقدر عند نفس المحل وسعرها من 1500 الى 1800 ريال.

2- تلبس وجه السارة برقع برقع ويباع جاهز حسب سيارتك.

3- فيه شي يباع عند الرماية وكارفور اسمه زيرو كراش وانا جربته وهو عبارة عن سائل شفاف في علبة بخ بس اذا رشيته يجف ويثبت على السيارة ويكـّون مادة عازلة تروح بالماء عند اول غسلة.

والشباب ماهم مقصرين اذا فيه حلول ثانية حنا ما نعرفة...

وسلامتكم

[shaheenshah]

بالنسبة للشمعات والانوار يسون لها صنفره ناعمة جدا وتظبط وترجع جديده
اما الباقي ما عندي خلفية
والله يخلف علينا وعليك

[التميمي 111]

حياك الله اخوي

اولا ً .. الحمد لله على السلامه .. والله يعوضكـ خير

شف ياعزيزي .. انا طال عمركـ ومن يقرا موظف في الاحساء وانا من اهل الرياض وكل اسبوع ارجع

اليوم بإذن الله جاي للرياض .. ولكن الاهم (خلنا في موضوعكـ) الي هو اللمعه

مثل ماقلت لكـ الله يعوضكـ خير

الشمعات تتلمع .. لكن الشبكـ الصدام والدعامه < اذا فيه .. بوية الجنوط .. العكوس

ماله لوا الي يقول لكـ تروح بالتلميع

والله اني جربت وخسرت دراهمي بدون اي نتيجه .. قالوا لي مالكـ الا تغير
رشيت الجنوط .. ولمعت الشمعات .. وركبت برقع على السيارهـ

والحمد لله .. ماصرت اعاني من المشكله هذي ..او بالاصح ( قلت المعاناة ) لان الجنوط ماعاد فيها بويه
وصارت مصدّيه


بالرغم من اني كل ما جاء عج .. اهدي السرعه ولا اتعدى 100




وهذا كلام مجررررب .. والى اليوم

المشكله الان عج .. وانا ابمسك الخط بعد العصر .. والله مشكله

لكن الله يخففها ويرحمنا برحمته يارب

اتمنى اني افدتك ولو بالقليل


سلام الله عليكم

[ناصر الدهمشي]

مالك الا حل واحد انك لاتسرع بالعجاج

او انك تستخدم تشحيم ، تغبيره ، صابون ، برقع ، تظليل الخ ..

هذا ينحط بوجه السيارة لكن مرات تطير بوية ( صبغة ) السيارة من الجنب

واحسن شي انك ماتسرع بوقت العجاج وذا كان فيه السافي

[abdul2005]

اشكر جميع الاخوان :

خالدطر طوس
ابو فهد 1
غاوي رومانس
ابو حسناء
shaheenshah
ابوجزا

الحقيقة استفدت كثير من ناصايحكم رحم الله والديكم وقلت مالها داعي اروح لمحلات التلميع , خذ من قاصرة ورش الصدام بوية عند == === وسوف ابلغكم بشغلهم هل هو زين او لا مع انه قال نعطيك ضمان , بالنسبة للجنود وتحتي الموتر هل يصبغ او يلمع ؟

ومشكورين يا شباب بعد تلميع الانوار والكبوس وصبغ الصدام وتصليح الاضرار الثانية سوف ان شالله اكتب موضوع ومفادة .

هل عندما تتعرض لعج لوجة السيارة انك تصلح الاضرار ولا ما فية فايدة بس خسارة جهد ومال ؟ لسيتفيد من قد تواجهة المشكلة في المستقبل.

[alfawzan]

ياخوي مايفيد لا تلميع ولا غيره مع السافي هذا العج يعتبر نوع من انواع الصنفره يعني صنفر وجه موترك والجنوط مالك الا التغيير والله يعينك على الخساير ليش مركبت برقع ولا اقل شي دهنت الوجه بشنبو لا ضللته وضللتالانوار ولا جلدته الوجه بتجليدة الوكاله

على العموم الله يرزقك باحسن منه ويعوضك