افضل تعديل على مكينة 4200 وتحويلها الى 4500 باقل تكلفه واكثر نشاط

[~EmPeRor~]

السلام عليكم ورحمة الله وبركاتة


كثير من الشباب اصحاب الباترولات من موديل 88 الى 97 وبعض الفئات من 98 الى 2002 تكون مكينتها حجم 4200 سي سي


طبعا لايخفانا جميع قوة الباترول في دبلاته وقيرة ولاكن مكينتة لاسف لك عليها


فحبيت انزل لكم خلطة لتحويل سعت المكينة الى 4500 << ويصير عزمها اقوى من 4500 البخاخ وذالك بسبب الفوارق في راس المحرك


نبداء باسم الله

ملاحظة :افضل شي واقل تكلفة عندما يكون الواحد يوضب المكينة ويعملها (( الطريقة توضيب بمقاسات معينة ))


طبعا اول شي تركب بستم مقاس صفر لموديل 2002 فتك (( 4800)) وافضل الاصلي بقيمت 800 ريال تقريبا


طقم شنابر نفس موديل البساتم ونفس المقاس << اهم شي تكون كلاه صفر مقاس 20 مايركب 350 ريال


افضل انك تغير البلوف من باب السلامة فقط 550 ريال


طقم وجية كامل للمكينة لموديل 97 واقل (( مكينة 4200 )) 520 ريال


كلتش جديد موديل 98 مكينة 4500 ب 700 ريال


واهم شي تمسح راس المحرك نصف ملي فقط << وتركب وجه واحد فقط واذا الموتر للتطعيس ومشاوير قريبة امسح واحد ملي الا ربع تكلفت المخرطة 120 ريال (( اهم شي وجه للراس واحد فقط بيقلون 2 ركب واحد انت ))


طبعا في طريقة يسمونها البوردنق للثلاجة والراس وتكلف 500 ريال << تسويها عند محلات التعديل الفائدة تنزل الحرارة نسبيا + زيادة بالعزم شي بسيط


توزن الديلكو على رقم 8-10 بالمبة


النتيجة ياشباب مرضية مرة وراح يكون عزم الموتر مرضي جدا


طبعا تنوية بسيطة مافية شي يفيد الا وله ضرر مقابل بسيط << طبعا الاضرار حاجتين فقط وماتعتبر اضرار


1- البنزين راح يكون استعمالك احمر << لابد منه


2- الحرارة بترتفع شي بسيط يعني تاصل الربع بالظبط << الحل رديتر المونيوم وراح تكون الحرارة اوكي طبعا في عز الصيف بالظهر


واذا عندك امكانية ركب كربريتر رياضي مقاس 550 سعره قرابت 1200 ريال جديد
ملاحظة :- مكينة 4200 اذا حولت 4500 راح تكون اقوى من 4500 بشي واضح جدا وفرق ملحوظ بقوة وذالك بسبب اخلاتفات براس المكينة 4200 و 4500 والفرق لصالح 4200
بالتوفيق ياشباب والمعذرة على العشوائية وعدم الترتيب ولاكن الموضوع باذن الله متكامل من والى والتكلفة مثل ماذكرت ممتازة نسبيا


ولاكن ركزو على المقاسات اهم شي لان المقاسات تفرق كثير جدا وافضل المقاسات كتبتها لكم وبالتوفيق



(( الكلام هذا من واقع تجربة وتعديل على كذا مكينة 4200 ))

[الصقار10]

ياخوي بما انك تعرف امل الشرح بالنسبه لديلكو 4500 الباترول موديل 2000 كيف اتأكد أنه موزون مضبوط لاني احس ان فيه شوية ضعف مع الشكر مقدما

[~EmPeRor~]

ياخوي بما انك تعرف امل الشرح بالنسبه لديلكو 4500 الباترول موديل 2000 كيف اتأكد أنه موزون مضبوط لاني احس ان فيه شوية ضعف مع الشكر مقدما
ياهلا بيك يالغالي


الصراحة انصدمت يوم ماشفت المشاهده للموضوع 63 ردود تشجعية صفر :eek: والاستفسارات واحد ولاكن يالغالي الدعوه هنا تبادل خبرة والهدف لتعم الفائدة بين الاعضاء

يالغالي الديلكو تازنة بالمبة افضل شي وتحطة مابين 8-10 وتكلفتها من 15-30 ريال

اتمنا لك التوفيق

[زايد بن بدران]

شغل وافي
شرح كافي
بيض الله وجهك ورحم الله والديك الله لايهينك

[قرناس2009]

الله يعطيك العا فية

شغل مظبوط

[البوعينين99]

الله يعطيك العافيه
موضوع مميز

بس دام انك معدل على كذا مكينه فلابد تعرف أرقام القطع
لو انك ذكرت أرقام القطع الي تنشرى جديده كان سهلت على الي يبي يعدل على مكينته الـ4200 .
والصور مانستغني عنها وتثري الموضوع بشكل كبير.


وفقك الله وجزاك الله كل خير

[bn 3mir]

ترانيم الوداع
اللله لايهينك ... والله انك افدتنا ... والله كنك تدري
عندي نيسان 93 عليه تواير بالون واذا دعست له ما يمشي غير 140 هههههههههه
و بقوم بالتعديل وبعلمك النتيجه ....
وبيض الله وجهك يا غالي

[التعـ King ـديل]

ترانيم ماعندي مشكله بقيمه القطع لكن تخبر ورشه تعدلها؟

[NissaN 1990]

يعطيك ألف عافيه

[مقلع الرمث]

الله يعافيك طيب يعني لو ابي اصلحه عند واحد تعرفه ولا كانك انت راعي فك وربط كم تصلح الاجمالي كله وشكرا

[؟؟؟ياعيني؟؟؟]

السلام عليكم
الله يعطيك العافية على الجهد الذي بذلته والذي تبذله لأخواننا في منتدنا مكشات واسأل الله ان يكتب لك الأجر ولكن لي ملاحظة ضعيرة وهي التوسع في الموضوع اكثر لتعم الفائدة ....

اسأل الله العظيم ان جعلنا باريين بوالدينا ..


لا الله الا الله

تقبل تقديري واحترامي

[~EmPeRor~]

يعافيكم الله ياشباب وشكر لكم على الردود المشجعهة

اخوي البويعيني تم ذكر المقاسات << اهم شي

اخوي bn 3mir يالغالي خذ قارمن وشوف كم تطلع السرعه بالبالون 140 تعادل تقريبا 160 - 165 ولاكن شيك على الديلكو وخل وزنيتة من 8 - 10 بالمبة وراح يجيب باذن الله 160 بالبالون تعادل 180 تقريبا

اخوي خبير نيسان تم الرد بالخاص يالغالي واذا عندك ميزانية ممتازة فانصحك بمكاين الشفر << قوة فوق الخيال باسعار حلوة جدا

مقلع الرمث يالغالي انا اشتغل الا لنفسي ولا ناس خاصين اعرفهم (( يعني وقت مافضيت احيان تقعد السيارة شهر كامل وهي ماتحركت فلا اقدر ارتبط ولاكن الي لك علي المشورة مراح اقصر معاك فيها باذن الله ))

؟؟ ياعيني ؟؟ الله يعطيك العافية ولاهنت على المرور

الف شكر لكم شباب على المررو واعتذر عن العمل لاحد وذالك بسبب الوقت

[مكشاتي كوكتيل]

شكراً لك مع إني ماني فاهم في هالأمور :)

[بن.حسن]

مشكور اخي ترانيم الوداع

على هذا الموضوع والجهد الطيب

الذي سوف يستفيد منه الكثير

جزاك الله كل خير


-----

[mo7taj]

بارك الله فيك ورعاك
تقرير واضح ومفصل
السؤال ينفع للاستخدام اليومي
موفق لكل خير

[شمالات نجد]

شكراً على الموضوع الرائع

لكن أنا من رأيي حرام الواحد يلعب في المكينه وهي مافيها إلا العافية أما إذا كان فاك على كل حال ما يخالف

بالنسبة للمروحة هل لها دخل في الموضوع؟ وهل يتم استبدال الميكانيكية بكهربائية؟

بالتوفيق لك وللجميع

سلام

[سوبر VTC]

و عليكم السلام و رحمة الله

مشكور على الجهد و جزاك الله خير :)

لا خلا و لا عدم :good:

احد الربع مركب مكينه جمس 6لتر على ربع سلقه ما شاء الله الموتر طيارة :good:

طيب يابعدي سؤال

احد الربع معه صالون باترول 93 بخاخ 4500 طرمبه بنزين جديده فتك
الموتر اذا شغل المكيف تضعف المكينه ترتر
ايضا القير بالثاني و الثالث تقلق البلوف

على الرغم ان

الديلكو وزانه على كلامه على موترين من ربعه نفس الوزنه

و لكن للاسف ما في فايده

طبعا اسلاك بواجي صفاي كل شي تمام فما الحل ؟؟؟؟؟؟؟؟

موفق و لاهنت

[~EmPeRor~]

يعطيكم الف عافية ياشباب على المرور

اخوي mo7taj اذا زدت المسح عن نصف ملي راح يتعبك شوي بالصيف تلقى الحرارة ثلث - النصف اذا وقفت ولاكن خلها نصف ملي او اقل والخلطه طبعا استخدام ومامنها اي ضرر باذن الله

شملات نجد هلا بيك يالغالي كثير من الشباب يدفع فلوس ويبي يرفع عزم موترة ولاكن مافية تكافى بالخلطات العشوائية الي يسويها فلا تفيدة بشي لاسف ولو جمع خساراتة على الوقت طلعت بالاف وهذا شي يحسر

هلا بيك اخوي سوبر فتك

الستة لتر اجرااااام واذا كان التجليس 100% و البرمجة 100% راح يكون عزمها اقوى من الكابريس اس اس بقوووة وشي ملحووووض ولاكن كم كلفتة ؟؟ اتوقع من 18 - 23 الف واحتمال اكثر

بالنسبة 93 مغيرة مكينتة لمكينت الموديل الجديد خلة يتأكد من وزن البلوف + الديلكو بالمبة <<< ويشوف ليات الهواء لديلكواذا كل شي 100% بيكون عنده يالجنزير او عمود التيمن << واحد منها

