اريد تركيب مثبت سرعة فبأي هذين تنصحونني ؟؟؟ [الأرشيف]

ذيب

07/08/2004, 11:00 PM

بسم الله الرحمن الرحيم
السلام عليكم ورحمة الله وبركاته

ايه الاخوة

عندي سيارة قير تماتيك اريد اركب عليها مثبت سرعة

بعد البحث والتقليب في اوراق هذا المنتدى المبارك
وجدت مكانين تركب مثبت السرعة واتصلت بهما وهما كما يلي :

1- صلصال في الشرقية سعره 950 ريال وضمان ثلاثة اشهر
2- الفلبيني فلب في رياض الخبراء في القصيم وسعره 1200 ريال وضمان ستة اشهر

مع العلم اني من سكان الرياض

فبأيهما تنصحون
وهل هناك غيرهما في الرياض

ذيب

09/08/2004, 01:08 PM

ولا واحد مركب مثبت السرعة
غريبه

ولا واحد سمع عن تركيب مثبت السرعة
غريبة

الروضة

10/08/2004, 11:26 PM

أبشرك ركبت مثبت سرعة على سيارتي جيب قير عادي ( ديزل ) وكلفني 1250ريال وذلك أنني أحضرت عصا التثبيت من التشليح بـ 200ريال من العجلان وشغل يده مع الجهاز اللي في الكبوت 1050ريال
وبصراحة تقول شد بلد العصا في الدركسون وتزيد السرعة وتنقص عن طريق العصا وإذا مسكت بريك افصل أو تفصله عن طريق العصا زي الكبس بالنور العالي
وأنا طالع فيه باث فندر وبرادو شغال بهم
وبدون عصا يرهم هو ضغاطات من عنده واعتقد بـ950ريال وضمان سته شهور
والسلام

ذيب

11/08/2004, 06:09 AM

اخي الروضة
اشكرك على تفاعلك معي

اين ركبت مثبت السرعة في اي ورشة

وفقك الله

الروضة

11/08/2004, 09:04 AM

أخوي ذيب نسيت أقول وين ركبت لكن حسب علمي مافيه يركب غير الفلبيني ( فلب) في الخبراء
يعني عند الفلبيني اسم الورشة ( الفائز )
والوصف بعد البدائع تجيك الخبراء وليس رياض الخبراء وانت في الخبراء على امتداد طريق الملك عبد العزيز تحصل الورشة على يسارك وأنت رايح للسحابين
بس أتصل عليه قبل ماتضرب مشوار وتراه يبي وقت ( أنا جيت الساعة 8 صباحاً وماخلص إلا 3 ظهراً
وقم جواله ( 0501907090 )
والسلام

ذيب

11/08/2004, 02:51 PM

اخي الروضة شكرا لك

انت قلت انك احظرت له عصا مثبت من التشليح وانك اذا لم تحضر له العصا يرهم لك هو ضغاطات من عنده

السؤال الاول /

متى هذا الكلام

لاني متصل عليه من ثلاثة الى اربعة ايام ويقول القطع امريكية والسعر 1200 ريال
عسى بس ما يكون يقصد هذي الضغاطات الي تقول

السؤال الثاني /

سألني عندما اتصلت به وقال هل في سيارك ارباقات ( البالونات الي تنتفخ عند الحوادث ) قلت نعم قال متأكد قلت نعم قال خلاص اذا اردت الحضور تجي بدري
وش دخل الارباقات في مثبت السرعة وهل قالك هذا الكلام

وتقبل تحياتي

الروضة

12/08/2004, 08:23 AM

أخوي ذيب
الكلام هذا يوم الثلاثاء 24/6/1425هـ
أنا سيارتي خليجية وفيها ارباق للسائق والراكب وركب المثبت عادي لإنه العصا شد بلد ( يعني سلك الكهرب ممد له
أما إذا كان فيها أرباق ولم تحضر له مثبت شد البلد فهو يبي يشبك المثبت ويشبك وسادة السلامة على ماأعتقد
أنا شفت عنده برادو يركب مثبت سرعه وفيه وسادة السلامة وقاعد يوصل أسلاك لها عن طريق المثبت على ماأعتقد
وتراه اللي يقول لك القطع امريكية يقصد المثبت ( الجهاز ) اللي في الكبوت اللي عليه العملة أما الضغاطات في توصل كهرب وتفصله فقط
وأي سؤال أنا جاهز
والسلام

