يا شباب اليكم افضل المعدات لاصحاب الكشتات(مواطير+بطارية+مراوح كهربائية.........)

[الخفاش الأبيض]

السلام عليكم ورحمة الله وبركاته

هذا الموضوع أرجو أن يحمل بعض من الاجوبة التي تدور في كثير من اذهاننا:

1) بالنسبة للمراوح الكهربائية كان النقاش طويل جدا حتى ان البعض مايدري وش السالفة
بالنسبة لاصحاب الاند كروزر فأفضل المراوح هي مروحة الفورد طبعا جربنا مروحة الشيروكي والمكسيما
وكثير منها لكن أفضلهن بلا منازع مروحة الفورد وبالنسبة للسعر فهي بـ(500)ريال انا آسف ترا ماعندي
علم الا باللاند كروزر

2)بالنسبة لماطور الهواء فأفضلها الاسترالي وبصراحة ماله منازع أنا مركبه لي أربع سنين وبجنب المكينة
وماشاء الله كني توي شاريه وتراه(لك وللزمن) وبالنسبة للسعر فهو بين الـ(850الى900)ريال أنا بصراحة
مسوي حركة على كيفك حاط ماطورين استرالي بلي واحد والفاصل اللي يشغلهن واحد ويعبي الكفر من
(0الى40) بثلاث دقايق بالكثير

3 )بالنسبة للشباب اللي يعانون من تطييحة( نزول) الموتر من الخلف اذا حملو العفش فترا هناك حركة
ممتازة جدا وهي وضع بالون في وسط اليايات ويمد لها لي الى فوق الكفر بحيث اذا حملت العفش تتفخ
البالون ويكون آخر ضغط لهواء البالون (30) وتمشي كنك ماحملت شي

4) وبالنسبة للبطارية الاضافية فيه حركة ممتازة جدا وهذي أنا مسويها بموتري الخاص وهذي الحركة
توفر لك الامان التام وهي توصيل بطارية اضافية ويكون بين البطارية الاصلية والاضافية فيوزات خاصة
تجاب من امريكا بحيث لو صار اي شي لاقدر الله ماعليك الا انك تفك الفيوز المحترق وتركب واحد جديد
وبها الحالة مافيه خوف لا على البطارية الاصلية ولا على الدينامو ولا يحزنون

[Bader-M]

وعليكم السلام ورحمة الله وبركاتة
.......
موضوع مفيد

والصراحه افدتنا في خبرتك

مثل ما يقال

اسال مجرد ولا تسال طبيب

......
الله يعطيك العافية

[مريقب العيفار]

ألف شكر أخينا الخفاش الأبيض

لكن بالنسبة للاندكروزر هل مركبة

على صالون او شاص

وما كيف كانت النتيجة من حيث 1- صرف البنزين

2- عزم الموتر

ولك جزيل الشكر على هالموضوع الحلو

[الخفاش الأبيض]

بالنستة للاند فهو صالون


وبالنسبة لصرفية البنزين قلت اكيد لكن مهيب ذيك الدرجة

والعزم صار على كيفك تقل راكبلك غزال ما شاء الله

[يزيد2002]

3 )بالنسبة للشباب اللي يعانون من تطييحة( نزول) الموتر من الخلف اذا حملو العفش فترا هناك حركة
ممتازة جدا وهي وضع بالون في وسط اليايات ويمد لها لي الى فوق الكفر بحيث اذا حملت العفش تتفخ
البالون ويكون آخر ضغط لهواء البالون (30) وتمشي كنك ماحملت شي


كيف اركب بالون
وبكم يركبونة
الله يسلمك

[الخفاش الأبيض]

بالنسبة أخوي يزيد لطريقة التركيب فهي فك ياي السيارة وتحط البالون بوسط الياي طبعا ما تتفخ البالون

الا بعد ماتحطه بوسط الياي بعدين تتفخ البالون على ضغط (30) كحد أعلى اذا تفخت البالون

راح تطلع الزوائد بين اليايات وبهالطريقة ترجع السيارة لوضعها الطبيعي

وبالنسبة للسعر صراحة اني ناسي لان لي حول السنة مركبه لكن على ما اعتقد انه بين الـ(100_150 )

للبالون الواحد.