بالتوفيق ياشباب ولاهنتم جميعكم على المرور

[سوبر VTC]

هلا بيك اخوي سوبر فتك

الستة لتر اجرااااام واذا كان التجليس 100% و البرمجة 100% راح يكون عزمها اقوى من الكابريس اس اس بقوووة وشي ملحووووض ولاكن كم كلفتة ؟؟ اتوقع من 18 - 23 الف واحتمال اكثر

بالنسبة 93 مغيرة مكينتة لمكينت الموديل الجديد خلة يتأكد من وزن البلوف + الديلكو بالمبة <<< ويشوف ليات الهواء لديلكواذا كل شي 100% بيكون عنده يالجنزير او عمود التيمن << واحد منها




هلا و غلا اخوي ترانيم الوداع ماقصرت يابعدي :good:
السلقه مجلسه مكينته عند الصمعاني ابو وليد و البرمجه ابو صالح الرياعي
البتبت 93 :D:p
مكينته بخاخ 4500
نبي نوزن بلوفه ان شاء الله
ليات هواء الديلكو ==> قصدك ممكن انهن به تنسيم هوا يعني شقوق ؟؟
الجنزير==> يكون راخي مثلا ؟
التيمن => تكون توقيتته مع الجنزير غلط ممكن ؟

موفق

[my own]

يعطيك العافية اخوي ترانيم الوداع ,,
و مشكور على طرح تجاربك الناجحة ,,
وفقك الله

[bn 3mir]

الله لايهينك على الرد الشافي

[~EmPeRor~]

عطيكم الف عافية على المرور



هلا و غلا اخوي ترانيم الوداع ماقصرت يابعدي :good:

السلقه مجلسه مكينته عند الصمعاني ابو وليد و البرمجه ابو صالح الرياعي
البتبت 93 :D:p
مكينته بخاخ 4500
نبي نوزن بلوفه ان شاء الله
ليات هواء الديلكو ==> قصدك ممكن انهن به تنسيم هوا يعني شقوق ؟؟
الجنزير==> يكون راخي مثلا ؟
التيمن => تكون توقيتته مع الجنزير غلط ممكن ؟

موفق



مشاءالله عليك يالغالي فاهم فيها مايحتاج بالنسبة للجنزير مايرتخي الا اذا اتعدمت السحطات << غيرها واحتمال تغير الجنزير

كبداية اوزن بلووف + تشيك على ليات الديلكو


بالنسبة ل 6 لتر مدام عند الصمعاني ماعلية كلام باذن الله

وبالتوفيق يالغالي

[حق الفيتو]

ما شاء الله .. احس اني قاعد مع مرهمين

الله يوفقكم ... ويزيدكم من علمة ..

[الوسيطاء]

و عليكم السلام و رحمة الله



مشكور على الجهد و جزاك الله خير :)


لا خلا و لا عدم :good:


احد الربع مركب مكينه جمس 6لتر على ربع سلقه ما شاء الله الموتر طيارة :good:


طيب يابعدي سؤال


احد الربع معه صالون باترول 93 بخاخ 4500 طرمبه بنزين جديده فتك


الموتر اذا شغل المكيف تضعف المكينه ترتر
ايضا القير بالثاني و الثالث تقلق البلوف


على الرغم ان


الديلكو وزانه على كلامه على موترين من ربعه نفس الوزنه


و لكن للاسف ما في فايده


طبعا اسلاك بواجي صفاي كل شي تمام فما الحل ؟؟؟؟؟؟؟؟


موفق و لاهنت



اخوي اذا على ضعف المكينه لازم تظيف حساس المكيف على كمبيوتر المكينه بس لامشى بيبرد اكيد

ولاكن لاوقف قله برودته ومن ناحيه البلوف اذا صوتها قوي اتوقع من لكلكت الديلكو واذا هي بلوف

لاتعب عمرك بوزنها لان بعد فتره راح تفتح وطبعاً اذا فتح ازين من يقفل لانه ابرد للموتر واتمنى اني افدتك

وطبعاً معي موتر له اكثر من سنتين 90 وعليه 4500 بخاخ ومشاء الله لاصرف ولاشي يمشي530كيلوعلى سرعه140 و150

[aooa]

بارك الله فيك ......... يا زين الشيء على طبيعته
واللي يبي قوة مكينه يشتري فتك او vxr

اما التعديل الصراحة انا ما ارتاح له ابد ابد

[قطب 999]

للاسف ماعندنا الا ورش تستخدم معدات متخلفه يفك ويطبق بدون وزن ولا قياس
كلها كم شهر وتنعدم يا مكينه او قير او دفرنس

[سوبر VTC]

مشاءالله عليك يالغالي فاهم فيها مايحتاج بالنسبة للجنزير مايرتخي الا اذا اتعدمت السحطات << غيرها واحتمال تغير الجنزير
كبداية اوزن بلووف + تشيك على ليات الديلكو
بالنسبة ل 6 لتر مدام عند الصمعاني ماعلية كلام باذن الله
وبالتوفيق يالغالي



الله يجزاك خير
يصير خير ان شاء الله
موفق



اخوي اذا على ضعف المكينه لازم تظيف حساس المكيف على كمبيوتر المكينه بس لامشى بيبرد اكيد
ولاكن لاوقف قله برودته ومن ناحيه البلوف اذا صوتها قوي اتوقع من لكلكت الديلكو واذا هي بلوف
لاتعب عمرك بوزنها لان بعد فتره راح تفتح وطبعاً اذا فتح ازين من يقفل لانه ابرد للموتر واتمنى اني افدتك
وطبعاً معي موتر له اكثر من سنتين 90 وعليه 4500 بخاخ ومشاء الله لاصرف ولاشي يمشي530كيلوعلى سرعه140 و150


الله يجزاك خير اخوي الوسيطاء
مسالة المكيف و الكمبيوتر :good:
ابتاكد منها ان شاء الله
تاكيد لكلامك انه الافضل ان البلوف فاتحه
3 من الربع كاشتين بالدهناء معهم سلقه باترول
المهم ان الموتر عيا يشتغل الصبح :no::no:
و السبب ان البلوف قافله :director:
ستر الله صار حولهم ناس و عطوهم اشتراك :alarm:
الموتر م93 يمشي بالتانكي تقريبا الى 520كيلو
موفق

[قرم العيال]

مشروع وخلطه ممتازة

لكن سمعت انه تنقص من عمر المكينه

مدري ما ذكرت كبليتر هولي و كامات .. خشنه !!!

[حسين البري]

انت رائع اخوي وتشكر على المجهود وتستحق الاشادة والتقدير

[الصمان 2]

الله يعطيك العافية على الشرح الواضح .



بارك الله فيك اخي ترانيم الوداع .




.

[~EmPeRor~]

هلا بيكم شباب وشكرا على مروركم جميعا

اخوي سوبر فتك المعذرة نسيت ارد على سوالك بخصوص المكيف

الباترول اذا اشتغل المكيف يرتفع الاستنص << تاكد من دائرت هواء الحساس الي يرفع الاستنص من عند الدعسة احتمال انة ملغي بالنسبة للكمبيوتر الياباني مستحيل نهااائي تعدل على كمبيوترة الا اذا ركبت كمبيوتر رياضي او ينيوجب<< وهذي مكلفة اكثر من 4000 ريال


مشروع وخلطه ممتازة

لكن سمعت انه تنقص من عمر المكينه

مدري ما ذكرت كبليتر هولي و كامات .. خشنه !!!
يالغالي بالنسبة للكبريتر ادل بروك افضل + طرمبة كهربائية + رقريتر << وانس انة يقطع بالطعوس او يكتم

ولاكن الكامات << تمنع الخلطة انها تكون استخدام يومي والي يبية للعب بس يمسح واحد ملي او واحد ملي وربع + كام ستيج 3 او 4 وشوف شلون بيكون عزمة << كذا مراح يكون استعمال يومي


ابد ياشباب الخلطة المذكورة لاستعمال اليومي وشكر لكم جميعا على المرور

[زايد بن بدران]

اخوي اذا على ضعف المكينه لازم تظيف حساس المكيف على كمبيوتر المكينه بس لامشى بيبرد اكيد

ولاكن لاوقف قله برودته ومن ناحيه البلوف اذا صوتها قوي اتوقع من لكلكت الديلكو واذا هي بلوف

لاتعب عمرك بوزنها لان بعد فتره راح تفتح وطبعاً اذا فتح ازين من يقفل لانه ابرد للموتر واتمنى اني افدتك

وطبعاً معي موتر له اكثر من سنتين 90 وعليه 4500 بخاخ ومشاء الله لاصرف ولاشي يمشي530كيلوعلى سرعه140 و150
هل تتوقع لو اطبق المكينه 4500بخاخ على الباترول 94بيمشيني التانكي 530 كيلو

[~EmPeRor~]

هل تتوقع لو اطبق المكينه 4500بخاخ على الباترول 94بيمشيني التانكي 530 كيلو


يالغالي 4200 اقل شرب للبنزين من 4500 ولاكن لان 4500 بخاخ راح احتمال تكون مثله او اقل ولاكن اذا موترك 4200 ماله داعي تخسر حدود 10 الاف ريال عشان شي بسيط


الدعوة كلها روح لقطع الغيار وخذ اصلاح كربريتر التيما وركبة على كربريتر الباترول راح يقل الشرب كثير + شيك عليى ليات الكربريتر والديلكو + وزن الديلكو على رقم 8-10 وراح يقل شرب البنزين كثير ويصير عزم الموتر لاباس فية بعدين يالغالي لاتنسى شرب البنزين يفرق من سيارة لسيارة لاسباب كثيرة

رفع السيارة - حجم الكفرات -صفاوت المكينة ... الخ

[ابوفيصل9]

ما قصرت والله يعطيك العافيه

[سوبر VTC]

مكشور اخوي ترانيم الوداع
و الله يسهل
موفق

[الوسيطاء]

هل تتوقع لو اطبق المكينه 4500بخاخ على الباترول 94بيمشيني التانكي 530 كيلو

والله بيفرق معك راح ترتاح المكينه والعزم تمام ويمشيك 530 بمشيئه الله وانت ودعست رجلك

[~EmPeRor~]

