مشكلة عويصه احترت وش اسوي !!!

[Khalid AlGhamdi]

السلام عليكم ورحمة الله وبركاته
الحمدلله والصلاة والسلام على رسول الله وعلى آله وصحبه أجمعين


باختصار ، بما اني عضو في مكشات فعمناته اكيد اني طعس :D

امزح ،، لاحد يعصب

لكن يعني اني من هواة الرحلات البرية وهنا المشكلة
الحين انا عندي مبلغ معين وعندي حلين له بختار واحد منها واتمنى تساعدوني على اختيار الحل الصحيح


الحل الاول

اني اشتري سيارة للبر فقط ، شاص مثلا واخليه للبر فقط ما اروح ولا اجي عليه
واشتري معاه سيارة ثانية اقتصادية للديرة كرولا مثلا او سيفك او كامري


الحل الثاني

اني اشتري بالمبلغ اللي معاي كله جيب صالون
لاند كروزر او سفاري ويكون هو سيارتي الوحيده للبر وللديره وللسفر وكل شي .

:confused:

وش الراي ؟؟؟

[القناص]

عندي حل بس تراني منيب طعس مثلك

الملافظ سعد على ما قالوا اخواننا المصريين

الحل اثنين في واحد
اختر لك واحد من الاتي حسب ميولك وامكانياتك المادية:

جيب مرسيدس
جيب بي ام
باث فيندر
انفنيتي جيب
فيتارا
جيب لكزس 300
جيب فلكس الطوارق

اما قصة سيارتين جربتها انا وتراها متعبة وممله ومرهقة نفسيا وماديا.

[Eagle]

اذا انت من النوع الي يداري الموتر ويحافظ عليه خلك على موتر واحد للبر والديره
انا عندي كامري مثل حقتك وافتر البر فيها وادخل طعوس وخبرات واشقح محميات
لانه الموتر اصلا موديل 99 وموذاك الزود فجلدته ماهمني
بس انشالله لو آخذ كامري الجديد انسا ادخله بر آخذ فوقه شاص وله عربانه

[Khalid AlGhamdi]

ديب مرسيدس ولكزس وبي ام :D

هذولي مواتر بر ؟؟

والله امكانياتي المادية ماتسمح لي ولو سمحت ماشريتها :rolleyes:

جزاك الله خير على النصيحه :good: وبالفعل اكثر اللي شاورتهم ضد اني اشتري سيارتين

---

اخوي Eagle وين اروح بالكامري :) !!

الكامري لو اطلع بها طلعتين للصمان تفككت :redcar:

وللأسف ماني من الناس اللي رجلهم خفيفه على الموتر

جزاك الله خير ومشكور على النصيحه :good:

[الربذي]

اخي القوة القصوي 00000ماكس باور

السلام عليكم ورحمة الله وبركاته

انا قبل فترة مريت بمثل ظروفك واشتريت جيب وسيارة صغيرة

وهنا بدات المشاكل
انا ماحب اعطي سيارتي احد واحب ان تكون دائما جاهزه لاي مشور طويل
يحصل احراجات واحد ودة يسافر وسيارتة بها عيب كفرات مثلا او اي خلل ثاني ويمون علي يجي وقول ودي اسافر بسيارتك واذا رجع فللته بنزين وغسلته وقفتها ثم جاء ثاني وصارت شغلة اتعب لخلق الله والسيارة الصغيرة صارت شغلة انفقعت المكينة اشتريت مكينه انفرط القير صلحتة كل شوي خربانة لدرجت اني مر علي يوم استاجرت سيارة !!!!!!!!!!!!!!!! لوني طعت بعض الناس :D واشتريت اسيزو دبل 2004 اقتصادية بر وسفر لكن ضيعت فلوسي وندمت000000000000000000000000000000000000000000000 0 رد متاخر يمكن قضيت امورك وطارت الطيور برزاقها

[Khalid AlGhamdi]

وعليكم السلام ورحمة الله وبركاته

جزاك الله خير يالربذي وماتأخرت لاني راعي طويلة للحين ماسويت شي ماشريت سيارة مازلت في مرحلة

التحري والبحث

والله ياخي اني متوهق حتى اني بعض الاحيان اقول ياولد وش هالقرادة اقضب الارض ولاعاد تزعجنا بر ومابر

لكن ياخي ماقدرت اتخلص من ادمان البر ( ياليت يسوون مستشفى الامل للتعالج من ادمان البر )

ويبدوا وفي مايبدوا

اني باخذ سفاري والشكوى لله ، نتحمل البنزين ولانتحمل فراق البر

[مهند]

حبيبي http://www.mekshat.com/pix/upload/images5/mk6995_MaxPower1.jpg اسمع مني زين ;)

