أهل الخبرة في التمور ((( إستشارة )))

[سلمان88]

السلام عليمم ورحمة الله وبركاته
أسعد الله مساكم بالخير والمسرات
وبلغنا وإياكم شهر رمضان
عزمت الذهاب إلى بريدة لشراء تمر للوالد وأنا في الحقيقة خبرتي عن أنواع التمور ليست كبيرة فأرغب من الإخوة الكرام بعض الإستشارات والنصائح عند شراء التمر الطيب حتى لا يروح مشوارنا تعب
وسلامتكم يا بعد حيي

[هماش]

السلام عليكم
يفيدونك اهل الخبره
لكن التمر الطيب اهو الا خلاص

[رأس الزعامه]

انا من القصيم واهل القصيم يفضلون التمر السكري
وإذا بغيت تشتري السكري أشتر الحبه الكبيره اللينه والصفراء

[سلمان88]

للرفع مع الشكر والتقدير

للأخوان

هماش

رأس الزعامه

[نمر بن حثلين]

مثل ما قالك الاخ راس الزعامه

فيه عدة اشياء تدل على جودة التمر

- الحجم كل ما كان اكبر كان أرغب واعلى بالسعر
- اللون والافضل هو الأصفر
- التمره ما تكون ناشفه ولا رطبه مدبسه يعني الوسط
- ان ما يكون فيها قشر ( الطبقه الخارجيه تكون منفصله عن التمره بشكل واضح)

وطبعا لا تستعجل بالشراء
احضر الحراجات وقارن السعر والجوده
ومع الوقت راح تعرف وش المرغوب

وانتبه للغش تراه كثير
وقبل يغرك التمر الي فوق اقلب الكرتون ودقق في الي تحت
اذا لاحظت اختلاف بالحجم او اللون لا تاخذه

واهتم بالتمر المنقى
يعني يكون الكرتون لون واحد وحجم واحد وقساوه وحده
لان بعضهم ما ينقي وعند التعبيه بالفريزر تظطر تطلع ثلث تمرك يا رطب يا ناشف ما ينفع

[dbdob]

هلا اخوي
عليك بالمنصف يعني نص رطب ونص بلح هذا افضل شيء للكنزفي الفريزر
وافضل شيء للكنز الخلاص_نبوت_سيف_صقعي
احرص على اللي حجمهاكبيرومنصفه
اماعن انك بتضمدفي تنك عليك بالخلاص وخصوصا اللي دبسه واجد

[سلمان88]

نمر بن حثلين

dbdob

شكرا جزيلا على النصائح الثمينة والغالية

بارك الله فيكم