(( أنا الجربوع أبن مربوع ))

[ريف النشاما]

سلاااام عليكم يالربع

صبحكم الله بالخير:)

موضوعنا ماهو جديد .. .. فهو موجود ... (( هنيا )) (http://www.mekshat.com/vb/showthread.php?s=&threadid=7794&highlight=%C7%E1%CC%D1%C8%E6%DA) وكذلك ....(( هنيا )) (http://www.mekshat.com/vb/showthread.php?s=&threadid=12830)

لكن مركبين له مساحات جديده...(ضحكة)...وهو يتحدث عن

(( الجربوع الرهيطي ))
"""
""
"
رهيطي مغلق
http://www.mekshat.com/pix/upload/images12/mk8178_rre1.jpg

وهذا المدخل تم إغلاقه حفاظا على أمن وسلامة أبن مربوع من المتطفلين
http://www.mekshat.com/pix/upload/images12/mk8178_rre2.jpg
رهيطي مفتوح .. والعاده يكون ذلك بالشتاء ...لكن أبن مربوع موجود في الداخل
مدري وش مسهره جيته الضحى وهو ماخلص .. خربنا عليه
http://www.mekshat.com/pix/upload/images12/mk8178_rre3.jpg
حاولت أصوره عن قرب لأنه كان يخرج ويدخل عندما أقتربنا منه
وقد تلاحضون الغبار البسيط عندما أنقلب على عقيبيه
http://www.mekshat.com/pix/upload/images12/mk8178_rre4.jpg
صوره لنطوقته عندما فر هاربا في الرهيطي المغلق ... وكنت مستعد لتصويره ولكن ..
كان أسرع مني
http://www.mekshat.com/pix/upload/images12/mk8178_rre5.jpg
وهذه لنطوقته في الرهيطي المفتوح لم يخرج مع الفتحه الرئيسيه
آثاريه كان مجهزها
http://www.mekshat.com/pix/upload/images12/mk8178_rre6.jpg
وهاهي النطوقه
http://www.mekshat.com/pix/upload/images12/mk8178_rre7.jpg
وهذا أبن مربوع عندما فر هاربا وزبن على جاره العزيز ضب

طبعا هو يلبق في اول لفه لين تهدأ الأصوات ثم يخرج

ويسيح في أرض الله الواسعه

والهم يعتصره على خراب بيته

http://www.mekshat.com/pix/upload/images12/mk8178_2.jpg

""""""""""""""
""""""""
(حزين)

"""
""
"
تحيتي للجميع

[السمح]

شرح وافي وكافي ياريف النشاما

لكن جربوعك ما بحثت عن أسباب سهره إلى صباح رب العالمين ؟؟ :D

أثاري الجربوع مهوب سهل .. إي والله !!

زيادة صور للجربوع بن المربوع بعدما تم القبض عليه ميتاً

http://www.mekshat.com/pix/upload/images/mat/mixd/72-copy_1.jpg

http://www.mekshat.com/pix/upload/images/mat/mixd/71-copy_2.jpg

أحلى تحية

[اعقاب]

وعليكم السلام ورحمة الله وبركاته

ريـــ النشاما ـــف

شرح وافي وصور واضحه

نبغي انشاع الله اذا شرفت الحباري تتحفنا بمثل هذه المواضيع

مشكور وما قصرت



السمح وش سويت ماخليته يزبن

ماشاء الله عليك ماخليته يفلت

[معمرها]

بسم الله الرحمن الرحيم
وعليكم السلام ورحمة الله وبركاته
يعطيك الف عافيه
اخي
((( ريف النشاما)))
على الموضوع

[عاشق الصفاري]

تسلم اخوي ريف على الموضوع المنتواضع ..
والرائع ..
بارك الله فيك ,,

[راع الكحيلة]

يا مرحبا يا ريف

خوش مراقبة وخوش متابعة
بس يا ليتك صدت له صورة كبيرة ذا الجبان المنافق :) ...... (منافق أصلها من صاحب النفق ذو المخرجين )

ولو انك جلست بسيارتك بمسافة قريبة بالحيل لفترة بسيطة وتحافظ على السكون
تلقاه أمّن بالوضع وعاد لخرفشته ومن هنا ترميه بصورة والاّ صورتين

ثم يمكن نتوسط لك عند ابو تركي يدخلونك في مسابقة صاحب أجمل جربوع :) ... مسابقة مفصلة لك.