انصحك باللاندكروزر الفي اكس هو التوب او جي اكس

اذا كانت فلوسك واجد الله يزيدك من فضله اتكل على الله وعليك بالفي اكس ار واذا كانت فلوسك اقل شوي خذ لك جي اكس ار واذا كانت فلوسك يعني حليوه خذ جي اكس ار مستعمل وعليك بالامارات او قطر
وترا قطر مواصفاتهم مختلفه شوي يعني يجيك عندهم الجي اكس بدون ار يجي فيه مواصفات الجي اكس ار عندنا تقريبا
اما الامارات فتقريبا مواصفاتهم مشابها للي عندنا ولكن الفرق في الالوان والاسعار للمستعمل اقل بكثير من هنا
واما بالنسبة للبنزين فاقول لك اطمئن لن تلاحظ فرق كبير حتى داخل البلد وانا اقول لك هذا الكلام من واقع تجربة شخصية فانا عندي جي اكس ار جديد اشتريته من الوكالة في الامارات واعبي الخزانين ب120ريال ويمشي 750كلم بالرااااااااااااااااااااااحة

لكن المشكلة الوحيدة اللي تضيق الصدر هي حاجتين:
الاوله وشلون تحافظ على البودي سليم من المخشات والطقوق البسيطه وخصوصا اذا وقفت في مواقف مزدحمة ---->ياهو يضيق صدري:(
الثانية الخوف والقلق من السرقة لانها سيارة غالية والعين عليها

ولاي خدمة حنا حاضرين
وسامحنا على القصور

[Khalid AlGhamdi]

جزاك الله خير يامهند

والله اني فعلا فكرت اروح قطر لكن بعدين قلت يمكن تطلع الاسعار مقاربة للي عندنا وكنا يابوزيد ماغزيت

ماقصرت وان شاء الله بحاول اخذ بنصيحتك :good:

[ذيب البر]

تبي راي مجرب وانا اخوك خذ رايي

الرأي الاول هو الصائب بلا شك وخل سيارة البر مهيب جديدة ولا غالية يعني سعرها

معقول وتراها اذا كانت للبر فقط تعيش معك كثير وانا اعرف بعض زملائي نصحتهم

بالرأي هذا ولا اخذو فيه وشروا جيب صوالين فوق المية الف وخلوها سيارة اساسية

حتى المخبز يروحون عليها وهذا ترى يدمرها وانا اخوك والله الان ان بعضهم يقول ليتي

سمعت رايك قلت ليش قال احس اني دمرت الجيب وهو الان موديل 2002 وماشي

فوق المية الف لاحظ

لكن لاتعدى الرأي الاول انا كان معي سفاري وهو سيارة ثانية وليس اساسية

والله عاش معي فترة طويلة وموديله 88 وكل من شافه تعجب من نظافته والان معي

تويوتا وبرضه سيارة ثانية وعايشه ونظيفه

تحيااااااااااااااااااااااااتي

[Y&Y_4X4]

انصحك وانا اخوك بالاختيار الثاني ويكون تايوتا خليجي .

لاكن وش معنى طعس ؟

[Khalid AlGhamdi]

والله ياذيب البر كلامك هو الاقرب لنفسي

مع احترامي لكل وجهات نظر الاخوان والمقصد زي ماذكرت هو ان صرف البنزين عالي في الدفع الرباعي غير ان موتر البر اذا استخدمته في الرياض اعدمته وانت ماوصلت البر من المشاوير

غير ان موتر البر زي ماذكرت اذا كان موديله ماهو جديد وانت مخليه للبر بس

ماهي كل طقة حصاه بالموتر تقول طاقة قلبك ، يعني بمعنى ثاني تاخذ راحتك في البر ماتخلي جرف ماتدق رواسي معاه :D

جزاك الله خير على رايك والله يكتب اللي فيه الخير

اخوي Y&Y_4X4 جزاك الله خير على النصيحة
وطعس انا امزح يوم اقولها لاحد يزعل :rolleyes:

والطعس عبارة جبل من الرمل يتكون بسبب الرياح ويكثر حوله الشباب في وقت الامطار :good:

[صفوان]

الأخ/ الكريم.. ماكس باور

عليكم السلام ورحمة الله وبركاته..

والموضوع هذا طُرح من قبل.. ويتكرر كثير في المنتدى! وهناك عنصريات من حيث اختيار بعض السيارات:mad:

وتبي نصيحة أخوك.. ولا يهون الجميع:good:

أنصحك بشراء 3 ثلاث سيارات.. :rolleyes: ولا تستغرب! اصبر علي شوي

اذا كان لديك تقريباً من 80000 - 100000
فأنت تستطيع شراء ثلاث سيارات بالراحة بدل شراء سيارة وحدة من بعض الأنواع التي ذُكرت!!

