المساعد الشخصي الرقمي

مشاهدة النسخة كاملة : بنشدكم عن دبل الباترول/ ربع 98 بعد التجربة في الجنوب..!!!


شمالات نجد
05/08/2009, 01:23 AM
بسم الله الرحمن الرحيم

أخواني.. السلام عليكم ورحمة الله وبركاته

وبعد..

خلال سفري للتمشيه في أبها وما حولها مررت على العديد من العقبات والطرقات الصعبة منها الترابي ومنها المعبد

المهم في الموضوع لاحظت الدبل الثقيل عند النزول مع أكثر من عقبة أنه لا يمسك السيارة مثل سيارات أخرى (بدون ذكر أسم) وأنني أضطر لإستخدام الفرامل كثيراً وكأن السيارة قير تماتيك؟

كذلك قبل فترة جربت الباترول بالدبل الثقيل في أحد الكشتات وكان معي أحد الزملاء ولم يصدق أنني عشقت الدبل الثقيل ويقول دبل سيارة (من نوع آخر) أقوى من ذلك بكثير وهو مجربها.

كذلك عند امتلاكي أحد السيارات سابقاً (ليست باترول) و(قيرها تماتيك) لاحظت أن دبلها الثقيل أقوى من دبل الباترول الموجود معي حالياً..!!

وفعلاً أنا ملاحظ أنه ليس هناك فرق كبير بعد التعشيق من الدبل الخفيف إلى الدبل الثقيل في الباترول..!!

السؤال: هل الباترول كذا دبله أو سيارتي فقط.؟

السيارة رغم ذلك مرتاح لها ولا شفت منها قصور ما شاء الله لكن مقلقني الدبل الثقيل أحسه ما يواجه إذا احتجته

أتمنى الجواب من اللي مجرب أكثر من سيارة ويعرف وش علتي :)

وشاكر ومقدر لكم تعاونكم معي أخواني مقدماً

سلام
روحي شمالية
05/08/2009, 01:30 AM
والله اللي معي 2001 باترول الدبل الثقيل ممتاز
وفيه فرق كبير بينه وبين الخفيف
شمالات نجد
05/08/2009, 01:38 AM
جعلك تسلم يا (روحي شمالية) لكن والله شي يقهر صحيح فيه فرق عندي لكن مهو ذاك الزود يعني تمشي بالدبل الثقيل وتسرع شوي ما عندك مشكله مهو مثل السيارات الثانيه بالدبل الثقيل تمسك الأرض ولا تسرع لأنه قوي جداً خصوصاً في الدحدره..

مدري هو علة الباترول كله أو بس موتري أو موديل عن موديل يفرق ولا أعرف وش الحل بصراحه مضيق صدري :)

شكراً لك
abo-lma
05/08/2009, 01:44 AM
معليك من هالكلام


وشلون الدبل معك في المحلات الوعره هو يزبنك

أنكان نعم فيا نعومك

والله يعطيك من خيره ويكفيك شره وشر عيون عيال الحرام

موفق خير
قناص غامد
05/08/2009, 01:45 AM
افحص السيارة ليست علة جميع السيارات انا عندي باترول الثقيل يجملك نزول وطلوع

تحياتي
شمالات نجد
05/08/2009, 01:51 AM
معليك من هالكلام


وشلون الدبل معك في المحلات الوعره هو يزبنك

أنكان نعم فيا نعومك

والله يعطيك من خيره ويكفيك شره وشر عيون عيال الحرام

موفق خير

الحمد لله ما عليه لكن في العقبات ماش خصوصاً في النزول أحطه بالثاني مع الدبل الثقيل وإذا رفعت رجلي عن الفرامل ينفلت الموتر كنه بالخامس أو كني بالخفيف جربت وركبت مواتر ثانيه الدبل الثقيل فيها مع النزول يمسك الموتر شوي ولا يهلك الفرامل صحيح لابد من استخدام الفرامل مع الدبل الثقيل لكن في حالتي كل شوي يا أضغط فرامل واترك وأرجع اضغط على طول تقول موتري تماتيك مهو عادي.!!

