توضيب الجيب 82

[خشم الحصان]

الاخوه الغالين
السلام عليكم
اخواني ساكتب عن عملية توضيب مكينة الجيب موديل 82 تايوتا وستكون علي شكل متتابع
اي انك لاتحتاج الي تنزيل المكينه او اخراجها من بطن السياره.
1- سم بسم الله وتوكل عليه
2- قم بتفريغ الزيت من الكرتير (وضع تراب علي البلاط خشية من ان يندفز الزيت)ولا تفك الكرتير الان لئن له شرح خاص
3- يوجد بزبوز ماء في جنب المكينه نحاسي افتحه ثم افتح غطاء الاديتر حيث لايكفي فك الخرطوش السفلي لتفريغ الماء من السرندل
4- قم بفك الخراطيش من الطرمبه
5- قم بنزع اسلاك البوجي
6- جب سحله كبيره او طشت لوضع القطع الصغيره المفكوكه ويالمسامير
7- قم بفك غطاء البلوف والبلوف وضعها علي جنب
8- قم بفك او فصل القزوز عن المكينه واحضر سكروب كبير او ليور وقرص عليه وبعده شوي عن المكينه ولكن لاتقوم بنزعه مره فلسي له داعي وقبل الفك ارخ علي مسمار الشيال الي تحت في البودي ليساعدك علي عملية القرص والزحزحه وثم اخر الوجه حق القزوز وستبدله بالجديد الذي مع الطقم
9- قم بفك مسامير القربه وابعدها كليآ حيث انها ستضيقك في عملية فك مسامير الراس
10 -قم بفك مسامير الراس وتحتاج الي حبه اصلي وماصوره نصف متر لزيدة القوه ولاياك تستعمل الحبه التقليد ترها خايبه تفرط وتحتاج الي حبه من نوع المفصليه وذالك للمسمار الاخير حيث انه داخل تحت البودي
11- عند فك جميع المسامير ضعها في زيت الكرتير الذي تم تفريغه حتي يساعد في ازالت الصدا
12- في هذه الحاله تحتاج الي شخص اخر ليساعدك في عملية نزع الراس من السرندل حيث انه ناشب بقوه وتحتاج الي شخص وسيع صدر وهادي ولسي حشري وجرفلي لئنه وصلنا الي الاشياء المهمه
13- بعد نزع الراس ضعه علي جنب وسوف تشاهد بعد ابعاد الراس البساتم وشكلها الجميل مع الكربون الذي يكسوها وهي تشبه كسر القرصان بس ماتوكل
14-في هذه الحاله تحتاج الي زردية كبس الفلوف وذالك لتغير البلوف واذا كنت لاتملك عده كامله للتوضيب خذ الراس الي المخرطه .
ماذا يحتاج الراس
ا- صنفره وفرز الراس و البلوف وتغير الغوايش (هي عباره عن دواير حديديه تكبس في الراس وانا اويد تغيرها اذا كنت بتركب بلوف جديده)
ب- بلوف جديده شد بلد ولا تركب تجاري (شور اخو) وغير جميع البوف لاياك تغير شي وتخلي شي انتبه غيرهم كلهم مره
ج-بعد فرز البلوف وكبس الغوايش والانتها من المخرطه وقبل ان تشيل الراس من المخرطه قم بربط البلوف في مكانها اما بمغيط(مطاط) او سيم ناعم او خلهم يرقمونها واعرف من وين بداء الترقيم لئن كل بلف تم فرزه قد اخذ خانته في الغوايش حقته واذا اختلف عن مكانه قد يوثر
د-كراسي البلوف فيه نوع يسمونه ابو صحين حيث ان ياي البلف يجلس في داخله ولا يخرج منه وليس مثل القديم وغير جلد البلوف انتبه لسنون شدد البلف ليها منقلبه
بعد انتهائك من المخرطه جاء دورك يالمكنيكي وش دورك .
ا- احضر دريل وحاول انه يكون صغير وحضر ريشة تنضيف حديد تجي صغيرة وشكلها بيضاوي وهي حديد
ب- قم بتنضيف خانات البلوف او (حفر البلوف) وستشاهد الكربون يخرج بكثره ولاياك تزعل علي المخرطه وتقول ليش مانضفوه بلاهم مهوم حرصين بلحيل عليه همهم الكبس
ج- بعد ماتم تضيف خانات البلوف او( الحفر) وصبح يلق جديد ضع مناديل رول تحت الراس ثم اسكب بنزين في الحفر وتركه مده وزده كل فتره لمة 30 او اقل المهم بعد ذالك ارفع الراس ونضر هل يوجد علي المناديل اي اثر بنزين واذا وجت اعلم ان البلف الذي به اثر فيه تنسيم ورجع الي المخرطه وخلهم يكبسونه زين
د- بعد التجربه ونجحها من التهريب قم بابعاد الراس وغطه بقطعة قماش وركنه علي جنب
الان الراس زاهب يبقا تنضيف بقايا وجه الراس من السرندل قم باحضار سكين مهيب حقة مطبخ الله يغفرلك لا هذي سكين معجون حقة البويه ودور الصغيره القويه ثم قم بعملية حلاقة الراس وازل كل صغيره ولو كانت كبر
النمله المهم هو موترك ولا حك جلدك الا ضفرك .
نقف عند هذا ونكمل في الحلقه القادمه باقي العمل
هذا مالدي والله اعلم
اخوكم في الله
خشم الحصان
ادعو له بالمغفره والرحمه
نرجو التصحيح والتوجيه

[Khalid AlGhamdi]

وعليكم السلام ورحمة الله وبركاته

جزاك الله خير ياخشم الحصان بانتظار الجزء الثاني ( بنفتح ورشه :D )

[أيمن]

بيض الله وجهك وسوٌد الله لحيتك :D
عمل رائع وسهل قد يجعل أحد المتهورين أمثالي بأن يفسر عن ذراعه لتطبيق هذا الموضوع الرائع ..
أكرر شكري لك لما أعلم أن الموضوع بالتأكيد أخذ منك وقتا ليس بالهين في إعداده، فتخيلتك :) إما أن حولك ورقة وأنت قاعد توظب الموتر وكلما خلصت من شغلة دونتها لين أصبحت الورقة كأنها ورقة استلام معونة عجز كلها بصمات :D ..
أو أنك استرجعت ذاكرتك خطوة خطوة وأمليتها علينا فالله يستر على من بيطبق كلامك خوفًا من أنك نسيت حدا الخطوات ..
كم كنت أتمنى أن تصور لنا بعض الصور والخطوات المهمة حتى يكون الأمر الغامض بين ومكشوف ..
كتب الله أجرك يا أبو محمد وأجزل لك المثوبة ..

تحيتي

[Bader-M]

لي تعليق بسيط
.........
هو الديلكو وين راح :D

كذالك
الكربليتر و الثلاجه

وايضا سيور الدينمو و الكمبرسر ....الخ


التوظيب ليس في الامر السهل
;)

لا يمكن شرحه في موضوع
وخاصه اذا كان
الموضوع لا يحتوي ولا على صوره واحد توضح اقل شي اجزاء المحرك




تقبل تحياتي

[Bader-M]

هذه صور

عشانك

http://rzeppa.org/tech/carb1.jpg



http://rzeppa.org/tech/carb3.jpg


http://rzeppa.org/tech/carb5.jpg



http://rzeppa.org/tech/cam2.jpg


http://rzeppa.org/tech/cam4.jpg


http://rzeppa.org/tech/cam4.jpg

[Bader-M]

http://rzeppa.org/tech/cam5.jpg

اقول
ايمن سامحنا هذه المره نزلنا صوره بنت :D

http://rzeppa.org/tech/cam7.jpg

http://rzeppa.org/tech/cam1.jpg

من كثر الصور ما قدرت انزلها في رد واحد
........

انتم تقول الموضوع ناقصه صور
وانا اقول
انه صعب تشرح توضيب وحتى لو كان في صور

حنا اختلافنا
صح

طيب

انا راح اساعدكم بهذه الصور
عاد انتم
كملوا

مع اني الان متمسك في ردي الاول

ولكن من باب

اختلاف الرئي لا يفسد في الود قضيه
او
كما قال:D

خشم الحصان
اذا خلصت الموضوع لي تعقيب علي ;)

<<<< واحد حاقد يدور الزله :D :D

[أيمن]

بارك الله فيك يا مشرفنا "طاير بالعجة" الحقيقة أبدعت ..
وبمثل هالحركة تعالج الأمور ..
بعدين ذي مو بنت ذي أسد :( .. الله يخلف !
إلا من وين ماشاء الله جبت هالصور تقل والم الله يبارك لك عيني عليك باردة، يالله انبسط يا أبو محمد .. بإمكانك وضع الصورة والتعليق خلفها ..
ولو أردت أي تصوير فلست بحل إن لم تجد من يصورها لك أن تخبرني وآتي لك برسم الخدمة وأهيئها لك كما تريد وهذا أكبر شرف لي إن منحتني إياه ..
وبانتظار كل مواضيعك التي تخص هالسيارة والتي وعدتنا بها مسبقا وزدتنا شوقا بها بهذا السرد العملي الواضح ..

تحيتي

[aahhhh2]

السلام عليكم ورحمة الله وبركاته
جزاك الله خير يامشرفنا العزيز طايربالعجه
على فتح الموضوع و الرجو انك ما تكون زعلت مني لاني معجب بالموضوع
وارجو اني ما اكون انا الي قلت فيه ( <<<< واحد حاقد يدور الزله )
وارجو انكم تحطون هلموضوع مع الموضيع المميزة
اوكرر شكري

[خشم الحصان]

الاخوه الغالين
السلام عليكم
مشكورين كل الشكر علي تجوبكم مع هالموضيع وانا محرج لئني مجبور اكتب عن السيارات وعن صيانتها بس تراء عن الجيوب القديمه يعني لاحد يقول نبي عن الجديده او يسالني عن المديلاات الجديده تراء معرف حدي 79 الين 85 وعسي الله يقدرني علي خدمتكم جميعآ امين والجزاء الثاني قريب جدآ بس ودي اسال منهو احرف مني او المتخصص فيها يعني شغلته ولقمة عيشه.
.......................
الاخ الغالي
ماكس بور
مشكور يابعدهم علي مرورك ومشركك ولايه لا وش الي يمنع من فتح ورشه تراء المكانيكا لها طعم يطير في الراس وجرب وثم شف معاد تحتاج الي ابو هنود او هالعليميه يتعلمون في سيراتنا وتري فيه كتب و مراجع تتكلم عن هلمنوال الله يغفرلك ويرفع من قدرك يابعدهم
اخوك
خشم الحصان
.......................
الاخ الغالي
ومشرفنا الحبيب
ايمن
الله يغفرلك ولوالديك ياخيي موضوع التوضيب بنسبه للجيب والله انها اسهل مما نتصور خاصه القديمه لئن المكينه اذا فتحت الكبوت ولاها مكشوفه مهيب معقده وانت ابخص وبعدين تعال انت تطل علي في السور وش دراك شرب من موية(الب............) بسم الله علي تدرون عن كلش فعلآ انا كنت اكتب واسال لئني ابحتاج الها في عملية تنزيلها في المنتدي لئني منذ مبطي ماشفة احد يتطرق الي موضوع توضيب الموتر وخاصه الجيوب
القديمه اما ورقة الشونه الي هي حقة العجز لا ياخيي غدة كنها الاجدار حق الشونه من ظهر من هالحريم مسحة فيه:D ولا قفا ثوب بزر عنده اختبار و ناقل كل الكتاب فيه لا ان شاء الله اني مانسية شي ضروري يؤثر علي الموضوع والله يذهب هالصور الله ياهي معقدتني والله ياخي اني معرف انزل الصور انت اقبلوني بدون صور وما فاد ابيجيب صورة اخوي الي اكبر مني تراه يشبهني مره هي تنفع ايه تنفع.
الله يغفرلك ياخيي ورفع من قدرك يابعدهم وان الله يجزاك عنا بدخول الجنه امين
اخوك
خشم الحصان
..............................
الاخ الغالي
ومشرفنا الفاضل
طاير بالعجه
الله يغفرلك ويجزاك عنا خير علي فتح حنفية المويه( الموضوع) وانت خابر مهنا ذاك العلم في الصور ومشكور للمساعده في تنزيل الصور وهذا الي مطمعنا فيكم و مخلينا نرتاح منكم بس ياخيي هذي ام شوشه
لزم تنزل معهم ودك من يشب في شوشتها ويطفيها بشلايخ سمر الله يجزاك عنا يامشرفنا بالخير والله يثيبك
وتراي معك في (اختلاف الرئي لا يفسد في الود قضيه) ياحبيل قلبك حبه
اخوك
خشم الحصان
............................
الاخ الحبيب
اهههههههههههههه 2
مشكور يابعدهم علي مرورك ولا تراء مهوب انت الي يدورون عليك الزله والله يغفرلك ويثيبك
اخوك
خشم الحصان

[الجيب الربع]

أخي خشم الحصان

مشكور على هذه المعلومات ولكن عندي سؤال:

جيب ربع 86 مكينة 4 سلندر هل ممكن أركب له مكينة كرسيدا 6 سلندر بدون مشاكل؟

لك أجمل تحيه

[خشم الحصان]

الاخ الغالي
والحبيب الجيب الربع
السلام عليكم
شف اخيي اولآ انا ياخيي منيب ذاك المكانيكي الي علي قهمك بس اني احب افك واربط وتعلم واكثر معرفتي في الجيوب القديمه تنشدني ليش اقولك احبها لئني اذا فتحت الكبوت ولا كلش واضح ولهيب معقده .
المهم انا اول مره ادري ان فيه جيب ربع 4اسرندل يعني و ماعمري شغته بس اني نشة المتخصصين وقالو انه يبله ترهيمات مثل كراسي المكينه والداير والحذاف والعمود اذا كان بيغير القير او بيركب المكينه مع قيرها بيني وبينك ادوشوني وانا والله ماعندي اي خلفيه عن هالموضوع هذا الي قدرة اعطيكياه ونشد يمكن احد يساعدك الله يغفرلك ويرفع من قدرك يابعدهم اذا لقيت الجواب الشافي والكافي لا تنسانا وتعلمنا او اطرحه موضيع في هالخيمه الله يجزاك عنا بدخول الجنه امين اخيي
اخوك
خشم الحصان

[aahhhh2]

اخي الجيب الربع السلام عليكم ورحمة الله وبركاته
انا اتوقع النمكينة الجيب 6سلندر تركب علي بدون اي ترهيم يبقا عندك القير مادري اذا انه
يتحمل قوة المكينة 6سلندر ولا لا لان انا عندي جيب 6سلندر ابي اركبله 4500 قالولي لازم تغير المكينة مع القير ولا المكينة الجديده تفرط القير لانة اقوى منه


افيدك انك تروح للتشاليح الي في الصناعية القديمة في الرياض وهم يعلمونك من دون ما تشتغل

والله يفق الجميع

[الجيب الربع]

أخي العزيز خشم الحصان

مشكور وجزاك الله خير وان شاء الله ولقيت طريقة راح اعلمك

لك تحياتي


أخي aahhhh2


شكرا لك على هذه النصيحة وساجرب التشليح بإذن الله

لك تحياتي

[خشم الحصان]

الاخوه الغالين
السلام عليكم
اخواني في الله في المقال الاول تكلمنا عن فك الراس وغيرها واليوم نتكلم عن تنضيف السرندل وفك البساتم
بسم الله توكلنا علي الله
1- انت الحين جبت سكين حق البويه من النوع الصغير القوي
2-قبل لا تبدا في التنضيف شف علي يدك اليسار وانت مقابل الموتر في السرندل فيه فتحه حقة الزيت غطها بقرطاسه (ابرهمها وحطها في الخفس) حتي مع التنضيف مايطيح شي ويسد مجري الزيت الحين حك السرندل مره لين يطلع كنه مرايه
3-جاء وقت فك الكرتير او(حوض الزيت) بنسبه للجيب فكه غثا مره تحتاج الي ليور طويل او صيخ 14 مم ويكون راسه مفلطح فك المسامير الي شاده الكرتير وترها واجد يعني تبي تتعب يدك وتخدر بس مهيب مشكله
4- بعد فك المسامير واحضار الور او الصيخ الطويل قم بوضع الطرف الي يم الكرتير في زوايا الكرتير ولاياك تحطه في نصف الكرتير تراك بتطعجه وانا ادري انك بتقول نعدله بس وشوله عموم قم بضرب الور او الصيخ بمطرقه وخل واحد ينسدح تحت الموتر ويقضب الصيخ او الور تدري ليش لاياك تصير حار ثم مع العجله تشق الكرتير بعد ماتحس ان الكرتير انفصل بسيط عن السرندل لا تقرص له انتقل الي الزاةيه الاخري وهكذا حتي تنتهي من جميع الزوايا بعد ذالك استعمل سكروب طويل ومن ثم اقرصله شوي شوي لئنه فيه طرمبة الزية
قريبه من صاجه داخل الكرتير وبعد فك الكرتير مباشره قم بتنضيف بقايا الوجه حق الكرتير من السرندل
5- احضر حبه اصلي ثم قم بحل مسامير الطرمبه وبعد الحل وابعد الطرمبه وغطها في الزيت علشان ماتكسب غبار وريش طيور او شعر او اي شي
6- قم بحل مسامير السبايك ولاياك تفكها مره لا خل فيها شوي علشان انك تبي تطقها بالشاكوش مع المسامير علشان يطلع البستم فوق لم خويك وعلي هالمنوال حرك السرندل بوسطة السيور اذا طلع السرنل شي بسيط فوق حل المسامير مره وخل خويك يسحب البستم واذا طلع البستم علي طول شكل المسامير مع البستم ولاياك تحرك السبايك من محلها ثم شد المسامير شوي ثم علي طول رقم البستم من عند مربط السبايك في ذراع البستم تلقا مكان املس ضع الرقم عليه بس تاكد من وين بداية فليكن واحد من عند الغماره وهكذا كل بستم طلعه رقمه لين تجي الي اخر بستم لم الاديتر وهكذا حتي تطلع جميع البساتم براء
7- لاياك تستعمل اي سكروب في عملية اخراج البساتم لئنك تبي تجرح السبايك او بطن السرندل ثم مشكله
8- بعد اخراج كل شي من السرندل دور جلال او قماش ثوب او اي شي وغط السرندل علشان ما يتوصخ او مع الجو يكون صدا في السرندل
9- الحين جاء وقت تنضيف البساتم او شي حطها في الزيت فتره قصيره علشان يتحلل الكربون الي في راس البستم ومجري الزيت الضيقه الحين كلش ضهر
10- جب طفاية حريق وهذي مهمه مره واذا ماعندك جب سطلين رمل ثم احضر البنزيم وصبه في جركل حق المويه الدائري وقصه مع النصف ثم غرق البساتم كلها وخل البنزيم يغطي نصفها
11- تنضيف البساتم هنالك طريقتين (ا) يدويه بوسطة كسر الشنبر القديم وحك البستم (ب) الاليه بوسطة الريشه الي انت شريتها البيضاويه مع الدريل وذالك بشد البستم في الملزمه بس بحذر شديد لئن البستم الامنيوم