شكر لكم ياشباب على المرور جميعا

[my own]

الدعوة كلها روح لقطع الغيار وخذ اصلاح كربريتر التيما وركبة على كربريتر الباترول راح يقل الشرب كثير
ياليت اخوي ترانيم الوداع توضح اي موديل في الالتيما ! وهل يفرق العزم !
يعطيك العافية ,,

[~EmPeRor~]

ياليت اخوي ترانيم الوداع توضح اي موديل في الالتيما ! وهل يفرق العزم !
يعطيك العافية ,,

هلا بيك يالغالي

هم يعرفون اهل قطع الغيار موديل 94 - 95 طبعا تحتاج الابرة فقط والباقي كله يركب عادي الابرة مقاسها 142 الباترول تقريبا 142

بالنسبة للعزم نفس ماهو بس يفرق بالسرعات العالية فقط يقل شوي وسعر الصلاح 25 ريال فقط

[taag1]

الأخ الفاضل / ترانيم الوداع (http://www.mekshat.com/vb/member.php?u=119504) الله يعطيك الف عافيه بصراحه شغل متعوب عليه لاهنت يالقرم الله ينفع بك الأسلام والمسلمين .,., تقبل مروري المتواضع .,.,

[my own]

بيض الله وجهك ,, ومشكور

[الوعب]

بصراحه موضوع يعتبر درس في المكيانيكا

راح ارجع اقراه مره ثانيه بتمعن .. ودك والله لو فيه احد فاهم الطريقه و هو يتكفل بترتيب كل شي بحسب ما ذكر ترانيم بالظبط وياخذ مربحه

ترانيم الله لايهينك والله يجعله في ميزان حسناتك

[~EmPeRor~]

الأخ الفاضل / ترانيم الوداع (http://www.mekshat.com/vb/member.php?u=119504) الله يعطيك الف عافيه بصراحه شغل متعوب عليه لاهنت يالقرم الله ينفع بك الأسلام والمسلمين .,., تقبل مروري المتواضع .,.,
الله يسلمك ويعافيك الله يالغالي وتسلم يالغالي على المرور


بيض الله وجهك ,, ومشكور
ووجهك حبيبي وتسلم يالغالي على المرور

واي استفسار حاظرين لكم وانشاءالله نفيدكم بالي نقدر عليه

بالتوفيق للجميع

[~EmPeRor~]

بصراحه موضوع يعتبر درس في المكيانيكا

راح ارجع اقراه مره ثانيه بتمعن .. ودك والله لو فيه احد فاهم الطريقه و هو يتكفل بترتيب كل شي بحسب ما ذكر ترانيم بالظبط وياخذ مربحه

ترانيم الله لايهينك والله يجعله في ميزان حسناتك


الله يسلمك يالغالي

والف شكر لك على المرور

بالنسبة للي يعمل الطريقة هذي لاسف مراح يعرف لها الا كراجات الترهيم << وهذولا يستنزفون للمال من طمعهم الزائد

ولاكن اذا عندك خلفية بالمكانيكا لو 10 % راح تعرفها اكيد 100%

واي واحد حاب يسويها يتفق معا اي ورشة << توضيب

ثم يبدى ويجيب له القطع بحسباب المقاسات المذكورة اهم شي واي استفسار حاظرين له

شكر لمرورك وانتظر مرورك الثاني

الف شكر لك

[فتك ربع]

اخوي ابي انشدك ..

من اللي يبي يضبط لي هالشغل ذا كله

بالقصيم تكفى افزع لي

[~EmPeRor~]

هلا بيك يالغالي

بالنسبة بالقصيم هذا مصدر الترهيم وهم اهل الخبرة

طبعا لو تركب مكينة امريكي افضل كثير ولاكن هذي افضل شي تسويها اذا المحرك مخبط وتبي توضبة

سوه عند اي ميكانيكي وجب القطع انت له وخلة يركبها في المخرطة طبعا بيخرطون السلندر وسو كل شي زي ماهو محدد بالمقاس

الدعوة بسيطة جداااااا

اتمنا لك التوفيق يالغالي

[~EmPeRor~]

للرفع لتعم الفائدة

[المجمعة عشق]

مشاء الله تبارك الله


معلم



اسلوب مميز ومتابعة جيدة




لكن لو تسمح لي بمداخلة بسيطة



مكينتك شغاله تمام لا تفكها ؟؟!!!


مكينة 4200 غالية الان نسبيا توصل 5000 ريال


اذا تبي تعدلها وتوفر انصحك


1) تبيع مكينتك الممتازة والافضل تبيعها لواحد او تشليح يشوفها شغاله لكي تيجب سعر انسب

2) تشتري مكينة 4200 مخبطة او مبوشة تحتاج توضيب

بعدين تفرنك عليها بطريقة ترانيم الوداع




& بس في نفسي اشوف هالتعديل على الطبيعة

[~EmPeRor~]

8888888

هلا بيك يالغالي


كلام سليم 100%


ولاكن لاتشري من التشليح خلها الين تخبط المكينة لان مكاين التشليح ماتظمنها احتمال يكون فيها راس المكينة وبيكلفك حدود 2000 ريال الراس الحاله

بالنسبة للمقطع

فية مقطع اذكر شفتة قبل مدة باليوتيوب لاواحد مسوي زي كذا ولاكن بستم 50 حق 4200

طبعا المقطع (( استعراض - تفحيط )) وليس قومة لموتر ولاكن بحاول اجيبة

[~EmPeRor~]

اخوي المجمعه عشق

لك المقطع بالخاص

[bader_2.0.1.0]

الله يعطيك العافيه اخوي موضوع مهم صراحه بنسبه لي
الله يوفقك ويستر عليك وعلى المسلمين انشاء الله

[~EmPeRor~]

وياك اخوي بدر ولاهنت على المررو ويجازاك خير ويرحم والديك

[~EmPeRor~]

فوووووووق لتعم الفائدة

[م/الحمود]

ماشاء الله تبارك الله


يعجبني الانسان الفاهم والمبدع بعمله وهذا واضح من ردودك التي تنم عن احتراف والمام بعملك


تقبل فائق احترامي




عندي استفسار

اكثر من مرة ذكرت المكائن الامريكية وتنصح بها هل هى للستخدام اليومي او فقط للمسابقات الرياضية وذا كانت للستخدام اليومي هل يتم فحص السيارة من قبل الفحص الدوري




اكرر اعجابي:good2: واحترامي:good: لك الاخ الكريم

[~EmPeRor~]

هلا بيك يالغالي

الله يسلمك ويعافيك يالغالي

بالنسبة لل 8 سلندر

محركات جبارة

محركات الشفر سوى من الجيل القديم او الجديد تتفوق على افضل المحركات اليابانية

وهذا ان دل على شي دل على منبع القوة الامريكية بصنع اقوى وافضل محركات بالعالم

بالنسبة لاستخدام اليومي او مسابقات فهذا حسب رغبتك يالغالي

محركات الشفر فترض محرك lt1 محرك الكابرس 96 محرك جبار وقوتة على الحذاف 295 حصان

لو تخليه ستوك < بدون تعديل تصبح استخدام يومي

ولو تعطية كام وشغلات جاامدة وتعديلت جامدة << ياصل الى اكثر من 500 حصان بتكلفة معقولة بالنسبة للقوة وتصبح للسباقات فقط

(( حسب التعديل الي تضعه على المحرك او تحلية بلد << انت ورغبتك))

والله يحيك باي وقت يالغالي والف شكر لك على مرورك

[بردوق صندقان]

اخوي الله يعطيك العافية ويبارك لك في عمرك
بغيت اسألك هل يظبط التعديل على الباترول 94 بخاخ الفل

[~EmPeRor~]

هلا بك يالغالي

الباترول ال 4200 افضل تعديل + اوفر شي هو مسح الراس نصف ملي + وجه واحد للراس فقط

بالنسبة للهدرز والشغلات الثانية مكلفة ولاكن ماتطلع بنتائج متوقعه

والله يسلمك ويعافيك والله يحيك باي وقت يالغالي

[aBo 7SeEeN]

بيض الله وجهك وهل لك خلفيه في تعديل الباثفندر

[العوووفي]

اخوي ترانيم الوداع
عندي بترول شاص موديل 96 عزمه ضعيف جدا وثقيل مغير دزق وكلتش قبل سنتين تجاري
يمكن يكون منه ولا ....

[~EmPeRor~]

تسم يابو حسين على المرور والله يعافيك


اخوي العوفي

تاكد من صفات والمكينة + وزنية الديلكو يكون على 11 او 10 +ناكد من المنظم الموجود على الرفرف حق الهواء < بين الباطرية والغمارة وان شاءالله بيكون عزم الموتر ممتاز

الكلتش التجاري << مشكلتة فقط بالبر اكثر اما على الزفلت فلا فية اي فرق ولاكن معا الوقت بيكون عمرة اقل من الاصلي

والله يحيك يالغالي وتسلمون على المرور

[العوووفي]

تسم يابو حسين على المرور والله يعافيك


اخوي العوفي

تاكد من صفات والمكينة + وزنية الديلكو يكون على 11 او 10 +ناكد من المنظم الموجود على الرفرف حق الهواء < بين الباطرية والغمارة وان شاءالله بيكون عزم الموتر ممتاز

الكلتش التجاري << مشكلتة فقط بالبر اكثر اما على الزفلت فلا فية اي فرق ولاكن معا الوقت بيكون عمرة اقل من الاصلي

والله يحيك يالغالي وتسلمون على المرور
كيف يتم فحص المنظم

[راعي الركيات]

موضوع رائع وبالتوفيق يارب

[~EmPeRor~]

كيف يتم فحص المنظم


يالغالي

المنظم يوجد فية 4 ليات

3 جنب بعض

والرابع كبير <<< غير مهم

الثلاثة الي راكبة تاكد من اليات مافيها تهريب فقط واذا مفكوكة لابد من شخص ذو خبرة يركبها لك واذا ماهي فاليسر منها << الي جهت الشمعه يركب بالكاربريتر من جهت الرديتر < واضح موقعه ولابد تفك القربة

الاوسط وانت مقابل افرف يوجد مخرجين بالكاربريتر يركب بالجزء الايمن

الايسر يركب بلاجظظء الايسر


اخوي صاحب الركات

تسلم يالغالي ويعطيك الف عافية على المرور

[العوووفي]