الجي اكس آر= فوق المائة تقريباً اذا هو نظيف وموديل جديد!
والنيسان حول التسعين
وغيره من الأنواع المشهورة حول السعر تقريباً

ومشكلة السيارة الوحدة الخاصة بالبر.. انك تمل منها خاصة اذا مشاويرك كثيرة
وأيضا لو تعطلت بأي سبب لا يوجد لديك بديل

لكن.. لو شريت تقريباً
1- سيارة للعائلة.. من الانواع الأمريكية مثل (الفنتشور) أو اليابانية (المتسوبيشي) أو الكورية (الهونداي) أو (الكيا) جاية بقوة ورخيصة جداً تحصل 2002 كامل مواصفات 40000
2- سيارة مشاوير.. كرولا، ترسل أو سوزوكي.. الموديلات من فوق 99 تقريباً السعر في العشرينات
3- سيارة للبر.. واذا معك عائلة خلها أربع أبواب.. بسعر الجي اكس ار موديل 97 (يسوا له 50000) تقدر تزود عليه شوي وتاخذ لك سيارة يبانية أو كورية جديد من الوكالة أو مستعمل شوي
مثل الجيب الهونداي موديل 2002 تلقاه بـ 35000

يعني المجموع لثلاث سيارات 40000 + 20000 + 35000 = 95000
يساوي قيمة سيارة وحدة من الأنواع المذكورة.. وش هو له، على شان يقولون اني راكب جي اكس آر
يسمحوا لي أهل الجي اكسات,, مع احترامي للجميع

-- تبقى القناعات الشخصية هي المحكمة -- كلن يرا المواتر بعين طبعه!!:D

تراني جاد بالمشورة.. وخوك مجرب الطريقة أعلاه والحمدلله.. وماشية معاي تمام تمام:good:
ولا تحير عمرك ولا شيء.. وتعيش كنك أمير:cool:

وعلى فكرة المشورة أعلاه للي عنده عائلة ومشاويره كثير ويحب البر!!
أما العزوبية لهم وصفة خاصة:eek:

تحاتي لك بالتوفيق العاجل

أخوك
صفوان

[صفوان]

مع ليش.. اسمحوا لي!

نسيت أقول لك والنصيحة للجميع..

لا تروحون لا قطر ولا الامارات.. السيارات غالية جداً وفوق ما تتصورن

رحت قبل رمضان السنة هاذي.. وتسومت المواتر ولقيتها غالية خاصة الامارات (الشارقة)
ويوم سألت السبب قالوا بسبب تصديرها الى العراق:mad:
وأما قطر أيضاً غالية وقريبة لأسعارنا.. وأيضا أغلبها مكروفة العدادات ماشية واجد ( ما دري وين يروحون عليها) وقطر مساحتها مهي كبيرة بالحيل!:rolleyes:

يمكن تلقون فرص ولا واحد محتد.. لكن بشكل عام.. لا تتعب نفسك واقضب أرضك!

هذا للأهمية.. وتحياتي

صفوان

[Khalid AlGhamdi]

وعليكم السلام ورحمة الله وبركاته

ياخي ثلاث سيارات كثير علي ماديا ومعنويا :D

انا عائلتي صغيرة جدا متزوج وعندي ولد واحد ( يعني اتمنى اشوف وشي وصفة العزوبية ) :)

بعدين بالنسبة للجيب انا مافكر بغير تويوتا او نيسان وطبعا موتر مو جديد مابين 93 الى 97

ومرات تخمني واقول خذ جمس دفرنسين ( حوض ) لكن الاحتمال هذا ضعيف شوي .

واما السيارة الثانية فامرها محلول والخيارات كثيرة جدا فيعني امرها ان شاء الله متيسر .

جزاك الله خير على وصفة العوائل وبانتظار وصفة العزوبيه :good:

[صفوان]

أخي الحبيب..

طالما انك عندك احتمال في الجمس ودك تعرف وصفة العزوبية.. رح والله ما أردك:good:

هذي السيارة الأولى حقتهم.. خفيفة وحق طعوس وش حليلها:cool:

http://www.mekshat.com/pix/upload/images5/mk5993_car000.jpg

وهذي الثانية يمكن تصلح لك.. وهي حق البر وطلعات الصمان!:good:

http://www.mekshat.com/pix/upload/images5/mk5993_car0000.jpg

على شانك تمنيت.. وحبيت البي لك امنيتك! :D

صفوان

[دهام]

بسم الله الرحمن الرحيم

الحمدلله والصلاة والسلام على رسول الله وعلى آله وصحبه أجمعين

اسال مجرب اقول ان كان الراتب على قد الحال خذ لك صالون ديزل باترول او لاندكروزر فهو يجمع بين

الديرة والبر والسفر وان كان الراتب طيب وان شاء الله يكون طيب خذ واحد من السيارتين بنزين ,اخوك معة

باترول صالون ديزل ولا ارتحنا او نسيانا غثا السيارات الى بعدة والله يوفقك