المساعد الشخصي الرقمي

مشاهدة النسخة كاملة : وشي احسن طبخة للعراجين ؟؟؟


شوق الصحاري
16/04/2002, 11:39 PM
مراحب شباب ....

هلا بالطباخين كلهم .......

هلا بالذوقين كلهم .....

من يقولي وش احسن طبخة للعراجين ؟؟؟؟

مع اللحم ؟؟؟

او مع المطازيز ؟؟؟

انا من وجهة نظري مع اللحم روعة ....

اللي عنده طريقة ثالثة يقولها ....

تحياتي ........
راعي الرحول
17/04/2002, 10:32 PM
السلام عليكم مرحبتين شوق الصحاري
ابدلك على طريقة لكن انا ما ذقت احسن منها
وهي
انك تغسل العراجين وبعدين وتزيل الطبقة المتربه
تكشن بصل ومما يلزم للكشنه لاتحط صلصه ولا طماطم
وبعدين حط سمنه حسب مقدار العراجين بس لاتحط ماء وحط عراجينك وسوي لهن قلي
وعلى نار هادئه قلبهن حتى تحس انهن نضجن اقلط عليهن وبالهناء والعافيه واذا ما قلت شي رائع تراني ما اعرف اطبخ
ولاتنسى تعزمني عليهن اذا اعجبنك
هاه تبي شرح اكثر :p
شوق الصحاري
18/04/2002, 01:59 PM
الف شكر لك على هذه الطريقة وراح اجربها واعزمك عليها ....

تحياتي واشواقي .....
راعي عنيزة
20/04/2002, 11:14 AM
صح لسانك يا راعي الرحول عزالله انها ازين طريقة للعراجين

وما يمنع تحط معه شوي طماط وفلفل (نفس طريقة تجهيز الكبده) وتطلع خرافيه
الضاري
20/04/2002, 03:22 PM
أخوي ........ شوق الصحاري

أنا جربت العراجين قلي بالزيت( كامل وتقطيع) وشوي (على الجمر ودفن بالملة) وطبخ مع الرزوطبخ مع المرقوق و جربتهن مع الشورباء
ولقيت افضل طبخة مع المرقوق ومع الشورباء يقطع العرجون بالطول قطعتين ( جربتة في شهر رمضان المبارك )
وبصراحة مالقيت أفضل من هالطريقتين ........ وجرب وأنت الحكم.
لا وأزيدك من الشعر بيت أنت ومن يقرأ هالخرابيط اذا نظفت العراجين وقطعتهن (انصاص أو كامل) وحطيتهن بالفريزر مايتغير لونة مهما طالت مدة التثليج.
واذا أعجبتك الطبخة لا تنسى تدعى لأخوك / الضاري بحسن الخاتمة.
والله يوفقك.
عريون
20/04/2002, 04:10 PM
السلام عليكم
وين حصلتو العرايين انا من السيح ولا لقيت شيء
:confused: وش رايك يا شوق الصحاري انته تجمع العراجين ونحن نطبخهن ولك النص لا لا النص وايد عليك اخفك تحمر ههههههههه خلاااص لك الربع ولا تزعل بس هاااا ماقلت لي نباهن مع اللحم والا مع المرقوقه رقوك بصوط ههههههههههه
:D :D
شوق الصحاري
20/04/2002, 05:57 PM
الضاري شكرا لك على هذه الطريقة الجيدة راح نجربها وما نخسر شي ...

عريون :
وعليكم السلام

العراجين ماليه الارض ..
وفكرتك ظالمة حرام عليك ..... الربع ياظالم ...

عموما شكرا لك .....

راعي عنيزة شكرل لك على الاضافة الجميلة ..
غازي 1
27/11/2008, 09:11 PM
يرفع بمناسبة موسم الخيرات والعراجين .. والشكر موصول لصاحب الموضوع
al360f
28/11/2008, 08:00 PM
كلها زينه لكن مع المطازيز لها طعمها ومذاقها الخاص ويعطيك العافيه
دكتور بر
28/11/2008, 09:31 PM
نبي صور يا اخوان توكد هالحتسي أحسن
راعي الفروه
29/11/2008, 12:15 AM
والله ياخوك مايعرف العراجين علشان انعرف نبطخها ،،،،،،،،،،،،،، والله يدلك على الطبخه الي تصلحلك