ذيب

12/08/2004, 02:32 PM

جزاك الله الف خير

1- يعني تنصحني ادور مثبت سرعة من التشليح ثم اروح له

2- وايضا على كذا بيطلع السعر 1400 ريال تقريبا حسب ما قال 1200+ 200
صح ولا لا

3- وعلى فكره صاحب البرادو الي تقول كم صلح به
4- وهل شكل الضغاطات الي حط له جميله او مقبوله على الاقل

ولك جزيل الشكر

الروضة

12/08/2004, 11:15 PM

أخوي ذيب حفظك الله ماهي سيارك أولاً ؟
ثانياً ليش 1400! هو قال لي إذا تصبر أجيب العصا بـ 1250 ، يعني العصا من عنده لكن أنا ماصبرت
وهو قالك 1200اكيد من عنده كل شي
وأنا انصحك تركب عنده أربعه ركبو عنده قبلي وأنا الخامس من ربعي ولو تشوف كثر السيارات اللي يركب لهن تقتنع بشغله
وبالنسبةلصاحب البرادو والله ماأدري بكم ركب لكن أعتقد أن السعر واحد ( 950) بضغاطات
وهو ركب ضغاطات على جيب 91و97و2002وكلهم سعرهم واحد( 950)
وشكل الضغاطات مقبولة ولونهن احمر
والسلام

ذيب

13/08/2004, 01:22 AM

الله يوفقك وييسر امرك ويجزاك الف خير
فعلا اعطيتني صورة شامله للموضوع
بارك الله فيك
وبيض الله وجهك

الفياضي

13/08/2004, 01:43 AM

نصيحة : لاتعدى الفلبيني اللي برياض الخبراء تراه ممتاز ومجرب

الروضة

13/08/2004, 08:52 AM

على فكرة أخوي ذيب ( عصا التثبيت للجيب ) في الوكالة بـ270ريال انا سألت عنها قبل في وكالة عنيزة وبريدة لكن قالو نطلبها طلب وتجلس يومين
وأنت في الرياض أكيد بأذن الله تحصلها بدون طلب يعني موجودة وهي أفضل لك من التشليح
والسلام

BASSAM

13/08/2004, 12:53 PM

السلام عليكم ورحمة الله وبركاته

اخوي ذيب انا سيارتي باثفيندير 2002 ومركب من صلصال ب 950 ريال وممتاز معي وتقدر تزود السرعه وتنقصه بالعصا ويفصل مع البريك وصار لي معه 8 شهور واعرف واحد صار له سنتين و مثل سيارتي .
وركبه لي ب 3 ساعات .

المشكله انه بالدمام

ذيب

14/08/2004, 08:39 PM

اخواني الاحباب
شكرا جزيلا لكم

عن قريب باذن الله اركب المثبت اسبوع او ما يقارب ذلك

وساخبركم بالنتيجة والتفاصيل
والله المعين

وفقكم الله وسدد خطاكم

سهم الشمال

16/08/2004, 02:52 PM

انا الان جاي من عنده ولقيت عنده سيارتين GXR لكن على قوله عصا المثبت الوكاله يختلف من2002 فما فوق واعرف شخص معه لاندكروزر2001 ومركبه من شرا موتره (وكاله) وماشي معه انتيكه (ما شاء الله) وعلى فكره موتري باثفندر وفيه ارباق والحمد لله لم يشكل عائق في التركيب مع العلم يعطيك عليه ضمان 6 شهور .
وانتبه اتصل عليه وخذ معه موعد قبل لاتضرب مشوار وتنلطع مثل محسوبك يوم زياده:(

وارجومن الله للجميع التوفيق والسداسد ................

ذيب

17/08/2004, 12:11 AM

طيب اخوي
الي سيارته باقي على الضمان
يعني وكالة حتى خمسة آلاف باقي ما وصلتها
هل يلغي الضمان ولا لا

يمكن يقولون هذا عبث في السيارة وانت خربت البرمجة والظفيرة وتتحمل مسؤولية ترهيمك وما يترتب على ذلك

ممكن كذا ولا لا

BASSAM

17/08/2004, 12:55 PM

السلام عليكم ورحمة الله وبركاته
اخوي ذيب بالنسبه للضمان سيارتي نيسان وسألت الوكاله بالشرقيه قبل ما أركب وقالولي ما يأثر بالضمان حتى الوكاله يسون دعايه ل صلصال.

ذيب

17/08/2004, 11:05 PM

شكرا لك
لكن الى ضمانه عند ابو جميل < تايوووتا >

ويش يسوي

افضله ينتظر شوي

راعي الكيف

19/08/2004, 09:12 AM

طيب يا شباب .... ممكن سؤال !؟!؟!؟

أنا سيارتي كامري 2001 تماتيك وراعي خطوط ..... ممكن إذا بغيت اركب مثبت سرعة ؟؟

هل تركيب مثبت السرعة مرتبط بنوعية السيارة .... مثلا جيوب ؟؟

وبكم ... لأنني أشوف أغلب اللي سألو ماشا الله راعين جيوب ... وانا الله يخلف كامري :( !!!

