استشاره بالون او دنلوب على الباترول ...؟؟

[أبوأحمد98]

السلام عليكم ورحمة الله وبركاته
اخواني عندي استفسار عندي باترول ربع 2006 وعندي جنوط هلل ومحتار وش اركب عليهن كفرات بالون او دنلوب حقات الشاص وانا اتردد اسبوعيا من الشرقيه لرياض وابي كفرات للخط وتكون حلوة بالنفود والحجره ونبي مشورتكم الله يعطيكم العافيه .
وشكرا .

[أبو__خــالــد او الوافي]

وعليكم السلام
انصحك بالبالون على الباترول احلى عليه

[مشاريg]

البالون اقوى واصبر وتصلح للحصى والنفود وعلى فكرة ترى البالون مصنوعة خصيصا للرمل >>رملية درجة اولى..ومافيه اي كفر يقارن بالبالون في الحصى والوعرة
واذا صملت اشر ماكسس ابو جمل هو الزين..ومن مميزات البالون عيون القطط والبطناج الخفيف ماتحسبها الا شي بسييط ومريحة للموتر ولا تفككه..

اما اذا كنت راعي نصب واحلى وما احلى ومدري ويش!! لا تركب بالون لأنهم بياكلونك..وايضا الدنلوب ممتازة ولا شك فيها ...ولا نهضم حقها

اسأل مجرب ولا تسأل دختور

تحياتي

[ساري 111]

الدنلوب اشوفه اصرف لك بما انك راعي خطوط

البالون ميزته شكله ويتحمل الحصى فقط لاغير

وعيوبه ينسحل بسرعه وسرعته القصوى (ان)<<يعني 140

وفيه رجه تبي تفكك موترك

لذالك انصحك اصرف النضر عن البالون

البالون يصلح للديره والبر بس اما الخطوط قسم ان تعاف حياتك

عندك يا الدنلوب 245/85/16 او الهانكوك وتراه يجي نفس نقشه الدنلوب بالضبط

[أبوالمثنى]

خذلك شواهين (نص رملي)

[ابوسعودد]

ما دام انك راعي خطوط اسبوعيا فمالك غير الدنلوب او مثل ماقال بعض الاخوان شاهين او هانكوك تقريبا كلها نفس الشي .

[نشمي الحوطة]

الدانلوب ارسى للموتر ..

<< بحكم تجربـة أحد الزملاء ..

[لهايب نجد]

الخط ما ينفعله بالون والدانلوب حلو مرة انا مجربه

[شمالات نجد]

كان عندي بالون ما ينفع لا في الديره ولا في الخط ولا بريال

لكنه في البر ممتاز جداً جداً

غيرتها وركبت دنلوب نقشة شاهين بصراحه أرتحت ديره خط بر كلها تمام الحمد لله


وشف ترا فيه دنلوب نقشة شاهين مقاسين واحد نفس اللي على الشاص البريمي 8 غاط والثاني يجي أقل منه ارتفاع وأعرض بشي بسيط ولا كتب عليه كم الغاط لكنه يتحمل

وأنا مركب الثاني وأنصحك به لجميع الاستخدامات

ما شاء الله

سلام

[المميـز]

البالون احس انه خطر بالطرق

ولعل راعين البالون يفيدونك اكثر مع تجاربهم للبالون وخاصه بالسفريات الاسبوعيه
هل يصلح والا لا ؟

والله يكتب لك اللي فيه الخير

[ميمون111]

دانلوب بتاع كله خط وبر

[ابولولو]

الاخوان افدوك بالدلوب وعن تجربه سنوات بالفكس ار والبترول فايرستون انا راعي خطوط ومرحات وفه ليونه ولا بهن صوت وهج عن البرجستون بالبر ولد والخط تقول ممشي بقره ههههه اعزكم الله

[سالم11]

الهانكوك رائع ولين ومريح في الخط

[مشاريg]

