المساعد الشخصي الرقمي

مشاهدة النسخة كاملة : عاااااجل اريد ان اذهب لابها


الحياة مبدأ
20/07/2009, 03:36 PM
انا من أهل الرياض واريد الذهاب اول مرة اسافر عموماً في حياتي
معي اهلي والسيارة كامري 2005 م امي مريضه بالسكر والضغط ؟
السؤال هل الوالدة تتحمل السفر؟
ثانياً : الطريق من الرياض الى ابها هل هو مسار واحد والامسارين؟
ثالثا: هل هوامان وماهي المحطات والشقق والفنادق الجيدة؟
رابعاً: الوقت المناسب لبداية الرحلة والعودة منها؟
واي شيء اخر بتفيدوني عنه قولو لي تكفون ترى اول مرة اسافر جديد بقراطيسة ابي وصف كامل ودقيق
ولكم مني الدعاء ومن والدتي واخواني واخواتي انا ابي اسافر بكرة او اليوم العصر
دندون ساجر
20/07/2009, 03:58 PM
ارســل سيـــارتكــ شحــن مع البســامي..
قبل الرحله بيوميـــن.........
ورح طيـــرااان افضــل.................

ترا انا جيت من ابهــا قبل يوميــن..
والله ان الخطـ يجيــب الملل والضغطـ وقليل(ن) مــن السكــر.....965 كيــلو.........
الحياة مبدأ
20/07/2009, 04:32 PM
اشكرك على المرور
مانقدر على قيمة التذاكر
بنروح بر ارخص
تكفون نبي الافادة الشافيه الوافية
ابوتلين
20/07/2009, 04:40 PM
هذا لوحصلت حجز من سابع المستحيلا ت الحجز لأبها خاصة
ترى الطريق موهوب شين مع وادي الدواسر بس وسع الصدر شوي وخل الطريق تمشي
وتاصل بالسلامة انشاء الله
الحياة مبدأ
20/07/2009, 04:42 PM
السؤال هل هو مساريين
الحياة مبدأ
20/07/2009, 04:44 PM
يالربع تكفون افزعو لي ردو بسرعة اهلي مالو من الانتظار
أبوعُمر
20/07/2009, 04:53 PM
الطريق من الرياض إلى أبها سريع أخي الكريم ( الرياض - الخرج - الدلم - وادي الدواسر - خميس مشيط - ابها ) يستغرق الطريق بسرعة 120 كيلو إلى 10 ساعات .

حاول أن تسافر بعد صلاة الفجر مباشرة

و كرر الأسئلة على والدتك - حفظها الله - هل تحتاجين للوقوف ؟

لا تستعجل

لا تحاول الوقوف في مناطق ليس فيها تواجد سكاني

وفقك الله
مخال القصب
20/07/2009, 04:56 PM
هلا بك اخوي الحياة مبدأ...
طبعا طريق الرياض الخميس مسارين وفيه تحويله بعد وادي الدواسر يمكن 70 كيلومتر تقريبا ومن ناحية الخدمات فيه مدن رئيسيه راح تمر عليها تقدر تسكن فيها وتريح فيها اذا حسيت بالتعب عندك مثلا حوطة بني تميم السليل وادي الدواسر والبسبه للوالده فيه محطات كثيره تقدر توقف وفيها اذا حسيت انها تعبانه وطبعا افضل وقت بعد العصر وتحاول تنام بوادي الدواسر واذا جاء عصر اليوم الثاني كمل السفر وانشاء الله توصل مع اهلك بالسلامه وجاهزين لاي استفسار
ابوغلاب
20/07/2009, 04:58 PM
اخوي الطريق ان شاء الله زين لكن لا تسافر بالليل اطلاقا سافر مع الفجر وانت مفلل نووم انتبه لنفسك والارواح اللى بذمتك لا تسافر الا وانت مرتاح وشبعان نوم الطريق طيب اذكره قبل 8 شهور كله مزدوج ماعاد وصلات بسيطه فيها تحويلات واعتقد انهم خلصو منها

بالنسبة لوالدتك شفاها الله خذ علاج السكر في ترمس ثلج اذا كان حقن لان الجو في الطريق حار نوعا ما والطريق امان بعد الله سبحانه

