هذا ماحصل لي .. انفجار. غريب ؟ عجيب !! خطييييير ....

[بدوي الحجاز]

اخواني الاعضاء الكرام السلام عليكم ورحمة الله وبركاته .
اليوم بعد صلاة الفجر ذهبت الى مطار الملك عبد العزبز بجدة لاستلام شغالة من مكتب الجوازات وقفت السيارة امام المكتب وعيالي بداخلها والمكيف شغال ونزلت وشوي يمكن خمس دقائق وهم يتصلون علي الحق ....
وجيت للسيارة والله ياجماعة شيء مايخطر على البال اطلاقا انكسر زجاج الباب الخلفي مع صوت مدوي وحالة من البكاء والخوف للصغار . (الحمد لله الحمد لله الحمد لله ) ارجوا من الاخوة التفاعل وابداء الاراء في هذه الحادثة الغريبة .

[سمو الصقر]

الحمد لله على السلامه . والسبب غريب جداً . بحكم أن المكيف شغال المفروض يخفف الضغط داخل السيارة . ولكن عساها دفعت أعظم منها ,,,,,,,,,,,,,,,,,

[راعي الفورت]

الحمد لله على السلامة

طيب وش لقيت حول السيارة

هل هناك مايوحي بضربة قوية أو صدمة ؟

هل تم استخدام ملطف الهواء أو أي معطر داخل السيارة ؟

هل تم اغلاق الزجاج بالخطأ يعني قد يكون الزجاج اغلق للخارج بمعنى إنه خرج من مجراه ؟

مكن نستفيد من هذه الأسئلة لأنها أسباب .

[لعّاب المنايا]

الحمدلله ع السلامه وماتشوفون شر
واتوقع انها جايتها ضربه قبل وضغطت الضربه حتى انفجرت القزازه ..

[بدوي الحجاز]

جزاكم الله خير .. اخواني الكرام الزجاج تكسر من الداخل الى الخارج والسيارة جديدة يوكون 2008 وعندي جالون 10 لتر فيه ماء في الخلف طار غطاه .

[هااااااوي]

الحمدلله على السلامه اخوي ...
ماتشوووف شر ...
غرييييييبه الصراحة
غطاء الجالون صعبه يكسر الزجاج

[صقر باهله]

الحمد لله على السلامة ياخوي

وبصراحة اللي صار شي غريب

وان شاء الله انها دفعة ماهو اعظم

[قمة افرست]

الحمدلله على السلامة وعلى سلامة الي بالسيارة
هذا ماشاء الله من قوة تبريد المكيف مع الرطوبة

الله يعينك على قيمة القزاز وخفف من درجة التبريد بالمرات الجاية

[راعي جيوب]

الحمد لله على سلامتكم أكيد القزازة فيها عيب مصنعي وأحترت من الشمس والسيارة مكتومة فأنفجرت القزازة

[أبـوالبـــراء]

الحمد لله على السلامة أخوي
ولاتستبعد إن قوة إنفجار الجالون السبب
والله أعلم

[عاشق الرفاليو]

الحمد لله علي السلامه لكن هل هناك عطر اوملطف جو@هل هناك ولاعه @ ربما يكون غاز الفريون او المكيف مغشوش؟

[بدوي الحجاز]

الحمدلله على السلامه اخوي ...
ماتشوووف شر ...
غرييييييبه الصراحة
غطاء الجالون صعبه يكسر الزجاج

اخي الهاوي
الجالون في الشنطة يعني الغطاءبعيد ماجاء يم الزجاج

[بدوي الحجاز]

الحمد لله على سلامتكم أكيد القزازة فيها عيب مصنعي وأحترت من الشمس والسيارة مكتومة فأنفجرت القزازة

اخي راعي جيوب
هذا الشي صار حول الساعة 6 صباحا مااشرقت الشمس .

