تلاعب محطات البنزين وتفننهم بسرقة الزبائن

[ابو متعب 100]

السلام عليكم ورحمة الله وبركاته

ما عرفت وين اضع هالمشاركه, قلت منتدى السيارات يمكن يكون احسن مكان. ايضاُ لاحظت ان زواره اكثر, لذا وضعتها هنا. المعذره ان كان المكان غير مناسب.

اخواني هذي مشاركه ابي انبهكم فيها عن تلاعب محطات البنزين وتفننهم بسرقة الزبائن. حصل لي هالموقف اربع مرات. مرتين في محطة العتش على طريق القصيم الرياض السريع حوالي 110 كم من الرياض, ومرتين في محطة الشرق الأوسط على طريق الرياض الدمام حوالي 80 كم من الرياض.

اللي حصل لي اول مره في محطة الشرق الأوسط اني عبيت بنزين وعطيت العامل 500 ريال. رجع لي العامل باقي الميه من رصت عملات صغيره وادخل الرصه باحد جيوبه. ومن جيب ثانيه اطلع رصة دراهم فأة 100 وفأة 50 وعد لي 400 ريال فأه 100 وانا كنت اراقبه. جيت ابي ادخل الدراهم بجيبي بس ما ادري ليش ناظرت الدراهم مره ثانيه ويوم جيت ابي اعدهن واذاهو وبسرعة البرق يمد لي ورقتين من فأة ال50.

استغربت من تصرفه سالته ورد يقول اني اصلاً ناوي اعطيك الرد بهالطريقه. طبعاً زعلت وحسيت انه كان ناوي سرقة الميه لو اني مشيت بدون عد الدراهم.

بعد مده قد تكون شهرين, ثلاثه او اكثر ما ادري بالضبط, وقفت ايضاً في نفس المطه ووقتها كنت ناسي اللي صار لي من قبل. وبالصدفه ايضاُ عطيت العامل, ولا اذكر ان كان نفس الأول او واحد ثاتي, عطيته 500 ريال. طبعاُ حصل لي نفس السيناريو واثناء ماهو يعد الدراهم ذكرت موقفي الأول وركزت عيوني على يديه وهو يع واحد, اثنيت, ثلاثه, اربعه وعطاني ال اربع ميه. ايضاُ كنت واثق انها اربع ميه لكن قلت ياولد وش يضر لو عديت. وطبعاُ مثل لمح البصر مد لي الخمسينتسن. عندها تيقنت انها لعبه يلعبونها علي الزبائن. وقفت السياره وفيها عيالي على جنب وجيت اهوش وازبد. مااطول عليكم وعود اهل المحطه والترجي تركتهم وقررت ما اوقب بالمحكه بعد اليوم.

قبل اربع اشهر تقريباُ وقفت بمحطة العتش اعبي بنزين. وحصل لي نفس السيناريو بالحرف الواحد. وقفت السياره وجيت ازبد واهوش. اكتشفت ان المطه ماسكها واحد يماني يقولون اسمه حسن ابو عبد الله. اخذت تلفونه من عامل البقاله, واحد سوداني, وبالطريق الى الرياض كلمته وشرحت له تلاعب العمال وسرقتهم للزبائن. طلبت منه يسوي شيء مع العمال وعلى الأقل يضع لوحه او لوحات تحذيريه امام الزبائن اثناء تعبأة البنزين تحذرهم وتحضهم على عد النقود قبل مغادرة المحطه. قلت له انا ماراح اعمل شيء الا بعد شهرين على الأقل للأعطائك مهله تضع اللوحات.

الأسبوع الماضي وانا جاي من القصيم ومعي الأهل, قررت اني ما اعبي بانزين الا بالعتش على شان اشوف اليماني سوى شيء والا لأ. دورت اللوحات, مافيه شي ابد, يعني ابو عبد الله ماجاب خبر, قلت اشوف العمال يمكن تغيرو. طبعا انا وزوجتي هالمره مركزين على حركاتهم. انا وضعت 500 ريال بيدي على الدركسون على شان يشوفها العامل ويجهز حاله. لعل اللي كان يعبي لي البنزين يمكن ناهو جيد بالحركه لذا جا واحد ومن ثم واحد ثالث. الأخير طبعاُ كمل الصب ومن ثم النصب. اكيد عرفتو انه طبعاُ تكررت العمليه بنفس الصيغه, يعطيكيك اولاُ بقية الميه, ثم يعد 400 ثم وبلمح, البصر لو حاولت تعدهن, يعطيخ خمسينتين.

عندها ايقنت انها ليست عمليه نصب مقتصره علي هالمحطتين بل اجزم انها تحدث في اي محطه بالمملكه او الخليج وربما الوطن العربي وغيره. لذا جرى النصح والتنبيه. أرجو من الجميع مقاطعة المحطتين وخصوصاُ العتش لأن المستأجر لامبالي. كما ارجو نشر هذه المشاركه في اكبر عدد من المنتديات لكي يستفيد منها العدد الأكبر.

