كيف أعرف ان السيارة طبلونها مفصول أو لا؟؟؟؟ ( دعوة للمناقشة )

[.أبوعبدالرحمن]

بسم الله الرحمن الرحيم



السلام عليكم ورحمة الله وبركاته




كثير من الناس ما عنده الاستطاعة في شراء سيارة جديدة

أو عنده قناعة أنه يشتري مستعمل عشان اذا جاء وقت بيعه هو تكون الخسارة بسيطة

أو غيره الكثير...



لكن السؤال هو ؟؟ كيف أعرف أن السيارة قد انفصل طبلونها أو لا ؟؟


وحسبي الله ونعم الوكيل على كل من يسوي الحركة هذي ليظهر للناس أن السيارة ممشاها قليل



في انتظار ردودكم ...

[الأسير]

نفس السؤال يدور في بالي من زمان

[ابن عكاش]

إذا كان العداد من النوع القديم العادي فسهله ناظر الصامولتين اللي في الطبلون إذا كانت متحككه فهي مفكوكه يعني منقص الطبلون ايضاً ناظر الأرقام إذا كانت غير متساويه واحد فوق شوي وواحد نازل شوي فترى ملعوب فيها
اما الألكتروني فهو صعب تكشفها لكن ممكن تقدر كم ممكن هالسيارة تمشي خلال فترة عمرها وهل نظافة السيارة مثل ممشاها وفيه ناس تفصل الطبلون وإذا بغى يبيع شبكه
هذا الأعرفه ولعل الشباب يعطونا معلومات اكثر
وانا بصراحه ان لعب علي في هايلكس وما اقول اللا حسبنا الله ونعم الوكيل
تقبل مروري اخوك ابوصقر

[aboyagob]

صعبه جدا جدا تعرف هل هي مفصوله ول لا

تعدد الطرق والفصل واحد من الطرق

من ورا الدرج فيه سلك ينفصل
تحت عند القير به سلك الساعه
فيوز الطبلون

يعني وانت ماشي

والي فيه خير يعرف صعبه جدا جدا تعرف او مستحيل بعد

فيه ناس يقولون رح لم الوكاله ويطلعون اقولك اذا كانت الساعه الي تدور وتحسب مفصلوه وشلون يعرفون ؟؟

الا اذا كان فيه جني بكل سياره ممكن

والسلام عليكم

[Cool 3la 6ooL]

يا ابن الحلال هذي حركه قديمه (حركة فصل الطبلون)
الحين صاروا يرجعونه مثل ما تبي.

هذي سالفة واحد من الربع باع سيارته ماشيه 380الف وبعد اسبوعين لقى واحد واقف بها بالسوق يبي يبيعها (نفس السيارة، نفس اللون، نفس اللوحة، نفس الدقشات) يعني هي امها وابوها، لقى عدادها 180الف مع العلم ان السيارة لكزس موديل 98 يعني عدادها الكتروني !!!

تبي الحل!!!!!

اذا تبي تشتري سيارة سعوديه، خذ لوحتها وشاصها ومر صيانة الوكالة وأسأل عن اخر صيانة كم كان ممشاها لعل وعسى تلقى عندهم معلومه تأكد ان عدادها صحيح. اما ان كان صاحبها ما يدخلها الوكاله فالله يخلف على السيارة اشترها على فحصك

قال لي واحد ميكانيكي ان الدبه (الكنداسه) يتغير لونها بعد ال60الف كم تقريبا

[حمد الأحمد]

أخو أفحص السيارة

يبين لك كم هي ماشيه تقريبا يعني يطلع بالكمبيوتر كم ضغط المكينة مثلا ضغط المكينة96% يعني ممشى السيارة من تسعين ألف إلى ميه حسب ما أعرف

وأفضل واحد بالسوق يفحص هو البريدي بمعارض النسيم يس غالي شوي لكن يستاهل

ولا تنغبن

[ابو سويلم]

ورقة الفحص الدوري مكتوب عليها كم ماشية السيارة بس هي صحيه ام لا ممكن يفيدون الاخوان

[DARK2]

سهلة جدا اخي الكريم .. جميع السيارات تحتوي على كمبيوتر يقوم بتخزين معلومات السيارة فمثلا عندك المرسيدس والبي ام فحص السيارة عن طريق مفتاح التشغيل بدون حضور السيارة .. فهناك كمبيوتر يفحص السيارة وكم ماشية حتى لو فصلت العداد

[كاشت وحداني]

فيه مراكز عندهم كمبيوتر ويعطيك عمر المحرك
اذا قال عمر المحرك 90% ممكن المهندس يعطيك الممشى الحقيقي تقريبا .
والغش اصبح حتى بالعداد الالكتروني
سمعت عن ناس عندهم كمبيوتر ويقدر يصفر لك خانه من العداد
.
المرسيدس والفلفو فيه حركه ممتازه .
كمبيوتر يخزن الممشى
افصل العداد وامش واذا شبكته طلع ممشاك الحقيقي . يعني ماكو فكه .