عندي استفسار... مادام ان البالون مايظهر تأثير عيون القطط والبطناج كيف يبي يفكك موتره؟؟ واحد من الربع معه مثل السفاري الي معك وكان عليه دنلوب نقشت شاهين..وجرب البالون محتد وبعدها باع الدنلوب قبل لا يركبها.. يقول ارييييييييييييح بقوه!!
طبعا لازم يرصص ترصيص ممتاز, والاخ ساري 111اتمنى لو ترجع تتأكد من معلومة ان البالون اقصى حد لسرعته 140!! والله عجب انا معي لاند مديل 95 كربريتر طبلونه بدون البالون بالطقااق 170وبعد تركيب الكفر البالون اصبح طبلونه 185-190تقريبا.. هذا وهو كربريتر وصالون ! ولذلك فان البالون وطيته أكبر للأرض فياخذ مسافة اطول من الكفر الاصغر منه يعني..اذا كان احد بجنبك يمشي بسرعة 140 وانت بجانبه مركب البوالين وتمشي 140 على العداد فأنت متقدم عليه بفارق.. اتمنى من الجميع فهم هذه المسألة الفيزيائية......علشان ماياكلونن بعض الناس الدنلوب ممتازة بالخط جدا..


((((( وجهة نظر ))))

وشكرا للجميع

[أبوأحمد98]

الله يجزاكم خير كلن باسمه
خلاص جزمت بعد ردودكم على الدانلوب حقات الشاص

[بدران123]

ارحب اخوي انا معي باترول ربع 2006 واحترت مثلك وانا راعي خط من المدينه الى القصيم احيانن بالشهر مرتين واكثر ..
احترت مثلك وركبت من الكفرات قومه وقعده لقيت كفر واحد بس اللي هو دنلوب اللي يجي للجكس الهدد وكاله من مديل 2006 الى 2009 وتراه مقاس واحد وسعر الكفر يبدا 520 للواحد صراحه كفر خط وحجره ونفود عرضه 235 وطوله 85 وله كم شهر من احسن مايكون..
بالنسبه لدنلوب دعسه شاهين مايتحمل الحجره والبالون المعروف يتعبك مع الخط ويموج والا هو صراحه كفر من الدرجه الاولى..
وانتبه من الدنالوب حق الشاص ترى له صفير بالخط ويجي به رجه اذا ركب على النيسان....
اذا احتجت اي شي بارك الله فيك راسلني على الخاص وابشر بسعدك...


بدران

[rayes3]

السلام عليكم

اخوي من تجربه فايرستون 6 سنوات ماشفت منه شر ولله الحمد

[.. Anas ..]

كد سافرت مع واحد من العيال معه باترول
ومركب بالون على جنوط هلل
ورحنا لأبها
بالخط السيارة تموج كأنه سفينة

ـ ـ ـ

أما الدنلوب فوالله أشهد انهن كفرات رساوه بالخط وبالحصى ما عندك أحسن منهن
وبالنفود أطلق شيء بالعالمـ .
أنا مركبهن على موتري
وأحسن مقاس لهن

245 /85

هذا شوري لك

[ابوو زيد]

انا معي باترول مركب بالون عليه

مشاء الله مريح لا بطانيج ولا شي يعيبه ثقل البالون يعني يالله يجيب معي 190 مع انه فتك

ومافيه ذاك الرجه الي يتكلمون عليه و دايم اسافر عليه انا ما شفت يلعب معي الا بالهواء

وابعد عن ماكسس يلعب بالخط من تدعس على موطى الرتيلات يقوم يلعب عكس السيام تاير

ركب بالون سيام تاير افضلهم وبعده الهيرو وانت نازل

[ابرق نثيل]

البوالين هي الكفرات انا اشهد

لكن المشكله انها ماتصلح الا للمتوسعين ف البر والمقانيص بشكل عااااام

والمتوسعين :d كذلك في الخطوط لانها تطوي المسافات وتعطيك جوك بالسرعات
وهي كفرات تبي محاضات عن نقص الهوا


اذا لم تكن من المتوسعين فخذ هونكك او دنلوب او ميشلان

[ابو كشه]

والله وانا اخوك انا مجرب بالون على السفاري حقي لي سنتين
وكل اربعاء امسك خط ما شفت منها مشاكل ولا شي بالعكس مريحه مره
بالون ماكسس عيبه الوحيد بس اذا وقفته كم يوم اول ما تمشي عليه خمس دقايق ينطط شوي بعدين خلاص يضبط لانه يلين مع الوقفه
ولا خط وبر ورمل حصى خذ رجال امعره في البر معر ما شاء الله ما قد نسم علي ما شاء الله تبارك الله بعد اقعد اصكه بعين الحين