هناك دواعي قد تكون اخطر من مجرد ان الواحد سرق منه 100 ريال. تصوروا يا اخوان لو ان واحد اخذ ال 300 معتقداُ انها 400 ووضعها في جيبه وعندما وصل البيت علق ثوبه ونام. عند ماقام وراح للبقاله يجيب حاجه اكتشف ان 100 ناقصه. هل تعتقدون انه سوف يعرف ان السرقه تمت في المحطه, او انه سيتهم ابنه, زوجته, الشغاله ....الخ. ماذا تعتقدون قديحصل؟

حمانا الله واياكم من شرور هذه الشرذمه الفاسده, وكل عام وانتم بخير

[نحال الجبال]

الله يجزاك خير على النصيحه ويجب على كل واحد يعد فلوسه قبل ما يتحرك ترها ما تاخذ وقت وتقيه النصب والاحتيال فى كل شى

[عـــرادي]

ابو متعب 100
بيض الله وجهك يالغالي
وهذا ما يدل الا على حرصك على اخوانك المسلمين
واخذ الحذر واجب في جميع الاحوال
الف الف شكر

[روزفلت]

يعطيك عافيه وكلام سلييم
انا تحصل لي الحركه هذي خارج السعوديه وخصوصا محلات الصرافه

[الوتر الحزين]

الله يعافيك اخوي على تنبيهك
فعلا المحطات فيها تلاعب منها انه يعطيك بدل الميتين يوم كانت فئه واحده يعطيك ميه

الله يكفينا شر من به شر

[ابن دهيمان]

انا اعطيه بالريال
ههههههه

لا وفي البقالات يسون نفس الحركة وفيه حركة ثانية

تشتري مثلآ بـ 2.50 يقول ما فيه نص خذ علك وهو نصاب بس بيمشي العلوك الي عنده..

[مكشاتي كوكتيل]

جزاك الله خير. الحركة هذي تتكرر في الكثير من المحطات خاصةً اللي على الخطوط السريعة لأنه متأكد إنك ماراح ترجع له لو اكتشفت الخطأ بعد فترة.

لكن ماشاء الله عليك ماعندك إلا 500 المفروض اسمك: ابو متعب 500 :)

[سلومي سار]

الله يجزاك خير على حرصك ونعم الانتباه لابد منه لا تاخذ فلوسك وتحطها بمخباك طوالي عد فلوسك اول هي لك والامانه موجوده بس الحرص واجب ((( العامل يوم يجي من بلده يفكر في الفقر الي هو عايش به ويبي الغنا باي طريقه ما همه لا حلال ولا حرام )))

[naharyfa]

جزاك الله خير للتنبيه

[أبوحمد 505]

جزالك الله خير
بس الغلط الأول والأخير من راعي الفلوس المفروض يعد فلوسة قبل يمشي
ولا هو في محطة البنزين فقط حتى في الأسواق والمحلات

[آل زايد502]

يعطيك الف عافيه يالذيب وماقصرت على النصيحه

[MماونشيM]

جزاك الله خير على التوضيح

[Abu Saad]

شكرا على التنبيه ولاتنسى انهم ماكلينا من مبطي ولايزالون بتغيير(طمس) ارقام التسعيرة .

[ابو شهد]

جزاك الله خير
على التنبيه وانا اشوفهم يسوون هالحركات بس ياغافلين لنا الله

الله حسيبهم ولا يجزاهم خير
واما محطة العتش والله ياهي ام الاجرام بالاسعار دبل وثري

[shaheenshah]

جزاك الله خير على التنبيه
عن نفسي ما اعطيه الفلوس الا بعد ما يعبي واشوف المكينة بنفسي واذا رجع لي الباقي ما تدخل مخباتي الا لما أعدها
وحتى في البقالات والمحلات الباقي لازم اعد الفلوس قبل ما احطها بمخباتي
والمؤمن كيس فطن

[موسم النزل]

اذا انت من اللي يعبون السيارة فل , شف الفلوس كم بالظبط , ولا تنسى تلاحظ عداد الليتر اللي بالشيشة حقت البنزين , وراح تكتشف انة جميع المحطات فيها تلاعب.

[الصمان 2]

جزاك الله خير على التوضيح .


.