وشتبي بعد أكثر من كذا؟؟


بو تركي
أشوفك حاط الجرابيع في طبق وكأنها جاهزة للأكل

[الفياضي]

بارك الله فيك ويعطيك الف عافيه

[ريف النشاما]

:)


:)


يالله حيهم

وش ذا يابو تركي عمليات أعدام متعمده مع سبق الأصرار والترصد :mad:
لاوالله ألي راح فيها أخو شمّا :(
يالله يارجال سامحناك هالمره ولاعاد تعودها:mad:
أما سهر ابن مربوع ... الضاهر أنه رايح يسربت بألليوله:D

شاكر ومقدر لهذه الصور الجميله

أخي عقاب
شاكر ومقدر وأبشر أنشاء الله أبتسلف طير أبو عايد وأقنص به
بس هاه ترا مالي شغل
وش يمسك الطير مدري ... ياطير ابن برمان جبناك حنا........:D

أخي
معمرها
عاشق الصفاري

حياكم الله وبارك فيكم ومشكورين على المرور

أخي راع الكحيله

أبي سلامتك يابعد حيي
وماعليك هذه الفكره في الحسبان وأنشاء الله تشوفها قبل رمضان
إذا أخضرت الريضان وشبع الجوعان من الجرابيع والضبان
نصور لك كم صوره كمان واضحه ماتبيلها ترجمان
وسلامتكم يالشجعان

أخي الفياضي شاكر ومقدر وأنشاء الله تكون أستمتعت بالجريبيعات
بس أنتبه تهوش ناحيت صحن السمح :)


:D


http://www.mekshat.com/pix/upload/images5/mk8178_fffgg55.gif

[أيام العبور]

الأصل كُتب بواسطة معمرها
بسم الله الرحمن الرحيم
وعليكم السلام ورحمة الله وبركاته
يعطيك الف عافيه
اخي
((( ريف النشاما)))
على الموضوع

[هاوي مقناص]

السلام عليكم ورحمة الله وبركاته................




مشكور اخي ريف النشاما علي الموضوع الشيق:) وماقصرت يالغالي.


اخي السمح يعلهن بالعافيه عليك.


ومشكوووووووووووورين .



اخوكم :الخشف

[ريف النشاما]

ابو ليا لي ..... أنتبه للحبارى من الخشف وطيره

شكله ناوي له نيه ... أنتبه:butt3:

ترا مالي شغل ... وإلا ناوين على جريبيعاتي أنا والسمح

أنا قلشت عليكم:burnout2:

والسمح وحده من ثنتين

أما أن عنده مزرعة جرابيع .... ولا أنه صايدها بالربيع ... يعني برضو قلشت :)








وشاكر لكم المشاركه ونتمنى لكم المتعه








أقول ماودكم بقصيدرت جريبيعات على القمرا ...:mad:


:looney:

[قشاع الرمث]

الأصل كُتب بواسطة الفياضي
بارك الله فيك ويعطيك الف عافيه

[الرماي]

مشكور على هذا الموضوع والصور الرائعه

[ريف النشاما]

أخي
قشاع الرمث
الرماي

شكرا لكم على المرور
والموضوع زان وتجمل في ردودكم ومشاركاتكم لأخوكم

والذي أدمن على إفتراس الجرابيع وقد ذكر له علاجُ ُ ناجع لعلاج هذا الأدمان
وهو أكل أم أذينات في الليالي المضلمات على ضوء النجمات مع مرقاتن وخبيزات
على الصاجات في الشهر ثلاث مرات فقط لااااااااغير













;)

[صقر]

السلام عليكم


أخي ريف النشاما:

مشكور على هذا الموضوع الرائع... ومشكور على هذه الصور وهذا السرد السهل.

