سؤال لأهل التاهو و اليوكن .......... تكفون

[nasser454]

أخوكم نوى بعد التوكل على الله يشتري تاهو او يوكن
بس لقيت فيه درجات
LT - LTZ - LS
فالسؤال : فيه فرق بينهم من حيث الأساسيات ( مكينة و قير )
أو من حيث الأكسسوارات ؟
لا تبخلوا على أخوكم و لكم الأجر من الله
و مشكورين

[Tahoe LT]

حياك الله أخوي

شوف يالغالي .. أخوك له فترة ياخذ الفروقات بين الفئات

راح أجاوبك عن التاهو :)

المحرك والقير ما فية أختلاف بين كل الفئات وهو 5.3 بإستثناء Z71 فهو 6.2 على ما أعتقد

Ls والعيسى ما يجب هذا النوع وهو أقل نوع وأعتقد انه ما فيه مثبت سرعة وفيه كثير من النواقص سواء الداخليــة أو في الشكل الخارجي كمقابض الأبواب والمرايات بلون أسود ولا يجي فيه حساسات خلفيـة ... ويجي بدبل وبدون دبل

Lt ويجي منه أنواع كثيرة

فيه مرتبة أماميـة كاملة يسمونها متصل منفصل يعني تقدر تخليها مرتبة وتقدر تستخدم اللي في المنتصف تكاية :) حسب الإحتياج هذا بين السائق والراكب

وفيــة يجي مفصول وديكور في المنتصف بين السائق والراكب واسمة الدارج ملكي

العيسى والتوكيلات ماعندهم جلد من ال Lt والجميح وبالبيد عندهم جلد حسب ما سمعت ولست متأكد ..

كذلك يجي منه اختياري بجنط 20 أنش عند العيسى أو التوكيلات وبإمكانك إختيار نوع المراتب متصل منفصل أو ملكي وكذلك الدبل أو بدون والجميح ما يوفر جنط 20 إلا في فئة Ltz وبالبيد ما أدري عنة من ناحية الجنط

Ltz يجي كامل المواصفات جلد فتحة شاشة ولو تفكر بهالفئة تأكد من المواصفات بين الوكلاء فعلى الأرجح فيه أختلافات وبصراحة ما دققت فيها كثير لأن أخوك مركز على فئة Lt

وفيه Z71 وهو يجي رفارف بارزة ومختلفة عن الفئات السابقة كذلك الواجهة مختلفة من تحت تجي فولاذ بلون فضي أو بما يسمى تيتانيوم وكذلك تجهيزاتة للطرق الوعرة أفضل

ختاماً فرق السعر مع البحث وجدت أن التوكيلات العالميـة أفضل عروض ... بفارق خمسة الاف تقريبا عن العيسى لفئة ال LT

نصيحتي حدد أختياراتك بالضبط ومن ثم قارن الأسعار

والله يكتب لك اللي فيه الخير ولا تنسى صلاة الإستخارة

[وافي 00]

نصيحة خذ LT العادي اللي مراتبة غير مفصولة وشكلة مفصول لاكن اذا رفعت السنادة ياخذ مكانها راكب مثل طفل او شاب جسمة موكبير ويجي سعرة كويس وفية سنسر وتشغيل عن بعد وتحكم بالدركسون وكشافات ودواسات بانزين متحركة ومناظر ايضا وجنوط 17 المنيوم وسعرة ممتاز ايام 2008 خذيت واحد من الجميح 108 الف بينما LS سعرة اقل ب3 الاف ريال وتعيس بدون كل اللي ذكرتة لك وجنوطة تعيسة ومسكات البيبان سود والمناظر ايضا سود وبدون رمونت التشغيل عن بعد و و عادي بالعربي مثل كامري XL .....

اما LTZ او Z71 او دانيلي اكسسوارات مالها داعي وغالي حيل ...

نصيحة اخو وانت بكيفك كله لجل كلمتك تكفون وهذي نخوة

وسامحني اذا فية قصور

[ابو نوره]

وعليكم السلام
Lt هذا تقريباً نص فل
يجي مكيف مهوب اكتروني مراتب مخمل مرايات سود ولا فيها لمبه لا تحت ولا للاشاره
مراتب متصل منفصل مثبت سرعه تتحكم بالمسجل من الدركسون جنط 17 او 20
تشغيل عن بعد بالريموت وكذلك تتحكم بدواسات البنزين والفرامل
بالنسبه للوكالات اشوف الجميح افضل من العيسى ببعض المواصفات
ومنها ان اليوكن الفل كامل والدينالي وطاياته الخارجيه كهرب تطلع مع فتح الباب
وبالنسبه للمكينه التاهو واليوكن كلها 5.3
وبالنسبه لمثبت السرعه موجود في جميع الفئات
وهذا الي عندي ويمكن فيه نقص

[nasser454]

مشكورين مروا
و عز الله قول و فعل
ما قصرتوا
فيه سؤال اخير
يفرق مع اللي يبي يستعمل جنط 17و 20

[بدوي جنوبي]

اكيد جنط 17 اخف على السياره وارخص بكثير من جنط 20

ميزة جنط 20 منظر وشكل لكن سعر الكفر اعتقد فوق 1500 ريال

[نمر بن حثلين]

جنط 20 أمان للسيارة في الخط لو حدث انفجار للكفر لا سمح الله

ولكن كفراته غاليه ولا تتوفر في كل مكان

وغير مريح حيث يكون المطب قاسي

وايضا ما ينفع بالرمل لان ارتفاع الكفر قليل يعني تنسم ولا ما تنسم كله واحد

[سيف الظفير]

اكسسوارت فقط

[مروووق]

اتكل على الله وخذ Lt وجنوط 17

هذا شوري عليك. وصلاة الاستخاره قبل كل شي وانا اخوك

بالتوفيق

[دحيم الاول]

اول شئ خذ يوكن

ثاني شئ فيه فئات

فئة العادية slt على ما اعتقد فيها كل المميزات ما عدا فتحه - شاشه ملاح - و شاشة دي فدي

فئة تشمل ما ذكر و سعررها حوالي 170 كااااش لكن ما نصح بها لسعررها المرتفع

[nasser454]

مشكورين
و ما قصرتوا