وش احسن كفرات لل.........

[ابوفزعه]

السلام عليكم ورحمة الله وبركاته




احسن كفرات للجيب وشي يالربع





ماهو مهم السعر اهم شي تحمل الكفر في كل مكان سواء الارض وعره اونفود

[القماري]

دام السعر مو مهم فعليك بكفرات (ميشلان) أعتقد أنها الأفضل (مجربه)

[الذيب الامعط]

كفرات الجيوب انواع كثيره :
يوكوهاما - قاسي جدا مثل الحجر يصلح للحصى والوعر لاكن النفود ماتمشي الا بتنسيم- السعر 370 للواحد
برجستون- ممتاز للحصى ولابأس به با للنفود والخط - السعر 390للواحد
ميشلان- ماينفع بالحصى ممتاز بالنفود و بالخط - السعر 360 للواحد
بريرلي وتويو نفس الميشلان ولاكن يختلف السعر
وهناك البالون التايلندي رخيص وزين للرمل والحصى اذا كان على اربعين فما فوق
ملاحظة: الاسعار للمقاس السخيف جدا امامع العريض فالزياده بحدود مئه الى مئه وخمسين ريال
والحكم الاول والاخير لك

[قشاع الرمث]

السلام عليكم ورحمة الله وبركاته

كان تبي رايي . فيه بالون تيوبلس صناعته تايلنديه
حط الهوا فيه 25 وانسه لاحجره ولا خط ولانفود
ما شالله ما مثله بس تراه ما يطول للي يجلده
ما يتم سنه .

تحياتي .

[برق الوسمي]

السلام عليكم
اخوي افضل كفر على الجيب (مجرب) البرجستون قوي ولا يمسح ويتحمل الاماكن الوعرة وماعليه في الرمل
اما البالون فهو افضل شي على الرمل لكن يمسح وما يطول وفي الا ماكن الوعرة يتشقق اذا طولت وكن على
علم ان رسمت الدعسة لها دور في جودة الكفر، الكفر الي في خطوط بالطول مستقيمة ممتازة في الرمل والكفر الي فيه تعراجات ونقشات مربعة او ما شابه ممتاز للوعر والكفر الي يجمع بينهم جيد للمكانين مع مرعاة نوع الكفر.
وتقبل تحياتي.

[دواس الظلمة]

أخوي أبو فزعة
الله يهنيك في موترك ويطعمك خيره ويكفيك شره
بالنسبة للكفرات فإني أرى أن تأخذ كفرات يوكوهاما لأنها كما قال أخي الذيب الأمعط أنه قاسي جدا مثل الحجر يصلح للحصى والوعر لاكن النفود ماتمشي الا بتنسيم - السعر 370 للواحد
فالكفرة هذي قوية وتتحمل المناطق الجبلية والوعرة على حد سواء ، أما النفود فكما أشار الذيب الأمعط نسم الكفرة وإنشاء الله ما تغرز وتمشي بس إجلد ولا توقف ، أما بالنسبة للبرجستون فأجد أن الناس طايرين بها وما أدري وش إللي مطيرهم ، سعرها غالي عليها ولا تستاهل سعرها.
الأخ برق الوسمي يقول إنه مجرب البرجستون على الجيب !!!
طيب ما علمتنا يا أخ برق الوسمي وش نوع الجيب ، وأين مشيت فيه ، هل مشيت في النفود أم في جبال الجنوب ، وهل كنت تنسم كفرتك أو كنت ما تنسم.....إلخ
يا أخي برق الوسمي لاحظت لك في مشاركة سابقة وقد رددت عليك أنك تحب كفرات برجستون ، فما أدري ما هو الذي يدفعك لحبها ، نصيحة يا أخي إنك تذهب إلى السوق وترى أنواع الكفرات وأن تعرف جودتها قبل أن تمدح كفرات برجستون ، هي صحيح أنها جيدة ولكن ليست ممتازة !!!

تحياتي وإحترامي للجميع

[ابوفزعه]

القماري

الذيب الامعط

قشاع الرمث

برق الوسمي

دواس الظلمه


اشكرم جميعا على النصايح والآراء