أرجوا الإجابة على هذا السؤال لو سمحتوا إذا أمكن .

ولكم مني جزيل الشكر

راعي الكيف

19/08/2004, 09:15 AM

معليش نسيت أسأل سؤال ثاني ....

هل أقدر أركب جهاز الارسال والاستقبال ((الكينوود)) في سيارتي الكامري ؟؟

وذلك لكثرة سفرياتي عليها وتعبت من كثر ما أشري هالاشرطة وخبركم أن الرادو ما يصفى في كل مكان مثل الرياض لأني من سكان الرياض

أرجوا أن تفيدوني في ذلك جزاكم الله خير

وأجزل لكم المثوبة

BASSAM

21/08/2004, 08:13 AM

اخوي راعي الكيف
المثبت تقدر تركبه وبالنسبه للكينود تقدر بس دبر مكان مناسب بالسياره

ذيب

21/08/2004, 11:04 AM

بسم الله الرحمن الرحيم
السلام عليكم ورحمة الله وبركاته

ذهبت الى فلب في ورشة الفايز الساعة ثمان ونصف صباحا وبدأ في تركيب المثبت مع ان الي يشتغل اخوه وليس هو
ايضا عنده سيارتين جيوب تايوتا مركب فيها
شغله نظيف ومرتب ومتكتك
العصا من الوكالة والجهاز امريكي مستعمل من التشليح
انتهى من التركيب اذان الظهر

توجهت الى الرياض وجربت المثبت في الطريق
ممتاز ولا فيه كلام

بالنسبه للي سيارته ما فيها ارباق للسائق يزود عليه السعر تقريبا مائتين ريال

ذيب

21/08/2004, 11:07 AM

فيه سؤال

مثلا انا ثبت السرعة على 120 كيلو وبعدين ضغطت على البريك (الفرامل) طبعا يفصل لكن لو تضغط المثبت فوق يرجع للسرعة الاولى يعني 120 صح ولا لا
وكذلك اذا اردت زيادة السرعة اضغط لاعلى
المشكله
ان البنزين ينظغط للاخر حتى انك تخاف من تلف مكينة السيارة من قوة الصوت

هل هذا طبيعي ولا مشكله خاصة اراجع الي ركب المثبت ليعيد تصليحه

ارجو انكم فهمتو السؤال

سهـود ومهود

22/08/2004, 01:24 AM

السلام عليكم ورحمة الله وبركاته
أرجو ( إذا ممكن ) صورة للجهاز وهو مركب . . العصا و ابو أزرار .. ؟

راعي الكيف

22/08/2004, 03:42 AM

تسلم يا بسام على مرورك الكريم على سؤالي :)

وفيه إذا ممكن كذا سؤال :

الأول / هل عليه ضمان ؟ وكم فترته ؟

الثاني / يلزم تقطيع أسلاك في السيارة ولا لا؟؟

الثالث / هل من الممكن تدعيم الموضوع بالصور سواء أثناء التركيب أم عقب التركيب؟

BASSAM

22/08/2004, 07:07 AM

السلام عليكم ورحمة الله وبركاته

ذيب: بالنسبه اذا ضغطت المثبت عشان ترجع للسرعه السابقه المفروض ان البنزين ما ينضغط للاخر هذا الي عندي وهو من صلصال .

راعي الكيف : نعم عليه ضمان 3 شهور ولا يلزم تقطيع اسلاك وكل الشغل نظيف ولا يبين شي تقول من الوكاله!
الصور ماعندي اثناء التركيب بس احاول اصور لك بعد ما ركبته.

ولكم التوفيق

الروضة

22/08/2004, 10:01 AM

مبروك ياذيب الله يطعمك من خيره ويكفيك شره
وبالنسبة للمشكلة اللي معك أعتقد إنها غير طبيعية يعني لازم تتأكد منه ، أنا معي طبيعي مافيه زي ماتقول
وبعد أذنك
راعي الكيف نعم فلب يعطي ضمان لمدة 6شهور
ولايلزم تقطيع أسلاك
والصور هذه
هذا الجهاز أمريكي من التشليح ( اللي في الكبوت )
http://www.mekshat.com/pix/upload/images5/mk4257_TN_0146.JPG

وهذي العصا اللي في الدركسون ( وكالة )
http://www.mekshat.com/pix/upload/images5/mk4257_TN_0149.JPG

http://www.mekshat.com/pix/upload/images5/mk4257_TN_0150.JPG
والسلام

راعي الكيف

22/08/2004, 04:23 PM

اشكرك اخي الروضة على إغناء هذا الموضوع ...