[.أبوعبدالرحمن]

الله يعطيكم العافية على الردود اللي نورت الطرح

وفي انتظار بقية الردود لعلنا نجد حل لهذه الظاهرة الشيئة


ومن ناحية اللي يقول يوضح من شكل السيارة


المشكلة أنه يغسلون الصيج ويرفعون الموتر رفع الوكالة ويغسلونه من تحت ومن فوق ومن كل جهة

ويرجعون كفرات الوكالة يعني لو تلاحظ بعض السيارات الجديد واللي يكرونها أصحابها في البر والخطوط

تلقاها بدون كفرات الوكالة ولا جنوطها مركب كفرات ثانية وكفرات ثانية واذا جا يبيع راح وركب شغل الوكالة

وقالك كل شيء شد بلد


ولا .. يخلون تجاليد الوكالة بعد .. وأكياس المراتب

هذا اللي يغبنك

في انتظار البقية ...

[المكشات]

سمعت عن حركة بالألماني مدري إذا كانت لكل السيارات

تروح للوكالة و يطلعون لك ممشى المكينة الحقيقي ...

يعني عداد خاص بمشي المكينة غير عداد المسافات

[الواصل 99]

طيب ياجماعة اللي يفصل العداد ويحلف إن هذا الممشى حقيقي مايخاف الله وياكثرهم خاصه خاصه اهل الجيوب التويوتا الربع وغيرهم

[الآسيف2]

موضوع مهم واتمنى من الجميع ان يدلي بدلوه ...
انا استغرب بعض السيارات التي تصل الينا من الخارج تكون موديلها قديم وممشاها قليل يعني قبل شهر بمعارض النسيم لقيت مجموعة من سيارات الاكسبلورر وارد اليابان موديل 96 وعداداتها ما توصل 100الف فهل يعقل هذا ؟!!

فياليت الجميع يشاركنا برأيه

[موادع الشرقيه]

فيه جهاز عند بعض محلات الفحص
يشبكة في الفيوزات او مكان تحت الدركسون ويطلع الممشى وكل شي
بس ما ينفع الا للسياراة اللي فوق 2003 على ما أظن

(ترى ماني متأكد من المعلومة )ياليت اللي عنده علم يسدحه هون

[ذيب عالية نجد]

أخي الكريم هناك عدة طرق أعرفها لاكن بواسطتها تعرف أن السيارة ممشاها كثير فقط دون أن تعرف كم المسافة بالضبط وهي
1ـ دعسة الفرامل والكلتش البلاستيكية إذا كانت متآكلة فمعناها ممشاها طويل
2ـ تاريخ الكفرات الموجود في جنب الكفر إذا كان الكفر تاريخه أحدث من موديل السيارة فمعناها ممشاها طويل خصوصاً إذا كانت نفس كفرات الوكالة
3ـ القير والدركسون إذا كان ظاهر لها لمعه من كثر التغيير ومسك الدركسون والقير

[المميـز]

ابعطيكم وجهة نظري قد تعجب البعض وقد لاتعجب احد :)

أنا مايهمني ممشى الموتر اللي ابشتريه

أهم شي افحص السيارة كمبيوتر لأنه يبين اشياء كثيره عن المكينة

مثل العمر الافتراضي والعمر الباقي

قوة المكينة الآن والبواجي واسلاك البواجي واشياء كثيرة

واهم شيء لايكون الموتر جايته صدمه من الواجهه ولاعبه بحسبة المكينه


يمكن تلقى موتر ماشي 300 الف كيلو

ويمكن تلقى نفس الموتر ماشي 60 الف كيلو

وكلهم نفس الموديل والنوع

واذا فحصتهم يطلع اللي ماشي 300 الف الفضل بكثيييييييييير من ابو 60 الف

والسبب يعود إلى

راعي الموتر اللي ماشي 300 الف يحافظ على صيانة السيارة وتغيير الزيت والسيفون بانتظام