[سحاب2]

اتوقع والعلم عند لله انه جايته ضربه قويه من الخارج او من الداخل

وبسبب المكيف تناثر الزجاج للخارج

[بدوي الحجاز]

اشكر جميع الاخوة على تفاعلهم السريع وجزاكم الله خيرا وبيض الله وجيهكم كلا باسمه .
والله يعين على شراء القزاز . وش توقون كم سعره ؟ من الشركة او من السوق ؟

[هويدي]

الحمدلله على سلامه عيالك

[ابو مقعد511]

يمكن الضغط داخل السياره انا صارلي مثل موقفك انا واخوياي جالسين في الحاره ومانسمنا قزاز الجيب الربع 2008 وماندري والا الصوت يضرب رحنا نشوف والا القزاز الامامي متشط . ونحمد الله على سلامتك انت واهلك

[دار الهوى]

السبب سلمك الله من مراتب السيارة الجلد تكون ممتصه الحرارة من فترة الظهر وذروة الشمس وتفاعلت مع قوه دفع المكيف وبرودة الهواء مما سبب ضغط على زجاج السيارة المغلق فأدت الى كسر زجاجة الباب الخلفي .


تحياتي ، ، ،

[ERIC7]

اهم شي الحمد لله على سلامة اعيالك والباقي يهون

[أبوعبدالله202]

الحمدلله على السلامة
دفعت بلاءإن شاء الله

[لازم966]

أول شي الحمدلله على السلامة
وما راح إلا الشر


أخوي أنصحك وبقوة إذا كنت ما تبي تصلحها في الوكالة أنك تروح تصلحها عند السالم للزجاج اللي في الصناعية القديمة على طريق الخرج القديم ولا تتعداه أبد حتى لو لقيت أرخص منه
وأتوقع والله أعلم انها تبي تكلفك حدود 800 إلى 1000 ريال
ترا شغلهم احترافي ونظيف مره ، خصوصاً ان موترك جديد مشاء الله.

[VXR.2007]

أول شي الحمدلله على السلامة
وما راح إلا الشر



أخوي أنصحك وبقوة إذا كنت ما تبي تصلحها في الوكالة أنك تروح تصلحها عند السالم للزجاج اللي في الصناعية القديمة على طريق الخرج القديم ولا تتعداه أبد حتى لو لقيت أرخص منه
وأتوقع والله أعلم انها تبي تكلفك حدود 800 إلى 1000 ريال
ترا شغلهم احترافي ونظيف مره ، خصوصاً ان موترك جديد مشاء الله.



يا اخوي اهو يقول راح يستلم شغالة من مطار جدة والرجال شكله من جدة


طيب السيارة فيها ضمان اذا كان فيها ضمان ودها الوكالة

[الربذي]

وعليكم السلام الحمد لله على السلامة

وشرا كفيت ...

[روس المزون]

اعتقد انه من قورة الضغط داخل السيارة والمعروف ما ينكسر القزاز من ضغط خفيف يعني ضغط قوي والظاهر ان القزاز مغشوش والله يعينك

[العزوم]

الحمد لله على السلامه

وترى العين حق يمكن شاطفك بواردي مع هالصباح وهونها ربك وصارت بالقزاز

[أبو حمد 77]

الحمد لله على سلامة العيال

[وادي غران]

بعد قراءة الردود ما لقيت سبب منطقي لما حدث سوى العين, والحمد لله أنها جات بالحديد.
حفظك الله وحفظ أهلك ومالك.
معوض خير إن شاء الله

[بدران9]

الحمد لله على السلامة...
شيك على الاستبنه ترا يمكن انها هي السبب..

