الى خبراء الدبل في السوبربان

[abofahad01]

اخواني تحية طيبة لكم

اشتريت سوبربان موديل 2000 دبل
وانا جاي من الشرقية وقفنا بجنب الخط للصلاة وقلت فرصة اجرب الدبل

يوم دخلت على الرمل شبكت الدبل الخفيف ومشيت شوي ثم ثقل الموتر بقوة واشبك الثقيل وللاسف الموتر تعلق ومعيي يطلع نسمت للكفرات ولكن دون جدوى
بصراحة ضاق صدري وخاب ضني في السوبر
لاني كان معي تاهو قصير موديل 99 وماشاء الله اطمربه اعالي النفود وما عنده مشكله
الشاهد انه جاء راعي جيب نيسان وماقصر سحبنا وطلعنا بصعوبة

ونبهني لشغلة ان المكان اللي نزلت فيه يسمونه هيار وماينفع به لا دبل ولا غيره وحذرني من مثل هالاماكن

بس مو هذي المشكلة
المشكلة بعد ما صلينا وجيت امشي الدبل معلق وحاولت اطفيه ما طفا وولعت لمبة service 4WD طفيت الموتر وشغلته مره ثانية وطفيت الدبل وابشركم طفى ولكن اللمبه مازالت والعه

احب اسمع تعليقاتكم والحلول وكيفية استخدام الدبل وهل السوبر مثل غيره نقدر نطعس به ولا لانه ثقيل مانقدر الا على الجال

ردودكم تهمني الله يوفقكم

[سوبر VTC]

هلا اخوي
الحمدلله على السلامه
الدبل الخفيف يشبك اذا كنت الارض مهب هيار يعني يمشي الموتر
يعني ارض لاهي هيار و لا هي عزاز بينهن
و اهم شي تدوس بنزين على نمره ثقيلة او تنزل القير على 2
لانه اريح للقير و للكلتشات
الثقيل يشبك بالهيار وتحطه على 2 او ال على حسب اللي قدامك
اذا كان قدامك طلوع عالي او هيار ريح القير و حطه بالثقيل
او اذا بغيت تجر احد مغرز تحطه بال يعني واحد و بالثقيل
لو حطيته على خفيف يموت عزم الموتر و تحتمي الكلتشات
و اهم شي دايم حط بالكفرات من 25 الى 30 بالكثير
ما يذبح الموتر الا كثر الهوا الزايد

عموما

لي عوده لموضوعك الليله

و ان شاء الله الاعضاء ما يقصرون

[abofahad01]

سوبر vtc

اشكرك على المعلومات
ولكن وش مشكلة اللمبة اللي مولعه

[راعي المجهم]

دبل الجمس أقوى من دبلات الياباني !!!!!

مرة أنا وأخوي معه جيب مفخرة الأرض 2008

ومعي تاهو 2001 ومعنا شاص 2006

قنصنا الرملة العام الماضي وهواء الكفرات عندي وعنده 20 بالضبط غرز أكثر من مرة

وسحبته مرتين وسحبه الشاص مرة

شكيت في سواقته وأخذته منه وسقته وغرز مرة ثانية !!!!

[ابو صقر 111]

مسألة اللمبه يفضل في الأمريكي الرجوع ريوس 0(للخلف)عشرة امنار تقريبا بعدفصل الديل

[معدم الظلام]

شباب لكم اجمل التحايا عندي الدبل يندي زيت تاهو 2002زد واحد وسبعين هل هو يضر الدبل تنديه خفيفه مره وهل زيت الدبل مع القيرشاكر لكم وياليت تعليقاتكم وسلامتكم

[abofahad01]

راعي المجهم

اشكرك على المعلومات
لكن هل فيه فرق بين دبل التاهو واليوكن والسوبربان ام ان الاستخدام والقوة وحده

[abofahad01]

ابو صقر

فعلا سويت اللي تقول وماراحت

ولكن يوم وصلت لبيتي نمت واليوم الثاني شغلت السيارة واللمبه طفت

[abofahad01]

معدم الضلام

المفروض انه ما يندي ولكن التنديه من الصرة والا من وين

وش تقصد بواحد وسبعين

وايش احسن زيت للدفرنش الخفيف والا الثقيل

[سوبر VTC]

العذر على التاخير
اخوي يوجد حساس راكب على دينمو دبل الجمس
الدينمو تجده تحت القير
و راكب عليه حساس و الحساس عليه فيش مكون من 5 اسلاك
هذا الحساس به عيب مصنعي دايم يخرب
احد الربع معه يوكون 2005 غيره مرتين سعره ب350
هذا الحساس وظيفته يخبرك فقط ان الدبل على احد الاوضاع التالية
2H مفصول
الخفيف4H
الثقيل4LO
AUTO وضع الاستعداد او التلقائي
لكل علامه لمبة محدده
اذا طفت لمبات الدبل لا قدر الله
تحصل باب صغير حق الفيوزات يسار الدركسون مع الجنب يعني يسار مفتاح الانوار
تحصل فيوز مكتوب عليه (4WD)
هذا حق الدبل افصل الفيوز و اشبكه عدة مرات ستلاحظ ان اللمبات اشتغلت
و بالتالي تقدر تطفي الدبل
دينمو الدبل قليل جدا جدا يخرب
دينمو او حساس الكارونة الامامية اللي تشبك العكوس قليل تخرب
و سعره ب400ريال اصليه نوع جي ام
طبعا اذا شبكت الدبل الخفيف راح تسمع الدينمو يشبك يطلع صوت طبعا يشبك الدبل الخفيف
بعد ما ينتهي صوته
ستسمع مباشرة صوت حساس الكارونة الامامي اللي يشبك العكوس و الكارونة


على كلام الفني يقول حتى لو ولعت اللمبة تقدر تروح و وتجي
و ما فيه مضرة
اذا عاكس معك افصل الفيوز و اشبكه مره ثانية



ادخل هاذين الرابطين
مناقشات حاده بيني و بين المشرف العزيز :D
طبعا يوجد صور للحساس
صور لدينمو الدبل
صور لحساس او ساعة الكارونة الامامية


الاخ العزيز سوبر Vtc ارجو الدخول للأهمية ولا يهون بقية الجماعة ... (http://www.mekshat.com/vb/showthread.php?p=1964564)



الرابط الثاني

بليزر 99م ومشكله الدبل - الصفحة 3 - منتديات مكشات (http://www.mekshat.com/vb/showthread.php?t=155824&page=3)

[abofahad01]

الله لا يهينك اخوي سوبر vtc
وفيت وكفيت ولا خلى ولا عدم