والله حرام ليش ابيعه تكفون دلوني

[مون14]

بسم الله الرحمن الرحيم


ياخوان معاي بليز 2004 امريكي صارلة معي سنه مشكلتي معة في الحراره في الصيف اوقف بعض الاحيان على الجسر من3 الى4 ساعات والمكيف شغال ودرجه حراره الجو واصلة50 درجه والحراره اوكيه تحت النص طبيعي ..........
بس يوم امشي فيها من بعد 100كم تبدى ترتفع وكل مازادت السرعه كل مارتفعت الحراره وتوصل بعض الاحيان للربع الاخير من H وبعض الحيان من بعد70كم او80كم
وماعرفت له حل واصحاب الورش صراحة لحسو مخي كل واحد يقلك كلام وماتدري وشو الصح من الخطا
واللي عنده حل لمشكلتي جزاة الله خير


ملاحضه(في الشتاء الوضع اوكيه حتى لوجبت طبلونه)

[كبسولة2]

أعتقد الرديتر فيه مشكلة !!!!

وإذا سليم شيك على البلف يسوي نفس الأعراض

[الشمطري]

تأكد من السيور

واذا فيه تنسيم للهواء في الرديتر حاول انك تسوي له تنسيم او تودية لمختص

نفس المشكلة وانحلت بإخراج الهواء من الرديتر

[زيزوووم]

هذا الله يسلمك تروح للي يصلحون الرديترات وتتأكد من عدة نقاط :
1 - تهريب
2 - غطاء الرديتر
3 - المروحة
4 - حساس الحرارة
5 - الليات
6 - اذ كان يهرب يسويله تسييخ وتنظيف ويسد أماكن التهريب باللحام وغير غطاء الرديتر (وتأكد انه يحط شوية مويه ويختبره بظغط الهوا) وبإذن الله ما راح تشوف الحرارة مرة ثانية .


أما اذا ما نفعت معاك هذي الأشياء فلازم تتأكد من راس المكينة وتفحصها عند واحد 100% لأنه اذا راس المكينة ما فيه مشكلة واتبعت النقاط اللي أعلاه فإنشاء الله ما فيه شي اسمه حرارة .

وإنشاء الله اني أكون أفدتك

هذا اللي عندي وسلامتك

[برق السما]

................... مكرر

[برق السما]

مشكلتك بسيطة أخوي ,

حط في بالك ان المراوح سليمة بإذن الله لإنك تقول إني أوقف بالساعات في الجسر مع المكيف ودرجة الحراراة العالية ومع ذلك الحرارة حلوة ..

شوري عليك سيخ الراديتر أول شي ..
ثم تعال هنا :)

مع اني اتوقع أنه بإذن الله تنتهي مشكلتك مع التسييخ ..

قد حصلت معي ومع التسييخ زالت : )

[abo.a]

علمي علمك بس انا اتوقع المشكله احد امرين الي هو يارديتر يا مروووووووووحه

[saudali]

اذا انت متولع بالسياره سو الي قالك اخوي زيزوم وتحياتي للكل

[شبروق]

الشبــاب اعطوك الحلول وان شاء الله تفيدك

[الدوسري دت كم]

:no2: لاتبيعه لالالا عندك الاديترفيه المشكله لاتعداه ابد, ياانك تصيخيه عند واحد ثقه او انك تغيره باصلي لازم اصلي ولا لاتغيره الله يعينك والسلام

[H5N1]

لاتنسون الشكمان يمكن يكون فيه طعج
وهذا سبب للحرارة .

[Magellan]

شف مايعطيك العلم إلا من جرب الموتر وبخصه وأنا معي واحد 2006 سعودي
مشكلته بإختصار هي كلتش المروحة فقط
أسأل مجرب ولاتسأل خبير
طبعا من موديل 2006 تلافوا هالمشكلة لذلك يلزمك تغييره بنوعية محسنة ولابد يكون رقمه 25790869

طبعا للمعلومات الإضافية خذها من الموضوع أسفل:

بشرى لأصحاب البليزر والإنفوي نزول إصدار جديد معدل ومحسن من كلتش المروحة (http://www.assayyarat.com/forums/showthread.php?t=137636)

طبعا أفترض مافيه مشاكل بالراس مثل تفوير القربة ويباس ليات الرديتر بشكل قوي وعدم تشغيل السيارة من أول نتشة

[ابن مدهون]

تأكد من خرطوش الماء اللي رايح للراس من الرديتر لأنه مع السرعة يتسفط ويضيق

له حلين ياتركب اصلي او يوضع في داخله مثل النابض ( الياي ) صغير عشان مايسفط

دايم تصير بأغلب السيارات الألمانية والامريكية


الا كلها بصفة عامه

[ابو خطاب]