يالغالي

المنظم يوجد فية 4 ليات

3 جنب بعض

والرابع كبير <<< غير مهم

الثلاثة الي راكبة تاكد من اليات مافيها تهريب فقط واذا مفكوكة لابد من شخص ذو خبرة يركبها لك واذا ماهي فاليسر منها << الي جهت الشمعه يركب بالكاربريتر من جهت الرديتر < واضح موقعه ولابد تفك القربة

الاوسط وانت مقابل افرف يوجد مخرجين بالكاربريتر يركب بالجزء الايمن

الايسر يركب بلاجظظء الايسر


اخوي صاحب الركات

تسلم يالغالي ويعطيك الف عافية على المرور
لا هنت وبيض الله وجهك

[~EmPeRor~]

وجهك يالغالي

واي استفسار حاظر لك

[عزيز النفس 66]

الله يعطيك العافيه اخوي وما قصرت

لكن حاب اسالك انت قلت المكاين الي قوتها 4200 ال 97

السفاري 99 سلقه كم قوة مكينته ؟ هل هو 4200 او 4500

والله يعطيك الـ 1000 ـف عافيه

[Bader-M]

معلومات عن محرك الباترول 4200 من مديل 1988-1997
Intermittent output (SAE Gross J1349)
152 Hp @ 3,600 rpm
Continuous output (SAE Gross J1349)
137 Hp @ 3,600 rpm
Peak torque (SAE Gross J1349)
32.5 kg-m (235 ft-lb) @ 2,800 rpm
Minimum fuel consumption
210 g/Hp·hr (0.463 lb/Hp·hr) @ 2,000 rpm
Fuel and type
Water cooled gasoline, (LPG & Natural gas) 4-cycle, O.H.V.
Cylinder arrangement
6 in-line
Combustion chamber
Bath-tub shape
Bore x stroke
96 x 96 mm (3.78 x 3.78 in)
Total piston displacement
4,169 cc (254.3 cu in)
Compression ratio
8.3
Length x with x (Type I)
906 x 720 x 850 mm (35.6 x 28.3 x 33.4 in)
Dry weight (Type I)
288 kg (635 lb)




المهم عدنا هو
Bore x stroke
96 x 96 mm (3.78 x 3.78 in)



طول الشوط و القطر وهو متساوي
96 سي سي


bore = 96 القطر
stroke= 96 الشوط




اما محرك محرك 4800 (tb48)



bore = 99.5 القطر
stroke= 102الشوط


ادخل هذا الرابط


http://www.autoweb.com.au/cms/A_54598/title_Outstanding-New-Engine-for-the-2002-Nissan-Patrol/newsarticle.html (http://www.autoweb.com.au/cms/A_54598/title_Outstanding-New-Engine-for-the-2002-Nissan-Patrol/newsarticle.html)



المشكلة عندنا هي
القطر (bore)
الفرق بين الاثنيين = 99.5-96 = 3.5 (mm)


من المعروف ان خرط السلندر في محركات اليابانبة
هو = 025 -.50 -.75-.100 (mm) يعني اذا كانت اخر خرطة تكون بزيادة 1 mm فقط


عندها يكون القطر يساوي 97 mm


بينما قطر محرك الفتيك 99.5 mm الفرق بينها يكون 2.5 mm


معلومات عن محرك tb45 ما يعرف ب 4500 سي سي
TB45E and TB45S
In 1997 the TB45 was produced. The cylinder bore was increased to 99.5mm but the stroke remained at 96mm. It was available as TB45S (with carburettor and electronic ignition) or TB45E (with electronic fuel injection and electronic ignition).
OHV (http://en.wikipedia.org/wiki/OHV)
200 PS (147.1 kW; 197.3 bhp) @ 4400RPM
35.5 kg·m (348 N·m; 257 lb·ft) @ 3600 RPM


عن موقع


http://en.wikipedia.org/wiki/Nissan_TB_engine#TB45E_and_TB45S (http://en.wikipedia.org/wiki/Nissan_TB_engine#TB45E_and_TB45S)


bore = 99.5 القطر
stroke= 96الشوط


قطر 4500 نفس قطر 4800 ولكن الاختلاف في طول الشوط


اعتقد ان لو طبقنا ماذكرتة على محرك 4500 ربما تنجح فكرتك والله اعلم



تحياتي اليك

[~EmPeRor~]

هلا بك اخوي طاير بالعجة

لو تلاحظ انت جاوبت على نفسك من نفس الكلام

شوط ال 4500 = 96 و شوط ال 4200 = 96 يعني نفس المقااااس

والكرنك والاذرعه نفس بعض

ومافي فرق الا بقطر البستم فقط

والف شكر لك على المرور ومعلومات صحيحة 100% وتسلم على المشاركة


الله يعطيك العافيه اخوي وما قصرت

لكن حاب اسالك انت قلت المكاين الي قوتها 4200 ال 97

السفاري 99 سلقه كم قوة مكينته ؟ هل هو 4200 او 4500

والله يعطيك الـ 1000 ـف عافيه

الله يسلمك يالغالي

ولاكن 4200 هذي السعه وليست القوة

من 98 وفوق جا نوع بسيط منها 4200 ولاكن الاغلب 4500

وتبين بالبليتة الي على الهيكل << بالكبوت

[كايد]

السلام عليكم اخوي الغالي ترانيم الوداع

اولا : ما ادري شلون اشكرك على ما تبذله من جهود في تطعيس كوم وفي غيرها من المواقع>ما انسبط ولا اقتنع الا لما اشوف القلم الازرق :D < .

ثانيا : عندي استفسارات مقلقتني

عندي ماكسيما 2003 لقيت فلتر k&n عند بلوهات اللي عالدائري "شبك" ..
هل راح يفيد او حسرة 250ريال .
صوره قريب منه
http://www.albreah.org/up2/uploads/images/albreah.com-a33fb5cf25.jpg

الاستفسارات الاخرى بخصوص سيارتي الثانية (سفاري96بخاخ صالون استخدامها ايام الربيع والصيد)
ما عليها الا الدبة مفرغه .
1- العزم حليل لكن نمرة 1 و 2 ok نمرة 3 يموت العزم (((خصوصا بالنفود)))
والضغط حق المكينة مرتفع
نمرة 2----->ضغط 3----> السرعة 45كم
نمرة 3----->ضغط 3----> السرعة 80كم
نمرة 4----->ضغط 3----> السرعة 120كم
ودي ارفع الضغط الى 8 مثل المكسيما وباقي السيارت .

2- بودي ازيد العزم بدون ضرر وخصوص الحرارة والكل جوابهم 1 (هدرز+كت باك+فلتر+بواجي اسلاك ) طيب المكينة 4200 شلون تزيد الاحتراق بهالتزويدات كلها خارجية "وجهت نظري ما راح تفيد تلك الفائده المرجوه "

3- عندي مشكلة بسيطة بالنفود تطلع ريحه للكلتش وعالخط عادي ؟
4- لما اشغل الدبل الثقيل والف دركسون يطلع طوت طقطقه عندما الف يمين او يسار ؟
5- لو غير طرمبة البنزين وحطيت طرمبة كابرس لها فائده ؟
6- كان يفحط الموتر برابع لكن غيرت وجه ثلاجه وخف العزم -ما ادري وش السبب لاني مليت من الورش-؟
7- ما الافضل مروحة سوبارو او مكسيما ؟

8-9- 10000 شاكر ومقدر لك يالغالي اكيد كثرنا اسئلة لكن تحملنا رحم الله والديك والقاري

[~EmPeRor~]

الله يسلمك ويعافيك يالغالي

وشكلك عرفت عضويتي بتطعيس

وابد يالغالي الله يحيك

بالنسبة للمكسيما وغيرها من السيارت

تحتاجة اذا ركبت كام او هدرز فقط وبشرط < يكون معزول ويسحب هوء بارد

بالنسبة للباترول

جواب السؤال الاول

هذي هي مكيينة ال 4200 حدها واحد و 2 وذا عطيتها كام تعطيك بالثالث بعدها تموت

بالنسبة للمدة بالنمرة هذا تلعب بالتناسب يعني (( تغير الكرونات الى ماقاسات تفرق )) وهذي مراح تفيدك مرررة

بالنسبة لفتح ال rpm الباترول يوصل الى 5000 وفية طريقة ممكنة تلغى الفصلة وسبق نزلت الطريقة انا بتطعيس بالصور ولاكن لاسف انحذفت الصور والطريقة بسيطة واذا عزمت وبغيتها عطني رسالة بالخاص او اقابلك واعطيك قطعه بدل قطعه في موترك وتنفك الفصلة << بلاش

السوال الثاني

انت مركب دبة < يعني بيكون العزم مقارب للهدرز لان ال 4200 يعتبر محرك غير نشيط الا بالتعديل الثقيل زي ماذكرت لك فانصحك لاتحط الا مراوح ودبة فقط وبالبر حط الهواء 5 وانتبة تلف بقوة وبيكون الموتر معاك جبار

جواب السوال الثالث
3- اكيد بتطلع اذا شبيت على الموتر واحتمال يكون عندك ضعف بالدزق < فلا يمسك بالكلتش فيدور الكلتش مباوش فتطلع الريحة

جواب السوال الرابع
شفت محل مايركب الفرار ؟ << الغطاء الي يرشونة نيكل هل الهايلكسات بلون فضي فكة انت وبعد ماتفكة تلقى تيلة طايحة حقت العكس < دايم تطيح ركبها وقبل تركبها اضغطها بقوة (( بزرادية يعني اثنها الى الداخل )) وانشاءالله معاد تنفك ويروح الصوت

واذا ماراح الصوت عندك مشكلة في راس العكس فقط ولاكن ماتوقع انها بتصير كذا مرررة مراح يكون المشكلة الا التيل فقط << طبعا الجهتين

جواب السوال الخامس
مراح تستفيد مرررة

السبب المحرك ليس بحاجة الى زيادة بنزين البنزين الي ياصلة كافي له

جواب السوال السادس

انت تقول تطلع ريحت كلتش < اكيد الكلتش تعبان

بالنسبة لوجه الثلاجة < احتمال يكون مقاسة كبير وسكر على الثلاجة او في تنسيم خفيف بوجه الثلاجة الجديد

