الى خبراء الجمس الرفرف الفزعه!!!

[GMC 78]

السلام عليكم ورحمه الله وبركاته

اخواني ابي منكم الفزعه

وابيلي عمود كرنك لمكينه جمس 454 زرقاء ستاندر

موديل 78

في الدمام في الرياض هذي حدودي

ولكم الشكر

[مطلق السلمان]

عزيزي

مساك الله بالخير ...،،،

بالنسبة لطلبك للمعلومية عامود الكرنك مكينة ( 454 ) ما يختلف بختلاف لون المكينة يعني العامود كله واحد من موديل 1975 وحتى 1986 تقريباً جميع المكائن ( الحمراء ـ الزرقاء ـ السودا ).

أتذكر قبل شهر ونصف فيه عامود كرنك ستاندر Gm في محل في الثقبة أسم المحل ( كرستال ) شارع مكة المكرمة في الثقبة الشارع معروف أسئل وتلقى الجواب ولكن السعر غالي جداً جداً أتذكر أن السعر فوق 3000 ألاف ريال وبعتقادي أن الرجل العاقل ما يشريه وأنت حر حبيت أفيدك يمكن موجود ويمكن غير موجود.

وتقبل أطيب تحياتي ،،،

أخوك : مطلق السلمان

[GMC 78]

الله يجزاك خير

والله انه غالي بس اذا صار الواحد موتره متعطل على هالقطعه وش السواله؟؟؟

لعل الله ييسرلنا واحد ارخص منه او شريناه هذا اذا باقي عندهم

[ابوووهلا]

ودنا بخدمتك يالغالي

[السيف الأملح]

الله يسهل امرك وتلقى اللي تبي....
فيه تشليح في تشاليح الدمام اسمه تشليح الغربي احتمال تلقى عنده...
واذا تبي جمس نظيف للبيع عندي ورخيص في حدود العشرة الاف واخذ منه اللي تبي....

[ابوعقل]

اطلبه من امريكا

[GMC 78]

الله يجزاكم خير

السيف الاملح ممكن ترسلي صور الجمس

[العارض]

أخي العزيز Gmc 78 دام ان العمود الحاله حول الـ 3000 ريال دور لك مكينه حليوه ونظيفه بيسهل الله امرك وخلها تشليح عندك بالحوش

بارك الله فيك

[مطلق السلمان]

كلام الأخ العارض هو " عين الصواب " وشور طيب من رجل طيب.

[العارض]

بارك الله فيك أخي " مطلق السلمان "

لاهنت على مديحك الطيب وأبيض وجه

[بـلـيـهـان 1]

السلام عليكم و رحمه الله وبركاته

خذ كلام الي صارله يدور عمود شهر او شهرين


--


بعد البحث يمنى و يسرى لم أجد شيئا ً أبددد ..

:)

لقيت إلي 1200 ريال و إلي 1000 ريال و إلي و إلي ... إلخ


وبعد البحث في تشاليح الدمام و تشاليح الجبيل


لقيت عمود كرنك من الجبيل مخروط 10 يعني اول خرطه بـ 400 ريال و من مكينه زرقا ... < للعلم لا يفرق لون المكينه شيئا ً ..


الرياض على حسب كلام كثير .. انك تلاقيها بالهبل

و ان شاء الله تلاقي استاندر

حاول قدر المستطاع تاخذ ستاندر لأنه الأقوى للتحمل

و أن ما لقيت حاول على الأقل مخروط 10أو 20 ولا تزيد

ولاكن الاستاندر ما له مثيل ..

هنا بالشرقيه غالي جدا ً ( تشاليح الدمام )

سعره 1000 ريال و حولها

عليك بالرياض و القصيم ..

خذ عندك هذا الرقم رقم الي شريت منه عمود كرنك مخروط 10 اسمه تشليح الوطن 0504901331 محله تشاليح الجبيل

-------

تحياتي لك و بالتوفيق

[GMC 78]

انا لقيت مكاين بس اغلبها شنابرها هنديه

وانا فاك مكينه موتري وهي مابها الا العافيه

بس حبيت اعرف راعيها الي موضبها وش حاط من قطع

وطلع القطع هنديه!!!!

وعلى شان كذا دامي فكيت المكينه ابي عمود استاندر لان الي بموتري 20

ومكينه انت تعرف وش داخلها احسن من وحده تركبها ما تدري وش ببطنها

شنابر وبساتم جايبها من الكويت GM بعد الموت لقيناها

لكن وقفت على العمود ويا بليهان 1 انا صارلي حول الشهرين

وقالولين نفس كلامك في الرياض بالهبل

بس والله متثاقل المشور اخاف اروح ولا القى

وانا ودي الي يعرف رقم تشليخ بالرياض واتأكد انها موجوده رحت والساتر الله

واسف على الاطاله ولكم كل التقدير والاحترام

[مطلق السلمان]

أخي العزيز بالنسبة لعامود الكرنك أنا سبق وأن رحت للرياض رحت لمحلات قطع الغيار أدور جديد ولكن للأسف الشديد ما لقيت ما خليت محل في الرياض ما جيته ويمكن موجود ولا حالفني الحظ ، بالنسبة لتشاليح الرياض ما جيت ولكن لو حبيت تروح تحتاج تجلس في الرياض يومين لين تطلع بنتيجة.

عندي سؤال أبغاك أجوابني عليه ومنك نستفيد على سبيل المثل عندك مكينة خبطت ( ستاندر ) وجيت بتعمل لها توظيب هل يحتاج أنك تخرط عامود الكرنك ولا عامود الكرنك ما يخرط أتركب أستاندر أنا اللي أعرف أن الكرنك يخرط مع خرط المكنية عند التوظيب !!! منتظر أجابتك يا الغالي.

بالنسبة للشنابر والبساتم اللي لقيتها في الكويت ممكن لو سمحت أسم المحل اللي شريته منها وكم مقاسها.

الله يعطيك العافية وبالنسبة للمحل اللي ذكرته سابقاً في مدينة الثقبة اللي كان عندهم عامود كرنك إستاندر الأسبوع الماضي مريت عليه ما لقيت شي الظاهر أنه بيع.

مع أطيب تحياتي ،،،

أخوك / مطلق السلمان

[GMC 78]

السلام عليكم ورحمه الله وبركاته

الي انا اعرفه انك اذا وضبت المكينه المخرطه هي الي تقرر تخرط العمود او تقولك ما يحتاج

خرط وانت بكيفك منهم من يخرطه ومنهم من يقول لا تخرطه

وبالنسبه للرياض انا فريت تشاليح الحاير

من الساعه 7:30 الين الظهر ما فيه ولا عمود

ولا مكينه زرقاء حتى بعض التشاليح كسرت خاطرهم وقاموا يكلمون ربعهم ويدورون

ودلوني على تشليح السوريين ولقيت مكينه زرقاء بس يبيعها لك ماء في سكر

يعني تشتريها كومه حديد شغاله , عطلانه , استاندر , مخروطه , ما يدري عنها

اما بالنسبه للشنابر الي من الكويت فيه محل اسمه العبدالله

وانا موصي خالي بالكويت

هو الي جابها طبعا مو من محل واحد

يبيلك تتعب وتطول بالك واذا ما تعرف احد بالكويت الله يعينك

انا جلست حدود الشهر وانا ادور واوصي

وبالنسبه للعمود الكرنك الاستاندر والله عليه طلب غير طبيعي

الي بالثقبه يبيعونه على 3 الاف ولا يقعد بعد

على العموم الله يوفقك وييسرلك

[مطلق السلمان]

مشكور يا الغالي