يامعشر الفنيين للباث فيندر الله يخليكم فزعة ولكم دعوة [الأرشيف]

مشاهدة النسخة كاملة : يامعشر الفنيين للباث فيندر الله يخليكم فزعة ولكم دعوة

وادي النوم

27/08/2009, 02:57 PM

يا حبايبي الله يجعلنا واياكم من المقبولين المعتقين من النار

اللهم من دلني وارشدني اللهم يسر امره وسدد رأيه وجعله مباركا أينما كان

اخواني الأعزاء

بعدما بحثت يمنة ويسره عن المشاورة وضاقت بي الدنيا كل يعطيني رأيه فأصبحت في حيره

قالوا الربع مالك بعد الله إلا اخوانك في مكشات فيهم اعضاء لهم خبره وباع طويل في السيارات

ماعليكم بالطويلة

يوم الخميس قبل شهرين رحت للورشه وشالوا مسامير الثلاجة وقالوا لي وش رايك

نفك البلف علشان ماتحلم ترتفع الحرارة مع العلم أن الحرارة عندي لم تكن مرتعه حينها .

قلت شل البلف

بعد أسبوع من شيلت البلف ذهبت إلى احد المحافظات القريبة من الرياض وطلعت من الطريق العام

ومادريت إلا الموتر وده يغرز ودعس عليه وطلعت الحمدلله

المشكله ناظرت الحرارة واثرها فوق النصف

نزلت والحمدلله .

مرت الأيام بعد أسبوعين ذهبت لتلك المحافظة بعدما تجاوزت 200كلم ناظرت الحرارة وش اشوف

فوق النصف لاحووول ولاقوة إلا بالله

نصيت الورشة لتك المحافظة وعلى طول سيخوا الرديتر

رجعت للرياض احسب الدعوى سهلة سافرت لمكة بعد مادعديت الخاصرة ارتفعت الحرارة

تعدت النصف الين وصلت للميقات

رشيت الرديتر وفجأة نزلت الحرارة وصلت لمكة والحرارة مضبوطة .

بعد مابردت عبيت الرديتر

رجعت للرياض يوم مشيت 500 كيلو تعدت النصف
وصلت للرياض

وبديت اشاور الناس حتى قال احدهم إن فيه لي يتبخر منه ماء الرديتر عند المكينه

لازم نرفع المكينه ونغير اللي .

احد المجتهدين قال فيه مشكلة بالتمتيك حق المروحة

والآخر يقول أكيد الراس منشعر وكل يعطيك رأي

اخواني الله يفرج كربتكم هل تعرفون فني بالرياض متخصص بالحرارة

علشان يروح الهم اللي أنا فيه الله يفرج عنكم ودوما وأبدا تذكروا

من فرج عن أخيه كربه من كرب الدنيا فرج الله عنه كربه من كرب يوم القيامه

(( للمعلوميه بالديرة ماترتفع الحرارة فقط بعد يومين أو ثلاثة ازيد الماء ولاترتفع ))

aooa

27/08/2009, 03:06 PM

اول شيء

عالج بداية المشكله

رجع بلف الحراره ويكون جديد

ولو فيه درجات خذ لك اقل درجة حراره

وركبه لان البلف يحافظ على درجة حرارة ثابته في السياره ولا تتاثر المكينه ولا يتاثر راس المكينه بسبب دخول الماء بدرجه حراره ثابته

وفك بلف الحراره يعتبر خطأ فادح

النوفي 3535

27/08/2009, 04:47 PM

اخوي العزيز
اول شي سو كلام اخوي aooa
وبعدها إذا ركبت البلف سوا تنسيم للمواية الردايتر
تلقها فوق ماوسرة عليها سده فك السده وعبى الموايه وجب موايه صحه واقطعها من النص وحطها مكان الغطاءوعباء المواية لين تلقى المواية تطلع من المواصرة واصبر شوي وكرر المحاولة
لين تتاكد مايطلع هواء من الماصورة وسكرها
وإن شاء الله
ترجع السيارة زي اول
اما بخصوص الارتفاع المفاجى هو هواء بالردايتر
تحياتي

وادي النوم

27/08/2009, 04:52 PM

اخواني الله يفرج عنكم بالدنيا والاخره

أنا ماعرف شيء اسويه بالسيارة هل ممكن تدلوني على ورشه معينة

ويعرفون الشغلة الله يصلح لكم أموركم

م.بندر

27/08/2009, 04:58 PM

السلام عليكم ورحمة الله وبركاته
اخوي الغالي
اختصار للوقت والجهد والمال
ركب مروحه ثانيه على اديتر المكيف
تشتغل وتطفى مع المكيف
ابسط واسرع واوفر حل
من تجربه سابقه

escape_man

27/08/2009, 05:04 PM

رح لورشة ابو ابراهيم بصناعية الدايري

لاطلعت مخرج 17 ومشيت مع المحلي تجيك الصناعية .. دور مدخل عنده لوحه تقديرات المرور