وبارك الله فيك.

[عاشق نجد]

يقال في المثل :

أنا الجربوع ابن مربوع ، لو أيديه طول رجليه ، ما سبقتني أم عبية .

( أم عبية هي الفرس )

[ابو عايد]

عوايدك يالغالي.

اسلوب رائع ............. تميز في الطرح .............اعطاء الموضوع حقه من جميع جوانبه

هذا ما عهدناه منك ياخي الغالي ريف النشاما لا اعرف ماذا اقول غير ذالك

فالموضوع ر ائع بالفعل وليس لدي ادنى تعبير او تعليق يفي بحقك والموضوع الممتاز الذي مثبت بصوره

وتقبل تحيـــاتي // العاشق الولهان

[ريف النشاما]

ياهلا ويامسهلا

فيك يابو عايد

والله ياخوك ياني غفلت عن جريبيعات وأثريك تدورج حولهن

عسى منت بتعشي طيرك ترا والله مانخليه لك انا والسمح انتبه

إلا على طاري الطيور

يقول الشاعر ياطير ابن برمان جبناك حنا

الله يخليك لي يابو عايد

شةفت أسمك توسع الصدر

وسع الله صدرك وجزاك كل خير


وتقبل تحيتي يالغالي

[ريف النشاما]

أخي العزيز صقر

يامرحبا ويامسهلا

والموضوع شرف بحضورك وحضور الربع

بس ترى عندي حساسيه من أهل الصقور .... مطمعو على الله ويشوفون جرابيعي

لاكن فزعتك يابو أحمد نبغى نطق على طيورهم

وعلى راسهم ألي فوق


أجمل تحيه يالغالي

أخي عاشق نجد لا أم اعبيه ولا ام أرطيه

والله يانطقته مالها مثيل كنته بستم

شرفت الموضوع يالغالي وياهلا


تحيتي

[خشم الحصان]

الاخ الغالي
ريف النشما
السلام عليكم
الله كريم حاطين حيلكم في هالضعيف وموذينه اذا فيكم شده ومدة يد روحو لولد عمه الي في استرليا
(الكنغر) مهوب هالمسكين .
وانت يالسمح تبي تروع عيالنا يومك حاط هالسكري في الصحن والدبس سايح منه
منول نصف حملة الموتر للكشته عسبان نخل وكرب علشان مطارد هالجربيع في المقيره(المقيره هي الارض الواسعه والمنبسطه) ونرجع ويكثر المصابين مهوب من الجربيع لا حتي الصيادين ياهذا دبجله واحد بين كتوفه
يالاقطه مع حبيل الضهر ياكامخه مع الراس وخذ هوشه ودمان تصبصب بس بيني وبينكم خلتنا منول سبوقين
اما اذا جاء يوم الدراسه تلقانا ندرس حافين مهوب علشان معندنا كنادر لا السبه ياضفر منقلع وتلقاه شاية جلمود حصاة او مليون شوكه وقطب والحين مع هالجيل (الكيكوزي نيدوي ) اذا شافه غشي عليه من الفرحه تدري ليش يقول(ياييي وش هذا الملون ابيه علشان ياخذ جلده ويغلف به جواله ويمسك الجوال مع الذنب وخذ تمشي في شارع(اذا صار الماء حلو ياحلوين) الله كريم ياريف النشما رجعة ملفات قديمه الله يغفرلك ياخيي ويرفع من قدرك ومشكور يابعدهم علي هالصويرات . الا مير ابنشدكم هو قد عض احد فيكم ؟
اخوك
خشم الحصان

