اخي شاري سياره جديده من معرض وحصلتها مصدومه ،،، تصدقون !!

[ابوريناد1979]

ياجماعه اللي يبي شتري سياره جديده من اي معرض يشيك عليها قبل يستلمها !!!

البارح اخوي شرى فورتشر رصاصي 2009 تماتيك يدون دبل من معرض نجد اللي بالنسيم
لما جا يستلمها اليوم الصباح حصل عفط بالرفرف الأمامي الأيمن:eek:
المشكله ماخبروه عنها ولا شي توه ماخذ المفتاح بيمشي
رجع للمصري صاحب المعرض وسوا نفسه مايعرف شي قال خلاص خذ السياره ورح للمدير بالمعرض الثاني (يبون يخلون مسؤليتهم باستلام السياره )
قال اخوي ماادق سلفها ولا اتحرك منها لين يجي صاحب المعرض ويوم جا قال خلاص بنصلحها لك وكاله وماصار الا الخير :D (من وين يجي الخير)
قال اخوي حل من اثنين ياتجيني سياره من الوكاله جديده ولا فلوسي ترجع
وعقب عراك رجع فلوسه
المهم من باب التحذير اكيد المعرض بيصلحها وكاله ويبيعها على انها جديده فانتبهوا اي واحد تعرفونه يبي يشتري هالسياره من المعرض انتبهوا له لو نزل فيها شوي !!!
المشكله نفس القصه صارت مع واحد من اخوياي كان ماخذ كامري من عبداللطيف واكتشف بعدين ان الصدام الامامي مرشوش :(
والله على ماقول شهيد

[الضاحي]

لاحول ولاقوة الا بالله

ذمم بعض التجار منتهية الصلاحية اللع يهديهم

اعجبني اخوك الذيب اللي فك حقه منهم

[taag1]

حسبنا الله وحده نعم الوكيل الله يعين اخوك على هالنصب .,.,.,

[شنطة عده]

لا ذمة ولا ضمير
الله لا يوفق من يغش الناس

[قناص الطير]

إنا لله وإنا إليه راجعون ( ظهر الفساد في البر والبحر بما كسبت ايدي الناس ) .

[العزوبي711]

ماقصرت يالغالي الله يعطيك الف عافيه0000000000000000

[صحاري 97]

لاحول ولاقوة الا بالله

[سطام vip]

الله يكون بالعون على هالنصب والله مشكله

واحد من الربع اشترى نيسان التيما على عزها من الوكاله

وركب اخوه معه وانكب ببسي على الارضيه خوينا فكر الفرشه الارضيه

ويحصل القاعده مقصوصه وملحمه تلحيم اسود يعني شغل ورشه

----------------------------
شايب مطلع هايلكس وجلس معه كذا سنه ودخل المعارض يبيعه

قابله شريطي وقال له الموتر منقلب؟؟ قال لا والله الموتر من طلعته وكاله

واهو تحت رجلي ما اعطيه احد قال جاك العلم الموتر منقلب وبالفحص والتتدقيق

لقوه بالفعل منقلب ومسمكر وماشيه على هالشايب كذا سنه ما يدري عنه

وشكل الوكاله مسمكرته ومعطينه هالشايب الله لا يوفقهم

اذا شريت موتر من المعارض تخاف من النصب والشريطيه

واذا شريته من الوكاله مالهم ذمه واخس من الشريطيه

الله يكون بالعون وحسبنا الله على كل من غش مسلم

دمت بحفظ المولى وشاكرين لك هالتحذير

[الدبل الثقيل]

جزاك الله خير ...

لكن ياليت تحط الموضوع في الساحات ومنتدى السيارات المشهور والمنتديات الخاصة بالرياض ...

الله يكافيهم بما يستحقون ..

[ريف النشاما]

الغش في المعارض زي سلامو عليكم


الذمة معدومة نهائيا

[واقعي وعقلاني]

ياأخوان بعد الي أشوفه من بعض التجار ولا نعمم ومن واقع تجربه تعامل بالخارج ايام دراستي والله افضل التعامل مع اليهود على هؤلاء التجار ...
باعوا ذممهم وأساءوا لديننا ...