اسأل الله لكم السلامه ورحلة موفقه وعلى هونك وانا خوك
ابو خالد 1992
20/07/2009, 04:58 PM
من الرياض إلى الأفلاج زي الورد ومن الأفلاج وإلى الوادي حليو ومن الوادي إلى الجنوب على ما اعتقد فيه مقطعة ولاكن من رأيي انك من الرياض إلى الوادي وتريح فيها انت والأهل ومن صباح الله خير لايردك إلى ابها والله يسترعليك
الحياة مبدأ
20/07/2009, 04:59 PM
شكرا لمروركم
تحويله يعني مسار واحد رايح جاي
واللى مساريين ودي امشي بكره الفجر ان شاء الله يعني متى اوصل
ابو البارق
20/07/2009, 05:02 PM
اخي الطريق مسارين لكن فيه ثلاث تحويلات مسار واحد
وأفضل وقت في وجهة نظري الساعة االثالثه بعد الظهر وتتوقف في وادي الدواسر للنوم ثم اكمال الرحلة فجرا هذه الطريقة مجربه
-الطريق امن ولله الحمد والمحطات كثيرة جدا وكذلك الشقق
ابوغلاب
20/07/2009, 05:04 PM
التحويلة اعتقد انها مسارين بس ظيقة تستدعي التهدئة الى 40 كيلومتر في الساعه تقريبا وفيها مطبات ولكن اذا وصلت السليل او الوادي عب سيارتك بنزين ولاتسرع على هونك الطريق فيه مواشي (ابل) وان مشيت بالسرعه القانونية ان شاء الله من بعد الفجر وانت محرك بتوصل الى ابها حول 2 او 3 العصر ان شاء الله عز وجل لكن شور الاخوان طيب اذا وصلت الوادي او السليل ريح الى العصر واللى عليك بالخير وبعدها توكل على الكريم ما يجي العشاء الا وانت بالخميس او ابها موفقين والله يرعاكم
الحياة مبدأ
20/07/2009, 05:05 PM
شكرا لك ابو البارق
المسار الواحد كم كيلو
شاص
20/07/2009, 05:16 PM
إذا مشيت في حدود الساعة 6 صباحاً توصل على 4 عصراً بإذن الله تعالى .. وحاول ترتب أغراضك وعفشك من الليل حتى تمشي بعد الفجر مباشرة .. ويفضل إنك ترتب السكن قبل ما تمشي لأنهم يذكرون إنه زحمة .. وإذا تبي فزعة بأرقام شقق ووحدات سكنية بالواديين خصوصاً أبشر .. تروح وترجع بالسلامة
الحياة مبدأ
20/07/2009, 05:17 PM
مافيه اضفات اخرى
الحياة مبدأ
20/07/2009, 05:22 PM
اشكرك على المرور
وشي افضل المحطات والشقق المفروشة وارقام الشقق ابي احجز وانا على الطريق
abu_ahmad_241
20/07/2009, 05:29 PM
أخوى العزيز الحياة مبدأ
انا من قبل سنتين شايف يعني من سنتين كنت فى مدينة ابها وتوجهة الى مدينة الرياض اول شى السفر بكون بعد صلاة الفجر او حتى قبل بساعة بس اهم شى قبل السفر تكون مجهز كل اغراضك بالسيارة ومايكون باقى لك ولا شى ثانيا تكون اخذا قسط كافى جدا من النووووووم والراحة
السرعة لاتتعدى 120 افضل شى
انا والعائلة حركت من ابها بعد صلاة الفجر والحمد لله وصلت تقريبا على الساعه 2.5 او 3
والخط متوفر فيه الخدمات
الله يشفى جميع المسلمين واتمنى لك سفرا سعيدا وتوصل بالسلامة ان شاء الله
الحياة مبدأ
20/07/2009, 06:05 PM
ان شاء الله بكرة بمشي لابها
بوصل للوادي الدواسر ثم اتوقف واشوف اذا كان الوضع كويس كملت واذا كان مو كويس رجعت ادعوالي بالتوفيق
والله يجزء كل من ساهم معي بالمشاركة كل خير ويوفقه في الدنيا والاخرة ويسهله دربه وشكرا لكم شكرا لك موقع مكشات والقائمين عليه وجزاء الله الجميع الف خير محبكم الحياة مبدأ
الحياة مبدأ
21/07/2009, 11:11 AM
اقوال مالله كتب لي روحه
الوالدة تعبت
وانا جاني تسمم غذائي من عشاء البارح
ابوغلاب
21/07/2009, 01:45 PM
الحمد لله على سلامتكم والله لايقدمكم لشر ولا يؤخركم له ان شاء الله فيها خير وربك اختار الصالح ماترون باس
يزن2000
21/07/2009, 02:21 PM
اقوال مالله كتب لي روحه
الوالدة تعبت
وانا جاني تسمم غذائي من عشاء البارح


