لصحاب الخبرة للسفر البري إلى دبي

[قرقاص مع شاهي]

مساكم الله بالخير

حبيت بس أسأل وش أفضل طريق لدبي من الرياض ومع الوصف الدققيق ( اخوكم ماهنا دلوله:d )وأكون شاكر لكم وممنون

[ابوريناد1979]

الطريق الأول : الرياض - الخرج - حرض - الإمارات = طوله حوالي 520 كيلو للحدود
من بعد ماتتعدى الخرج ب 20 كيلو يصير سيد واحد
الطريق الثاني : الرياض - الهفوف - الامارات (طريق سريع ولكن لازم تمسك طريق الشرقيه السريع الين يجيك مفرق الهفوف بعد 280 كيلو تقريبا من الرياض) = طوله حوالي 630 كيلو للحدود
* وأنا أفضل الطريق الأول صحيح انه متعب شوي ولكنه اقرب وانتبه من الرمال الزاحفه خصوصا بالليل واتكل على الله ورح معه

[عليم العطش]

طريق الرياض حرض ممتاز بس امش معه بالنهار.
يعني اخر الليل قبل الفجر بساعه تحرك من الرياض وطلوع الشمس وانت بحرض
وتقطع منطقه الربع الخالي والوقت براد وبتوفيق الله.
لاهنت

[shaheenshah]

طريق الرياض حرض ممتاز بس امش معه بالنهار.
يعني اخر الليل قبل الفجر بساعه تحرك من الرياض وطلوع الشمس وانت بحرض
وتقطع منطقه الربع الخالي والوقت براد وبتوفيق الله.
لاهنت

مثل ما قالك اخوي عليم العطش
الرياض حرض ممتاز

[دغيم1]

السلام عليكم ورحمة الله وبركاته
حياك الله أخوي
ماذكره الأخوه فيه البركة
ولكن ..
من الرياض - إلى الخرج .
وعند وصولك الخرج عند الإشارة التي بعد برج مياه الخرج - خذ يسار - حتى تصل إلى إشارة منتزه الخرج ( المشتل - سابقا ) تجد لوحه تفيدك إلى - حرض .
توجه إليها - الطريق ضيق قليلا ويمر بمزارع الألبان - نادك - المراعي وغيرها .
يفضل السير بآخر الليل لتجنب الرمال المتحركة والحر والشمس والتريلات .
لاتنسى أن تعبىء البنزين من أي محطة تواجهك ولو كان بالتانكي اكثر من النصف تحسبا لأي ظروف .
المسافة 500 كم من الرياض إلى منفذ البطحاء .
350 كم من منفذ الغويفات إلى المثلث .
طريق سريع وجيد ومغطى بالمحطات الجيدة .
120 كم إلى دبي .
تمنياتي لك برحلة سعيدة وآمنه
وأن تحقق أمانيكم
تقبل تحياتي

[mms]

بالتوفيق وانا انصح بطريق حرض وزي ما قالو الاخوان عليك بالدلجه هي
اخر اليل ويكون الجو براد وتتفادى الشاحنات الكبيرة وحرارة الشمس والبتوفيق ورحلة موفقه

[نجم الطريق]

ما قاله الإخوان فيه الإجادة والإفادة
لكن يمكن أن أضيف:
طريق الرياض الهفوف سلوى البطحاء سريع في معظم أجزاءه والسفلتة ممتازة ولكنه الأبعد
طريق الرياض حرض البطحاء أقصر من حيث المسافة لكن الطريق مزدوج والسفلتة قديمة والطريق يعتبر طريق شاحنات

[khalid 6]

السلام عليكم

الشباب ماقصروا بالمعلومات المفيدة واخونا دغيم عطاك اياها بالتفصيل.

بس اذا سلكت طريق الرياض الهفوف اسلك مخرج خريص لأنه اقرب حسب علمي.