[عاشق الفرعه]

أقر على الموتر ووده للوكاله

[غربي هواوي]

الحمدلله عالسلامة

اتوقع البلا في الجالون اما انه جديد وفيه مادة من التصنيع او عبيت فيه شيء قبل

وهو اللي سبب هالشيء

[alhajri]

انا اقول يمكن البزران هم اللي كاسرين الجام
وقالوا لك سالفة غير

[هواي الصين]

معليش

انا لا اتهمك بالكذب لكن مافيه ولا سبب منطقي للي ذكرته

وبحسب الظروف اللي ذكرتها

الضغط مستحيل يكون السبب

وانا ما اتهم عيالك

لكن يمكن بسبب شقاوة احدهم كسر القزاز بدون ما يدري

وخافوا يعلمونك

اعتقد هذا سبب منطقي

والسلام

[وادي الصفرا]

الحمد لله على السلامه صارت هذه الحاله مع احد اقاربي وعياله معه في السياره وموترهم جمس صالون جديد وفي ابها بالتحديد وكان الجو بارد جدا ونزل الرجال وخلى العيال في السياره والظاهر واحد من الصغار تعبث بمفتاح تسخين الزجاج الخلفي وماهي الا ثواني ويسمع ذاك الانفجار والحمد لله كان القزاز باقي في مكانه بس متهشم وكان فيه صغار الله يحفظهم بجنب القزاز سلمهم ربي ........... مالك بالطويله
اتوقع هذه هي المشكله وذلك يعتبر عيب في السياره وتصليحها يكون على الوكاله لان جهاز التسخين لم يتدرج في الحراره بالشكل المطلوب لذلك انفجرت الزجاجه
هذا ماحبيت افيدك فيه وتعتبر وجهة نظر ممكن تكون صح وممكن غلط

[الطيف الموادع]

الحمدلله على السلامه اخوي والناس ماتعطي خير العين هي السبب

لاتنسى ان تقرى الاذكار والله يحفضك

[satam1389]

الحمد لله على السلامه

[بدوي الحجاز]

(اللهم لك الحمد حمدا كثيرا طيبا مباركا فيه ملء السموات وملء الارض وملء مابينهما كما ينبغي لوجهك وعظيم سلطانك ) اشكر جميع الاخوة الكرام وأسأل الله الكريم بنور وجهه العظيم الذي ملأ اركان عرشه وفي هذه الليالي المباركات ان يديم عليكم وعلى اولادكم الصحة والعافية . والله اني محتار محتار ولم اجد سببا منطقيا واكيدا لما جرى الا (عين حاسد عساها بعود ) ماذكرت الله مع الصبح . وابشركم ركبت قزاز جديد واصلي بـ400 ريال بعد اني لفيت المحلات كلها .

[علي عليوه]

هذا والله العالم نذير لك إن الشغالة تبي تركز رجلها
لكن لا تعطيها فرصة
وألف حمد لله على سلامتكم ,,,,

[الستانس]

اتوقع والله العالم ان قزاز السيارة كان ممتص حرارة وفوقك كذا رطوبة
وانت وقفت سيارتك في مكان يظرب فيه هواء بارد (مثلا قدام بوابة المطار)
فصار عندك تمدد وانكسرت


والحمد لله على سلامة عيالك

[العبرود1]

الحمدلله على السلامه

[إًلْقَنْإًصْ]

انا اتوقع اخوي انه من الشمس مع الرطوبه وتقبل مروري.

[-الساري-]

الحمد لله على السلامه ،وسلامت العيال ،،،

[البوعينين99]

الحمد لله على السلامه صارت هذه الحاله مع احد اقاربي وعياله معه في السياره وموترهم جمس صالون جديد وفي ابها بالتحديد وكان الجو بارد جدا ونزل الرجال وخلى العيال في السياره والظاهر واحد من الصغار تعبث بمفتاح تسخين الزجاج الخلفي وماهي الا ثواني ويسمع ذاك الانفجار والحمد لله كان القزاز باقي في مكانه بس متهشم وكان فيه صغار الله يحفظهم بجنب القزاز سلمهم ربي ........... مالك بالطويله
اتوقع هذه هي المشكله وذلك يعتبر عيب في السياره وتصليحها يكون على الوكاله لان جهاز التسخين لم يتدرج في الحراره بالشكل المطلوب لذلك انفجرت الزجاجه
هذا ماحبيت افيدك فيه وتعتبر وجهة نظر ممكن تكون صح وممكن غلط

هذا السبب المنطقي الوحيد الي يفسر الي صار.