فيها خير واناخوك مره ثانيه ان شاء الله ...الله يشفيكم جميع ..
الحياة مبدأ
21/07/2009, 07:53 PM
الله يتحفى بحالكم
ويجزاكم خير
وماترون بأس
الضاحي
21/07/2009, 08:31 PM
اقوال مالله كتب لي روحه
الوالدة تعبت
وانا جاني تسمم غذائي من عشاء البارح



الله يشفي الوالدة ويعافيها ويشفيك ان شاء الله

لعل الله كتب لكم خيره

والحمد لله على سلامتكم

بالنسبة للوالدة وتحملها للسفر فيا أخي الكريم اسمح لي ان اقول لك ان طبيبها حق السكر يجب ان يسأل ويستشار فهو من لديه تاريخها المرضي ويستطيع ان يفيدك بالمطلوب.

ثانيا: اتمنى وانصح الا تسافر باهلك اذا ما معك اخوان اولاد كبار في السن
صحيح الدنيا امان ان شاء الله لكنها امان الا ساعة

والافضل ان تسافر مع احد ثاني يماشيك في الخط حتى لو قدر الله وتعطلت او بنشرت او احتجت اي شيء يكون معك احد في سيارة ثانية يفزع لك.

الله يوفقك ويستر عليكم

عسى الله يكتب لك الخير يا اخي
اااالرااااكد
21/07/2009, 10:29 PM
(سبحان الله وبحمده سبحان الله العظيم)
الكايف 1
22/07/2009, 02:24 AM
الحمدلله على سلامتكم طهور إن شاء الله.
عسى أن تكرهوا شيئاً وهو خيرا لكم
لعل في تأخيركم السفر أو تأجيله خير
وكما افاد اخي /الضاحي لابد من إستشارة الطبيب المتابع لحالة الوالده اطال الله في عمرها ومتعها بالصحة والعافية وأبلاغه عن الارتفاع حيث ان أبها ترتفع عن سطح الارض 2200 متر والسوده تبعد عنها 25كم في الشمال الغربي وهي ترتفع عن سطح الارض 3000متر وقد سمعت أن الارتفاع يتعب مرضى الضغط .
شفى الله جميع مرضى المسلمين .
العرمه
22/07/2009, 02:50 AM
الحمد لله على سلامة الوالدة وسلامتك وما تشوفون شر يا رب يا كريم

يقول المثل اذا عزمت السفر فلا تجلس

انت نويت تسافر اعزم وتوكل على الله لكن نصيحتي غير وجهتك ابها لا تستحق العناء فالشقق غالية جدا والخليج يملونها زحام شديد في المنتزهات وغبره اللي طيب يمرض وما فيها اكسجين كتمه
اهلها ينحاشون منها لجده

لكن وش رايك تروح الطايف 750 كيلوا تقريبا بعدها الباحه 200 كيلو مع الطريق السريع ( جديد) تجلس اللي يكتب لك الله وترجع للطايف يومين يتخللها عمره وترجع بعدها لشقتكم في الطايف وتجلس اللي يكتب الله

اهم شي احسب مصاريف الرحلة على اقل تقدير 500 ريال يوميا اذا انتم عائلة متوسطه ووتعيش بشوي تقشف و1000 ريال مرتاح على الاخر ما تسال عن السعر ولا تتعب في البحث عن الشقق

واحتياطي للازمات

وان كان ما لك خلق على الشقاء الخرج قريب او الاحساء فيها تغيير ووناسه


واذا ما قدرت اطلعوا العيينة وحريملاء اهم شي لا تجلس

تراها بتكون حسرة

والحمد لله على اللي كتبه الله
القلب المحروم
22/07/2009, 01:48 PM
اخوي مايندرى وش الخيرة فية

الحمد لله على كل حال

انا كنت ابروح وانكسرت يدي وكـــنـسـلــت الروحة