ادخل معها لاخر الشارع بتلاقي حول المسجد ورشة سفاري

بالتوفيق ولا تنسى تدعيلنا

aooa

27/08/2009, 05:41 PM

اخي ما يحتاج تروح لورشه متخصصه

او يكون واحد فاهم

رح لاي محل رديترات وقله ابي اركب بلق حراره السياره وما راح ياخذ اكثر من 50 ريال

طبعا بعد ما تشتري البلف من الوكاله +مويه رديتر من الوكاله وليس الماء الاخضر المقلد

وبكذا تنهي المشكله من اساسها

ومشكلة نقص الماء هذا شيء طبيعي جدا اذا ارتفعت الحراره فوق النص بسبب عدم وجود منظم للحراره وهو البلف لا بد من تبخر الماء عن طريق القربه البلاستيك الابيض بجانب الرديتر

انت سو اللي اقولك وبعدين يحلها الله

ولا تصدق اللي يقول الراس منشعر او اي كلام ثاني ركب بلف وبعد كذا ارجع اعمل رد هنا بعد ما تجرب الموتر اكثر من يوم ....

mazenk15

27/08/2009, 05:48 PM

اخوي انا اقولك سم ماقالك اخونا
aooa
وعسى الله يفرج كربتك
ونتظر ردك بعد التجربة

لاندكروزر-83

28/08/2009, 04:20 AM

غير غطا الراديتر يمكن يكون خربان ويسبب تبخر الماء قبل لا تغيرة شيك علية لانة صار معي في الجمس

.أبوعبدالرحمن

28/08/2009, 10:58 AM

أول شيء رح لأحد محلات الحمراني المعتمدة واطلب البلف حق الباثفندر الخاص فيه وخذ لك موية رديتر من نفس المحل اصلي علبتين تراها شوي غالية لكن تحمل

وبعدين رح لأي واحد حق رديترات تحس انه فاهم وخله يركب البلف ويعبي الرديتر من العلبتين وريح بالك

وان شاء الله ان هذي حل المشكلة

سوبر VTC

28/08/2009, 03:08 PM

وادي النوم

30/08/2009, 05:33 PM

اخواني الله لايحرمكم الاجر ويجعلكم موفقين ومباركين

لكن للمعلوميه أنا شلت البلف اللي داخل المكينة

هل اعيد تركيبه مع العلم أن المهندس يقول ‘ن ماجاك منها خير ماجاك منها شر

وسلامتكم يااحبابي الكرام

سوبر VTC

31/08/2009, 05:19 AM

انت ما تقدر تحكم على الحرارة حتى تركب البلف
لازم تركبه
اذا كان الماء يدور من و الى المكينه بدون بلف
فان الحرارة لن تستقر :no2:
يصير الانبير مره طالع و مره نازل و ما تطلع بنتيجه واضحه

بن محفوظ

31/08/2009, 11:39 PM

أخوي مثل ما قالوا لك الاخوان :

1- رجع البلف
2- غير موية الرديتر
3- ركب مروحة اضافية بجانب مروحة المكيف الي أمام الرديتر : والمروحة هذي تلقاها عند أي محل مراوح في الصناعية القديمة وركب مرواح عدد الريش فيها كثير .
4- اذا ماتغير عليك شيء رح لابو ابراهيم في صناعية الدائري
5- لاتنسى تدعي لي الله يحفظك تراي تعيبان هههههههههه

وموفق ان شاء الله

طفقان

01/09/2009, 01:58 AM

اخوي شف الاديتر من فوق بلاستيك يمكن انه منشعر صارت معي تراه بلاستيك من عند الغطاء لاتنسانى من الدعاء

أبوعُمر

01/09/2009, 02:09 AM

أخوي الله ييسر أمرك و يوفقك
الحلول واضحة توكل على الله و ابدأ التطبيق

الله يعينك

سوبر VTC

01/09/2009, 02:23 AM

اخوي شف الاديتر من فوق بلاستيك يمكن انه منشعر صارت معي تراه بلاستيك من عند الغطاء لاتنسانى من الدعاء

اذا كانت منشعره الطبله

لازم ينقص الماء :good: