أفضل مواقع التوانك لأصحاب اللاند كروزر اصطب لكزس أو اصطب عادي

[الخفاش الأبيض]

السلام عليكم ورحمة الله وبركاته
بسم الله الرحمن الرحيم الحمد لله والصلاة والسلام على رسول الله
اخواني اصحاب اللاند كروزر الصالون

قد يعاني الكثير منا في مكان تركيب التوانك وخصوصا اصحاب اصطب اللكزس

بس موضوعي عبارة عن اقتراحات لاماكن التوانك واستغلال اكبر سعة من اللترات

1)المكان الاول وهو تحت السيارة مكان الاستبنة طبعا اللي عنده اصطب عادي ماعنده اي مشكلة
لأن الاستبنة معلقة ويكون عنده تحت مكان فاظي بس اصحاب اصطب اللكزس تبي تظطر انك تفك
الاستبنة مع قواعد الاستبنة وهي ثلاث قطع حديدية
المساحة اللي تحت تاخذ سعة ( 90) لتر
في هذي الحالة تقدر تركب الاستبنة داخل السيارة وتكون نفس طريقة استبنة الجمس بحيث انك
تستغني عن مرتبة واحدة فقط اليمين او اليسار وتصلح لك قاعدة حديدية تثبت فيها الاستبنة


2)المكان الثاني وهو على جوانب السيارة تحت الدعاسات الجهة اليمنى تاخذ ( 30 ) لتر
والجهة اليسرى تاخذ ( 37 ) لتر وبهذي الحالة ما يحتاج انك تفك او تركب شي
****لاينصح باستخدام هذي الطريقة لكثرة سلبياتها:
# تبي تزعجك بالاصوات والصرصرة
#وأيضا يبي يزعجك صوت الماء رايح جاي
#اذا اسرعت تبي تسمع لها صوت مثل الصفير
##وعلى فكرة تراها مجربة ولا ينصح بتركيبها ابدا أبدا


3)المكان الثالث وهي توانك جاهزة سعتها تقريبا ( 75 ) لتر شكلها مستطيل بس فكرتها
انها تربط بالمرتبة


4)المكان الرابع وهو لازم انك تستغني عن المراتب الخلفية وتفصل تانكي على المساحة الفارغة
بأي ارتفاع ترغبه انت





## يمكن البعض لم يفهم الطريقة الأخيرة لكن اعدكم بوضع صور لكل الطرق اللي ذكرتها لكم
بأقرب فرصة ان شاء الله ##

[أيمن]

وعليكم السلام ورحمة الله وبركاته

كفيت ووفيت يالخفاش الأبيض، أمتعتنا بهذه المعلومات التي ستفيد كل أصحاب اللاندكروزرات ..
والله يحييك في منتداك ..

تحيتي

[مثابر]

يعطيك العافية

[اعقاب]

[الأصل كُتب بواسطة أيمن ]
وعليكم السلام ورحمة الله وبركاته

كفيت ووفيت يالخفاش الأبيض، أمتعتنا بهذه المعلومات التي ستفيد كل أصحاب اللاندكروزرات ..
والله يحييك في منتداك ..


لكن مابال النيسان

هل فيه مجال اركب تانككي داخل خلف المرتبه
سعت 100 لتر او حولها
اذا كان فيه كم قيمته ومكان تركيبه(الورشه)

[الخفاش الأبيض]

السلام عليكم ورحمة الله وبركاته
الف شكر لك اخوي عقاب على تفاعلك مع الموضوع

بالنسبة للفكرة الاخيرة تقدر تسويها في أي موتر لأنها تفصيل
طبعا تقدر تسويها بالنيسان البانرول
وسعة التانكي تبي تكون على حسب المساحة اللي عندك وعلى حسب الارتفاع
تقدر تحط وانا اخوك اي سعة تبغاها 100 لتر أو 150 لتر
لان اخوي عقاب التانكي ما يجي جاهز
تفصله أنت بالطريقة والشكل اللي تبغى

ان شاء الله وصلت الفكرة أخوي عقاب وأكرر لك شكري

[مشغول]

هلا وغلا بالخفاش الأبيض

معلومات قيمة تشكر عليها

الله يعطيك العافية

في الحقيقة كلامك صحيح بالنسبة للتوانك اللي تركب تحت الدعاسة للجيوب خلفية لكزس

أنا ركبت نفس التانكي وشف الصورة على هذا الرابط

تانكي وخلفية لكزس (http://www.mekshat.com/vb/showthread.php?s=&threadid=20523)

كان في البداية صوت صرير مزعج قليلا لكن الحمد لله الحين مافيه اي صوت .. راح بلحاله .

اما بعد السرعة 150 يطلع صوت . واعتقد انه من الماسورة البلاستك في مقدمة التانكي .

اما صوت الموية فهو قليل جدا .


وشكرا لك مرة ثانية

[ابو دانة]

بسم الله الرحمن الرحيم

ذبحتونى مافيه شي حق السزوكي جراند فيتارا 98:good: :good:

[بــح ــر الــكــرم]

[الأصل كُتب بواسطة أيمن ]
وعليكم السلام ورحمة الله وبركاته

كفيت ووفيت يالخفاش الأبيض، أمتعتنا بهذه المعلومات التي ستفيد كل أصحاب اللاندكروزرات ..
والله يحييك في منتداك ..


لكن مابال النيسان

هل فيه مجال اركب تانككي داخل خلف المرتبه
سعت 100 لتر او حولها
اذا كان فيه كم قيمته ومكان تركيبه(الورشه)

[الخفاش الأبيض]

أخوي السهلي سبق وجاوبنا على الأسئلة اللي طرحتها


لكن بالنسبة للسعر للطريقة الأخيرة تراه غالي


لو كان الشغل نظيف بالحيل يبي يكلفك (2000) ريال

[عبودكم]

أخوي الصقر الأبيض ولا يهونون الربع
أنا عندي لاند اصطب لكزس وفعلاً احترت في موضوع التانكي وقترح علي مهندس طريقة ما جربتها وش رايكم بها الطريقة هي :
1-اغير الكفر السبير وجنطه واشتري كفر حق جيب عادي (كفر نحيف )
2- اروح عند واحد يركب توانك يكون جيد وأخليه يلحم التانكي بالشاص من تحت ويحط قتحة دائرية بوسط التانكي لتنزيل السلسلة حقت السبير من خلالها (هم يدبرون الموضوع هذا )
3- تركب السبيربعد ما نزلنا السلسلة من خلال التانكي وترصها على التانكي .
وش رايكم بهذي الفكرة وسلامتكم

[الخفاش الأبيض]

اخوي عبودكم الفكرة بصراحة ممتازة جدا

لكن انتبه للي يسويلك الشغل اهم شي يكون فنان وفاهم بالأمور هذي ولأن الأمر دقيق ويبغاله

بصراحة واحد فنان

[صقرنجد]

جزك الله ألف خير يأخ الخفاش الأبيض

على هاالأفكار المميزه


والصرحة فكرة عبودي حلوووه مره لكن هل فيه إزعاج و صرير أوغيره

[الخفاش]

يعطيك العافية يالخفاش الأبيض