بشأن اختلاف مقاس الكفرات .. هل تضرر الكارونه؟؟

[مجالس الرجال]

السلام عليكم ورحمة الله وبركاته
مساء الخير للجميع ..
الموضوع مثل ماقريتو بالعنوان
مثلا كفر مقاس 265-75-16 مقابل كفر بالون مقاس 900 الفرق بالارتفاع مايقارب 3 سم
إفترض إن احد الكفرات الخلفيه من المقاس الاول .
والكفر الثاني البالون .. إذا شبكت الدبل بما ان الدوره تختلف راح يضر الكارونه بسبب اختلاف المقاس


نبي نسمع من اصحاب الخبره هل هذا صحيح او لا ؟؟ مع الشرح الوافي


شاكر ومقدر للجميع

[سوبر VTC]

و عليكم السلام و رحمة الله
لاشك ان اختلاف الكفرات يؤثر على عزم المكينه و على القير
و بالتالي يكون الضغط الاكبر يقع على الكارونة و رمان العكوس
الكارونة تحتوي تروس داخليه (ديشالي) + طار + عمود بنيون

من وجهة نظري اذا كانت سواقتك هادئه جدا يعني سواقه على سنع
و بالنفود تكون قيادتك عقلانية بمعنى وسط لاضرر و لا ضرار
فما عندك مشكله
انا اتصور ان السرعات العالية فوق 140 تهين و تخرب عليك الكارونة
و اذا كنت انت تمشي بسرعه 140 فضع باعتبارك انك تمشي تقريبا 170 او اكثر
لان دورة الكفر اكبر من كفر البلد

لكن والدي ميكانيكي يقول اذا كان الكفر اكبر من حق الوكالة اكيد انه يتعب الكارونة بالدرجة الاولى
و انا اقول ايضا رمان العكس


تحياتي

[taag1]

لاهنتو ا اخواني على الموضوع المفيد للجميع ولكن حبيت استفسر منكم هل اذا ركبت كفرأماي من نوع رفيع
والأخر من نوع اقل منه ارتفاع
هل يشتغل الدبل وبسهوله ام لا .,.,؟؟

[طحنون]

خذها قاعده اي اختلاف في المقاسات راح يؤثر على المدى البعيد على الكورونا لانها كلها مواصفات ومقاييس للصانعين ولم توضع عبث بل بعد دراسات واختبارات واللي يضر اكثر هو البالون
مقاس 900 بالذات

[ناجز]

من الافضل تركيب المقاس الي جاي معه من المصنع

[mo7taj]

خليك على مقاش شد البلد احسن واريح للسيارة.....موفق للخير...

[مجالس الرجال]

شكرا للجميع على التفاعل
صحيح اللي قالو الاخوان إنه مع الزمن يضر اذا كان المقاس اكبر من شد بلد بفرق واجد
لكن اللي اقصده انه بنفس الوقت يضر اولا وخصوصا لما تكون بالبر وبنشر عليك احد الكفرات
وركبت السبير ومقاسه اصغر من الباقين وحاولت تمشي عليه 50 كيلو او ماشابه يضره بهالحظه اولا
طبعا الكلام هذا مع الدبل

[ق ص ك]

الردود كفت ووفت
بس انا عندي سؤال ومستغرب منه
الجموس وجيب الكزس 2009 تجي الجنوط مقاس 20 والاسبير مقاس 17 من وكالته
يعني اللي معاه جنط 20 لازم يركب اسبير 20 ؟؟؟؟؟؟؟؟؟؟؟؟؟؟؟؟

[جيب شراع]

شف ياخوي ركب اللي تبي بس اهم شي يكون الكفرين اللي في دفرنس واحد نفس المقاس

[كرفان]

الســــــــــلام عليكم
مرحبا بالشباب و بكاتب الموضوع:D
حقيقة شدني الموضوع وكذلك الردود . المهم لاتروحون بعيد :no2: لنفترض أن أحد الإطارات أقصد الإطارات المحركة للمركبة في حالة نقص الهواء عن الآخر أليس دوران الإثنين مختلفين ؟
الجواب نعــــــــــــم ...فمن الناحية العملية أصبح الإطار الناقص أصغر من الإطار الغير ناقص ، وهذه الظاهره نشاهدها في كثير من المركبات .
السؤال - هل يتأثر الدفرنش ؟
نعم... ولكن ليست الكارونة أو البنيون أو الرمان ، وإنما سوف يكون الجزء الذي يتأثر مباشرة هو مجموعة التروس الأربعة المتعلقة بالبنز (تروس التفاضل) فهذه التروس التفاضلية عندما يتساوى الإطارين في الدوران فإنها لاتدور إلا عندما تنعطف المركبة يمينا أو شمالا(يسارا) فعند إستقامة مسار المركبة يتوقف دوران هذه التروس .
أما إذا كان أحد الإطارين أكبر من الآخر أو أحدهما ناقص الهواء فإن الدوران لهذه التروس سوف يستمر ويزداد دورانا عند الإنعطاف مما ينقص من عمرها الإفتراضي وزيادة في حرارة السائل للدفرنش مما قد يؤدي إلى تأثر الأجزاء الأخرى مع كثرة الإستخدام . :cool:

[غربي هواوي]

موضوع مفيد وشكرا للجميع

[ابرق نثيل]

يضر القير اذا كان توماتيك ،، هذا في حالة اختلاف مقاسات الكفرات الايمن عن الايسر

[مجالس الرجال]

شاكر للجميع على التفاعل وإثراء الموضوع بالمفيد

[كرفان]

يضر القير اذا كان توماتيك ،، هذا في حالة اختلاف مقاسات الكفرات الايمن عن الايسر

مالك لواء.......
انا أختلف عنك لأنه كما ذكرت الدفرنش يقوم بإمتصاص الطاقة الصادره من القير ويقسمها على الإطارات بشكل تفاضلي والدليل أن المركبة كثيرا ما تنعطف لليمين أو اليسار :D أرجوا أن تكون الفكرة قد إتضحت لديك..:mad:

[الدوسري دت كم]

الشباب ماقصروا والله. انا مع اخوي كرفان في الفكره.. بس اذاكانت المسئله طواري يعني واحد بنشروركب كفرمقاسه اكبرمن الثاني حتى يصلح الكفرالاساسي انا ارا ان مافيه مشكله في هالحاله. المشكله اذا أستمرعلى المقاسات المختلفه يسبب تلف في التروس الشمسيه والقمريه داخل الكارونه بسبب اختلاف سرعة دوران عكس عن عكس. فيه واحد من الشباب يسئل اذا اختلفت المقاسات يأثرعلى تعشيق الدبل؟ انا اقول والله اعلم نعم في أغلب الاحيان مايعشق الا أذا وقفت السياره بسبب تفاوت دوران الاعمده

[؟؟؟ياعيني؟؟؟]

السلام عليكم............
الصراحه الموضوع شيق والردود مفيدةوطيبة

الله يعطيك العافية

[kmn]

يؤثر على طول لأن دواران الكفيرن يختلف .

[sameer_1798]

أخوي إذا بتغير مقاس الكفر أو الجنط غير كل الكفرات الخمسه عشان مايضر السياره
وأتوقع الفرق اللي بتلاحظه أن السرعه تكون أبطئ .

[الايام]

طيب ليش الشركة الصانعه مثلا نقول تويوتا000تركب اكثر من مقاس على نفس موديل السياره 0وهو نفس الدفرنس ونفس القير

عندك مثلا الربع يجي كفرات عريضه واقل ارتفاع من بعض الموديلات اللي تجي كفرات نحيفه واعلى او كبر حجم

وكذلك الشاص ابو رفرف تختلف كفراته عن الشاص اللي بدون رفرف

ولا فيها اي مشاكل لو بدلت كفرات ابو رفرف على العادي

افيدونا مأجورين

[الدوسري دت كم]

اخوي الايام السلام عليكم...
المهم تكون الكفرات كله مقاس واحد سوا كان الكفرعريض اورفيع المهم انهن يكونن مقاس واحد لسيارات الدفع الرباعي يعني الدفرنسين...
اما السيارات العاديه الدفرنس الواحد مايخالف اذا أختلف مقاس الكفرالامامي عن الخلفي مثل البورش والكورفت واغلب السيارات الرياضيه وشف سيارات الفورملا مثلا

[sameer_1798]

طيب ليش الشركة الصانعه مثلا نقول تويوتا000تركب اكثر من مقاس على نفس موديل السياره 0وهو نفس الدفرنس ونفس القير

عندك مثلا الربع يجي كفرات عريضه واقل ارتفاع من بعض الموديلات اللي تجي كفرات نحيفه واعلى او كبر حجم

وكذلك الشاص ابو رفرف تختلف كفراته عن الشاص اللي بدون رفرف

ولا فيها اي مشاكل لو بدلت كفرات ابو رفرف على العادي

افيدونا مأجورين
صدقت والله حتى اللاندكروزر شفة كتالوجه
يذكر ثلاث أنواع لمقاس الكفرات المسموح بها من المصنع
7.50 R16
235/80 R16
275/70 R16

[ساقان]

اخوي الايام السلام عليكم...
المهم تكون الكفرات كله مقاس واحد سوا كان الكفرعريض اورفيع المهم انهن يكونن مقاس واحد لسيارات الدفع الرباعي يعني الدفرنسين...
اما السيارات العاديه الدفرنس الواحد مايخالف اذا أختلف مقاس الكفرالامامي عن الخلفي مثل البورش والكورفت واغلب السيارات الرياضيه وشف سيارات الفورملا مثلا

الامريكي القديم الكفر الاحتياطي جنط صغير ويدعم كلامك لانه دفرنس واحد

[مجالس الرجال]

الله يجزاكم كل خير على إثراء الموضوع بالمفيد

[البرتقالي]

اخوي الايام السلام عليكم...
المهم تكون الكفرات كله مقاس واحد سوا كان الكفرعريض اورفيع المهم انهن يكونن مقاس واحد لسيارات الدفع الرباعي يعني الدفرنسين...
اما السيارات العاديه الدفرنس الواحد مايخالف اذا أختلف مقاس الكفرالامامي عن الخلفي مثل البورش والكورفت واغلب السيارات الرياضيه وشف سيارات الفورملا مثلا
كفيت ووفيت
بس ليه تضرب مثل بالبورش وعندنا دداسن :)