المساعد الشخصي الرقمي

مشاهدة النسخة كاملة : نظام Abs في اللاندكروزر عطلان وسعرة (7000) هل تعرف أحد يصلحه "دعوة في ظهر الغيب "


عبـــد الله
08/06/2009, 01:11 PM
السلام عليكم ورحمة الله وبركاته ..وبعد

السيارة جي أكس أر 2003

المشكلة : تم تغيير الفحمات قبل أسبوع و أمس ولعة لمبة الـ Abs مع لمبة الجلنط وتعطل الفرامل

رحت للبازعي : قيمت القطعة 7000 آلاف ريال

مع العلم أنهم ما يعرفون له بس يبي يغيرون وبس كذلك العضيب

أرجو ممن يعرف أحد يصلحة يفيدنا جزاكم الله خير

وحتى تعم الفائدة الجميع لأنه حسب الأستطلع لم أجد أحد يعرف له.
pasel
08/06/2009, 01:30 PM
طيب ما ينفصل ويرتاح الواحد ؟؟؟
جبرني وقتي
08/06/2009, 01:33 PM
الله يعينك
عبـــد الله
08/06/2009, 01:46 PM
الله يجزاكم خير ويعين الجميع ويليت نلقى حل
إبن ماشي
08/06/2009, 02:10 PM
أناشريت للكابرس جهازabs من تشليح الحاير قبل3 أيام بسعر 800 ريال , وبعد التركيب زانت جميع الأعطال تلقائيا ومنها المكيف ومؤشر الحراره ومؤشر البنزين وعداد معدل السرعة ومصابيح التحذير .
استشاري
08/06/2009, 02:33 PM
و عليكم السلام
تاكد ان حساس مانع الانزلاق اللي بالهوب او اسلاكه ماحصل لها خراب.
حصل معي مره ولعة لمبة مانع الانزلاق بعد تغيير جلب العكس الامامي (سياره دفع امامي) و لقينا الحساس (بلاستيك ) مكسور بس ماسكه السلك قمنا لحمناه بغراء و اشتغل مانع الانزلاق.
وقبل شهر تقريبا و لعت لمبة مانع الازلاق و لقيت الحساس مكسور و متعلق بالسلك لحمته بغراء و زبط الوضح و الحمد لله
my own
08/06/2009, 02:38 PM
دامك قبل اسبوع مغير الفحمات ,, تاكد من الحساسات الي في الهوبات اكيد كسرهم الي ركب لك الفحمات ولفقها لين تخرج من عنده ..
ابدا بالحلول الاسهل والله يعينك
العتل
08/06/2009, 02:41 PM
الله يعين المسلمين على حرامية الورش
صقرالعرب2007
08/06/2009, 03:37 PM
الله يكون في عونك وييسر لك أمرك,,,

تأكد أن المشكله بسيطه ولا تخليك كلمة البازعي بـ 7 الآف أنك تتخيل المشكله كبيره ومستعصيه.. لأ

كلها حساس بسيط منكسر ولا مفصول ونسى يرجعه مكانه

كان لك خبرهـ ولو بسيطه في المكانيكا شيك على الهوبات وتتبع مسار الأسلاك حول الهوب والحساسات والقطع الإلكترونيه ممكن تلقى واحداً مفصول ولا منجرح احد الأسلاك... موترك ماشاءالله من عائلة تويوتا وما هوب راعي مشاكل من باب لطاقه زي بعض الأمريكي ولا الياباني...

أتمنى أني أفدتك...

ولو زان موترك ولا صلحته برا عطنا خبر للفائدهـــ
الشهابة
08/06/2009, 04:47 PM
في البداية اقول .. الله يعينك و يسهل امرك .. و إن شاء الله تلقى الحل بأبسط طريقة ..

بس عندي سؤال .. الـ Gx-r موديل 2003 يجي فيه Abs ؟
التعـ King ـديل
08/06/2009, 04:56 PM
اخوي قبل تلعب بشي مر على مركز الجابري بالصناعيه القديمه ولا دق علي واوصف لك
يسوون لك برمجه لان ممكن عندك لمن غيرت غيروها بطريقه غلط

وولعت اللمبه .. ولو سوا لك البرمجه ولا زانت اللمبه معناته الفحمات مركبه غلط ولا الحساس فيه مشكله وان شاءالله انها البرمجه وخلاص