وجزاك الله خير على الدعوات الطيبه.. اللهم آمين


افحص السيارة ليست علة جميع السيارات انا عندي باترول الثقيل يجملك نزول وطلوع

تحياتي

المشكله توي مشيك عليه من الصدام للصدام بنفسي ولا ني قليل خبره في الموتر لكن قاهرني هالدبل الثقيل ودي يجود الموتر أكثر

شكراً لمروكم وإبداء رأيك

بالتوفيق للجميع

سلام
راعي المجهم
05/08/2009, 01:56 AM
ممكن الدبل الثقيل مايشبك معك شيك عليه عند مهندس ممتاز
شمالات نجد
05/08/2009, 02:16 AM
هلا بأخوي راعي المجاهيم

لا والله يشبك واحس بفرق بينه وبين الدبل الخفيف لكن مهو ذاك الفرق الكبير وانا ابيه على اسمه (ثقيل) ولاعينت منه ثقل.. عساه خير
شمالات نجد
05/08/2009, 04:16 PM
يا الربع بإنتظار المزيد من الردود وإبداء الرأي في المشكلة

وين أهل الجيوب؟ أو خلاص كامري :)
عاشق النفود 111
05/08/2009, 04:40 PM
وعليكم السلام ورحمة الله وبركاته

والله يا خوي فيه منحدرات قويه جدا وتكون مستقيمة بدون لفات فهذي اتوقع اي سياره راح تندفع حتى لو انها بالثقيل يعني لابد من استخدام الفرامل وإذا المنحدر قصير وفيه منحنيات فأعتقد بتلاحظ إن الموتر ماسك نفسه بالثقيل خاصة ..

وإذا بتتأكد إن الثقيل يعمل وأنت معشق الثقيل والسياره في وضع الوقوف قومها بالثالث وشوف إذا فز الموتر كأنه بالاول فمعناته أن الدبل الثقيل يعمل ..

تنبه : حاول أن لا تتجاوز سرعة 40 كيلومتر بدبل الثقيل حتى وإن كنت في نزول مستقيم وطويل ..

وللأطمئنان مر على اقرب أخصائي قيرات واسأل ..

بالتوفيق أخي الفاضل
تركي98
05/08/2009, 10:07 PM
لا ياخوي اتوقع موترك فيه شي
انا كان معي باترول 91 وجلس معي 6 سنوات وبعته والحين معي باترول 99 له سنه ونص
وكلهن مشاء الله الدبل الثقيل فرررق بينه وبين الخفيف وتلاحظ الموتر يفز بالدبل الثقيل ويمسك الموتر

يعني ثقيل ثقيل بمعنى الكلمه وفرق كبير وملاحظ عن الدبل الخفيف

فا شيك على الدبل عندك ممكن يكون فيه خلل او شي انا والله منب راعي خبره في الميكانيكا لكن حبيت افيدك بالمعلومه وان شاء الله تلقى لك احد فاهم زين بالمكانيكا يفيدك.
شمالات نجد
06/08/2009, 12:16 AM
وعليكم السلام ورحمة الله وبركاته

والله يا خوي فيه منحدرات قويه جدا وتكون مستقيمة بدون لفات فهذي اتوقع اي سياره راح تندفع حتى لو انها بالثقيل يعني لابد من استخدام الفرامل وإذا المنحدر قصير وفيه منحنيات فأعتقد بتلاحظ إن الموتر ماسك نفسه بالثقيل خاصة ..

وإذا بتتأكد إن الثقيل يعمل وأنت معشق الثقيل والسياره في وضع الوقوف قومها بالثالث وشوف إذا فز الموتر كأنه بالاول فمعناته أن الدبل الثقيل يعمل ..

تنبه : حاول أن لا تتجاوز سرعة 40 كيلومتر بدبل الثقيل حتى وإن كنت في نزول مستقيم وطويل ..

وللأطمئنان مر على اقرب أخصائي قيرات واسأل ..

بالتوفيق أخي الفاضل


جزاك الله خير على الرد سويت مثل كلامك قبل كذا وقومت السيارة بالثالث لكن بدون فزه قويه مثل سيارة ثانية مجرب عليها.. والمنحدرات والعقبات اللي قلت كانت مع لفات حاده وكان فيه سيارة تمشي قدامي يستخدم الفرامل بأقل مني بكثير.


لا ياخوي اتوقع موترك فيه شي
انا كان معي باترول 91 وجلس معي 6 سنوات وبعته والحين معي باترول 99 له سنه ونص
وكلهن مشاء الله الدبل الثقيل فرررق بينه وبين الخفيف وتلاحظ الموتر يفز بالدبل الثقيل ويمسك الموتر

يعني ثقيل ثقيل بمعنى الكلمه وفرق كبير وملاحظ عن الدبل الخفيف

فا شيك على الدبل عندك ممكن يكون فيه خلل او شي انا والله منب راعي خبره في الميكانيكا لكن حبيت افيدك بالمعلومه وان شاء الله تلقى لك احد فاهم زين بالمكانيكا يفيدك.


