المساعد الشخصي الرقمي

مشاهدة النسخة كاملة : وش الحل في راديتر السفاري


عابر سبيل
27/06/2004, 12:32 PM
السلام عليكم ورحمة الله

مساكم الله بالخير يا جماعه ,,,,

ابي استشيركم ياجماعة انا موتري سفاري 98 ... عندي مشكلة في الراديتر( بعد حادث بسيط ) والحمدلله وكثرة تهريباته ومن لحام في لحام ... وصار لا زم اغيره .....

وشرايكم في الراديتر النحاس الي يجي ثلاث رصات الي يصنعونه محلي .....
لأني احترت صراحة ناس يقولون ركبه وتصير الحرارة تمام
وناس يقولون ماينفع بريال وبتزيد الحرارة ....

ورحت ابي اشتري جديد من الوكالة وقالوا لا تهمك الوكالة راديتراتها مضروبة
واستشهد بباث فايندر عنده قال شفه ما كمل معه ثلاثة شهور الا وبدا يهرب
( هذا كلام راعي الردايترات طبعا )

المهم قالي ابي اشوف لك واحد مستعمل وجاب لي واحد الا وعلى قولتهم زيد اخو عبيد ....

وش الراي الله لا يهينكم
1. اشتري جديد من الوكالة واتوكل على الله .
2. اشتري واحد مستعمل .
3. اركب لي راديتر نحاس .

وسؤال بعد على الطاير :
بالنسبة لموية الراديتر وش الأفضل الخضراء والا الحمراء ؟
وهل اعبي الراديتر كله موية خضراء أو حمراء أو إني احط علبة وحدة بس والباقي موية عادية ؟

(((( انا عارف اني ثقلت عليكم يا حبايبي )))) .... العذر والسموحه ....


تحياتي للجميع ......
الاسود
27/06/2004, 01:00 PM
ياعابر سبيل لاتحتار ولا شي نصييييييييييييييييييييييييييحة ((( بدل الاديتر بجديد من الوكالة وخل عنك كلام اهل الاديترات... )

وبالنسبة للموية ترا فيها مغشوش في الاحمر والاخضر (( اللون مهوب مهم اطلب الاصلي فقط ولاتفكر في اللون ) .

*** شيك على الخراطيش العلوية والسفلية للاديتر خاصة اذا كانت الحرارة ارتفعت معك اكثر من مره
** لاتحاول تمشي على الباترووول والحرارة مرتفعة لانه النيسااااااااااااااان حساااااس جدا جدا للحرارة وخذ بنصيحة اخوك ... وتسلم.
عابر سبيل
27/06/2004, 01:20 PM
بيض الله وجهك اخوي الأسود ....

فعلا ارتفعت الحرارة معي اكثر من مرة ... لكن الله يستر ...
اجل مالها الا الجديد من الوكالة ؟؟؟

شاكر لك على كل حال ... ولاهنت يا لغالي
al-barnoo
27/06/2004, 01:23 PM
مرحبا اخوي

عليك بالاصلي الي في الوكاله صحيح انه غالي بس ماشي يسد محله

تحياتي وبالتوفيق انشاء الله
جــدار الطيـن
27/06/2004, 01:29 PM
النيسان مافيه مشاكل حرارة عادة مما يعني أن نظام التبريد شد بلده ممتاز ومناسب للجو عندنا، وأكثر ما يستعمل الراديتر السعودي النحاس للسيارات الأمريكية، فأنصحك ركب أصلي وخذ بلف ماء أصلي من الوكاله يعني الحمراني مو موزع وانتبه للي يركب لا يلطش غطا الأديتر الأصلي اللي يجي معه.
أما الموية : حط لتر واحد فقط من مضاد التجمد (انتي فريزينج) اللي تجي عليه علامة مرسيدس وهو ألماني وقيمته ثلاثين أو خمسة وعشرين وموجود عند اللي يبيعون موية الأديترات، ثم زوده بموية مقطره لين يمتلي بس لاتقرب الماء العادي، وترا الطريقة هذي ماخذها من مهندسين دارسين ومطبقين مو زي عمال الصناعية (يتعلمون الحلاقة على روس اليتمان)
والله أعلم

تحيااااتي;)
عابر سبيل
27/06/2004, 01:51 PM
الأخ / البرنو ...
على قولتك .... وشاكر لك التواصل ...

