من عنده علم وتكونون مشكورين

[وحيد الدرب]

السلام عليكم ورحمة الله وبركاته
السالفة وما فيها هذا زميلي بالعمل اشترى سيارة جديدة من احد الوكالات المشهورة ولها معه حوالي شهر ونصف .. ولكن المصيبة انه اكتشف اليوم أن باب السواق مرشوش وبويته تختلف (باهته شوي) وداه يم شريطي وقال فعلا مرشوش .. وش السواة هل يشتكي على المحكمة والا الشرطة والا التجارة والا وين وتكونون مشكورين

[01MiKsHaT]

^ ^ ^

وانا زميلي شراء , , ولقاها مرشوشه "طبعاً من ابو جميل "

ومن تطالب , , قالوا له انت اللي صادم فيها ! ! !

[التعـ King ـديل]

الله يعينه بس لكن فيه حل

مر على جريده الرياض والاقتصاديه واشرح لهم وعطهم الاثباتات ومب مقصرين يحبون الفضايح

[الهوى جنوبي]

الله يعينه بس لكن فيه حل

مر على جريده الرياض والاقتصاديه واشرح لهم وعطهم الاثباتات ومب مقصرين يحبون الفضايح
هذا الكلام الصح أما وزارة التجاره فهي مع التاجر ضد المستهلك :no2: لأن شعارهم التاجر دائماَ على حق
الله يعينه

[الستانس]

وشي الوكاله لاهنت؟

[أبا مجاهد]

ياخوي خذ العلم اللي يجمد عالشارب

اعرف واحد من اصحابي شغال في شركة نيسان ويقول/

اغلب السيارات اثناء تحميلها في الشاحنات تنزلق يمين او يسار ويتأثر جنب السياره..فيتم رشه في الوكاااله.
هذا كلامه واعان الله صاحبك

[راعي سمنان]

اقسم بالله ان واحد من المعارف اشترى سياره من الجميح وصارت مسمكره و مرشوشه من تحت الأبواب من الرفرف الى الرفرف واشتكاهم وتم تحويله للتجاره ولا عطوه وجه وقفو مع الجميح المهم طلب الشرع و وكل محامي مادفعله ولا ريال كل شي على الجميح بعد ماكسب القضيه وخيروه بين فلوسه او سياره واخذ سياره جديده بدالها وكان طالب منهم اعتذار بالجريده وتنازل عن طلبه في اخر جلسه بالمحكمه بطلب من الشيخ نفسه .


تبي طولة بال وسعه صدر وتكتكه هم متعودين وعندهم طلبيه بدال الواحد 100

بالتوفيق ان شاء الله

[وحيد الدرب]

الله يعطيكم العافية الظاهر مافيه الا المحاكم

[NissaN 1990]

الله يعينه ويعوض عليه بس علمنا وش الوكاله عشان الواحد ياخذ حذره

[وحيد الدرب]

نوع السيارة كراون فكتوريا 2009

[ابودعسان]

ارفع دعوى بالمحكمه
وراح تكسب القضيه ان شاء الله
وطلع برنت من المرور بان السيارة ما صار عليها اي حادث من شريتها

[ابويارا1001]

اسمع وانا اخوك طبيعي بيجحدونك ويقولون انك انت صادم بالسيارة

اذا عندك بال طويل وفاضي رح اشتكي عليهم بس المشكله انهم راح يحولونك لوزارة التجاره

بعد موقفك ضعيف لان السياره لها شهر ونص يعني تعتبر مده طويله

انا سبق وشريت سيارة هونداي قرانديور وطلعتها من الوكاله بالدمام رحت للخبر

ورجعتها لهم وغيروها لي ثاني يوم بوحده ثانيه بعد ما شافوا ان شغلتهم ما تترقع

والسالفه ان السياره كانت مخمل فمن الطبيعي ان الابواب من داخل مخمل

اللي صار ان الابواب اليمين جلد واليسار مخمل؟؟؟؟

لا ويقول لي مدير المبيعات راح تطلب لك داخليه ابواب توصل بعد شهرين ولا

تخاف السياره تحت الضمان

قلت له بتغير السياره ورجلك فوق رقبتك لا اشتكيك واسوي وافعل وما خليت

وزارة ولا مصلحه حكوميه الا وقلت له بشتكيك عندنها لين شاف الدعوة جد

وقال صقطوا اللوحات عند المرور وانقلوها على سياره ثانيه جديده

يعني سيارتي بتتصلح وتتلصق في ظهر مواطن ثاني؟؟

رحت ثاني يوم لساحة السيارات حقتك وقعدت اقلب المواتر كني رايح معارض ابو حدريه مش وكاله؟؟؟


اسمع اخوي

دور لك محامي اذا انت متقاعد وزهقان تبي تضيع وقت وتسوي اكشن في حياتك

او خذها بجنبك والله يعوض عليك وحقك بتاخذه عند رب العالمين سبحانه

[ابوعبدالله9999]

إذا ماعندك نفس طوييييييييييييل .... فإبلعها واسكت ..... وعوضك عند رب العالمين .

[كاشت وحداني]

اهم شئ تنشرها باحدى الجرايد
وعطنا صور نحطها بمنتديات اللي تهتم بالسيارات
واذا بالك وسيع الله يعينك على الطلايب والمحاكم
والله يعوض عليك

[الحر...]

^ ^ ^

وانا زميلي شراء , , ولقاها مرشوشه "طبعاً من ابو جميل "

ومن تطالب , , قالوا له انت اللي صادم فيها ! ! !







والله الضاهر ان هذا اللي يبون يقولنه له لكن انت طالب وصلها لشيخ

واذا وصلت لشيخ تبي توصل للحلف ,,,

بس اللي خلاهم يغشون يخليهم يحلفون

تدري الضاهر ماله الى الدعوه

[exsoskeleton]

الحل عندي
دق على 969 وسوي برقية للملك والأمراء وابشر بحقك ولا تنسي سبق تري بعض الأمراء يتابعها بشغف لأنها صوت الشارع وياما قضايا تم حلها بثواني عن طريقهم .