والله محتار !!!!!!!!!!!!!!

[صلف الراس]

السلام عليكم ورحمه الله وبركاته




رزقن الله بمبلغ حليل وحبيت اشترى موتر طبعأ (جيب)
بس المشكله بالـ تيوتا والنيسان ومحتار بين



الجي الاستاندر علمان بأن مبلغه (146000)
عادى بس فيه ثلاجه.



والسفاري رقم 1 4800 وقيمته(132000)
مكيف خلفى وثلاجه
وكلهم قير عادى
وانا والله جاى ابى فزعتكم والافاده بهذا الموضوع يالوجيه الطيبه انا مالى خبرتن بهالامور والى عنده خبره لايبخل علينا بيض الله وجهه



وسلامتكم :confused:

[ميشوM]

اخوي انا عندي لك خيار افضل منهم كلهم

فيه جي ليمتد واتوقع انه مايجي الا خليجي يعني عبداللطيف جميل يمكن مايجيبه

وشفته بالمعارض موديل 2008 وهذي مواصفاته

بصمة+توماتيك وعادي+فتحة+مثبت سرعة+ديف لوك+ثلاجة+حساسات أمامي وخلفي وجناح كله + خلفية لكزس واتوقع تقدر تطلب قير عادي واسبيرين حسب مافهمت من صاحب السياره

وكان يبي فيه حدود 135000 وممشاه كان حدود 30 الف انا اشوف انه افضل شئ وكل المواصفات فيه

والراي لك

[راعي الطلعات]

اللاند صراحة سعره غالي ولا فيه مواصفات تستاهل اني ادفع عليه مبلغ كبير

بس يمدحون السفاري صراحة مع انه غلى شوي نفس المواصفات الي انت ذكرتها اخذنا مثله بـ 120 الف قبل فتره موديل 2008وصراحة عز الله موتر شكل ورزه ومواصفات
والله يوفقك وييسر امرك ولا تنسى تستخير الله

بالتوفيق

[عاشق السيل]

أرشح السفاري وأنصحك بالتماتيك !!

[الدوسري دت كم]

ياخوي لاتحتار ابد خذتايوتا على طول مايبلها تفكيرولامشاور اصلا الباترول لويحطون مع الموصفات زود مره جديده لاتاخذه... كله شهر اوشهرين ويطلع الموديل الجديدوالباترول معروف اذاطلع الموديل الجديديطيح الاول من15الى20 الف رح لمعرض نجدواسئل عن2007والمشكله مافيه فرق بينهن ابد.كثيرمن الناس مايعرف الفرق في موديلات الباترول لان مافيه فرق اصلا. وبعدين تعال لتايوتا الصالون وش مركب وش شكل ياحافض ياحفيض وبعدين متعةالقياده ياسلام سلم والنوماس عندالناس ياخوي ماتسمع الي يقول(نصف المال نضره) وبعدين تعال للبيع والله الفرق والله الفرق قوه هذانصيحتي لك والله اعلم واحكم .. ولانتسى الاستخاره.

[ابوطاقية]

نصيحتي خذ تايوتا واستمتع فيه 9 سنوات قادمه الله يعطيك ويعطينا طولة العمر على طاعة الله

[ابن عكاش]

ابصراحه الباترول من وجهة نظري مافيه ميزة إلا ان الدفرس الأمامي دفرنس ماهو فريول اما الباقي وإن كا ن الفتك انشط من الاند إلا انها تهون فمشاكل الفتك معرفه وقوة تحمل الاند معروفه وكلاً له نظره وانا جربت الهدد بصراحه موتر

[بو خليفه]

انا اقول اشتر اللي أقل سعر لأنهم نفس الفئة

[التميمي 20]

إذا كنت تبحث عن القوة والمتانة والصبر ...

السفاري هو الخيار الامثل , التايوتا الجديد مثل الامريكي وافتح الكبوت تزغلل عيونك من كثر البلاوي ...

غيره النفس وماتهوى وأنصك بالتماتيك أفضل واريح الا اذا كنت في منطقة ليست مزدحمة كالرياض ومع ذلك ترى التماتيك الآن ممتاز ومافيه خوف ابدا ...


الله يكتب لك الخير والجميع إن شاءالله ...

