استفسار عن صرفية البنزين للاندكروزرgxr

[الزين غالي]

السلام عليكم
اخواني الاعزاء حاب استفسر عندي لاندكروزر gxr مديل 2006 بصراحة احس انه يصرف ، في وسط المدينة التانكيين تمشيني حول 450 كيلو تقريباً وللعلم جربت اكثر من مره نفس الشي ولحد الحين لم اجرب السيارة علي الخط
استفساري هل هذه الصرفية طبيعي او في مشكلة
تحياتي

[الهدد1111]

وعليكم السلام نعم الصرفيه طبيعي بس كل واحد ورجله على الدعسه

[زيزوووم]

وعليكم السلام
عادي جدا لأن استهلاك البنزين داخل المدينة أكثر من الخط لأنك على الخط دعستك ثابتة
فلا تهتم للموضوع لكن خل رجلك خفيفة على الدعسة وانشاء الله ما يصرف

[الزين غالي]

اشكرك اخي القبطان وكذالك اخي زيزوووم علي سرعة ردكم
وعلي فكرة سواقتي هادية مره وفي ناس يقولون في فرق في الصرفية لنوع البنزين بين 91 و 95 بس مدري صحيح

[مواسي الطعوس]

450 فقط . ياخوي هذه صرفيه تانكي واحد فقط . هذا وانت تقول قيادتي هادئه .



** لعلمك التانكيين حجمهم كبير مقارنه بالسيارات الثانيه الامريكي والارمادا . وكذلك مقارنه بالسفاري وهذا شفته عن طريق التجربه . ولاتهمك الانبيرات والكتالوجات فيها تلاعب واضح .

[أبوسعد 511]

استخدم بنزين 95

[sameer_1798]

والله أحس أن فيها مشكلة ... للعلم أنا لم أقيس المسافة في وسط البلد
ولكن على الخطوط تمشيني التانكيين من 650 إلى 750 كلم على حسب الدعسه .

[ابن عكاش]

والله أحس أن فيها مشكلة ... للعلم أنا لم أقيس المسافة في وسط البلد
ولكن على الخطوط تمشيني التانكيين من 650 إلى 750 كلم على حسب الدعسه .
مثل ماقال الاخ من 650إلى 750 وداخل البلد اقل شي ممكن 550

[مواسي الطعوس]

يعني من كلام الشباب فيه عله . ماهي ؟؟؟؟؟؟؟؟؟؟؟؟؟


المفروض الموتر يمشي اقل شي 600 كم

[زاير الغيم]

وأنا أخوك سيارتك مابها مشكلة ولاشئ؟؟


خصوصاً داخل المدينة السيارة تاقف وتمشي والمكيف شغال ..


وبعدين ماتقدر تحكم عليها بالصرفية إلا على خط


يعني لو إنك ماسك خط وبسرعة 140 كم وفوق يمشيك 450 كم التانكيين تقريباً


وإذا ماتتعدى الــ 120 كم يمشيك إلى 700 كم..


لكن خذ هالنصايح وراح تخفف من صرف البنزين بإذن الله..


طبعاً داخل المدينة:


1- فيه زر بالقير على جنب لاصرت بالديرة أضغطه تطلع لك لمبة برتقالية off على الطبلون.


2-لاتشغل الثلاجة إلا للحاجة.


3-دائماً شيك على البواجي وفلتر الهواء لأنها تعطي عزم للسيارة لأنها لوكانت قديمة مافيه عزم وراح تشد


على الموتر طلباً لأداء أفضل.


4- وهذي للخط إذا كان فيه مثبت للسرعة عزالله هذا اللي يوفر البنزين دائماً استخدمه إذا كان الطريق


مستوي يعني مافيه منحدرات ولا طلعات.


5- وهذي للخط برضوه إذا كان الهواء بوجهك خفف الدعسه والعكس.


وأنصحك لاتلعب بالموتر من جهة الميكانيكا لأن موترك ماشاء الله جديد..


وفقنا الله لما يحبه ويرضاه

[راعي الصطحه]

نعم استخدمت 91 وقام يتفتف رجعت 95

والصرفيه حوالى 700كم
اما بالبلد يصرف

وتقبلوا تحياتي

[خيال الغلبا]

استعمل 95 ............

[الزين غالي]

اولاً اشكر جميع الاخوان علي تكرمهم بالمشورة والنقاش
ثانياً عن نفسي احس انه في مشكلة ومن امس خليت التانكيين تفضى مره وعبيت 91 واحس ان الوضع اهون شوي........ ابي اجرب 91 وشوف كم كيلو يمشي وان شاء الله اعطيكم خبر
تحياتي

[راعي الطلعات]

طبيعي ماشاءالله وترى صرفية داخل المدينه اكثر من صرفية على خط واحد

بالتوفيق والله يعطيك خيره ويكفيك شره

[fusion]

- فيه زر بالقير على جنب لاصرت بالديرة أضغطه تطلع لك لمبة برتقالية off على الطبلون؟؟؟؟ايش قصته هذا لانه مو واضح بالكتالوج ابدا؟؟؟؟

انا معي جكسار 2002 وعبيه 91 ويمشي 600 تقريبا بالبلد وايتوماتك وسواقتي هاديه

[باوزير]

انا عندي Gx قير عادي 2004 و التانكيين يمشوني حوالي 570 كيلو اصلا صرفية اللاندكروزر عالية