صيانة الباترول في الوكالة وش رايكم ؟؟؟

[طخيمان]

مساكم الله بالخير جميعاً

اليوم كنت عند وكالة الحمراني اللي على خريص والحمدلله عايرت زيت القير و ما فيه مشاكل بس طلع فيه تهريب في صوفة الدبل وقالولي الفك و التركيب بــ 700

مهيب هذي المشكلة

عرضوا علي صيانة عندهم بــ 1200تشمل

فك الرمان وتشحيمه
تصفية المكينة من فلتر بنزين وفلتر هواء
تغيير الفحمات
تشحيم اسفل السيارة
تشييك على الصوف
تغيير السيور
تغيير الزيت مع السيفون
تشييك على الهوبات والمقصات والاذرعة والمساعدات
تغيير البواجي
(تشييك كامل على السيارة)

مع العلم ان ال1200 تشمل شغل اليد فقط

وش رايكم يا اخوان أسويها ولا لا ؟؟؟:confused:

وللمعلومية تغيير البواجي فقط بــ 400 لأنه لازم تفك ثلاجة المكينة:(

نسيت اعلمكم وش الموتر :D

الموتر باترول فتك 2004

[shaheenshah]

اذا كنت متأكد انهم راح يغيرون لك الشغلات اللي قلتها توكل على الله وخلهم يسوونها
لانهم يقولون غيرنا وهم ما غيروا (شغل نصب) يعني لازم توقف على راس العامل اللي بيشتغلها ولا راح يخلونك

وعلى فكرة فك القير بكبره ما ياخذ 300 ريال على ايش 700 مهيب اختراع صاروخ

[طخيمان]

اخوي بالنسبة لفك الدبل المشكلة مهيب في فكة

بس الوكالة اضمن ويضمنون لك شغلهم

[shaheenshah]

الضامن الله يا طخيمان

[سفاري نجد]

السلام عليكم ورحمة الله وبركاته جميعاً

أخوي صاحب الموضوع انا اسوي الصيانه اللي قلت عليها صراحه احس تغير بالموتر وخصوصا البواجي فكها مو بالسهل ، ما تحصل برا احد يفكها لك نظيف كل تغييرات البواجي لسيارتي بالوكاله وبعدين شغلهم عليه ضمان ،،،وتوكل على الله

اذا رغبت بالصيانه اطلب من المهندس اي قطعه تتغير بسيارتك يضعها بكرتون وطابقها مع قطع الغيار المصروفه حسب الرقم فيه ورقة صرف قطع قبل ما تحاسب شيك من حقك ،،، أشترط على المهندس في ورقة دخول السياره أن كل القطع القديمه توضع بسيارتك ،،،

تحياتي لك ،،،

من زمان ما دخلت مكشات اخوي طخيمان شفت رسالتك على الخاص ورديت عليك أتمنى توصلك،،، وأي خدمه مستعد

[التعـ King ـديل]

انا مع كلام اخوي سفاري نجد موترك جديد لاتتعبث به واجد

[قاصد الصمان]

هذه الشغلات ما تحتاج وكالة خصوصاً وان هذا السعر للفحص يعني لو احتاج غيار يبي يضربونك بسعر غالي ، دور ورش غيرهم اوفر لك
وبعدين لاتستعجل في تغيير صوفة الدبل لأنها مع شدة الحرارة تبدا تهرب وبعدين توقف وهذا حصل معي قبل اسبوعين وانتهت المشكلة
ولكن احرص على التشييك على الزيت لاينقص