اما راعي الـ 60 الف تلقاه كاد موتره ويمشي على الزيت 20 الف وماعمره غير سيفون

ولا عمره فكر يسوي صيانه



الكلام يطول حول موضوع ممشى السيارة


ارجع لموضوعكم

من الصعب جدا التعرف على العداد المفصوووول

وندعي بالهداية للاخوان اللي يفصلون طبلون سياراتهم :)

[الهوى جنوبي]

بالنسبه للعداد الالكتروني ضعاف النفوس يقومون بتغيير لوحة العدادات من التشليح ويدورون موتر ممشاه قليل وهذه الحركه معروفه ولا يمكن اكتشافها
والله المستعان ( اذا ضيعت الأمانه فارتقب الساعه)

[.أبوعبدالرحمن]

أشكركم جميعا على المرور الكريم


وفعلا مشاركات جميلة



من ناحية الاخ اللي يقول المشكلة هذي تقريبا في جيوب الربع اقوله لا


المشكلة في أغلب السيارات ربع التويوتا والنيسان والهايلكسات والدداسن والباثات وغيرها الكثير


وحتى الان أرى أنه لم نجد الحل الجذري للمشكلة

[صقرالعرب2007]

يا اخوان أنا يوم السبت الماضي لقيت لبالمعارض باث 2006 ماشي 148 ألف وأخذت رقم راعيه وقلتله ابستخير...

دخلت الربوع الماضي وحصلته نفسه ونفس اللوحه ونفس السمكره ومع شخص ثاني والله شهيد على ما أقول حصلته ماشي 83 ألف....!!!

كلمت راعيه عن العداد قالي وبكل بجاحه هذا واحد من الجماعه الله يهديه يبي يخلي الموتر يمشي سوقه وسوا هالحركه..!!!

صار اللعب بالعداد سهل جداً وما تعوق معهم بعض الناس الغش والتدليس ويقولون لماذا منعنا القطر من السماء..؟؟

أبي أعرف طريقه أتعرف من خلالها على ممشى السياره الحقيقي

[هاوي الله]

موتري بعته وهو ماشي 150 الف ويلقاه اخوي بعد شهر وعداده 50 الف !!! لكن اللي يغش لااااابد يجي يوم من الايام وينغش ( هكذا الدنيا تدور )

[الشمطري]

أخي الكريم هناك عدة طرق أعرفها لاكن بواسطتها تعرف أن السيارة ممشاها كثير فقط دون أن تعرف كم المسافة بالضبط وهي1ـ دعسة الفرامل والكلتش البلاستيكية إذا كانت متآكلة فمعناها ممشاها طويل2ـ تاريخ الكفرات الموجود في جنب الكفر إذا كان الكفر تاريخه أحدث من موديل السيارة فمعناها ممشاها طويل خصوصاً إذا كانت نفس كفرات الوكالة 3ـ القير والدركسون إذا كان ظاهر لها لمعه من كثر التغيير ومسك الدركسون والقير :no2:

هذا الكلام منذ مبطي

هالحين شوف عيني يجلدون السارة كاملة لا جيت والى السيارة كلها قراطيس

الدركسون الدعسات الشماسات ازارا المسجل والمكيف ايدي الابواب ويد الدرج ووالفررار حق المكيف وكل شئ تقريباً تلمسة بالموتر اضف على ذلك

قبل البيع يفك كل هالقراطيس ويمر المغسلة ويجلي الكنداسة لين تلق

ويلمع اسفل الموتر ويرجعه لك وكالة ونجيك ياطويل العمر مطفين النور

ولا فيه طريقة تكشف فصل الطبلون ابد ابد

لكن فيه ناس تستطيع ان تثق فيهم بالفحص ويقدر لك الممشى ونوع الإستخدام

هو استخدام حشمة والا لأ ...... والأدهى والأمر تلقاه يعطي ابوه الموتر ويقول بعه لي

والشايب يجيك مدرعم ويتذمم الموتر والناس تمدح هالموتر والله الموتر مع شايب

ومن هالقبيل وفيه نقطة مهمة لا ننسى ان البيع والشراء توفيق من رب العالمين

تقبل مروري

[.أبوعبدالرحمن]

كلام جدا واقعي اخوي الشمطري