واللذي كنت أتحرق شوقا لرؤيته على الصور ...

فلك جزيل الشكر

أخوك راعي الكيف

BASSAM

22/08/2004, 11:28 PM

راعي الكيف

هذي الصور

المثبت
http://www.mekshat.com/pix/upload/images5/mk7984_ccc.JPE
جهاز يركب على البنزين
http://www.mekshat.com/pix/upload/images5/mk7984_aaa.JPE
بقيه الجهاز
http://www.mekshat.com/pix/upload/images5/mk7984_bbb.JPE

ارجو ان تكون الصور واضحه.

ذيب

22/08/2004, 11:46 PM

اخي الروضة واخي BASSAM
شكرا لكما
وارجو ان تصفو لي ما يحصل معكم اثناء ضغط المثبت للأعلى من اجل اعادة السرعة الأولى
هل ينضغط البنزين على الآخر ام ماذا يحصل

*****************************************

اخي BASSAM بعد اذنك

من الصور الي وضعتها يتبين الفرق بين صلصال وفلب

1- الجهاز الي في الكبوت عند فلب امريكي من التشليح اما صلصال كوري
يقول فلب انه يتأثر بالحرارة ويقول انه كان يركبه من زمان وحول الى الامريكي لانه اجود

2- من الصورة كما يبدو لي ان العصا عند فلب تركب على الدركسون مباشرة مثل شد البلد تدور مع الدركسون
اما صلصال فهو يركبه على الوصله الحلق الي بين الطبلون والدركسون بمعنى مع ضغاطات المساحات والأنوار بمعنا انها ثابته
وهذا الي يخلي فلب يسأل عن الارباقات

هذا ما استشفيته من الصور
ان كان كلامي خطأ ارجو التوضيح

ولكم من الشكر اجزله

BASSAM

23/08/2004, 06:59 AM

اخوي ذيب
السرعه تزيد تدريجيا ولا ينضغط البنزين للاخر.

ومكان المثبت يركب يمين او يسار في حدود الرقبه الي تقول عليها.

وبالنسبه للجوده اعرف ناس مركبين حق صلصال اكثر من سنتين ونصف ولا اشتكو منه.

ولكم التوفيق جميعا.

aaa658

24/08/2004, 08:28 PM

اخوي ذيب لايفوتك فليب في ورشة الفايز انا مركب عندة على كامري قير عادي من احسن مايكون واخوي مركبة على كامري قبل خمس سنوات من عندة والى الان وهو زي الحلوة

خوي النشاما

24/08/2004, 10:16 PM

السلام عليكم ورحمه الله وبركاتة
انا اعرف اثنين من اخوياي معهم جيوب gxr مديل 2000 وا 2004 ومركبين مثبت عند صلصال الى بشرقية وممتازات وجيدة وبسعر 950
ولكم شكري

خوي النشاما
__________

صيهد

30/08/2004, 12:06 PM

ياشباب معقوله مافيه ورشه في الرياض تركب مثبت سرعة

بس في الشرقية او القصيم؟؟؟

أبو فراس

08/09/2004, 04:31 PM

السلام عليكم ورحمة الله وبركاته

انا ركبته عند فلب اللي في ورشة الفايز وماشي تمام التمام والله يانا ارتحت راحة

ولد وايل

29/05/2007, 01:58 AM

بيض الله وجيهكم افدتو واستفدتو

الف تحيه لكم وتقدير

ابن صقيه

29/05/2007, 05:21 AM

معقولة ما فيه ورشة في الرياض تركب مثبت سرعة ؟؟
س/ هل يركب المثبت على أتيما 2005 أوتوماتيك ولكم جزيل شكري

ابن صقيه

29/05/2007, 04:22 PM

يا شباب ياهوه ياولد ؟؟؟
الظاهر مافيه أحد .