ثم نضف البستم بالريشه الحديد ولاياك تضغط علي الدريل بقوه حتي لا يفرط من زود الضغط وتحك البستم يعني شوي شوي
بعد تنضيف الشكل الخارجي للبستم يبقي مجاري الزيت وهذي لازم استعمال شنبر قديم مكسور ثم قم بحك الكربون من الاماكن الضيقه واذا انتهية من واحد ابدا في الثاني حتي تنتهي (ولاياك تفك السبايك انتبه)
12-ربما البعض عند فك الشنابر قد لايعرف كيف يضع الجديد اذا كنت مثلي قم باحضار ورقه وقلم ثم اكتب وضع الشنابر شنبر كبير فوق شنبر صغير وسط المشرشر تحت وهكذا
13- الحين كلش نضيف وكلش زاهب
14-طيب البعض يبي يتاكد من ان السرندل مهموب مشفف يعني راس السرندل مافيه شفه هذا جب ضفرك ومشه من داخل السرندل حتي نهاية الفتحه من فوق واذا دقر اصبعك تدقيره قويه فهو مشفف البعض تلقاه يوسوس لا التشفيف واضح طيب بيقي ان حنا نتاكد من ان السرندل نضيف قم وجب لمبه قويه مية شمعه وخل خويك يولع من تحت وانت طل في السرندل تلقاه املس ولا فيه اي شقوق وبعض السرندلات تلقاها فيها خطوط لولابيه زي ماسورة الشوزن وهذ علامة الجوده يعني السرندل ماجاه جور (لاياك تستعمل اي شي حاد سكروب او غيره انتبه) لئنك تبي تجرح السرندل ثم يبيله تلميع
15-الشنابر البعض يحط اصلي وانا حاط تجاري ياباني kt وارد المنيف في الصناعيه القديمه هو التجاري الزين لاياك تصدق هالمحلات لئن الكرتون kt والشنبر دمار
16 بعد تركيب الشنابر والبساتم زاهبه يبقي التطبيق اخر شي فك او مايركب رجع البستم الي يم الاديتر الي هو اخر واحد فكيته وتبي تعرفه بوسطة الرقم الي انت رقمته وجب زيت ودهن البستم مع الجنوب ثم سقطه في السرندل وخويك مهع زيت يدهن السبكتين الي في البستم والي في يده طيب اذا طاحة السبيكه من محلها وشلون اعرف مكانها انه صح شف فيه تسنينه في السبكتين خالهن متقابلات بس سن يمين والثاني يسار
بعد ذالك شد علي مسامير السبايك وتاكد انك حطية زيت لئن اذا شغلت الموتر ان شاء الله يبطي الزيت مايجي السبيكه ويمكن تحتمي او تزرق قبل لايجيها الزيت ثم تعض
17 بعد شد جميع البساتم وترجيعها الي مكانها حرك البساتم بوسطة السيور لكي تتاكد ان كل شي زين او بوسطة الهندل اذا عندك
18-قم الان بتنضيف الكرتير وتعديله اذا فيه طعج وطرمبة الزيت وبعد التنضيف مره احضر الوجه من كرتون الطقم الي انت شاريه
وضع جمركه ياباني قيمتها40 ريال بس مسكته ترها مثل معجون الاسنان وركن الكرتير علي جنب لين بنشف شوي ثم قم وركب الطرمبه وتاكد وتاكد انها خذت خنتها بعد ذالك ثم قرب الكرتير ودهن السرندل بالمعجون
الحين الوجه مدهون من الجهتين يبيلك واحد يساعدك لئن الوجه جديد ولابد انه بيوذيك شوي قم بتشكيل يعني
سنتين من كل مسمار علشان الخفوس ماتوذيك اذا جية تركب المسامير واذا تم تشكيل جميع المسامير شد عليها وسط لا هوب قوه ولا هو رخو الحين اطلع من تحت السياره
19-وخر القرطاسه الي في فتحة مجري الزيت (مهمه جدآ)لئنك اذا نسية وحطية الوجه وشديته وين يجي الزيت معه خبط الموتر