السوال السابع

المكسيما اذا جلست صح والسبارو فيها الخير والبركة

8-9

مرحبا فيك والله يحيك اي وقت واي استفسار حاظر لك يالغالي

ويجزاك الف خير واتمنا لك التوفيق يالغالي

[كايد]

الله يجزيك خير
ويطول عمرك

التعبير بالشكر لك يعجز عنه اللسان والايدي

لكن ما اقول الا بارك الله فيك

[~EmPeRor~]

وياك يالغالي

والله يسلمك ويعافيك يالغالي والله يحيك باي وقت

[بعيدالدار123]

الله يعطيك العافيه
موضوع مميز

[Mekshaati@]

الأخ الفاضل / ترانيم الوداع
الله يعطيك الف عافيه ماقصرت الله ينفع بك الأسلام والمسلمين .,., تقبل مروري

[BRI6ANI]

يعطيك العافيه اخوى ترانيم
صراحه موضوع شحلاته واللى احلى ردودك واستفسارات الاخوان
اللى منها نستفيد وهذا هو صلب الموضوع المطلوب :)

اخي الكريم ولاهانو الاخوان عندي اخوى عنده باترول 99 سلوقي مكينته 4200
معدل على المكينه مثل ماقلت بالظبط بس قالى السبب الرئيسي بقصر دراع البستن
ورفع البستن من الاعلى الى الاسفل يعطي دوران سريع هذا اللى قالى ؟

انا عندي مثل موتره بالظبط بس في بينا اختلاف غريب الدفرنش الخلفي عند اخوى يختلف انه جاى درام الدسك درام (سفايفه كبار مقوسين ) انا دسك عادي مثل الموديلات الجديده والفرق بالرمل انا يحفر اهو يشيل عمره ومايحفر .

نرجع للشغل اللى سواه اخوى عزمه بالقومه صار عجيب نشاط ماشاءالله شحلاته .

انا غيرت وركبت مكينه جمس 350 تسابقت مع 2007 فتك بالاول انا قدامه مسافه سياره بالثاني طلعت زياده بالثالث انا قدام نفس المسافه بس بنص الثالث جانى وسبقنى لان موترى حده بالثالث 120 والفتك يروح بالثالث يقلع .

ودي ازيد من نسم الموتر ومانى عارف علما انى مركب كبريتر ادل بروك 600 ؟؟

طلبت لى ثلاجه حاليا وناطرها ادل بروك وبشوف شنو يصير .

بركب هدرز لانى على صفحات الاقزوز (المنفولت )

افادتك تنفعنى يالغالي انت والاخوان

شاكر لك وسامحنى على الاطاله

[~EmPeRor~]

بعيد الدار الله يعافيك ويسلمك يالغالي

ابو موسى الف شكر لك على المرور

خوي

BRI6ANI (http://www.mekshat.com/vb/member.php?u=133515)

الدفرنسات تفرق من 4500 و 4200

دفرنس ال 4500 اكبر

غير كذا فية نوعية نزلت lock دفلوك فكذالك تختلف

ولاكن جميعها تناسب واحد << هذا اهم شي عدا التماتيك يفرق يجي حاشر شووووي

بالنسبة لكلامك عن قصر ذراع البستم < التوقع انة بالاخير يقصد الحفة < مسح الراس عشان يزيد الكمبريشن لا اكثر


بالنسبة للثلاجة الي طلبتها انت

اطلب نوعية ادل بروك ماركة rpm <<< افضل نوعية بالاداء وسعرها حدود 400 وعليها $ واصله هنا حدود 1200 او اقل شوي

ولاكن ال 350 خلطاتها كثيرة وانا بحاول اوفر عليك باقل خلطة

طبعا الكهرباء لاتدخل لها ( البواجي واسلاك ) لانها مراح تفيدك الا ركبت box msd (( الجهاز الاحمر )) وسعره حدود 1200 ولاكن خلك منه

ال 350 الكمبريشن فيها نازل شوي < فعطها مسح للروس وركب وجه واحد فقط (( عشان يرتفع الكمبريشن )) مقاس المسح 0.6 ملي اكثر من نصف الملي شي بسيط

والثلاجة < لاتنسها واذا امكن تركب كام الرفه حقته خفيفة < مراح يضر وبيكون الاداء حلو جدااا ولاكن الان جرب بالحفة والثلاجة وان شاءالله بيكون العزم قووي <واعتقادي باذن الله مراح يمسك معاك الفتك نهائي

بالنسبة للقزوز اذا ركبت الشورت < بيكون ادائة حلو ولاكن الونق افضل < يريح المكينة شوي

ولاكن لاتركب لا هدرز ( الشعبة ) ركب كت باك فقط مواصير 3 بوصة ودبت يوكن وبيكون الاداء حلو باذن الله

بالنسبة للباترول حدة بالثالث 120 << لا حدة 175 بالظبط < ويكون rpm على 5800 - 6000 << ولاكن وش هالمكينة الي بتوصل ال rpm هذا بالثالث يا lt1 او ls1

واي استفسار حاظر لك يالغالي

[BRI6ANI]

تسلم لى على ردك الطيب
انا مركب ام ازدي مع وايرات اكسل وبواجي راسين
مافهمت قصدك لاتركب لاهدرز (الشعبه) مافهمت القصد ياليت توضح ؟؟
انا طالب كام ناعم حق استخدام يومي مع الثلاجه بيوصل بعد شهر على خير واتوقع بيتغير كل شى معاى .
دبه اليوكن شلون صايره بالظبط وياليت اذا في صوره يكون افضل لان الله لايوفق راعي الشكمانات شريت منه دبه على اساس انها لسبرمان وبالاخير طلعت حقت كابرس وانا ماعرف شكل مالت اليوكن واخاف يغشونى هالحراميه .

شاكر لك اخوى من جديد وللأمانه استمتعت بالحوار معك واستفدت حيل

[تيمون2]

يعطيك لعافيه

[ابونواف501]

يعطيك العافيه على الموضوع القيم

[~EmPeRor~]

اخوي BRI6ANI (http://www.mekshat.com/vb/member.php?u=133515)

مشاءالله عليك داخل بشخل جامد

مدام بديت كذا < فعط الموتر مسح للراس نصف ملي + وجه واحد فقط للراس

وركب هدرز كامل مدامك بتركب كام

الشعبة ( الي هي راس الهدرز ))

ولاكن خذ لك كامل من المكينة الى الصدام < لانك بدت بشغلات ثقيلة نسبيا الكام

ولاتنسى تركب كربريتر ادل بروك 550 < واهم شي الفلتر يسحب هواء بارد

بالتوفيق يالغالي ويا استفسار حاظر لك

اخوي تيمون 2 واخوي ابو نواف

الله يحيك باي وقت ويامرحبا ولاهنتم على المرور

[راعي مختار]

الله لا يهينك على كل حال..متمكن ماشاء الله عليك
انا موتري نيسان مكينته 94 بنزين لكن مامن عزم مع العلم اني مركب هيدرز

نبي نصيحتك .. شي للاستخدام اليومي ويعدل العزم

واذا تخبر ورشه بالدمام تسوي هالشغل دلني عليها لاهنت

[abc-00-abc]

بارك الله فيك

ان شاء الله يستفيدون اهل السفاري من هذا الموضوع

[~EmPeRor~]

الله لا يهينك على كل حال..متمكن ماشاء الله عليك
انا موتري نيسان مكينته 94 بنزين لكن مامن عزم مع العلم اني مركب هيدرز

نبي نصيحتك .. شي للاستخدام اليومي ويعدل العزم

واذا تخبر ورشه بالدمام تسوي هالشغل دلني عليها لاهنت


الله يسلمك ويعافيك يالغالي

يالغالي بالنسبة للهدرز << الكت باك وش نوعه الدبات تفريغ لا بلد ولايوكن ؟

اول شي شيك على منظم الكاربريتر << منظم هواء يركب فية 4 ليات هواء شيك انة تكون اليات راكبة تمام

بعدها تاكد من وزنية الديلكو وشيك على الكاربريتر

اذا كل شي تمام

هل المحرك مفكوك ؟ اذا كان مفكوك هل وجية الراس مدبلة ؟

وان شاءالله تكون الشغلة تصفية :) فقط

بالنسبة للشرقية والله ماخبر احد الا واحد لتركيب ال 8 سلندر يوسف السيد فقط

[~EmPeRor~]

بارك الله فيك

ان شاء الله يستفيدون اهل السفاري من هذا الموضوع


الله يسلمك ويعافيك والف شكر لك على المرور يالغالي

[راعي مختار]

الله لا يهينك يا ترانيم ان شاء الله ابشيك على الامور اللي قلتها

[~EmPeRor~]

الله لا يهينك يا ترانيم ان شاء الله ابشيك على الامور اللي قلتها


الله يسلمك ويعافيك ابد شيك ورد لنا خبر والله يكتب الي فية الخير

[((السنياري))]

مشاء الله عليك موبدع

بنسبه لي

الي كنت اسويه

صينية سنتر فور+ويرات مع لاديلكو+راس هدرز/// التغيير20% عن العزم السابق

اكثر الشباب هااليام لانكسرت المكينه ركب مكينة شفر وريح باله رخيصه وقويه وقطع غيارها رخيص

اخوي عندك محل

[BRI6ANI]

شاكر لك ردودك على وعلى الجميع
اخوى ترانيم انا مركب كبريتر ادل بروك حجم 600 مع العلم كبريتر شد البلد كان موترى يمشي اكثر بالقومه
هذا مومهم حاليا لانى بغير الفكره حاليا بس عندي سؤال ؟
موترى حاليا يوصلنى 350 كيلبو متر على التانكي الاساسي مع العلم ان يوم كان مكينه نيسان كان نفس المسافه يقطعنى والمفروض على هذا التعديل كنظريه لازم يوصل اكثر ! هل هذا كلام صحيح ؟
هل مكينه ال Lt1 تفي بالغرض بالنسبه للعزم لو اغير نظام مكينتى راح يتغير العزم عن عزم الموتر حاليا او اركب Ls1 واريح بالى علما انى عندي مكينه Lt1 حاليا وجايتنى بلاش ؟
دوختك وشاكر لك سعه صدرك يالغالي