وشكرا

[قرقاص مع شاهي]

بيض الله وجيهكم جميعا بدون ذكر أسماء والحقيقة احترت والله ناس تندح طريق الخرخ وناس تمدح الثاني بس أشكر تواصلكم ولاهنتوا

[Rahhal_xp]

شف هالمرفق ان شاء الله راح يساعدك،
خريطة لطريق حرض.

[قرقاص مع شاهي]

تسلم اخوي رحال

بس شكلي الظاهرأبروح مع طريق الشرقية وبعدها مخرج خريص إلى الهفوف وش رايك تنصح فيه ؟

[ابو لمار]

أخي قرقاص مع شاهي

إذا كان السفر مع العائلة فأنصحك بطريق الشرقيه خريص أو الشرقية الهفوف للراحة النفسية وانت سالكها...

أما إذا كان السفر مع الشباب فطريق حرض هو الأنسب لكم...

والله من وراء القصد

[قرقاص مع شاهي]

معليش أخوي ابو لمار إذا ممكن وصف الطريق بطريقة واضحة علشان اعرف راسي من رجلي واكون مرتاح اكثر وانا رايح (مع المسافات ) تلقاك تقول كنه اشغلنا هالقرقاصي القلق

[ابو لمار]

أخوي قرقاص مع شاهي...

انا ابوصفلك الحين الطريق من طريق الشرقيه الهفوف لأن الطريق هذا رحت معه شخصياً بس تراه ابعد من حرض يقولون...

تطلع لطريق الشرقيه إلين مفرق الهفوف تتجه يمين وتطول لين تجيك ثاني إشارة مع الإشارة الثانية اللي بعد المحطة تتجه يمين وهذا الطريق يطلعك على الدائري حق الهفوف ولا يخليك تدخل الهفوف وتحوس فيها احسب أربع دوارات الدوار الرابع تروح يمين وعب بنزين واسلك الطريق لين تجيك محطة ساسكو اللي قبل حرف تي وهذا يوديك لمنفذ سلوى حق قطر اتجه يمين مع التي وأمشي على طول لين تجيك محطة ساسكو الثانية حقت منفذ البطحاء ويجيك حرف تي بعد اتجه يسار بعد المحطة واتجه للمنفذ ... وعلى فكره كل هالطريق سريع ولا فيه سيدين أبد يعني ادعس وانت مرتاح ... وتمنياتي لك برحلة موفقه...

اما طريق خريص ما اعرف توصيفه إلى مفرق خريص لكن حسب معلومات واحد من الزملاء راح معه يقول إنه ممتاز... وفيه ناس راحو مع حرض ويقولون إن زين ويختصر المسافة لكن فيه زحف رمال يخوف ... وعلى فكره توصيف الأخ (دغيم1) ممتاز لطريق حرض...

الله يوفقك

[قرقاص مع شاهي]

ماقصرت أخوي أبو امار بس شكله يدوخ إشارات ودوارات شكلي بينفلب راسي والله يستر
طيب وش رايك باللي يقول امسك طريق الشرقية وامش إلين يجيك مفرق قطر والمارات وادخل معه تنصح فيه؟

[أبوفهد السعيد]

اخوي خلك على الوصف الأول
الرياض حرض والسلاااام تروح
وترد بالسلامة شكلي متأخر شوي

[ابو لمار]

فيه مخرجين فيهن لوحات قطر والإمارات اللي هو طريق خريص والثاني طريق الهفوف وكلا الطريقين لهن مميزات ومثل ما قالو الشباب اسلك الطريق اللي انت تبي بس اهم شي بطريق حرض انتبه لزحف الرمال والله يوفقك

[الذويخ]

الطريق المؤدية الى مركز حدود البطحاء السعودي والغويفات الاماراتي ، من منطقة الرياض يكون باتجاهين مختلفين ، الاول هو عن طريق الخرج حرض وتبلغ مسافته 520 كم ، والثاني الطريق المؤدية الى خريص الهفوف ( الاحساء) اي كأنك ستذهب الى الدمام الخبر ، لكن بعد ان تسير مسافة سبعين او ثمانين كم ستجد لوحة ارشادات مكتوب عليها طريق خريص .