AMAZ

29/05/2007, 07:21 PM

انا معاي gxr 2006 وركبته عند فليب بشهر قبل سنة تقريبا والله انه ماشي زي تمام والحمد لله علما بان السيارة قير اتماتيك وفيها اثنين وسائد سلامه وكلفني 1500 ريال وكل شي من عنده اتصلت عليه وعطاني موعد وجيت عنده الساعه التاسعه صباحا وستلمته الساعه الثالثة عصرا .. وشغله شهادة لله ماعليه كلام ولا تكسير ولا اسلاك بالكبوت تقول شغل ياباني ... قبل اركبه رحت لابو جيمل وحصلت مدير قسم الصيانة في بريدة وقال والله نركبه لك لكن لازم تطلب القطع وخاصه الجهاز من امريكا عن طريق الانترنت وياصلك مع الشحن 350 دولار ونركبه لك عندنا شغل يد 1500 ريال وقالته عن فيلب قال لا ممكن يخرب عليك السيارة وبعدين استخرت الله ورحت الى فيليب وركبته وكان الجهاز الى ركبلي مستعمل حق سيارة امريكيه مديل 96 على اماضن كابرس والقطع ام العصاء فيه من وكالة تايوتا وقال حتى لو بعد فتره خرب عليك الجهاز الرئيسي الى هو تقدر تشترية من عند قطع غيار السيارات الامريكية وتحلصه كثير وخاصه انه من مديل 85 وحتى 96 كلها تركب ........

الرهدن

01/06/2007, 05:20 PM

سيارتي GXR 99

لاتعدون فلب 00

أنا مركب عنده لي أكثر من 5 سنوات وماشاء الله00

نصيحة :

اللي سيارته جديدة ولازالت تحت الضمان00 لايركب أي شئ كهربائي00

كدت والله أدفع أكثر من 4000 ريال ( إحترقت الظفيرة ) وكانت سيارتي تحت الضمان00

وتضاربت أقوالهم وقالوا السبب إنك مركب جهاز الإنذار00

لكن :

يبحثون عن أي نصبة

ولولا الله وتسهيله ثم واسطة منهم وفيهم00 كان والله دفعت المبلغ

لكن الله ستر

.

alkamali

21/09/2017, 10:29 AM

.
قَبَسٌ
مِّن كِتَابِ اللهِ
ـ ـ ــ ـــــــــ ــ ـ ـ
غرّة شهر اللهِ المحرَّم 1439هـ
21 ســــبــتـــمـــبــر 2017 م
ـ ـ ــ م ـــــــــ ش ــ ـ ـ

قال الله ﷻ :
﴿ إِنَّ عِدَّةَ الشُّهُورِ عِندَ اللهِ اثْنَا عَشَرَ شَهْراً فِي كِتَابِ اللهِ يَوْمَ خَلَقَ السَّمَٰوَاتِ وَالأرْضَ مِنْهَا أَرْبَعَةٌ حُرُمٌ ذَٰلِكَ الدِّينُ الْقَيِّمُ فَلَا تَظْلِمُوا فِيهِنَّ أَنفُسَكُمْ ﴾

🔹وهكذا العمر يمضي ..!!
بين عام مضى وانقضى .. وعام هلّ هلالُه 👈 يمضي العمر سريعاً ..!!

🔺لا يشك أحد بأن الوقت هو الحياة ، فعمر الإنسان عبارة عن أيام ؛ كما قال الحسن البصري :
" يا ابن آدم ؛ إنما أنت أيام ، إذا ذهب يوم ذهب بعضك ".
🔺والأيام ما هي إلا ساعات ودقائق ..
لـذا على المرء أن يتفكر أين يذهب يومه ..
لأنه 👇
🔺سيحاسب على كل لحظة فيه ..

وفي الحديث الصحيح : " لاتزولُ قدما عبدٍ يومَ القيامةِ حتى يُسألَ عن أربعٍ : عن عُمرِه فيما أفناه .. " الحديث .
👇👇
فانتبهوا لأعماركم .. يرحمكم الله ..!!

#نصرة_للنبي_ﷺ 👈 اتبعوا سنته .. تسعدوا ..!!

🙌 اللهم اجعله عام خير وبركة ونصر
وتمكين لعبادك الموحدين 🙌

alkamali

21/09/2017, 10:30 AM

تركيب مثبت سرعة في الكويت و تحكم دركسون لعموم سيارات تويوتا وكيا وهايونداي بقطع اصلية بدون ترهيم وبدون اي مخاطر للتواصل واتس او اتصال
0096555512123
هايلوكس 2016 فما فوق عادي واوتوماتيك
fj 2008 وفوق
كامري 2007 وفوق
كرولا 2008 وفوق
لاندكروزر 2008 وفوق عادي واوتوماتيك
برادو 2010 وفوق 4 سلندر و 6 سلندر جير عادي واوتوماتيك
رافور 2008 وفوق عادي واوتوماتيك
فورشنر 2016 وفوق عادي واوتوماتيك
اينوفا 2016 وفوق
يارس بعض الموديلات عادي واوتوماتيك
وعموم سيارات الكيا و الهايونداي

alkamali

21/09/2017, 10:46 AM