20- جب مسامير الراس من االطشت الي فيه الزيت القديم وغطسن في البنزين ثم نضفن بالريشه الحديد
21-ركب الوجه ثم جب الراس ثم اطبقه وتاكد انه طبق صح ثم جب المسامير ودهنها بزيت اذا بغية علشان اذا بغية تفكه مره ثانيه ما يلك ثم صقطه في الراس وخل شدك مثل علامة الضرب لاياك تشد علي جه وحده
22- بعد شد الراس جب صيخ العصافير وركبه علي الراس وشد مساميره ثم حرك البستم بالسيور او الهندل اذا كان كلش زين والحمد لله
23- جب طقم البواجي الجديده وركبها محل القديمه البعض يقول ورا ماركبنها يوم الراس برا بلا نخاف يطقها شي وتنكسر خل القديمه تسد محلها
24- الحين ان شاء الله كلش زين خل الموتر ساعه او حولها ليش علاشان الجمركه الي في الكرتير مابعد نشفة شوي
25- بعد شد مسامير الكرتير ونشوف الجمركه قم بسكب الزيت في المكينه (يستحب انك تشيك عليه بعد فتره)
26- رجع القزوز مع تغيير الوجه حقها ثم شد مسامير القزوز
27 قضينا لايانا نسينا شي يالربع ان شاء الله مانسينا شي
28- شد الخراطيش والبزبوز الي في السرندل ثم عب مويه بس لا تركب غطاء البلوف خله شوي
ثم اتكل علي الله وشبك الاصبع البطاريه ثم شغل ولا ياك تقرص علي المكينه خلها تشتغل صلنصيل الله يانت تبي تنبصط اذا رنة المكينه بتشقق
خل الراس يحتمي شوي واذا احتمي جب الحبه حقة مسامير الراس ثم شيك عليها وستعمل ذراع قوه اما ماسوره ثم شد شد تحس انك مرتاح ولاياك تقطمها
لا تغير وجه غطاء البلوف ثم اطبقه ورجع كل شي في محله مثل القربه ولاسلاك وغيره وخل الموتر شغال لمدة يوم ونصف ثم امش عليه لين تاخذ الشنابر محلها والسبايك وبعد 15 الي 20 يوم من الممشاء العايدي
دخل الموتر الي البيت ثم اوزن البلوف والموتر بارد مره لاتوزنه وهو حار واذا وزنته وتاكت غير وجه غطاء البلوف وطبقه والحمد لله هذي اهم نقاط عملية توضيب الشنابر
اما اذا كان توضيب كامل يعني الموتر مخبط ومن هذا القبيل يبلك تطلع المكينه براء الموتر و توديها لم الصناعيه او ود الموتر لم الصناعيه اذا مافي الموتر شي ينخاف عليه من من السرق لئن التوضيب الكامل يبله
خرط سرندل وعمود وسبايك ثابته ومتحركه يعني شغله
هذا ياخواني مالدي والله اعلم
وعذروني اذا فيه نقص او خطا
ونرجو منكم التصحيح والتوضيح
اخوكم
الفقير الي ربه يرجو رحمته
خشم الحصان
ادعو له بالرحمه والمغفره
ملاحضه انا ماغيرة سبايك موتري مخلي القديمه لئنها زينه وماخذه خانتها في العمود

[الجيب الربع]

أخي خشم الحصان

بارك الله فيك وغفر لك هالحين الواحد يقدر يتفلسف على الورش اذا ودى سيارته لهم يصلحونها

جزاك الله خير

[خشم الحصان]

الاخ الغالي
جيب الربع
السلام عليكم
حياك الله يابعدهم ولا اضن ان هالمواضيع تخفاك ومشكور علي تواضعك يابعدهم الي يزين الشي اذا الواحد اشتغل خراب موتره بيده يستفيد كثيرمنها
1- يكتسب خبره
2-يعرف خراب موتره
3- يعرف وش غير وش صلح
4- يطمئن من موتره
5- يوفر علي نفسه ماديآ
6-ويزود المنتدي بالمعلومات اذا هو ناوي يخدم اخونه
7-تبادل الخبره بين الاعضاء
والكثير الكثير الله يغفرلك ويثيبك يابعدهم علي مرورك يالغالي
اخوك
خشم الحصان