اخوي الشهابه الجي اكس ار مواصفات البازعي الفل كامل يجي فيه اي بس اس
سبع البوادي
08/06/2009, 05:54 PM
أخوي عبد الله الله يكون في عونك

وبالنسبة لموضوعك انا ما اعتقد ان جهاز فرامل الـabs عندك في شيء

يا أخي الكوابرس موديل التسعينات كلها Abs وشغالة زي الحلاوة رغم قدمها

ولكن قطعة قيمتها 7000 ريال ما اظن ان عمرها الأفتراضي انتهى وهي موديلها 2003

ومثل ما قالولك الأخوان احتمال ان يكون حساس او اسلاك مرتخية

او ان المشكلة ان عندك نظام الفرامل من اهواز وجهاز الـabs وعلبة زيت البريك والكليبر يكون فيه وساخة بحيث انه تسبب لتيوبات الـabs انسداد مما يمنع وصول الزيت ويخفض من ضغط الزيت عندك

والحل انك تسوي تنظيف كامل للنظام عند الورش المتخصصة وان شاء الله انها تنحل المشكلة

وبالتوفيق
بدوي جنوبي
08/06/2009, 06:14 PM
اخي عبدالله مثل ما قالوا الشباب
المشكله تتعلق بالحساسات
مو معقوله يتعطل النظام بعد تغيير الفحمات

وبعدين ليه البازعي يقرر ان الجهاز عطلان
ويببي يخسرك 7000 بكل سهوله

ودائما نظام الاي بي اس كذا يشتغل مع المطبات
او مع الامطار ،، فلا تستعجل

بالتوفيق ان شاء الله
خشيمان
09/06/2009, 06:46 AM
كلامك الشباب قد يكون صحيح
كان مع الوالد صابونة ومولعة لمبة الاي بي اس ولا كان يشتغل
وكشفوا عليه بالكمبيوتر طلعت المشكلة الحساس..
غيرته بــ 150 وأحلى منه مافيه

فتأكد قبل
رحال7
09/06/2009, 08:36 AM
روح للوكاله عبداللطيف وريح نفسك من الفتنه! ونهب الاموال!

الوكاله بيقولون لك المشكله...علمنا عشان يفيدونك الشباب...

سهله ان شاء الله
عبـــد الله
09/06/2009, 08:39 AM
تحية طيبة للجميع ... والشكر لكم بعد شكر الله عز وجل على هذه الأخوة الصادقة

من أمس و أنا أدور في من صناعية النسيم للصناعية الجديدة ورحت أمس للعضيب حقين الصناعية القديمة وسوالي برمجة بس ما زبطت يقول خربان عندك العلبة وقالي رحل للجابري واليوم أبروح للجابري

لأني جيتة أمس وقال تعال بكرى بدري وعسى الله ييسر الأمر

بالنسبة لسبب العطل أمس وبالصدفة أقرأ تحذير على علبة الـ abs في حال تغيير الفحمات أو الصيانة يجب مراعة إرتفاع الزيت .. والزيت كان متعدي ماكس بواجد وجلس على هذه الحال حتى تعطل

بالنسبة لإستفسار أخوي الشهابة لـ الجي أكس أر 2003 يجي فيه abs القطري يجي العادي فتحة و abs و بدون جناح .

وسأكمل الرد بعد الرجوع من الورشة لتعم الفائدة الجميع
منــاكد
09/06/2009, 09:03 AM
وعليكم السلام ورحمة الله وبركاته...

أخي اذا انك تحس ان السياره لم يتغير به شيء غير اللمبه فهذا دليل على ان المشكله فقط من الحساسات...
وهذه الحساسات معرضة للإتساخ بالغبار والشحوم...
أو ان السلك إنفصل من الفيش...

وهذه صور من النت تبين اوساخ الحساس ومكان الفيش...
ولا يلزم ان تكون للالندكروزر فمعظم السيارات تتشابه...


http://z.about.com/d/autorepair/1/0/7/5/-/-/ABS-sens-dirty.jpg


http://www.realcamber.com/images/install/figure_1.jpg

وتقبل احلى تحيه...
عبـــد الله
09/06/2009, 10:37 AM
حياك الله أخوي كابتن جربوع

ليست اللمبة فقط مولعة بل الفرامل لا يعمل يعني كأن السيارة مطفية

* آخر ما توصلت إليه عند الجابري أنه يبي يلغية ويركبلي باكم يعني فرامل عادي .