الأخ / جدار الطين ....

تحية طيبة ...

تصدق عاد واحد من اخوياي توه شاري واحد من الوكالة وما جا معه غطا ....
يعني مسروق اصلا من الوكالة والا وش السالفة .... على شان انتبه انا بعد لا يلطشونه ....
وتراك صادق بالنسبة للنيسان نظام التبريد حقه ممتاز ومناسب جدا لأجوائنا ...
بس المشكلة مثل ما قلتك في الراديتر مهوب من السيارة .... وهل لا زم اغير البلف ...

تحملنا يا حبيبي ..... والله لا يهينك

شاكر لكم جميعا ,,,,
صقر
27/06/2004, 03:33 PM
السلام عليكم

حياك الله اخوي عابر سبيل ... وينك فاقدينك ؟؟؟؟

بالنسبة للراديتر السعودي انا حاطه من سنة ... بالشتاء ممتاز وما عليه خلاف بس بالصيف مع المكيف والسرعة اكثر من 110كم/ساعة يحتمي الموتر ويوصل لـ H

يعني فاشل.

وانا نصحوني الشباب بشراء أصلي وكالة بس غالي سعره جدا وأنا الآن أفكر بشراء أصلي مستعمل واعتقد هو الحل لمشكلتك ومشكلتي.
القناص
27/06/2004, 04:45 PM
مثل ما قالوا الشقرديه
الاصلي وبس
ولو مستعمل نظيف
واهم شي بعد ذلك استخدام المويه الاصليه من الوكاله لان المويه مره كل سنتين مهيب كل يوم
وفقك الله
الضحــــــاوي
28/06/2004, 02:18 AM
الاخوان الكرام

السلام عليكم ورحمة الله وبركاته:

مساكم الله بالخير والعافية واتم الله عليكم نعمة 0

الاخ عابر سبيل :
بما أنك متضايق من الحرارة وهذا شي طبيعي انصحك بتركيب الشبك الاردني

وسوف تدعو لي0

وانا مجربه شخصيا واذابغيت المحل المضبوط ترا اخبره0

وشكرا0
عابر سبيل
28/06/2004, 09:10 AM
الأخ الغالي /// صـقــر ..

ما تفقد غالي يارب .... وشرفني مرورك ...

الأخ /// القناص ..
يبدو ان الآراء توحدت .... شاكر لك مرورك ...

الأخ /// الضحاوي ..
هلا بك والله وغلا وشاكر مرورك ....
سؤالي لك يالغالي : هل الراديتر الأردني نحاس والا المونيوم ؟ للفائدة لأني :

صراحة توكلت على الله وشريت لي جديد من الوكالة ولو انه غالي ( 1300 ) ريال بس وشنسوي
وعلى قولتهم ( اضرب على الكايد لا صرت بحلان .... )
الشكر أيضا موصول لجميع الأخوان المشاركين ....

وأخص أخوي / جدار الطين .... لأني صراحه يوم جيت اركب الراديتر الجديد قلت له ابي الموية
الألمانية الأصلي الي قال عنها اخوي جدار الطين وفعلا يقول انها الأفضل على الإطلاق وشريتها
بـ ( 20 ) ريال وغلق الباقي مويه مقطرة ....
بس انا لا حظت اني يوم شريت الراديتر ما جا معه غطا ؟؟؟ ... هذا هو نظامهم والا وش السالفه ..
شرقان
29/06/2004, 09:48 PM
نصيحة مجرب :انحش عن الرديتر التجاري لانه مهما سويت في الصيف ترتفع الحرارة فوق النص

اشتر اصلي واذا بعد تبي تركب مراوح كهربائية احسن لك
الضحــــــاوي
01/07/2004, 02:24 AM
الاخ عابر سبيل

السلام عليكم ورحمة الله وبركاته:

الشبك الاردني يجي المونيوم 0
ومثل ماقلتلك بتدعيلي0


والسلااااااااااااااااااااااااااااااااام