المساعد الشخصي الرقمي

مشاهدة النسخة كاملة : مشكلة موتري الباترول


راع الجيب2002
31/05/2009, 12:01 PM
السلام عليكم ورحمة الله وبركاته


يااخوان انا سيارتي باترول 2002 اول شي المويه تنقص بس مانتقص كيف الردايتر افتحه مليان بس القربه ناقصه ولا فتحت القربه انتظر شوي بعدين تجي المويه والموتر احسه ترتفع حرارته لاوقفت واسمع المروحة التماتيك تشتغل من مده ...
ثانيا فيه صوت ياخوان بالمحور الخلفي ماادري وشوا شيكت على الدفرنس وزيت الحمد الله زين الصوت مايظهر الا اذا وقف الموتر بعد سرعة يعني لامشيت عشر دقايق واكثر ووقفت وامنت القير ظهر الصوت خلف رحت للميكانيكي قال مافيه شي والثاني قال رمان وغيره قال الكارونه علما بان الصوت لاوقفت او رقيت شي مرتفع يعني لبذل الموتر مجهود ...


اشكر الجميع على رحابة صدورهم وانتظر ارائهم الطيبه


اخوكم
راع الجيب2002
abo-lma
31/05/2009, 01:24 PM
عني أنا ودي أفيدك

ولكن تبي تلقى العلم أنكان مانيب واهم عند أخونا العضو عسول

ولايهنون اخواني الباقين

ولكن عسول ماشالله عليه راعي باترول وله خبره الله لايضره
راع الجيب2002
08/06/2009, 01:52 PM
ياااخوان 60 مشاهدة ورد واحد

يااخوان طامعين بعلمكم ومعرفتكم لا تخلون عنا شي
abo-lma
08/06/2009, 02:11 PM
السلام عليكم ورحمة الله وبركاته

علمتك وانا خوك اذا تبي الشور عند أخونا أبوخالد ( عســـول )

تراه حاط رقم جواله في توقيعه أن شالله أنه يفيدك

وموفق خير
ابوعبداللهA
08/06/2009, 02:15 PM
حسب خبرتي كثرت العطال بالباتر ارجو منك التكد انضر غطا الزية المكينه اذا كان فيه لون ابيض فهو مختلط الماء مع الزيت حسب مافهمت منك
اذا كان صحيح فالمر سهل
هذي المشكله كانت معي
انتضر ردك
D I K T O O R
08/06/2009, 02:36 PM
يالغلا

انا ما اعرف وش المشكله لكن ابدلك على واحد فاهم بالباترولات

الوصف :
الصناعيه الجديدهـ - صناعية الدائري الشرقي على الدائري الجنوبي
اسئل هناك عن ورشة الشنيفي

واذا تبي رقمه راسلني على الخاص

وانا مابي شكر منك ابي الدعاء
ابوألياس يوسف
08/06/2009, 04:26 PM
اخوي راع الجيب الفتك فيه قربتين اذا كنت تقصدالقربه الي في اتجاه الراكب لازم تكون مليانه ولايكون فيها تنسيم بخاربسبب القفزان اوالغطاء والقربه الثانيه بتجاه السواق في مقدمة السياره على انصف تقريبا
الرحال 2003
08/06/2009, 11:12 PM
السلام عليكم اخوي راع الجيب
افتح غطا الرديتر وشوف الياي انكان الياي ضعيف غيرالغطا ونكان مفيه شي عندك الخراطيش الليات فيها تنسيم خفيف انشاالله تستفيد
المميـز
09/06/2009, 04:38 AM
مثل ماقال اخوي ابوألياس يوسف

القربه اللي جهت الراكب اللي عليها غطاء مثل غطاء الراديتر لازم تكون مليانه

والقربه الثانيه اللي جهة السواق هذي وظيفتها تستقبل الماء الزايد بس ..

ياليت لو توضح لنا الحرارة إلى كم توصل معك ؟؟ وان شاء الله راح نساعدك وابشر بعزك :)


وبالنسبه لصوت الطقه اللي تقول عنها

إن كان موترك قير تماتيك فهذي الطقه موجوده في أغلب القير التماتيك ( الباترول بس )

وحلها ياطويل العمر تشحيم عمود الدوران كامل وبشكل صحيح وخاصه الجهه الخلفيه
لازم يكون الشحم معبي الصلبان زين


واي خدمه حنا تحت امرك طال عمرك ...
راع الجيب2002
09/06/2009, 01:24 PM
اخواني
بيض الله وجيهكم ...

وماقصرتم فعلكم طيب وحضوركم اطيب ..

واشكر الجميع بلا استثاء
بر الوالدين
10/06/2009, 12:14 PM
الله يوفقك أخوي

و إن شاء الله حل إرتفاع الحرارة تلقى له حل و سهل

و هالأيام الكل يشكي من حرارة موتره
سفاري نجد
10/06/2009, 12:46 PM
السلام عليكم ورحمة الله وبركاته ،،،

اخوي تلاحظ تهريب اسفل السياره والا ... لا

ـ صارت لي تهريب (ليّ) قريب من القربه اللي عند الراكب غيرت (الليّ) عند الحمراني بـ 150 ريال قيمة قطعة الغيار .

بالنسبه للصوت للمحور اذا وانت تضغط الفرامل وش رايك تقوم بتشحييم عمود الكردان ( الصليبات ) والصليبات للمشاحم لعمود الدبل مره وحده بـ 5 ريال .

الله يسرّ أمورك ،