[~EmPeRor~]

مشاء الله عليك موبدع

بنسبه لي

الي كنت اسويه

صينية سنتر فور+ويرات مع لاديلكو+راس هدرز/// التغيير20% عن العزم السابق

اكثر الشباب هااليام لانكسرت المكينه ركب مكينة شفر وريح باله رخيصه وقويه وقطع غيارها رخيص

اخوي عندك محل


هلا بك يالغالي

الله يسلمك ويعافيك يالغالي

اكيد لان مكاين الشفر < رخيصة جدااا واعطالها قليلة ولاتكلف صيانة


لا يالغالي ماعندي محل ولاكن دارس في المجال وكذالك عندي ممارسة بشكل كبير بالشغلة

والله يسلمك ويعافيك يالغالي وحياك الله باي وقت

وعقبال مايرجع لك طيرك باذن الله سالم

[~EmPeRor~]

شاكر لك ردودك على وعلى الجميع

اخوى ترانيم انا مركب كبريتر ادل بروك حجم 600 مع العلم كبريتر شد البلد كان موترى يمشي اكثر بالقومه
هذا مومهم حاليا لانى بغير الفكره حاليا بس عندي سؤال ؟
موترى حاليا يوصلنى 350 كيلبو متر على التانكي الاساسي مع العلم ان يوم كان مكينه نيسان كان نفس المسافه يقطعنى والمفروض على هذا التعديل كنظريه لازم يوصل اكثر ! هل هذا كلام صحيح ؟
هل مكينه ال Lt1 تفي بالغرض بالنسبه للعزم لو اغير نظام مكينتى راح يتغير العزم عن عزم الموتر حاليا او اركب Ls1 واريح بالى علما انى عندي مكينه Lt1 حاليا وجايتنى بلاش ؟

دوختك وشاكر لك سعه صدرك يالغالي


هلا بك يالغالي

يالغالي كربريتر البلد كافي للمحرك 4200 ولاكن اذا خرط 100 وصار 4500 ركب مقاس 550 << انسب شي وافضل اداء على المحرك

ملاحظة بسيط

اداء المحرك زاد << يعني استفدت من كل قطرة بنزين والمحرك مفس السعه لية يشرب بنزين ؟ راح يتم زي ماهو او يقل شي بسيط

بالنسبة لل lt1 راح توصلك حدود 300 ولاكن للمعلومية


lt1 اقوى تورك من ls1 واقل احصنة من ls1 بحدود 35 حصان ولاكن التروك يجعلها مناااسف قوي بالمقاومات وبالسرعات العالية لل ls1 << فرق بسيط

بالنسبة lt1 اعطالها وصيانتها رخيصة جداا بالمقارة لل ls1

وانصحك تركبها ولاكن قبل تركبها بع قطع التعديل الي على موترك الباترول او تواصل معاي بالخاص بطريقة اخرى وادلك على شور افضل من كذا < بتتعب بالبداية ولاكن ترتاح فيما بعد باذن الله (( تحويل lt1 الى كارب ))

اتمنا لك التوفيق يالغالي والله يحيك باي وقت :)

[BRI6ANI]

كلامك طيب ورائع
تعرف مشاركاتى ماتسمح انى ارسل رساله خاصه وانا موترى للأستخدام اليومى وانا رعي مقانيص
لانى راعي مسابق او تفحيط ابي شى يخدمنى بالمطاريد خاصه الفزه الاولى
وراح اسمع شورك ويهمنى شورك ويشرفنى رأيك اخوى ترانيم
ومنتظرك تقولى عن الطريقه بالخاص او دز لى ايميلك برساله خاصه تسلم وماقصرت

[~EmPeRor~]

هلا بك يالغالي والله يسلمك ويعافيك

لك رسالة على الخاص

ولاكن مدامك راعي مقانص تعرف مكاين الشفر صوتها عالي شوي < والصيد يبي له موتر ماله حس

على كل حال يسرها ربك وحياك الله يالغالي

[اميرالصمت]

يعطيك الف عافيه علي هذا المعلومه

[~EmPeRor~]

888888888


الله يسلمك ويعافيك يالغالي وشكرا على مرورك

[((السنياري))]

كلامك طيب ورائع
تعرف مشاركاتى ماتسمح انى ارسل رساله خاصه وانا موترى للأستخدام اليومى وانا رعي مقانيص
لانى راعي مسابق او تفحيط ابي شى يخدمنى بالمطاريد خاصه الفزه الاولى
وراح اسمع شورك ويهمنى شورك ويشرفنى رأيك اخوى ترانيم
ومنتظرك تقولى عن الطريقه بالخاص او دز لى ايميلك برساله خاصه تسلم وماقصرت

راعي بر

خلك نفسي شد بلاده لاتغير فيه شي

لانك اكثر الوقت باالبر ولنت بحول الدير ولاخرب الموتر عليك وانت باالبر يبي يعومسك

[~EmPeRor~]

888888888


الرجال الان مركب 350

عسى الله يسر امره

واذا الشغل مضبوط باذن الله مافية مشاكل

[dr7004]

لك جزيل الشكر والتقدير

[النادرتو]

مشكور مقصرت

http://dc03.arabsh.com/i/01416/o78jm0zy6qzg.bmp (http://arabsh.com/o78jm0zy6qzg.html)

[~EmPeRor~]

العفو للجميع

للرفع لتعم الفائدة

[ابوحفصه]

السلام عليكم

موضوع ممتاز وان اشاء الله استفادوا الشباب

انا عندي مشكلة بسيطة في مكينة4500 كربيرتر اول مشغل وهو بارد يتف تف ويطفي واشغلة يتف تف ويطلع دخان اسود في بداية التشغيل لكن اذا احتماء خذ ولد تتوقع وش سبب التف تفه وهو بارد

[~EmPeRor~]

السلام عليكم

موضوع ممتاز وان اشاء الله استفادوا الشباب

انا عندي مشكلة بسيطة في مكينة4500 كربيرتر اول مشغل وهو بارد يتف تف ويطفي واشغلة يتف تف ويطلع دخان اسود في بداية التشغيل لكن اذا احتماء خذ ولد تتوقع وش سبب التف تفه وهو بارد


هلا فيك يالغالي

هذا الله يسلمك عندك دعسة تشغي البارد ماتعمل بالشكل المطلوب < لازم تشيك عليها وباذن الله بيكون وضعه ممتاز

الكاربريتر مدام الموتر شغال زين فلا فية مشكلة المشكلة بهذي < زي الكورة تقريبا لونها اسود تركب على الكاربريتر من جهت الغمارة < المشكلة فيها او في توصيلتها

بالتوفيق يالغالي وحياك

[العذال]

الله ينور دربك بالايمان وطاعة الرحمن

[ابوريما99]

طيب ممكن رقم مهندس تعرفه يضبطها لي
لأن واحد من الشباب وده يسويها
بس مايثق في اي مهندس

[~EmPeRor~]

يافيكم الله جميعا

ابو ريما ماتحتاج ميكانيكي

اعرف الخلطة ورح لاقرب ميكانيكي ووعطة القطع < يوديها المخرطة تركبها وبس :)

[عاشق الموج]

السلام عليكم

كفو والله اخوي ~EmPeRor~

من سردك في الموضوع احسك ممتاز في امور المكانيكا

يالغالي انا عندي بليزر مخبط مكينته 350

وناوي اوضبه وارفع من اداء المكينة طبعا الفلوس على قد الحال

وش تنصحني اعمل مع التوضيب

وايضا كيف اعرف ارقام الكوارين الخلفيه و الاماميه من غير فك غط الدفرنش ؟

وتسلم مقدما يا الغالي

[ابو نواف المطرفي]

بيض الله وجهك

[~EmPeRor~]

السلام عليكم

كفو والله اخوي ~EmPeRor~

من سردك في الموضوع احسك ممتاز في امور المكانيكا

يالغالي انا عندي بليزر مخبط مكينته 350

وناوي اوضبه وارفع من اداء المكينة طبعا الفلوس على قد الحال

وش تنصحني اعمل مع التوضيب

وايضا كيف اعرف ارقام الكوارين الخلفيه و الاماميه من غير فك غط الدفرنش ؟

وتسلم مقدما يا الغالي

وعليكم السلام ورحمه الله وبركاته

ومن يقول سالم

بالنسبة للتعديل فية الف طريقة للتعديل على المكينة يالغالي

اولها بساتم lt1 وزي كذا ولاكن مابي ادخلك بالامور هذي

فانصحك تركب بستم مقاس 60

وبلوف هواء مقاس 2.02 ونار 1.56

كذا بيرتفع الكمبريشن وبيكون الاداء افضل

وبعدها اذا بتعدل ادخل بكاربريتر رياضي وكام وثلاجة < وبيكون الاداء خورااافي باذن الله

او بدل بستم 60 ركب بستم 60 حق كابرس ltz موديل 96 وبيتغير الاداء كثيرررر باذن الله يالغالي وبيكون عال العالي

اتمنا لك التوفيق

[~EmPeRor~]

بيض الله وجهك


وجهك يالغاالي

[_AZOZ_]

الله يعطيك العافية

..

[vxr99]

اخوي الامبراطور ياليت تفيدنا بخبرتك
كم تكلف LT1 على باترول ربع 90 من دون تعديل او تزويد شامل التحويله شغل اليد
وكم تعطي حصان وهل هي مجربه ابي شي عزم معقول وقليل اعطال

مع كل الشكر لك اخوي

[majeds]

والله خبير ذا الامبراطور كلامه شامل وافي
عطو سداح فرصه

[~EmPeRor~]

الله يعطيك العافية



..



الله يعافيك :)

[~EmPeRor~]

اخوي الامبراطور ياليت تفيدنا بخبرتك
كم تكلف LT1 على باترول ربع 90 من دون تعديل او تزويد شامل التحويله شغل اليد
وكم تعطي حصان وهل هي مجربه ابي شي عزم معقول وقليل اعطال

مع كل الشكر لك اخوي


هلا فيك يالغالي

من 8000 الى 11 الف

ومجربة والموتر يصير انشط من الفتك وتعطي على الحذاف 290 حصان لاكن زد شوي وادخل في ls1

والسبب لان اعطال lt1 لك عليها شوي

[almjrooh_07]

يعطيع العافيه ومشكور على الجهد

[أبوفهد-5448]

مشكووووور يالغالي


بس ودي اعرف كم الفريق بين التعديل والتغيير

يعني التعديل من يكلف والتركيب كم يكلف


ومشكوووووور ..