[المترو]

اولا اكيد ما دام انك راعي جرابيع ديكور موترك معدوم من كثر لفزات الجرابيع وخذ يا دوره عليه الى انك تفكك اكثر قطع الديكور خصوصا اللي يصيده حي للصقور
ثانيا له سالفه معي مره واحد من الشباب قال ابي لي جربوع لطيري اليله عشاء قال اخوك راعي الفزعات انا سبوق ابي الحقه وامسك ومن زود الفزعه نسيت انزل الجوال من جيبي المهم ان جوالي طاح وانا الحقه وبعد ما رحنا مسافه الا واذكر الجوال وطول الليل وحنا ندور الجوال الى ان لقيناه ومن بعدها احذت حذري من الجاربيع

موضوع حلو وجميل وراعيه اجمل
وسلامتكم الرحال2003

[ريف النشاما]

يالله تحييك ياخشم الحصان ويسلمك على هالسويلفات..... والجريد
ويجزاك خير على الدعوات......... ويبيض وجهك في الدنيا ولآخره ......... اما صحين السمح
فهو يخرع
حتى أني ماعاد جيت الصفحه الأوليه منه .... بس الله يجيرك ذكرتني بعد أنت الجريد
هالسنين رحنا نتصيد وجبنا حول 30 ومعهن 3روس حيه وحنشين... وقفنا على الشارع
عند رجال إلا يوم أقبل علينا هالكواحد .. يوم اقبل وأحذف عليه الداب ويدخل عليه مع القزاز...
ويصير موقف طولي من هالسالفه
ونعرج على الجريبيعات .... وبهكالقصديره وطميطمات وبزيرات وبصيلات ..... وندفنه وسط الجمر
وينك يا الرحال.... :mad:
على طاري الرحال ..مرحبا بك وعندي لك قصه مثل قصتك
مره واحد من الشباب راح مع ربعه يتصيدون وقريب من الديره
وضيع البوك ..ودور ملقا .. ورجع من بكره ودور ودور ومالقا شي ضاع البوك والبطاقات كلها
والرجال حيمول الطرد عليه لأنه عصقول وسبوق ;)
وماخلا جحرن ماواق فيه .. المهم بعد الياس ومرور خمس أيام كلها امطار قال الله يخلف
... قلنا ياولد
وش رايك يوم الخميس تطلعنا للموقع وتذبح التيس والباقي أزهله .قال تم
ومير انتواعد ويصير مركبه معي .. ويوم الخميس صليت الفجر ونمت لي غطه ....
قلت ابىخذ غطه قبل يجي

ومير اشوف ..رؤيا .. في المنام كنت واقف انا وياه في غرفه وقدامي طاوله يوم ناضرت للطاوله
إلا والبوك عليها .... وأنا أضحك وأناضر له .... وتاخني النبهه واقوم
يوم جا وأعلمه بالسالفه وقلت

أبشر بألبوك .... قال كيف .. قلت القصه كذا وكذا وتفسير الرؤيا نلقاه

رحنا للموقع وأفطرنا بهاك الجو الرهيب ... وننتشر حول الخمس طعش :D
وندور على الحروه وندور ..,,,,,,,ووووووووووو ...ماش مافيه فايده
وكان راكب هو وأخوي واحدن ثاني
قلت أنتو وجيهكم كره ...... ومار يوم أقبلنا على مقطانا .. ,انزلهم قلت رورحو على رجيليكم
ورحت انا والرجال وندوووووور وهو كنه بس فوق التنده متمسك بالشبك
ومير ألف من عند هكالعقم إلا وذاك زوله .... ,انا اصيح عليه بوكك بوكك وهو
يشوفه ويطبح من فوق السياره
قلت هذا تفسير رؤياي من قبل قد جعلها ربي حقا ..... لقيناه انا وياه سالم غانم ...
.....وقد علته المزون العقربيه
.....

تحيتي