يا اخوان وش رايك بجيب دوج دورانجو؟

[wlhaan]

السلام عليكم

يشرفني انضمامي لكم ,,,

حبيت استفسر من الاخوان اللي عندهم معلومات عن جيب الدوج دورانجو ؟

http://www.mekshat.com/pix/upload03/images116/mk123577_dodge.jpg

من جميع النواحي ,,
- هل قطع الغيار رخيض ام غالي ؟ اللي عنده مثال ياليت يكتبه
-قطع الغيار هل هو متوفر بكل المدن ام بالرئيسيه فقط؟
-هل القطع الاستهلاكيه (مثل الفحمات وغيرها ) تستهلك بسرعه ؟ قالي واحد معه شارجر انها ماتطلب كثير
- اي اكثر رحابه هي ام الفورد اكسبلورر؟
-هل هي مريحه بالخط الطويل؟
- من ناحية صرف البنزين تصرف ام لا ؟

واللي عنده معلومات ياليت يذكرها

[بو جريس 73]

السلام عليكم ورحمة الله وبركاته

اخي العزيز من حكم استعما ل خالي للدورانجو موتر احسن مافيه لما تدعس يطيب خاطرك على الخط اما الأستهلاك للبانزين داخل المدينه يصرف كثير وابشع عيوبه المكيف تعبان مره والسياره بالخليج بدون مكيف بارد ماتسوى بيزه!! انا انصحك بالأكسبدشن وباتوفيق ان شاء الله

[طحنون]

الموتر مايعيبه غير صيانته ووكالته
سقتها من الدمام الى الرياض الموتر عليه محرك جبار وعزم جبار
لاكن الناس تشتكي من الصيانه والوكيل وبحكم الوقت القصير اللي استخدمت فيه السياره اعطيها 5 من عشره فقط

[shaheenshah]

الدوج بصفه عامه كلها فيها قوة عجيبة لكن اذا خالف معك وقطع غيار نار ووكيل فاشل ولا تتعب نفسك على طول بعه تشليح لانك مهما صلحت فيه ما راح يزين

[الآسيف2]

انا بصراحة اضم صوتي للاخوان اللي شاركوا بردودهم
محرك السيارة جبار فهو من نوع هيمي 5.7
ايضا من ناحية الشكل في نظري انه جبار
سعرها مقارنه بمثيلاته ارخص
المشكلة الرئيسية هي خدمة مابعد البيع
وعليك القرار بعد الاستخارة

[alnassar]

بسم الله الرحمن الرحيم ---- اناعندى واحد 2007 ماشى الحين 100 الف كيلو مااشتكيت منه بشى مثال الفحمات الاماميه الاصلى 400 ريال والتجارى 200 بس الاصلى يطول اكثر يعنى بتغيره بعد 50 الف كيلو تقريبا وحسب الاستخدام البواجى تغيير بعد 100الف كيلو ------وبنسبه للوسع هواوسع من الفورد الاكسبلورر

[KITKAT802]

توكل على الله تراه موتر بس مشكلته وكيله وقطع الغيار

[browny]

الدورانجو اخذ منه المكينه ومتعه القياده
وباللنسبه للقطع مااقدر افتي لاني ماجربت الوكيل

انا انصحك اتروح الوكيل وتسأل الموظف عن اسعار الصيانه وكم سعر للصيانه الفل
وتطلع من عنده وتروح عند قطع الغيار وتسأل عن الشغلات الاستهلاكيه مثل القماشات
عشان اتكون على بينه
-------
واسمحلي اطلع شوي عن الموضوع التاهو افضل سياره باللنسبه للفئه هاذي
وبعده يجيك الاكسبديشن الشكل الجديد روعه داخلي وخارجي

[الدوسري دت كم]

