أفضل ورشة في صناعية العاصمة

[سفير الجزيرة]

السلام عليكم ورحمة وبركاته

كان بودي أن اجد موضوع متكامل عن أفضل الورش في الرياض وتخصص كل ورشة ، وهذا مهم وضروري لكثرة الورش والنصب والإحتيال ، وصرنا للأسف حقل تجارب عند هالعمالة - ولا حول ولا قوة إلا بالله -

واشوف هالايام صناعية العاصمة غرب الرياض فيها حركة غريبة والورش متحركة بشكل ملحوظ ، لكن سؤالي ما هي أفضل الورش في صناعية العاصمة ؟
وهل يوجد فيها ورش متخصصة وعمالة فاهمة ؟
وهل احد جرب يصلح سيارته فيها ، ومشت اموره مضبوط ؟


ارجوا التفاعل من الجميع ،، والله يعينا على هالسيارات ، ما ينزل الراتب إلا وتسحب منه على الاقل 500 ريال للسيارة أو أكثر ...

[فيصل مبارك]

للرفع ونفس السؤال

[You Like Me]

والله يالغالي
الحاصل الان لما تذكر ورش اشتغلت عندهم وفاهمين واسعارهم معقوله
فجأه بعد ما كل واحد يطريهم ويمر عليهم تلاقيهم زادو في السعر واستغلوا خلق الله
والسبب رجال شرواكم محبين للخير ومن باب حب لأخيك ماتحب لنفسك
وقصدهم يخدمون ويدلون الاعضاء
ولنا في النويصر وابن مرضاح و ورشه سوافي وباترول اُسوه
وغيرهم الكثير والكثير

[كاشت وحداني]

في جميع الورش
يتعاملون مع الشخص حسب ما يبدو لهم
وحسب خبرته ومن واقع كلامه معاهم
فاذا لاحظوا منه الطيبه وايضا عدم المعرفه بامور السيارات استغلوه اسواء استغلال وطلعو بعشرين قصه


Sent from my iPhone using Tapatalk

[abo naser 1]

السلام عليكم

دائماً أصحاب الورش ما يريدون يشتغلون للرجل الفاهم بأمور الميكانيكا لأن مالهم مجال بالغش
الا من رحم الله

[تميم2222]

والله مشكله وصدقت .. لكن حسب علمي الورش المشهوره بالرياض بالملز ..القديم علمن باني من اهل الغرب .. واجي للعاصمه لكن شغلات خفيفه .. فيه شباب اسمع بعض الربع يمدحونهم سعوديين فيها ..شفها باقصى الصناعيه من غرب ..موفق خيررر ولك كامل الود

[مطنوووخ]

عندك ورشة سندباد الشمال في صناعية العاصمة

[أبـوأسـد]

بخصوص صناعية العاصمة وبحكم أنها أقرب صناعية حولي

وهذي وجهة نظري المتواضعة


لا أحد يصلح منها نهائيا إلا الأشياء الضرورية جدا وأيضا لا أحد يصلح منها أذا الأشياء الضرورية تقدر تتأجل لمسافة المشوار أنك توديها لصناعية القديمة


ليش

بحكم تجاربي لكم ورشة هناك

صلحت كم مرة عندهم

المشكلة ترى ورش واجد وأنا ما أعمم على الكل يتعلمون على السيارات

حتى أذا أحد جابك لموضوع تصفية مكينة ولا أنصب منهم أقول لكل الورش وش المشكلة يقولي تصفية مكينة؟! يطقطقون عليك يبيك تسوي تصفية مكينة بأي طريقة وهو أصلا ما يدري والله وين المشكلة أقوله عندي نفظة عندي ضعف عزم عندي وعندي زي بعض محلات الحاسب تقوله عندي ... على طول يقاطعه فورمااااااات :mad:

والسبب الحقيقي الي مخليني ما أصلح عندهم نهائيا وهي الي تبهذلت منها

محلات قطع الغيار هناك شحة جدا مافي إلا درجة ثانية وعساك تلقى قطعتك المطلوبة؟
كم محلات طقع الغيار هناك؟ والله أني تبهذلت بمساعات وفرامل وليات مكيف وكمبروسر كلها مهب موجودة مغير حاطها بصناعية العاصمة وأطق لي مشوار بسيارة ثانية أو بليموزين أشتري القطع من هناك وارجع والسيارة تجلس فترة أطول بسبب أن قطع الغيار مهي موجودة عندهم فيما أنك أن حطيت السيارة بصناعية القديمة من البداية هم مكلوفين بجيبون لك أي قطعة بسبب محلات قطع الغيار كثر كثر التراب حتى قريبة منها يعني مهي حجة لو ما يجيبها لك أن كنت بتحط الموتر عندهم أو تجيبها بنفسك ان كانت الشغلة تتصلح بنفس اليوم مقارنة بصناعية العاصمة ولا المدينة وغيرها من الصناعيات الصغار الي محلات قطع الغيار قليلة جدا ومو متوفر عندهم كل شيء تحتاجة مغير القطع الأستهلاكية

وكم مرة رحت وصلحت مشكلة عندهم وما تضبط لفترة

وعلى طاري أخوي مطنوووخ بخصوص ورشة سندباد الشمال تراني تعاملت معهم كم مرة

بصراحة صلحولي أشياء وحاسولي أشياء

مسألة الفرامل صلحتها عندهم وحاسوها لي وسحبو علي كل ما جيتهم مشغولين مشغولين تعال بعدين
أخر مرة صلحت مشكلة عندي بالكهرباء يوم جيت أستلم السيارة وأحصل شق بمخمل السقف وش كبرة تطاقيت معهم :mad: يقولي لا هذا الشق من زمان عندك وش تبي تسوي فيه؟!

بعدها توووووووووووبة أقرب لهذي الصناعية إلا أشياء تافهة جدا وعسى بعد أتمنهم

[ابن مكرز511]

تباء نصيحتي ابعد عن الســـوري ويرزقك الله لان ذمتهم وسيعه شوي الا من رحمه الله

[ابراهيم 2003]

فيه ورشه في صناعيه القديمه اسمهااا ورشه باتيس الالصلاح اللتكيف لم قطع غيار مستعمل ابعد عنها الانها صلحت وتري ولا ضبطه وغبر الكبروسر وركب لي واحد مستعمل بسنه خربان بس يوم وديته لواحد مختص غير على طول الكبروسر وركب كبروسر جديد بدالا الاول

[آآآبو سعود]

نصيحه لوجه الله اهم شي ابعد عن السوري لو تصلح عند اسرائيلي ولا تصلح عند السوري ! تجيه بمشكله بسيطه عارفها انت يفتح لك 100 مشروع و100 خراب علشان يزود شغل اليد والله من وسسسع الذمه

[koogak]

مشكلة صناعية العاصمة ان ايجارها شهري
ويتشارك في الورشه 10 يمنيين و90% منهم من مخالفين نظام الاقامة
عشان كذا كثير منهم يتعلمون في سيارات العالم

[عقووول]

اخوي نصيحه

انا ساكن قريب من الصناعيه

وعدك ورشتين

الاولى ورشة مايز ومتخصصة باليباني

اللي لوحتها مكتوب عليها تويوتا لمنيف النهدي
وموقعها عند الاشارة

ويستقبل سيارات نيسان وتويوتا وجميع السيارات اليابانية

والعماله من الفلبين

وعندك ورشة الشباب فيها واحد سوداني ومعروف بالصناعية
كلها

اسمة تاج
شايب عمره 55 او اكبر

وهذا بالتوضيب 100%

وانت عارف سيارات النيسان مكاينها معقدة بس هو ما شاء الله عليه يضبطها


هذا اللي متعامل معهم وصدقني راح ترتاح من تعاملهم

[escape_man]

لا تنسون ورشة اخونا الثنيان (ابوابراهيم).. وهو احد اعضاء مكشات

متخصص نيسان .. يشتغل جميع اعطال نيسان ماعدى التوضيب

[ولد وايل]

ورشة ميدان الجنوب الاخ عمر الافغاني ابووليد
يخاف الله

زبون عنده من ايام الورش القديمه اللي قبل العاصمه 18 سنه