[مدمن فتك]

اخوي انا ابعطيك المواصفات والخيار لك:
اولا السفاري:1_ سعره ارخص من اللاند
2_ ياباني من صدام الى صدام
3_ دفرنسين والدبل قير
4_ بالبر والخط انشط ولا منافسه للكروزر ابدا مع الفتك
5_ المكينة 4800 يعني طرب
6_ صيانته تعيبه وهذي لان الوكيل غير مؤهل مع احترامي الحمراني والجبر الله يجبر حالنا وحاله
7_ القير تبرتونيك بينما الكروزر مافيه
8_ فيه امكانيات اضافة افياش كهرب وغيره بينما الكروزر مافيه..
ثانيا : اللاند كروز:
1_السعر مبالغ فيه يكفي اقل نوع ب147
2_ لايسلم من تلاعب عبداللطيف جميل
3_ لايعرف من اليابان الا الاسم فقط
4_ فريول قدام والدبل زرار
5_ بالبر ثقيل وهذا بكلام اهل اللاند انفسهم
6_ سمعته حلوة لكن ارى انها تلاشت مهي مثل اول
7_ الكروزر بنظري 97 ونازل.
الراجح : ياخي خذلك فتك وخل المصخره..

[ابو نايف 111]

ابعد عن الباترول:no2:

[الدوسري دت كم]

يارعي الشروكي احترم رايك مع المحتار لاكن مادامك راعي شروكي يكفيك الموتر الي معك ولاتشورعلى احد قبل نفسك.
والسلام على الجميع

[الفتكاوي]

ابو فلان ..


تبي موتر يطربك وتفله معه ويطرب القلب ممشاه عند الفتك ..



الفتك ياباني .. اصيل .. مهوب مثل الاند الي ما ندري وش اصله ..



الفتك مثلك عارف مكينة 6 سلندر 4800 بقوة 280 حصان .. لكن الاند 6 سلندر 4000 وبقوة 240 حصان .. يعني الفتك مكينة اكبر واقوى وتعيش اكثر من الاند ...



الفتك خفيف ومريح بالخطوط .. اما الاند ثقيل طبله بالعون يمشي مكينة الستة سلندر يا الله تحمله اما مكينة الثمانيه ثقيله وغاليه ...


الفتك سمعته احلا من الاند الجديد ... الفتك قير الدبل تروس - يعني دفرنس قدام -


وبعدين لو نزل 2010 يبي يكون مهب مرغوب فا انا اقول تغانم عمرك قبل يطير سعر الموديل الحالي ...



وإن اخذت لا تأخذ إلا لؤلؤي تراه ارغب عند البيع ويفرق واجد عن الألوان الثانيه ..


والله يوفقك

[هاوي m6r]

اخوي
انا عندي لاند

جي لمتد 2008

فتحه دفلوك قير تماتيك ثلاجه حساسات اماميه وخلفيه خلفيه لكزس
كسيت وسيدي

ماشي 27الف نضيف ماجته صدوم ولا شي والحمد لله

والصيانات موب كلها في الوكاله

وما طب النفود الى مره وحده بس

ووقف عند الخيمه ماتحرك الى يوم طلع


على الشرط

اذا لك نضر ردلي على الخاص

[مدمن فتك]

يارعي الشروكي احترم رايك مع المحتار لاكن مادامك راعي شروكي يكفيك الموتر الي معك ولاتشورعلى احد قبل نفسك.
والسلام على الجميع
اولا :جزاك الله خير يالدوسري وكثر خير على ردك المحترم وهذا يدل على رقيك واسلوبك العالي في الحوار:no:
ثانيا:انت تقول احترم رايك وينك ويين احترام رايي :rolleyes: وانت تسكتني قدام المنتدى وانت تعرف ان الاختلاف في الراي لايفسد للود قضيه.
ثالثا ابو هريره قبل النصيحه من ابليس واقره النبي صلى الله عليه وسلم على ذلك
رابعا: اتمنى من اللي يبي يرد يوسع صدره تراها الدعوى حديد ماتسوى نرد على بعض وهي اراء قابلة للصواب والغلط..:no: والسلام

[طخيمان]

اخوي انا والله جربت الاثنين واقولك

اللاند تركبه تحس ان معك موتر شيوخ صدق ما تسمع صوت للمكينة ومراتبه مريحة ومطبه خفيف مرة وممشاه في البنزين اكثر الكلام هذا كله عن ال8 سلندر

الباترول ما يميزه عن اللامد ال6 سلندر اللا خفة وزنه ونشاطه في الخط و البر


رايي خذلك لاند كروزر بس يكوةن 8 سلندر

[الرياضي1111]

السلام عليكم
أنا اقول شف مواضيع الي يشتكون من السفاري واجد
لكن الاند ما عمري شفت عليه شكوى
وعليك بالاستخاره

[مدمن فتك]

ياعزيزي جرب اللاند وجرب الفتك وبتشوف الفرق وش جاب حر الطير(الفتك) لفريخ وزه(اللاند)
موفق

[الدوسري دت كم]

لالالا ياخوي ترا الغلط مرجوع ولايصيربا الخاطرشي , يا خوي كان هذا النقاش بيي يسوي شي مهوب زين بالخاطر تراي انسحب مهوب من هالنقاش وبس انا انسحب من المنتدا كله . لاكن هي افكار ومقترحات ونقاشات بعض الاحيان تصير دافيه واحيان تصيرساخنه واحيان تصيرحاره؟؟؟ لاكن لايصيربالخطرشي تراه ماتسوى وانا اخوك...