ياخوي السلام عليكم ورحمة الله .اما السياره عليها محرك هيمي 5.7 لتر رهيب جدا. اما اذا كنت راعي مقاوما بالشوراع فانا انصحك فيه اما أذاكنت تبي تستعمله زي السيارات تروح خط طويل اوتروح للنفود اوتروح للشعبان فاعزالله انك اخطيت قوه بعد اول شي ياخوي شف ارتفاع صدروبطن السياره عن الارض يتعلق بقوطي ببسي ,
اما الشكل والله انه مبعد عن الزين مرررره ووجه حامل صليب النصارى اركب فيه تحس انك جالس على كرسي بوفيه اما المكيف ماكنه راكب ابد . وبعدين ياخوي اهلناقالو من زمان ( أشترتبيع ) يعني الموترالي ماتلقاله قطع غيارولاتالقاله شراي اذاجيت تبيع ياخي حتى لوتبي اكسسوارات ماتلقاله احس ان ماله داعي حتى افكرفيه ...
اسمع ياخوي اذاكان حادك السعرعليه فيه موتر احسن منه الف الف الف مره هوالمستوبيشي باجيرو
انت اذا ماتقدرتشتري تايوتا اونيسان انا ارشح المستوبيشي بقوه ليش لان قطع الغيارغاليه زي الدرانقوياخي حتى اسمه ماهوب زين والوكيل احسن شوي من الشركه العربيه .
والسعرنفس السعرتقريبا. بس والله فرق في المركب والرساوه والمكيف للمعلوميه افضل مكيف سياره على الاطلاق هومكيف المستوبيشي وأسئال اهل الكويت عن الموتر...
تراهذارايي ماهوب فرض على احد والسلام ختام

[كاشت وحداني]

بكل صراحه الدورانجو ما شبهته الا بالخنزير اعزكم الله
هو وخشمه

انصحك بفي اكس ار لو مستعمل
وانحش من الدوج وبلاويه

[كاره الأمريكي]

والله ياعزيزي بكل صدق انا اتكلم عن تجربه قبل شهر تقريبا كان معنا واحد مثله موديل 2005رحنا فيه للشرقية صراحه مراتبه جدا جدا سيئه تكسر الظهر بعدين وجهه نازل والخلفيه مدري وشلون قايله بس صراحه موتر مكينته ما شاء الله عليها ميب صاحيه
وكان فيه مشكله محد تكلم عنها من الشباب الاوهي صوة الهواء داخل السيارة والله كنك راكب ددتسن 84
بوجه عام ما انصحك فيه عندك التاهو اطيب منه بمليون مره
واسف يا الغالي على الاطاله ((اوصيك بلااستخاره)) والله يوفقك في الموتر السنع

[أبو طلال-نقوه]

نصيحه إبعد عند كرايزلر وتوابعها... من دوج و جيب

[HEMI SRT]

حبيت استفسر من الاخوان اللي عندهم معلومات عن جيب الدوج دورانجو ؟





طبعا الأخ الولهان طلب من الإخوان اللي عندهم معلومات, لكن كالعاده (ماعدى الأخ النصار) الكل صار خبير وهو جالس في بيتهم ويمكن ماعمره لمس السياره ما اقول ركبها أو حتى جربها !!!!!!!!!!!!!
السياره أنا مجربها ماعليها موديلها 2006 وماشيه 100 ألف وآخر صيانه في الوكاله كانت قبل سنتين على 40 ألف ماغيرت غير الفحمات أخذتهم من الصناعيه على 100 ريال الخلفي أمريكي والأمامي من الوكاله فحمات درجه ثانيه على 220 ريال وماشيه معاي زي الحلاوه لها 55 ألف كم, الموتر قطع غياره أسعارها عاديه مثل باقي الأمريكي وأحيانا أرخص (روح للوكاله اسأل عن أسعار قطع الغيار والصيانه أحسن لك, وعلى فكره ترى صيانته كل 10 آلاف كم)
أما بالنسبه لاستعمالي للسياره فهو بتاع كله بر ومدينه وماشكيت منه شي, أخوي أنا ما أقولك اشتر الموتر ولكن اللي حبيت أقوله إنك ياريت تسأل أي واحد من هالخبراء اللي جوك طايرين ويجاوبون من روسهم ياريت قبل ماتقرا ردودهم انهم يجاوبون على سؤال صغير وهو انهم سبق جربوا الموتر أو لا (أو حتى يعرفون أحد جربه أو حتى ساقوا الموتر أو حتى ركبوا فيه وهذا أضعف الإيمان والأمانه).