تحليل لمشكلة سيارتك:
1- اذا موية الرديتر نظيفة . . فمعنى ذلك لا داعي لتصييخ الرديتر . . بس تاكد من تجديد كامل الموية بموية اصلية مع اضافة ماء مقطر ليدوم عمر طرمبة الماء واجزاء التبريد عمراً اطول.
2- بلف الحرارة عندك قافل او شبه فافل يحتاج تغيير . . لا ختبار ذلك اول ماتشغل الموتر الصبح والموتر بارد امسك الخرطوش العلوي اذا لقيته حاشر مضغوط من اول ما تشغل معناها ان البلف ما يفتح بالكامل . . لذلك غيره و وهو موجود تحت الكوع. . علامة اخرى اذا شغلت الموتر وهو بارد وتاخرت درجة الحرارة في الارتفاع الى الوضع الطبيعي بزيادة عن الوقت المعتاد الا لما تدوس للموتر او تمشي فهذا يدل على تأخر تدفق الماء عبر فتحت البلف. ما يفتح بالكامل.
3- احذر من انغلاق البلف بالكامل لان ذلك سيؤدي الى انفجار احد الخراطيش.
4- لو كان المشكلة من توماتيك المروحة (ان وجد في موترك) مع انه ما يجي الا بالهفي دوتي. فكان ترتفع الحرارة وانت واقف وتنخفض اذا مشيت وضرب الرديتر هواء يعوضه عن هواء المروحة الخربانه.
5- احتمال وارد اذا كنت تسمع صوت لقلقه اذا دعست وانت تمشي بخط . . فهذا يعني ان توقيت شرارة الاشعال متأخرة (الدلكو) وهذا احتمال ضعيف لانه الكتروني ومبرمج يتقدم ويتاخر حسب سرعة دوران المحرك. . اذا فيه لمبة صفراء بالطبلون تفيد بتشييك المحرك فقد تكون البرمجة او قراءة كمبيوتر السيارة تفيدك بالعطل.
6- اضعف احتمال. . ان كان الموتر استعمال امريكي . . فقد تكون دبة الببيئة مليانة بمخلفات الاحتراق الصلبة وكاتمة الموتر.
ارجو اني افدتك.

[مون14]

مشكورين ياخوان على مروركم وانشاء الله اكون استفت بعض الشي واحب اوضح عده نقاط
1_ اول ماجاني الموتر من امريكى العام الماضي بعد ما جتني المشكله على طول قالولي كلتش المروحه ورحت للتوكيلات وخذيتلي واحد وركبته ولا فاد
2_قالولي الديتر يبيله تسييخ وسيخته وركبتله مويه اصليه والين اليوم مويته نظيفه بس مافاد
3_قالولي الشكمان وديته لمحل الشكمانات وقلولي الدبه اللي فيها ماده الرصاص يبيلك تشيلها لانه امريكا بارده ويحطونها عشان ترجع هواء حار للمكينه وتسخن المكينه لاكن الباكستاني حق الشكمانات نصحني ماشيلها وخليتها
4_وصراحه باقي البلف ماشيكت عليه بس امس شغلت السياره الصبح وفتحت اللديتر بعدخمس دقايق المويه ماتحركت مدري عادي الوضع ولا في مشكله.................احب اوضح لكلام الاخ ماجلان بانسبه للليات انا حاس انها قويه من جد كانه ظاربتها شمس تتوقع تكون السبب
وذا كانت حلولكم السبب ليش ماترتفع الحراره وهي واقفه


واسمحولي طولتها عليكم,,,

[ابويارا1001]

أخي العزيز


انا استخدمت تريل بليزر وانفوي لمدة 4 سنوات
وزي ما قلت انت الحرارة وانت واقف على النص او تحت شوي


وعلى الخط بالصيف ترتفع الى ثلاث ارباع على سرعة 180
ولك هذا الكلام لشرح تجربة فقط

طبعا ما انصحك بالسرعة بل احذر منها


رحت للوكاله والسيارة ما كانت على الضمان
(يعني كانو يقدرون ينصبون علي لأن الصيانة على حسابي)
وقالوا لي هذا شي طبيعي لان حرارة سائل التبريد على النص 99 درجة مئوية
واذا كان على الثلاث ارباع تكون الحرارة 107 درجة مئوية
(هذه القراءة من جهاز كمبيوتر الوكالة اثناء الفحص)


فإذا كانت الحرارة ما تعدى ثلاث ارباع في اقصى الظروف فهذا الوضع طبيعي


وانت تقدر تتحكم فيها من ناحية السرعة كل ما اسرعت تزيد الحرارة


هذا حصل معاي في سياراتي وكذلك سيارة احد الزملاء
وكلها كانت موديل 2003


ممكن يكون فيه كلتش مروحة جديد معدل زي ما ذكر احد الاخوان




لا تخسر عمرك دام الحرارة بين النص والثلاث ارباع


وبالتوفيق

[برسلي الخالدي]

حبيب قلبي معروف وارد امريكا اول ماتجيبه لازم تبدل رقع الماء اللي بالمكينه
او ماتسمى بالكويتي الطبات