[مدمن فتك]

الله يعفو عني وعنك وكل مسلم وتعجبني يالدوسري بردك ورجولتك واضحه في ردك وهذا يدل على رقي اخلاقك وعقلك..
الله يستر علينا وعليك
موفق

[ابن عكاش]

ياعزيزي جرب اللاند وجرب الفتك وبتشوف الفرق وش جاب حر الطير(الفتك) لفريخ وزه(اللاند)
موفق
مع اني اقول ان السفاري لازال دفرس والدبل قير ومع ذلك ما استطاع يغلب الاند في الشعبيه ايضاً إذا دخل gx97 في المعارض شف الزباين عليه طيب مليه هالمهبل ماياخذون فتك

[الدوسري دت كم]

السلام عليكم . ياخوان انا اشوف الشباب يقولون ان الدفرنس(المتصل) افضل من الفليور(المنفصل) وهذا يااخوان خطا كبير, ماعلينامن نيسان اوتويوتا, حنى نتكلم من الناحيه الفنيه والتقنيه للسياره. للمعلوميه فأن كل سيارات الحرب الامريكيه والالمانيه والفرنسيه واليابانيه كلها نضام تعليق منفصل ليش؟
اول شي انه يعطي السياره ثبات عالي على المنعطفات في السرعات, ثاني شي يعطي السياره مرونه اعلى اثناء السير على الطرق الوعره والموحله وتسلق المرتفعات , ثالث شي يعطي راحه ومتعه اثناء القياده بسبب ماسبق ذكره وبعد لان كل واحد من الكفرات ياكل مطب لحاله ماله دخل بالثاني ...
وبعدين اشكرك اخوي راعي الشروكي على الرد الزين

[برسلي الخالدي]

السفاري النيسان مشكل كثير بتصير لك علاقه بالكهربائيين

التيوتا الجديد غبي لامن داخل ولا من برى وحساس

خلك على الجي اكس الـ2007 وتحت

[مواسي الطعوس]

ياخوي لاتحتار ابد خذتايوتا على طول مايبلها تفكيرولامشاور اصلا الباترول لويحطون مع الموصفات زود مره جديده لاتاخذه... كله شهر اوشهرين ويطلع الموديل الجديدوالباترول معروف اذاطلع الموديل الجديديطيح الاول من15الى20 الف رح لمعرض نجدواسئل عن2007والمشكله مافيه فرق بينهن ابد.كثيرمن الناس مايعرف الفرق في موديلات الباترول لان مافيه فرق اصلا. وبعدين تعال لتايوتا الصالون وش مركب وش شكل ياحافض ياحفيض وبعدين متعةالقياده ياسلام سلم والنوماس عندالناس ياخوي ماتسمع الي يقول(نصف المال نضره) وبعدين تعال للبيع والله الفرق والله الفرق قوه هذانصيحتي لك والله اعلم واحكم .. ولانتسىالاستخاره.
**********************************************

الله من الهياط اللي ماله داعي .

[الدوسري دت كم]

ارجومن الي مسمي نفسه مواسي الطعوس انه يوضح الرد حقه شان يستفيد الجميع؟؟

[ساري 111]

7_ القير تبرتونيك بينما الكروزر مافيه

ماعمري شفت راعي باترول إلا مشغلنا عند هالقير تقل مافيه غيره

ترى الجيب الأوتو الجديد فيه هذه الميزه ..

الأمر الثاني نصيحه اذا تبي تفرق بين الموترين لاتسمع لاكلامي ولاكلام الناس ..
جرب والتجربه خير برهان ..

غااالب اللي يشير عليك يكون الموتر معه ومتعصب له

خذ لك باترول ومغطه برادميه وامش 90 او 100

وبعده

خذلك جيب ومغطه مثل مامغطت الباترول راااح تشوف الفرق ..

صدقني عقب الجيب تبدا تناظر الباترول ددسن ..

وترك كلااام الناس .. والله ماابي اشحن الموضوع بس هذه نصيحه من أخ يحب لك الخير

وعلى فكره ترى الجيب شيخ وعز بكل مكان وزمااان

وبالنسبه للاسعار لايهمك زود الجيب 10 الاف

تشري الجيب 146000 وتبيعه بعد شهر 140الف
وتشري الباترول132000 وتبيعه بعد شهر 110 الاف

وعقلك براسك وتعرف خلاصك .. والعاقل خصيم نفسه

ولاتنسى تستخير