[xp.vip]

السلام عليكم
لك رساله ع الخاص

[YUKON_GMC]

موضوع مميز بارك الله فيك

[vxr1000]

جزاك الله خير ورحماالله والديك وجميع المسلمين
انا عندي باترول 92 مركبله هدرز ودبت يوكن وفاصل المروحه والسياره للستخدام اليومي والمكينه موظبها قبل سنتين والحمدلله ماشيه تمام بس عندي الكلبيتر نوب يشكل ويصفا منحاله والتماتيك حق تحميت الموتر خربان ودي اغيره وشتنصحني به وهل اقدر احوله الا بخاخ وهل الكبيتر الرياضي الي اسمعبه افضل من شد البلد

[vxr1000]

لللللللللللللللرفع

[vxr1000]

وينك يا الامبرطور مارديت علي جزاك الله خير

[~EmPeRor~]

يعطيع العافيه ومشكور على الجهد


يعافيك الله يالغالي

[~EmPeRor~]

مشكووووور يالغالي


بس ودي اعرف كم الفريق بين التعديل والتغيير

يعني التعديل من يكلف والتركيب كم يكلف


ومشكوووووور ..

هلا فيك يالغالي

شغل اليد قرابت 1000 ريال بالكثير والقطع والمخرطة 2500-4500

والعفو لك وشاكر لمرورك

[~EmPeRor~]

السلام عليكم




لك رساله ع الخاص


وعليكم السلام
تم الرد :)

[~EmPeRor~]

جزاك الله خير ورحماالله والديك وجميع المسلمين
انا عندي باترول 92 مركبله هدرز ودبت يوكن وفاصل المروحه والسياره للستخدام اليومي والمكينه موظبها قبل سنتين والحمدلله ماشيه تمام بس عندي الكلبيتر نوب يشكل ويصفا منحاله والتماتيك حق تحميت الموتر خربان ودي اغيره وشتنصحني به وهل اقدر احوله الا بخاخ وهل الكبيتر الرياضي الي اسمعبه افضل من شد البلد


هلا فيك يالغالي

عاد هذي مشاكل كاربريتر النيسان متنتهي

لكان انصحك تروح لاحد فنان يصلحة لك 100% < وبعدها ركب فلتر هواء اصلي حق الوكالة وحط من تحتة سيلكو بينة وبين القاعده عشان معاد يهرب رمل للكاربريتر ومن فوق لستك على حدودة وباذن الله تريح بالك من المشكلة على طول

[~EmPeRor~]

موضوع مميز بارك الله فيك


الله يبارك فيك وشاكر لمرورك

[~EmPeRor~]

لللللللللللللللرفع


رفع الله قدرك :)

[~EmPeRor~]

وينك يا الامبرطور مارديت علي جزاك الله خير


عذرا على التاخير

تم الرد يالغالي :)

[~EmPeRor~]

الله يسلمكم جميعا

وشاكر لمروركم

واعتذر عن التاخر بالرد لبعض الوقت < لسبب انشغالي وغيابي موقتا

[قطاع ليله]

السلام عليكم ورحمة الله وبركانه
يالإمبراطور مشكر على الموضوع انا عندي باترول 93 وفيه عدة مشاكل
1ذبحني بالصرفية للبنزين اعبيه فل كامل ياله ياله يمشي 300
والمشكلة الكربريتر مغيره مستعمل ومنظف ومركب ابر التيما قالي المكيانيكي الكربريتر متوسع بس الكربريتر مايكث اسود
2 الزيت ينقص علبتين بعد 1400ك قالي توظيب وشرايك اوظب واسوي الخلطة تبعك
وفيه راعي ترهيم قال كل المشكلتين من الكربريتر قلت صلحه قال ماني فاضي
3 كل ما أدعس يفرقع الموتر
الله لا يهينك
وشرايك والله ضايق صدري شريت الموتر من خوي لي وقال الموتر نظيف ووالله خسران في الموتر اكثر من 10000 آلاف وآخر شيء طلعت سالفت التوظيب

[~EmPeRor~]

هلا فيك يالغالي

والله يحيك

انصحك تركب بساتم الفتك + مسح نصف ملي + ثلاجة تعديل + كاربريتر ادل بروك مقاس 550 + هدرز

وباذن الله بيكون وضعه سليم وادائة رائع

بالنسبة للصرفية

الموتر مشنبر وينقص زيد وكذا بيزيد شربة بالبنزين لان المكينة تضيع قدرة عاليه

بالنسبة للفرقعه احتمال وزنية الديلكو < لازم تتاكد اذا هو اوكي فالمشكلة من الكاربريتر

اتمنا اني افدتك يالغالي

[قطاع ليله]

السلام عليكم ورحمة الله وبركاته
مشكوووووووووور يالغالي
بس لا هنت عندي سؤالين بعد:D:D:D
1 ال4200 تمشيك كم العادة إذا عبيت فل ؟؟؟
2بعد الخلطة الحلوة تبعتك كم يمشي بالمتوسط يعني ؟؟؟؟
والله متليع من البنزين
وآسفين على الإزعاج بس إذا لقيت واحد عسل إلحسه كله :D:D:D
وشكرااا

[قطاع ليله]

وينك يالأمبراطور
للرفع

[كلاسيكو]

يعطيك اف عافيه موضوع في قمة روعته للي يهتمو بالأداء العالي
انا بحثت عن تعديل وتزويد مكينة 4500 وبالصدفه الشيخ قوقل حطني في صفحتكم لاني ماتوقعت في مكشات ناس تهتم بالتزويد
والا انا من اعضاء مكشات العزيز على علينا جميعا منذوو زمن
طولت بالسالفه عليكم <<<<ههههه
المهم
باترول 4500 صالون بخاخ
الخلطه الي ذكرت في تركيب بساتم فتك هل هي افضل من انك تخرط السرندل وتركب بستم مقاس اكبر
او ان بستم الفتك افضل بالاداء
الشي الثاني انا مركب هدرز وعندي كام رياضي نهاية رقمه 93 مدحوه لي اصحاب الخبره
هل اركب الكام بدون الخلطه الي قلت بيطلع نتائج افضل كام وهدرز وفلتر
او الخلطه الي ذكرتها بساتم فتك وبورتنق
او لو جمعناهم الخلطه مع الكام وش تتوقع بيعطي نتائج هل يجاري الفتك العادي بدون تعديل
وسمعت من شباب انهم يركبون كرنك فتك وش تعليقك حول هذه المعلومه

الشي الاخير بعد الخلطه الي ذكرت هل هي مجربه وكم جابت سرعه على الخط سواء قارمن او عداد السياره نفسه وكم التكلفه التقريبيه للخلطه كامله
وهل تنصح بالتفك بنفسه للي يرغب التزويد انه يريح نفسه من الشغلات كله يزود قريشاته على الموتر وياخذ فتك بالمره
مع اني كنت متخوف من مشاكل الفتك ولي رغبه في تعديل 4500 فماهي نصيحتك
ومشكوووووووووور على الاهتمام ومتابعتك لموضوعك المميز
كلاسيكو
و

تقبل الاطاله
متحمس وينتظر الرد

[~EmPeRor~]

السلام عليكم ورحمة الله وبركاته
مشكوووووووووور يالغالي
بس لا هنت عندي سؤالين بعد:D:D:D
1 ال4200 تمشيك كم العادة إذا عبيت فل ؟؟؟
2بعد الخلطة الحلوة تبعتك كم يمشي بالمتوسط يعني ؟؟؟؟
والله متليع من البنزين
وآسفين على الإزعاج بس إذا لقيت واحد عسل إلحسه كله :D:D:D
وشكرااا


عذرا على التاخير

300-400 بالكثير كيلو

تقريبا نفسها بالمشي العادي ومعا الحمل الكامل لا امكن يكون 250 كيلو ويخلص التانكي

[~EmPeRor~]

يعطيك اف عافيه موضوع في قمة روعته للي يهتمو بالأداء العالي
انا بحثت عن تعديل وتزويد مكينة 4500 وبالصدفه الشيخ قوقل حطني في صفحتكم لاني ماتوقعت في مكشات ناس تهتم بالتزويد
والا انا من اعضاء مكشات العزيز على علينا جميعا منذوو زمن
طولت بالسالفه عليكم <<<<ههههه
المهم
باترول 4500 صالون بخاخ
الخلطه الي ذكرت في تركيب بساتم فتك هل هي افضل من انك تخرط السرندل وتركب بستم مقاس اكبر
او ان بستم الفتك افضل بالاداء
الشي الثاني انا مركب هدرز وعندي كام رياضي نهاية رقمه 93 مدحوه لي اصحاب الخبره
هل اركب الكام بدون الخلطه الي قلت بيطلع نتائج افضل كام وهدرز وفلتر
او الخلطه الي ذكرتها بساتم فتك وبورتنق
او لو جمعناهم الخلطه مع الكام وش تتوقع بيعطي نتائج هل يجاري الفتك العادي بدون تعديل
وسمعت من شباب انهم يركبون كرنك فتك وش تعليقك حول هذه المعلومه

الشي الاخير بعد الخلطه الي ذكرت هل هي مجربه وكم جابت سرعه على الخط سواء قارمن او عداد السياره نفسه وكم التكلفه التقريبيه للخلطه كامله
وهل تنصح بالتفك بنفسه للي يرغب التزويد انه يريح نفسه من الشغلات كله يزود قريشاته على الموتر وياخذ فتك بالمره
مع اني كنت متخوف من مشاكل الفتك ولي رغبه في تعديل 4500 فماهي نصيحتك
ومشكوووووووووور على الاهتمام ومتابعتك لموضوعك المميز
كلاسيكو
و

تقبل الاطاله
متحمس وينتظر الرد


هلا فيك يالغالي

موترك يتضح لي انة من 98 وفوق < وهذا ثقيل بالوزن

بع مكينت موترك وبع الكام وركب فتك افضل لك

[تمياط]