أو انه يكون واحد من العيال مسوي مصيبه وسكت :D

[الرسيفر]

أنا أخوي معه تاهو 2008 هو اللي فاكه وكالة
الرجال يمشي بالخط ولا له بالشر طريق إلا وذاك الانفجار اللي خلاه يوقف لا شعوري
طبعا ما فيه أحد حوله وإلا كان يقول بفعل فاعل حصاة وإلا بندق مع غشيم المهم وقف ويتلفت وش السالفة ومن اللي سواه بعد شوي عدت الروعة وجلس يناظر ويتأمل خصوصا السيارة جديدة ما مشت ذاك الوقت 10000 واكتشف إن الكسر على برا حمد الله على السلامة وراح لآقرب محل قزاز وركبه بألف وخمسين ريال
والقزازة هي اللي ورا السواق

[غالي]

الحمدلله على السلامه

أخوي انت تنظف القزاز بمويه عاديه او بإدوات تنظيف؟؟؟؟؟؟؟؟


اذا كانت ادوات تنظيف

اتوقع منها

مثلا عندك منظف اليدين الديتول

جاني ايميل انه يكسر القزاز :(

والله اعلم انه من منظف انت تستخدمه

[النيزك الناري]

كلام وادي الصفراء هو اللي يجمد على الشارب وصارت لمدرس عندنا معه يوكن 2004 على وقته يروي لنا حول هالسالفه يقول شغلت التسخين الخلفي وانفجرت القزازه الخلفيه وصلحها على الضمان وتقبلوا مروري مع الاطاله

[رعد الصحراء]

حمدلله على السلامه وهذا أهم شي
الله يحفظ المسلمين من كل شر
للأسف اخي الكريم لا يوجد لدي أي معلومه تفيد بهذه المشكله التي حصلت
’’تـقبل تحياتي’’

[اسطورة الصمت]

الحمدلله على سلامة عيالك

[ع السحيباني]

السلام عليكم
صديق لي حصل له نفس السالفه هذي بسيارة فورد موديل 98 كانت جديده توه مطلعها من الوكاله ومامشت 10000 وبعد تعبية بنزين من محطة على طريق القصيم ومسك الخط الا والقزاز حقت المعاون تنفجر وهو تو ماشي وياقف ويناظر الا القزاز منكسر على برى .
راح لتوكيلات الجزيرة طبعاً السيارة جديده وبالضمان وشيل وحط هو وياهم وبالاخير يجي مدير الصيانة بتوكيلات الجزيرة أوروبي الجنسية ويناظر السيارة ويفكون الديكور حق الباب ويقيسون مكينة القزازة (على شآن يبي يتأكد هي متحركه ولا لأ)وبعدها إعتذر له وركبوا له قزاز جديدة وعلى حساب الشركة وقاله يمكن من عوامل الجو أو عيب مصنع .
هالسالفه انا حاضرها وأذكر الرجال يسولف بها .

[m1m]

سبق أن حصلت معنا قديما .. لكني لا أذكر السيارة بحكم كثرة تغيير السيارات في تلك الفترة حيث ما كانت السيارة تجلس شهرين على بعضهم ..

لكن أذكر السبب هو نسيان إغلاق مفتاح الضباب .. واحترت القزازة وانفجرت وربما انت صادفت أيضا طلوع الشمس

[aooa]

اتذكر ان فيه واحد في احدى المنتديات قد ذكر لنا قصه مشابهه عن يوكن على ما اعتقد 2007


يقول كان في البايكه داخل البيت وعند اقتراب وقت صلاة الفجر سمعنا انفجار كبير داخل البيت وعند خروجنا للتاكد وجدنا اليوكن بدون قزاز قد تناثرت بالقرب منه وكان السبب هو خروج الايرباقات الموجوده بالسياره فجأه والسياره واقفه داخل البيت وليست شغاله ....


لذلك نتوقع ان يكون هناك ايرباق قد انفجر داخل السياره ولكنه لم يخرج فقط الغاز


تاكد من ذلك لربما يكون السبب