[الدوسري دت كم]

ماعندك مشكله ياستارهيمي الموتروالله انه مايستاهل انه يقاله موتر.
عندي موديل 2008 ذهبي الله لايوفق الى اشار علي فيه ولايوفق الي بصالة العرض في الشركه قلك اقدم سياره دفع رباع كذبواعليك وقالوا؟؟ أسمع ياهيمي انا اعتبرنفسي من المنكوبين في هاالسياره ومتحسف قوه تراي ابيعك كانك تحب هالسياره ... وبعدين مالك حق تقول هالكلام الرجال طلب الشورواناعطيته الشور الي عندي بس هذا الي صار لاكن اطلع كذاب هذي مردوده عليك ياهيمي. وبعدين ياخي انزل السوق وشف هالسياره الي انت تكذبنا عشانها احديسئلك عنها اصلا ولالا ... وبعدين ردعلي والسلام

[كاشت وحداني]

بالنسبة لتجربتي له فقد جربته في العقبات في المنطقه الجنوبيه .
صحيح المكينه قويه
لكن وش ابي بقوة مكينه بدون توزان للموتر وبدون راحه وباستهلاك قطع غيار ..
مثال قطع سعرتها بنفسي .
تندة ب 26 الف ريال
اكثر من قيمة الموتر
صواميل الكفرات الحبه ب 117 ريال . ليه ذهب .
والصيانه محد يفهم فيه
ابد ابد
يعني لو تكون في المنطقه الجنوبيه مالك الا تشحنه للرياض ولا جده .

[سعد الغامدي.]

هلا بكـ أخوي ولهان :)

والله أنا أنصحك فيه :good2:

و ترى عيبه الوحيد انه نازل شوي يعني رح ورشه زينه و قل له يفكـ الخط اللي يجي تحت قدام {{ تحت اللحيه }} و بس

أما عن عزمه فأظن ما يحتاج يجي واحد يشرح لكـ قوة مكينة HIMI :good:

...

[مجنون نحم]

شيك على الدورانجو 2011 ترى تغير الشكل صااااير هباااااال

[عقال]

انا مجرب وما زال معي موديل 2005 ماشي 190000 كلم
بصراحة موتر

عيبة الصيانة فقط محد يعرف يحدد مشكلة العطل

اما اسعار القطع ما هو غالي نفس السيارات الثانية وفيه قطع ارخص من السيارات الثانية (( ولك تسعر في الوكالات )) لا تروح لمحالات التجاري قارن بين السيارات في الوكالات فقط وتعرف من اللي سعره غالي !!!!

ويا كثر اللي بيقولون انحش وهم ما جربوا

ولا تشتري اي سيارة إلا وانت مقتنع بها ومجربها ((( استأجرها لمدة اسبوع وخذ النتيجة بنفسك )))


والله يوفقك ويكتب لك اللي فيه خير

[ع العمرو]

ما شاء الله تبارك الله انا مجرب الجمس جميل مريح واسع رخيص كويس وابن ناس.

[طيرشلوى 2]

الدوج مافيه خير من طلع الى يومك خربات يطفابك في كل مكان دور لك جمس ولا جيبب وخل عنك الدوجه

[عآشق الحره]

بعض التعليقات تضحك ..خخ موتر مو صاحي قوه جباره ومكينه مهي صاحيه بس انت روح شوفه تحس انه معوق فاهمين التميز غلط وبعدين والله ياهو نازل نيتي ان الاكسنت ارفع منه مره نازل حق ازفلت وشواطئ بس

[رسيس نجد]

السعر الي تدفعه فيه يجيب لك سياره افضل منه 0

[نديم الشمال]

الدوج دجو هله بسبوع / عجزو عن التتن يشرونه

قصيده قديمه / ماحفض غير مطلعها
الاولين ماخلو للتالين شي

شوري عليك لا تقربه

[الشنه]

ياحبيبي كل ماتشتهي. والبس ما يعجب الناس موتر ما تعرف ملته وش تبيبه

[Bader-M]