ومشكور اخوي يزيد على اهتمامك

[الجيب الربع]

أخي الخفاش الأبيض

لماذا تضع المروحة للاند كوزر؟

لك تحياتي

[الخفاش الأبيض]

السلام عليكم ورحمة الله وبركاته
اشكرك اخوي الربع على مشاركتك وتفاعلك مع الموضوع

طبعا ماركبت المروحة الا بعد اسئلة كثيرة وبعد ماسألت ناس مجربين وبصراحة بعد ماركبته

عزم الموتر تغير كثير وصرفية البنزين بعد قلت


وبس هذا السبب اللي خلان اغير المروحة

[الجيب الربع]

أخي الخفاش الأبيض


هل تغير مروحة السيارة بمروحة الفورد في نفس المكان أم تركب المروحة من أمام الراديتر؟


لك تحياتي

[الخفاش الأبيض]

تركب في نفس مكان مروحة المكينة

[الجيب الربع]

أخي العزيز الخفاش الأبيض

ومالفرق بين المروحتين الذي يجعل صرف البنزين يختلف


لك شكري

[محبوب الجميع]

أخي العزيز الخفاش الأبيض
سعر البالون رخيص كاني سمعت انه اغلى وين يركب البالون اقصد لو توصف لنا الورشة الى تركبة
ومشكور وما قصرت

[مريقب العيفار]

أخي الخفاش الأبيض

بارك الله فيك

لكن وسع صدرك معنا ونحن جدا ممتنون لك

بالنسبة للمروحة للصالون

هل هناك اشياء استخدمتها مع المروحة

مثل كتاوت او اي شيء آخر

هناك من يقول ان دورة المروحة تتناسب مع السرعة

في المروحة الميكانيكية بينما في المروحة الكهربائية لا يمكن فالسرعة وحدة

فما رأيك أخي الكريم؟

[كوال]

اشكرك على الموضوع وعلى فكرة البالون

بس مادري من يركب البالون وهل يركب على اي سيارة

وشكرا

[الخفاش الأبيض]

بالنسبة لوصف الورشة كتبته في اخر موضوعي لكن المشرف حذفها ولا اعرف وش السبب

[الخفاش الأبيض]

طبعا البالون مقاسه واحد ويركب في اي سيارة

[الخفاش الأبيض]

اذا بغيت تركب مروحة كهربائية طبعا لازم تركب كتاوت


وبالنسبة لطريقة عمل المروحة يركب حساس في الماء الخارج من المكينة واذا وصلت درجة

حرارة الماء لدرجة معينة ( على حسب الحساس اللي يركب ) تشتغل المروحة
افضل الحساسات هو حساس المرسد س

[الخفاش الأبيض]

اتمنى ان شاء الله ان الشرح واضح

[مريقب العيفار]

أخوي الخفاش الأبيض

تبي الصراحة لا والله ما هو واضح

كيف حساس على الماء والمروحة اصلا

لازم تكون شغالة على طول

وش فايدة الحساس؟

ما عليش وسع صدرك معنا

ونحن لك شاكرين

[الخفاش الأبيض]

اخوي مريقب العيفار السلام عليكم ورحمة الله وبركاته

عندي لك راي ممتاز جدا اذا كنت تبي تفهم كل شي عن المراوح الكهربائية


رح لاول موضوع للكاتب ايمن اللي هو المواضيع المميزة

تبي تلقا موضوع للكاتب مهيلان عن المراح الكهربائية فيه شرح وافي وكافي ان شاء الله

عن كل شي يتعلق بالمراوح الكهربائية والشرح( واااااضـــــــــــــــــــــــح ) باذن الله

[الخفاش الأبيض]

عسى كل شي واضح ان شاء الله

[الخفاش الأبيض]

العذر والسموحة يا جماعة

فيه خطا بسيط في أحد الردود لي أنا عن احجام البوالين وأسعارهن

الاحجام تختلف

والسعر البالون الطقم الاثنين مع بعض بــ(900)ريال

والظمان (6) شهور

وأكرر اعتذاري لكم ياجماعة
:) :) :) :) :) :)

[مثابر]

قبل تغير ارخ مخباتك

[الخفاش الأبيض]

شكرا لكم ياشباب على تفاعلكم معنا