كيف اخلي مكينة الباترول 4200 تفتف

[~EmPeRor~]

كيف اخلي مكينة الباترول 4200 تفتف


هي تفتف لاكن تفتفها تختلف عن السيارات الثانية لانها كاربريتر فالتفتفه حقتها تكون من الكهرباء

[خشير الذيب]

موظوع جميل وما قصرت ولاكن اللي بيبدا من الاخير ويركب مكينة شفر ايش تنصحه 350 كربريتر والا 6 لتر ومن اللي يظبطها بالشرقيه والرياض وكم تتراوح التكلفه وهل الموتر بعدها ثقه للسفر والخطوط الطويله والا يخوف

[~EmPeRor~]

موظوع جميل وما قصرت ولاكن اللي بيبدا من الاخير ويركب مكينة شفر ايش تنصحه 350 كربريتر والا 6 لتر ومن اللي يظبطها بالشرقيه والرياض وكم تتراوح التكلفه وهل الموتر بعدها ثقه للسفر والخطوط الطويله والا يخوف
الله يسلمك ال 6 لتر مايبي لها كلااام لايتردد

[تمياط]

شرايكم فيه مكينة باترول4500 ؟؟قوتها مع النفود ؟؟

[~EmPeRor~]

شرايكم فيه مكينة باترول4500 ؟؟قوتها مع النفود ؟؟


مشي حالك افضل من 4200

[majeds]

شرايكم فيه مكينة باترول4500 ؟؟قوتها مع النفود ؟؟


عض ثوبك واشرد عنها نصيحه لوجه الله اقوى شي فيها القير الاول
والباقي ماعندك احد

[بعدك طيب]

موضوع يدل على الخبره الله يجزاك خير

عدي اسفسار اخوي الله لاهينك

عندي باترول 97 لاشغلت الصبح يترتر ويطفي لازم ادوس البنص لين يحتمي وهمن ماعندك احسن منه

مادري وش المشكله بنضرك .

[~EmPeRor~]

عض ثوبك واشرد عنها نصيحه لوجه الله اقوى شي فيها القير الاول
والباقي ماعندك احد


ههههههههههههه

[~EmPeRor~]

موضوع يدل على الخبره الله يجزاك خير

عدي اسفسار اخوي الله لاهينك

عندي باترول 97 لاشغلت الصبح يترتر ويطفي لازم ادوس البنص لين يحتمي وهمن ماعندك احسن منه

مادري وش المشكله بنضرك .


كاربريتر ولا بخاخ ياغالي ؟

اذا كاربريتر فهو المنظم حق الكاربريتر يجي لونة اسود من جهت الغمارة اما عطلان او يحتاج وزن

اذا بخاخ امكن حساس القربة او حساس حرارة الماء او حساس يركب تحت الثروتل< ركز تحت الثروتل مو الثروتل

[وارد منصور]

يعطيك العافية موضوع جيد
بس اتوقع راح تعاني من حراره المكينة

[بعدك طيب]

كاربريتر ولا بخاخ ياغالي ؟

اذا كاربريتر فهو المنظم حق الكاربريتر يجي لونة اسود من جهت الغمارة اما عطلان او يحتاج وزن

اذا بخاخ امكن حساس القربة او حساس حرارة الماء او حساس يركب تحت الثروتل< ركز تحت الثروتل مو الثروتل


الله يجزاك خير الموتر كلبيتر راح اشوف اللي انت قلتلي ..

ماقصرت يابعدي

[~EmPeRor~]

الله يجزاك خير الموتر كلبيتر راح اشوف اللي انت قلتلي ..

ماقصرت يابعدي

عافاك الله

وامرة بسيط جدا

واذا انت بالرياض راسني ادلك على واحد يصلحة لك رخيص بالحيل اتوقع اقل من 40 ريال

بالتوفيق

[بعدك طيب]

عافاك الله

وامرة بسيط جدا

واذا انت بالرياض راسني ادلك على واحد يصلحة لك رخيص بالحيل اتوقع اقل من 40 ريال

بالتوفيق

ما قصرت كفيت ووفيت لاكن انا من سكان بريده

راح اشوفلي واحد يضبطه باذن الله واذا تعرف احد لاتبخل علينا

جزاك الله خير

[~EmPeRor~]

ما قصرت كفيت ووفيت لاكن انا من سكان بريده

راح اشوفلي واحد يضبطه باذن الله واذا تعرف احد لاتبخل علينا

جزاك الله خير


باذن الله تلقى واهم شي انك عرفت الاشكالية

[عشقي الباترول]

انا موتري
4200 بخاااخ
هل ينفع له التعديل

[بن عريفج]

الله يبيض وجهك والله ماقصرت الله لايحرمك الاجر يااارب
ذكرت بان الخلطه تركب بساتم الفتك على مكينة 4200 ولكن هل يخرط السرندل بمقاس معين حتى يركب بستم الفتك او كيف يعني مثال بسم فتك صفر يركب على سلندر4200 صفر او يخرط 4200الى 20 حتى يركب بستم الفتك صفر افدنا لاحرمنا الله تواجدك المبارك

[~EmPeRor~]

انا موتري
4200 بخاااخ
هل ينفع له التعديل

ينفع يالغالي ولاكن الافضل يتحول كاربريتر لانك بتحتاج برمجة وبيصير الموتر مكتوم بعد البساتم بسبب صغر الثروتل والثلاجة

لاكن افضل شي لك حفة ملي الا ربع + كام ستيج 3 + هدرز وفلتر هواء ومراوح

بالتوفيق

[~EmPeRor~]

الله يبيض وجهك والله ماقصرت الله لايحرمك الاجر يااارب
ذكرت بان الخلطه تركب بساتم الفتك على مكينة 4200 ولكن هل يخرط السرندل بمقاس معين حتى يركب بستم الفتك او كيف يعني مثال بسم فتك صفر يركب على سلندر4200 صفر او يخرط 4200الى 20 حتى يركب بستم الفتك صفر افدنا لاحرمنا الله تواجدك المبارك

هلا فيك يالغالي

لا يالغالي اذا تبي تركب بستم فتك < يجيب عليك خرط السلندر 100 وتكون اخر خرطة هي يالغالي

والمعذرة على التاخير

[الصافي3]

الف شكر لك وما قصرت ...

[عاشق النفود 111]

وعليكم السلام ورحمة الله وبركاته

ما شاء الله موضوع وذف .. ودسم

كل الشكر اخي الفاضل على التوضيح

[~EmPeRor~]

الف شكر لك وما قصرت ...



الله يسلمك ويعافيك

[~EmPeRor~]

وعليكم السلام ورحمة الله وبركاته



ما شاء الله موضوع وذف .. ودسم


كل الشكر اخي الفاضل على التوضيح



الله يسلمك ويعافيك

والعفو لك يالغالي

[الصافي3]

على فكرة يا امبريور هل انت اللي تكتب في تطعيس وجراف ؟

[~EmPeRor~]

على فكرة يا امبريور هل انت اللي تكتب في تطعيس وجراف ؟


نعم يالغالي :good2:

[الصافي3]

نتشرف بتواجدك معنا

[~EmPeRor~]

نتشرف بتواجدك معنا


الله يسلمك ويعافيك

[عاشق مكشات]

(العجوز تبقى عجوز)
الدردعة دردعة لو تزين فيه الى قبل

وجهة نظر عن الباترول من 97 وتحت

[~EmPeRor~]

(العجوز تبقى عجوز)
الدردعة دردعة لو تزين فيه الى قبل

وجهة نظر عن الباترول من 97 وتحت


ههههههههههههه

الافضل تغير وترتاح

[ibrahim.k.s]

(العجوز تبقى عجوز)
الدردعة دردعة لو تزين فيه الى قبل

وجهة نظر عن الباترول من 97 وتحت


انا عندي ربع نيسان موديل 90 ما يرده شي ولا يشكي من شي

وجهة نظر مقبوله :good2:

[~EmPeRor~]

888

حياك الله :)

[صاحب مبدا]

مشكوووووووووووووووووووور ومااا قصرت

[~EmPeRor~]

مشكوووووووووووووووووووور ومااا قصرت


العفو يطول بعمرك :)

[ابو نايف الساري]

يعطيك العافيه يامبدع

[راعي بيشة]

فيه جي اكس تويوتا قديم 2001
عزمه منتهي كيف أقويه جعلك تسلم

[محسن اليامي]

اهنيك على موضوعك الرااااثع

وعندي استفسار

اولا انا لاني راعي تطعيس ولا سباق وعندي باترول 98 تماتيك في الخط حليو مكفيني لكن المشكله في القومه ثقل شوي ركبت فرارات وزان شي بسيط

السؤال

لو اركب هدرز بدون ازعاج وفلتر شوته هل يبين فيه وهل له تأثير في الإستعال اليومي والسفر

واسف ع الإطاله

[hail_ksa]

أخيراً حصلت الموضوع
صار لي مده أبحث عنه


جاري قراءة الموضوع ...


شكراً للأخ "امبيرور" على الموضوع المهم

[hail_ksa]

بعد القراءة ..

الأسعار تكلف 3540 ريال (طبعاً بأسعار عام 2009 لأن الموضوع قديم ) ومن دون ذكر سعر شغل اليد .. يعني بتآصل 5000 ريال بأسعار 2009 .. وهلحين يمكن تآصل بحدود 6500 ريال


أعتقد بيع المكينه الحاليه وشراء مكينة 4500 أفضل من التعديل على مكينة 4200 أو لا يا إخوان ؟؟؟؟

[كاشخ2009]

اسأل الله الكريم ان يوفقك لما يحب ويرضه
وبيض الله وجهك بنور الطاعة ,,

هل هذا الكلام ممكن ينطبق على الهايلوكس 2400 22R
ومكينة 2700 وماهي الطريقة ؟

[ara888]

يعطيك العاااافية اخوووووي

[باترول - 91]

يعطيك العافية يا صاحب الموضوع


وللرفع للفائدة

[باوزير]

موضوع ممتع واصل الابداع

صحيح اسم على مسمى

[ابوعبدالله 93]

هل السلندر ينخرط وكم حد خرطه وهل البلوف اركب بلوف فتك او بلوف باترول