مميازات الدرانجو عند سؤالي لاحد الشباب الذين يملكونه

1- محرك جبار جدا الاقوى من فئته
2- سعر مناسب
3- قليل الاعطال

عيوبة
1- تكيف ضعيف (مقارنة بالياباني)
2- وكيل سئي (هذا لا تهمك اذا كنت سوف تشتري مستعمل)
3- استهلاك وقود مرتفع (مقارنة باليوكن و الاكسبدشن) و السبب يرجع لحجم المحرك الاكبر
4- السعر عند البيع (للذالك انصحك تاخذ مستعمل استعمال بسيط) يعني يكون ماشي اقل 20 الف كم

اما قارنة بالاكسبلور
الصراحة هذا ظلم لدرانجو
الدانجو افضل بكثير (رغم انني من عشاق الفورد )

نصيحتي لك
يعني تاخذ درانجو مستعمل 2010 م لا يتجاوز سعرة 90 الف بالكثير
راح يكد معاك على الاقل 5 سنوات وبعد خمس سنوات لو تبيعة 35 الف ما عندك مشلكة (خسارة 55 الف)
افضل من ان تشتري تاهو ب 130 الف على اقل تقدير و تبيعة بعد 5 سنوات 70 الف (60 الف)
هذا نصيحتي لك

ولا تنسى الاستخارة

[ابو مطلب]

راح يكد معاك على الاقل 5 سنوات وبعد خمس سنوات لو تبيعة 35 الف ما عندك مشلكة (خسارة 55 الف)
افضل من ان تشتري تاهو ب 130 الف على اقل تقدير و تبيعة بعد 5 سنوات 70 الف (60 الف)
هذا نصيحتي لك

ولا تنسى الاستخارة




[/QUOTE]
بس معليش اخوي بدر عندي نغطة :D
لما تستخدم الدوج 5 سنوات على قولتك
شف كم راح تدفع عليه صيانه وقطع غيار
اما التاهو كد ومد وقطع غيار ارخص
ولما تجي تبيعه الاغلبية من الناس ترغبه
اما دوج على شروكي على كرايزلر >> انا اقترح انهم يحولونها سياكل :D

[أبوريان سعيد]

موتر رائع بمعنى الكلمة بحكم تجربتي للدورانجو ٢٠٠٨
متعة بالقيادة وعزم وتماسك

[هلي ديزل]

^^^^^^^^^^
الموضوع قديييم بارك الله فيك،،

[ديفون]

انحش الصياة بتفلسك . عدك ياباجيرو او اكسبدش . وكلهم افضل من الدوج من ناحية الصيانة والقطع

[ددسن 2008]

الموتر مايعيبه غير صيانته ووكالته
سقتها من الدمام الى الرياض الموتر عليه محرك جبار وعزم جبار
لاكن الناس تشتكي من الصيانه والوكيل وبحكم الوقت القصير اللي استخدمت فيه السياره اعطيها 5 من عشره فقط

اشارك الاخ طحنون الراي .. الموتر طيب وسعره مقبول

وشكله متغير عن اول


http://www.mekshat.com/pix/upload05/images248/mk201574_2012-black-dodge-durango-exterior-view.jpg


http://www.mekshat.com/pix/upload05/images248/mk201574_dodge-durango-2012-08.jpg


الله يوفقنا واياك ومن يقراا

[الطرس ممدوح]

انا بصراحة اضم صوتي للاخوان اللي شاركوا بردودهم

[talol]

:Dها بشر شريت واذا شريت ماهو انطباعك بعد استخدام 4 سنوات

[ابوسند9]

صديق لي كانه معه واحد موديل اعتقد 2008 وماني متاكد من الموديل وسئلته عن الاعطال يقول ما شفت منه اي عطل
وباعه واشترى تاهو
يقول والله فرق وشكلي برجع للدرانجو
وبرضو اشوف الموديل الجديد شكله حلووو

[كم كيلو باقي]

الضحك اللي يقول سيارات دوج وكرايسلر المفروض يقلبونها سياكل
والله مايعرف منها الا اسمها الله يستر علينا وعليه