لأنه إذا كان كذا في الرياض ما أحد يعرفله و مكلف طيب كيف لا كنت في سفر

على العموم خرجت بفائدة : على أصحاب القنص و طلعت البر إذا كان في موترة abs والسيارة

مطولة معه عليه أنه يلغية . هذا ودمتم دائماً بخير.
الظبي
12/06/2009, 11:32 PM
السلام عليكم ورحمة الله وبركاته ..وبعد

السيارة جي أكس أر 2003

المشكلة : تم تغيير الفحمات قبل أسبوع و أمس ولعة لمبة الـ Abs مع لمبة الجلنط وتعطل الفرامل

رحت للبازعي : قيمت القطعة 7000 آلاف ريال

مع العلم أنهم ما يعرفون له بس يبي يغيرون وبس كذلك العضيب

أرجو ممن يعرف أحد يصلحة يفيدنا جزاكم الله خير

وحتى تعم الفائدة الجميع لأنه حسب الأستطلع لم أجد أحد يعرف له.


مسيك بالخير والحاضرين جميعاً
شوف يالغالي انا عندي نفس موترك ورحت عند واحد في الاحساء اسمه طاهر كان يشتغل بوكالات تايوتا وتركهم وفتح ورشه في مزرعته الشهاده لله شغله نظيف وقال لي اللي ركبلك القماشات ركبهم بدون ما يظغط الهواء حق abc لمهم كلمه وقله سالفتك وبذن الله ما يخيبك اسمه طاهر 0503642660
أبا مجاهد
12/06/2009, 11:46 PM
عندي عطلان بفورد ومطنشه..وماسار شي بفضل الله
غسان
13/06/2009, 12:06 AM
اذا المشكله ظهرت بعد اي شغله في السياره اكيد انه الشغل اللى صار غلط او اثر على شيء 0ارجع للشغل اللى صار وافحصه ولاينصبوا عليك 0مره زميل خرب عنده مثبت السرعه راح لورشه عندهم كمبيوتر قالوا له المودم خربان قيمته 2000 ريال قال لهم اطلبوه 0ذكر الموضوع لواحد قال له ترى اذا اللمبه حقت الفرامل محروقه مايشتغل مثبت السرعه راح للورشه قال لهم غيروا اللمبه غيروها راح جرب السياره اشتغل مثبت السرعه اعطاهم 5ريال ولعن والديهم ومشي0 روح لميكانيك ثقه خله يفحص الحساسات والاقمشه وترى له افيوز واهم شيء إنك تفصل اصابع البطاريه لمدة خمس دقايق وتركبها ثاني امكن كل المشاكل تروح
عبـــد الله
13/06/2009, 12:56 AM
هلا والله بالجميع ..تحية طيبة .. هلا بك الظبي
وبيض الله وجهك على هالجهد موادي أقولك ليتك مخبرني قبل لكن ماقصرت أنا رحت لمكنيكي أعرفه وركبلي باكم يعني عايدي شغل يدة مع الباكم من التشليح بـ 800 ريال
وبصراح ودي أرتاح لأني تمرمطت مالقيت أحد فاهم فيه و اللي رحلت لهم البازعي ، العضيب ، الجابري

كلهم يقولون يبيلك تغييرة عطلان و الجابري ولده سامي يقول مشاكلة واجد abs .

أتمنا أن تجربتي تفيد الجميع .. مع الشكر لكل من بذل جهد و أخص الظبي عساه للظبي اللي ياكل منها لين يشبع .. دمتم دائماً بخير.
مواسي الطعوس
13/06/2009, 01:09 PM
مشكور اخوي على متابعتك للموضوع وعلى ها المعلومات .


وتحيه لصفر صفر العرب العائله العريقه .
عبـــد الله
14/06/2009, 11:13 AM
؟؟؟؟؟؟؟؟؟؟؟؟؟؟؟؟!!!!!!!!!!!.
بن سليمان
14/06/2009, 11:54 AM
هذا رابط رابطه اللاندكرزر يمكن عند الاخوان حل
http://www.mekshat.com/vb/showthread.php?t=199317

أو فك عمرك من الموتر لو عندي من زمان فكيت روحي
شلشكو
15/06/2009, 11:49 PM
صارت لي مره بسيارتي الفورد فكتوريا وكلا يقول الوكاله وبس تصلحه بالاخير دلني فلبيني على ورشه بصناعيه الشفاء (( البيان )) والحمد لله مرهم ما اظن انك بتخسر شي
وسلامتك