تقبل خالص تحياتي

بدلهن ولاحض الفرق

[Magellan]

4_وصراحه باقي البلف ماشيكت عليه بس امس شغلت السياره الصبح وفتحت اللديتر بعدخمس دقايق المويه ماتحركت مدري عادي الوضع ولا في مشكله.................احب اوضح لكلام الاخ ماجلان بانسبه للليات انا حاس انها قويه من جد كانه ظاربتها شمس تتوقع تكون السبب
وذا كانت حلولكم السبب ليش ماترتفع الحراره وهي واقفه



واسمحولي طولتها عليكم,,,



لا مو عادي
لازم تشوف الماء تتحرك وإذا ماتحركت الموية معناتها 100% من طرمبة الماء خربانه
أما صلابة الليات فعادي وقت السيارة شغالة والسيارة محتمية إلا في حالة إنك ماتقدر حتى بأصابعك تثني شيء بسيط هذا نقدرنقول من الراس ، بس لازم يرافقه تفوير القربة عشان نقول الراس 100% مضروب ،،،
لكن من كلامك أتوقع الراس عندك سليم بسبب إن الراس لو هو خربان تلقاه طوالي بعد تشغيل السيارة ترتفع الحرارة للH ووقت الزحمات كذلك ....
لكن بالنسبة لك خل أمورك محصورة بين إثنين
1- البلف : وللتأكد إنه غير سليم إلمس (اللي) اللي رايح للمكينة إذا كان حار بزيادة فالبلف عندك مايفتح..
2- طرمبة الماء، وهذي أرشحها بقوة بسبب لو شغلت السيارة وفتحت الرديتر لازم تشوف الماء يتحرك ، إذا شفته مايتحرك فطوالي الطرمبة خربانه

[مخاوي السامر]

انا صارت معي في جمس
اذا واقف مع المكيف
الحراره ربع الى الثلث

واذا مشيت ترتفع الحرارة

وبعد مراجعة الورش
غسلت المكينة مع تنظيف الاديتر وغيرة الماء الى ماء مقطر وبعض القطع
ومع هذا استمرة المشكلة

وبالصدفة عند كهربائي في الصناعية النسيم (ابوشادي)
اكتشف المشكلة وكانت
مروحة التبريد يوجد فيها سلكين لعكس اتجاه المروحه
وكانت شغالة تدفع الهواء للخارج ولا تبرد على الاديتر
والحمدلله صار اكثر من سنتين
والوضع تمام

[ابو خطاب]

3_قالولي الشكمان وديته لمحل الشكمانات وقلولي الدبه اللي فيها ماده الرصاص يبيلك تشيلها لانه امريكا بارده ويحطونها عشان ترجع هواء حار للمكينه وتسخن المكينه لاكن الباكستاني حق الشكمانات نصحني ماشيلها وخليتها

4_وصراحه باقي البلف ماشيكت عليه بس امس شغلت السياره الصبح وفتحت اللديتر بعدخمس دقايق المويه ماتحركت مدري عادي الوضع ولا في مشكله.................
طيب يوم المويه ما تحركت بعد خمس دقايق الحرارة وصلت لمعدلها الطبيعي ولا لسه طايحه؟؟ اذا كانت بمعدلها الطبيعي ودعست بنزين ولسه مادارت معنها البلف مهب مضبوط. واذا الحرارة طايحه بعد خمس دقايق والويه ما تدور فهذا وضع طبيعي . هذا لان المويه مابعد سخنت داخل السرندل ولا تدور الا بعد ما يفتح البلف عند وصول حرارة الموية لمعدلها الطبيعي. اما دفع طرمبة الماء فيعود عبر الخرطوش من الطرمبة الى الثلاجة دون المرور بالرديت وذلك حتى يفتح البلف معلن وصول الحرارة لمعدلها الطبيعي فيذهب الماء للرديتر ليبرد هناك. وانا استغرب انك فتحت الرديتر بعد خمس دقايق .. يفترض تكون المويه حاره ! ! وهاذي دلالة ان البلف عندك شبه قافل ما يفتح صح فتبقى المويه الحارة داخل السرندل .
وذا كانت حلولكم السبب ليش ماترتفع الحراره وهي واقفه



واسمحولي طولتها عليكم,,,


لان كميه الماء النافذه عبر البلف كافيه لتبريد المحرك على السرعات المنخقضة لدوران المحرك.وغير مناسبة على السرعات العالية. . وللعلم احياناً ازلة البلف تزيد الحرارة على السرعات العالية. وعلامة عدم وجود بلف هو تغير حرارة السيارة مابين الوقوف والمشي او المكيف.

[بـلـيـهـان 1]

كلام أبو خطاب عين العقل

--

انصحك بغسيل المكينه غسيل داخلي فهناك ناس قاموا بتجربته و إختفت الحراره