[كبسولة2]

يا أخوان ولد عمي شريطي سيارات

شاري gxr موديل 2006 على أيامه من وكالة جدة جدييييييييييييد بقراطيسة

المهم يوم جاء يستلمه ويقلبه لقى الصدام والكبوت مرشوشة رشة صح ماحد يقدر

يطلعها من حبكتها المهم قال لهم السيارة مصدومة ومعدله ومرشوش الكبوت

قالوا لالالالالالالا مستحيل السيارة جديدة تونا جايبينها من المستودع قال أقول السيارة

مسمكرة ولا أبيها أما تجيبون فلوسي ولا سيارة غيرها مافيه ياحرامية يانصابين

قالوا وش دراك قال أنا شريطي سيارات من عمري 10 سنوات والآن شايب عمري 50 سنة

وأعرف السيارة من النظرة الأولى المهم طلعة ونزلة أسبوع وغيروها له وعطوه وحدة ثانية

المهم يوم أستلم السيارة جاه واحد سيكرتي سعودي من شباب جدة شغال في الوكالة

ويذكر سالفته من الأسبوع الماضي طلع معه عند بوابة الوكالة يسولف معه

قال والله أنك تعجبني ياهالشايب ذيب ماشاء الله عليك كفشت حركتهم القذرة

السيارة الأولى الي عطوك إيها مصدومة في الوجة عندما نزلوها من الباخرة

وسمكروها وضبطوها وأرادوا بيعك أيها بس أنت كفشتهم صح

لكن للأسف باعوها لواحد غيرك ولا درى عن الصدمة !!!!!!!

وغيرها سيارات كثير تنصدم في المستودعات وتنحك مع الجنب من التنزيل والتحميل

ويضبطونها ويبيعونها على الخلق الداخية

[دله وفنجال]

السلام عليكم...


اخواني من ناحيت النصب والاحتيال فلي تجربة مريرة معهم...

عام 99 شريت كامري من عبداللطيف جميل ويوم مشيتها 1000 كيلو دخلتها تشييك بصيانة عنيزة ولاكنهم خربولي الديكور لقيته مكسر وبعد هواش معهم قالو نبي انغيرة لك وروح لم الرياض وغيرة بمركز صيانة طريق خريص عند دوار القاعدة ويقعد المصري يمرمط فيني اسبوع ياجماعه وبيوم من الايام دق واحد من ربعي علي يقولي سلامات يابو فلان عسا ماشر الموتر لاقية مصدوم ومسمكر وهذاه يرش بوية عند الوكالة .. قلتله الموتر بلصيانه ولافيه اخلاف وشجابة للسمكرة.. ويوم تبقشت الامور لقيت الوكالة صادمين فية ومصلحينه ويبون يسلمونه لي على اساس انه ماجاه شي شف الذمة وين اوصلت بهم حسبي الله عليهم الى يوم الدين...

[النحيف]

ربنا على الظالم والمفتري

الله يمحق رزقهم

ويلحقهم الفقر

[ابوسعودد]

يالربع لا احد يلوم هالوكالات اذا ما سوت هالحركه يخسرون
ناخذ الكامري اللي مرشوش صدامها مثال :
الكامري قيمتها مثلا 80 الف وهي طالعه عليهم واصله لين المستودع 75 الف ههههه طبعا ال 75 اعكسها تصير 57 ولاتنسى تحذف النص تصير 28500 القيمه الحقيقيه للسياره
تكلفة تغيير الصدام مع الرش 1500 ريال مثلا
طلعت عليه الحين 76500
لو قالولك الوكاله ان الصدام مرشوش ماراح تاخذها ولو ب 70 الف
فهم مضطرين انهم يكذبون عشان مايخسرون 6500 من راس مال السياره تعرفون انتم ان عندهم موظفين ورواتبهم ومصاريف مايعلم بها الا الله

[NOYEB]

حسبي الله ونعم الوكيل

[الــفــيــصــــل]

إنا لله وإنا إليه راجعون

[راعي الطلعات]

ما هو اول واحد الوكلاء يغشونك عيني عينك يكفيك انها قبل ما تنزل السوق مركب عليها اضافات وخرابيط زي رديتر ماليزي فحمات تيوانيه كمبرسر هندي

الله يعين بس الوكلاء لاعبين في البلد لعب ولحد قاليهم ليش

لكن الله يمهل ولا يهمل

الله يهدي الجميع ان شاءالله