الله يرضى عليك وشكراً على الرد.. لكن صدقني أنا مجرب مواتر ثانيه والله الموتر ثقيله عادي تمشي فيه بسرعه بينما في المواتر الثانية الثقيل مستحيل تقدر تسرعه من قوته.

==================


سألت واحد من الربع وقال فرق بين كل سيارة والثانية يعني الباترول دبله الثقيل يختلف عن اللاند والجموس والشروكي كل شركة ولها مقاييس

ويقول الدبل الثقيل في الباترول ميزه حلوه له في الطعوس لكن جبال وعقبات يمشي الحال

والدبل الثقيل في اللاند ميزه له في العقبات والجبال لكن في الطعوس ما تمشي به بس تطلع من التغريزه وترجع للخفيف.

والظاهر أقرب مالها كذا


الله يعطيكم العافية يا جماعة الخير

شاكر ومقدر مروركم الرائع وردودكم الأروع

سلام
ساقان
06/08/2009, 04:58 AM
يمكن جنزير الدبل يحتاج شد او تغيير
مقلع الرمث
06/08/2009, 11:57 AM
حبيت اقولك حاجه فيه فرق بين الباترول والسيارت الثانيه

ان الباترول نمره طويله ويمد بالنمره اكثر من السيارات الثانيه

لان السيارات الثانيه لا شبكته بالثقيل ومثلا بنمره 2 تحصله ماسك الارض

ام االباترول اذا شبكت الثقيل وحطيته مثلا باثنين تحصله طاير ماحولك احد لانه يعادل رقم واحد بالسيارات الثانيه

وجه نظر ومقتنع فيه خاصه بالبر وبالنفود لكن ماانصحك انك تشغل الثقيل مع الزفلت لانه ماله حاجه انا اشبك

الخفيف بس مع الطلوع وافصله لا طلعت لاني اكون امحمل وقير تماتيك واخاف يطلع ريحه الكلتش بس

طبعا سيارتي فتك وسبق ان جربت الاول

سلملم
وليد 5
06/08/2009, 12:09 PM
السلام عليكم
السعودي ولا خليجي الباترول
NissaN 1990
06/08/2009, 12:16 PM
الدبل الثقيل في الباترول يخليه يمسك الأرض ولازم يكون فيه فرق بينه وبين الخفيف
بس بسألك هل أنت مركب مراوح كهرب يعني شايل مروحة وكالته ،،،،
yasser1389
06/08/2009, 12:20 PM
انا يالحبيب قنيت الباترول من موديل 86_ 91_ 96_99_2002_2004_2008 ولم اجد هذا العيب اللي تقول عنه والمعروف عن الباترول ان فيه قوه بدبله غير طبيعيه عن السيارات الاخرى
~EmPeRor~
06/08/2009, 01:15 PM
يالغالي

احيان اذا صارت مشكلة بالدبل ربعنا الي بالصناعية يدورون اي ترسين تركب متقابلة اهم شي تركب ولايهمهم التناسب << وهنا مشكلة كبيرة

احتمال حاصل لموترك كذا

بالتوفيق
أبوالمثنى
06/08/2009, 01:41 PM
الله يذكر ايام الفورتشنر بالخير ;)
شمالات نجد
06/08/2009, 02:40 PM
يمكن جنزير الدبل يحتاج شد او تغيير

إن شاء الله مافيه إلا العافية وشكراً لك على المرور


حبيت اقولك حاجه فيه فرق بين الباترول والسيارت الثانيه

ان الباترول نمره طويله ويمد بالنمره اكثر من السيارات الثانيه

لان السيارات الثانيه لا شبكته بالثقيل ومثلا بنمره 2 تحصله ماسك الارض

ام االباترول اذا شبكت الثقيل وحطيته مثلا باثنين تحصله طاير ماحولك احد لانه يعادل رقم واحد بالسيارات الثانيه

وجه نظر ومقتنع فيه خاصه بالبر وبالنفود لكن ماانصحك انك تشغل الثقيل مع الزفلت لانه ماله حاجه انا اشبك

الخفيف بس مع الطلوع وافصله لا طلعت لاني اكون امحمل وقير تماتيك واخاف يطلع ريحه الكلتش بس

طبعا سيارتي فتك وسبق ان جربت الاول

سلملم

شكراً لك والله لا يهينك على المعلومات الطيبة وفعلاً ملاحظ أنه يمشي كثير بالثقيل عكس سيارة ثانية


السلام عليكم
السعودي ولا خليجي الباترول


خليجي

=======

شاكر لكم مروركم ونصايحكم أخواني
شمالات نجد
06/08/2009, 02:52 PM
الدبل الثقيل في الباترول يخليه يمسك الأرض ولازم يكون فيه فرق بينه وبين الخفيف
بس بسألك هل أنت مركب مراوح كهرب يعني شايل مروحة وكالته ،،،،

بالنسبة لموتري فيه فرق لكن ماهو كبير وأنا أخوك جربت جمس وجربت تويوتا بصراحه تحس فرق كبير بين الخفيف والثقيل

بالنسبة للموتر شد بلد الحمد لله ولا ركبت فيه مراوح كهرب ولا غيره


انا يالحبيب قنيت الباترول من موديل 86_ 91_ 96_99_2002_2004_2008 ولم اجد هذا العيب اللي تقول عنه والمعروف عن الباترول ان فيه قوه بدبله غير طبيعيه عن السيارات الاخرى

مدري وأنا أخوك يمكن قوة تحمل.. لكن أنا أقصد قوة الترس الموتر مدحدر مع عقبة ودبل ثقيل ونمره ثقيله واستخدم الفرامل على طول كني كابرس لا تلومني والله شي يقهر

واحد يمشي قدامي أشوف استخدامه للفرامل أحسن مني بكثير يربط فرامل شوي ويترك كثير وأنا العكس


يالغالي

احيان اذا صارت مشكلة بالدبل ربعنا الي بالصناعية يدورون اي ترسين تركب متقابلة اهم شي تركب ولايهمهم التناسب << وهنا مشكلة كبيرة

احتمال حاصل لموترك كذا

بالتوفيق

والله معرف وبأشيك عليه بعد فترة وأشوف لأن ما حولي حالياً ورشات فاهمة


الله يذكر ايام الفورتشنر بالخير ;)

http://farm3.static.flickr.com/2443/3780423881_327a32a121_m.jpg (http://www.flickr.com/photos/meem7979/3780423881/)
ما شاء الله


اللهم آمين يا أبو المثني.. تصدق أنه قير تماتيك ودبله الثقيل يمسك أكثر من اللي معي حالياً

جد والله.. لكن الباترول موتر ما ينقال فيه شي وأنا مقهور بس من استخدامه في العقبات والجبال مع أني من أهل نجد ولاني كل يوم في الجنوب.

ولعل وعسى أنه يكون خلل في سيارتي فقط

شكراً لك على المرور

================


شاكر للجميع ردودهم وتعاونهم معي

سلام
وليد 5
06/08/2009, 03:00 PM
الله والعلم عندك اترواس ادبل هل هو مفكوك من قبل
الباترول الي معك قطري
ملف علاقي
06/08/2009, 03:05 PM
تحياتي لك اخي الفاضل ولكل المتواجدين مدام علي كلامك موترك خليجي يمكن تكون دفرنساته مختلف عن السعودي لأن السعودي من موديل 89إلي2001 تجي دفرنساتها 37/9والخليجيه 37/10 اما الفتك من 2002وطالع تجي 41/10 مثل تقاسيم اليوكن الجديد لذالك لاتقارن موترك مع سعودي قبل ماتتأكد من تقسيم دفرنساته هذا حسب علمي وباقي الأخوان فيهم الخير والبركه0000
شمالات نجد
06/08/2009, 07:43 PM
الله والعلم عندك اترواس ادبل هل هو مفكوك من قبل
الباترول الي معك قطري




مدري والله الوكالة قالو خليجي ولا تناقشت معهم في الموضوع لأني أدور على قطع غيار ومستعجل وقتها

والقير إن شاء الله أنه ما فك لكن بشيك عليه متى ما رجعت للرياض

الله يعطيك العافية


تحياتي لك اخي الفاضل ولكل المتواجدين مدام علي كلامك موترك خليجي يمكن تكون دفرنساته مختلف عن السعودي لأن السعودي من موديل 89إلي2001 تجي دفرنساتها 37/9والخليجيه 37/10 اما الفتك من 2002وطالع تجي 41/10 مثل تقاسيم اليوكن الجديد لذالك لاتقارن موترك مع سعودي قبل ماتتأكد من تقسيم دفرنساته هذا حسب علمي وباقي الأخوان فيهم الخير والبركه0000

بصراحه شي جديد علي لكن هو راس ماله (ربع سلق) ضنك بيكون فيه فرق بين السعودي والخليجي وإذا صار بنغير دفرنس سعودي الشكوى لله

=========

شكراً للجميع على التعاون والنصح

سلام