[فارس البيد]

جزاك الله خير على التنبيه الخطيرررررررررررر

مشكور وما قصرت

[البرحه]

جزاك الله خير

صدقت صارت لي مره

[عاشق الفرعه]

جزاك الله خير على النصيحه وال10 تفك أزمه

[ولد وايل]

وحركة العداد يبدا من خمسه ريال مو مصفر

كل مره لهم حركه

[@قرناص@]

السلام عليكم ورحمة الله وبركاته
وعليكم السلام ورحمة الله وبركاته

هل تعتقدون انه سوف يعرف ان السرقه تمت في المحطه, او انه سيتهم ابنه, زوجته, الشغاله ....الخ. ماذا تعتقدون قديحصل؟
هنا المشكله الاكبر ،، ومشكور على التنبيه
حمانا الله واياكم من شرور هذه الشرذمه الفاسده, وكل عام وانتم بخير

امين واياك وانت بالف خير ،،



بيض الله وجهك والحقيقه لازم الواحد يعد دراهمه قبل لايطلع من المحطه ،،

والله يعيننا جميع ،

[أمير بطيبتي]

جزاك الله خير
والمفروض نعد فلوسنا لو اشترينا اي شي
مو بس البنزين

[بن قاسم 1]

الله يجزاك خير

[محمد الشتوي]

هناك ايضا حره أخرى
وهو ان العامل يعبي السيارة مثلاً :
السيارة الفل حقها 30 ريال .
ووقف التعبئة عند 29 ريال تقاه يعبي يعبي حتى تصل الى 29.70 ريال يعني باقي 30 هلله يقول ما فيه هلل
طبعا هو يبي ال 30 هلله وتخيل كم زبون يمر عليه بنفس الحركة يوميا ؟؟؟؟؟؟

طبعا انا فطنت لهذ الحركة واعطيه 70 هلل خخخخخخخخخخخخخخخخخ
الزم ما علي لا يضحك علي البقالي ..
حبيت التنويه فقط

[محمد بن سعيد]

جزاك الله خير على النصيحة

[قناس هدد 676]

جزاك الله خير

[جـرح الشمـال]

جزاك الله خير
ومشكووور على التنبيه

[ابو متعب 100]

الشكر للجميع على ابداء الرأي.

هل ممكن يا اخوان تنشرون هالمشاركه في منتديات اخرى؟ الواحد بهالشهر الفضيل يدور الأجر اينما كان وهذي والله فرصه.

على الأقل ياليت احد يعلمني عن المنتديات اللي ممكن تنشر فيها؟

[كاشت وحداني]

الله يجزاك خير

وعلى طاري الغش والنصب في المحطات
اقترح لو يتم وضع قسم خاص بالمنتدى
اي محطه يتم فيها طمس التسعيره وكتابتها بالطامس او تلاعب في ارجاع الباقي او تلاعب في تصفير العداد
يتم وضعها في هالقسم
اسم المحطه والمدينه والشارع والحي وكلش عنها
حتى يرتدعون ملاكها وينبهون على العماله بعدم التلاعب

[مقلع الرمث]

شكرا بيض الله وجهك على النصائح وانا اصلا من الحريصين على العد لاني لا اثق باحد وهالوقت هذا لو تاخذ من اخوك فلوس عدها مو عاد بنقالي بمحطه والسلام عليكم

[براد نجد]

بيض الله وجهك ورحم الله ولديك عن النار عز الله انها صارت معي في نفس المحطة أكثر من مرة ( أنتبهوووووا ياجماعة من عمال المحطات)0000 وكل عام وانتم بخير00

[nhn]

لكن ماشاء الله عليك ماعندك إلا 500 المفروض اسمك: ابو متعب 500 :)
:D :D :D :D :D :D :D

[KASHTAT]

وبعضهم مايخليك توقف جنب الطرمبة يقول لك صديق قدام قدام علشان ماتشوف العداد وتعرف ربعنا عجازين.

[MIDDLE EAST]

جزاك الله خير والله يعطيك العافيه

[MIDDLE EAST]

لاحول ولا قوة الا بالله العلي العظيم جزاك الله خير اخوي ودائما تحدث مشاكل عند المحطات نسأل الله السلامه

[ابو متعب 100]

بيض الله وجهك ورحم الله ولديك عن النار عز الله انها صارت معي في نفس المحطة أكثر من مرة ( أنتبهوووووا ياجماعة من عمال المحطات)0000 وكل عام وانتم بخير00


الأخ براد نجد, ما ادري هل حصلت لك بنفس الطريقه اللي حصلت معي؟

[لاح البرق]

السلام عليكم
مشكور أخوي عالتنبيه و اليوم بصراحه صارت السرقات بشكل غريب و غير متوقع و الحركه هذي يسوونها اكثر بالخطوط السريعه لأنهم يعرفون أن الواحد مستعجل و يبي يمشي و لكن الأدهى من ذلك أنهم يردون الباقي فلوس مزوره و قد صارت لي لكن الحمدلله اكتشفتها و كانت فئة خمسين ريال و يوم مسكتها بيدي لاحظت أنها غير طبيعيه و يوم طابقتها مع خمسين كانت معي لقيت الاختلاف بالحجم شيء لايذكر ورديتها له وماتكلم بحرف واحد والشاهد أن الغش الضحك موجود وبكثره...
وتقبلو مروري

[براد نجد]

الأخ براد نجد, ما ادري هل حصلت لك بنفس الطريقه اللي حصلت معي؟
عزا الله يا أبو متعب انها صايرة معي أكثر من مرة في نفس محطة العتش وانا الحمد لله بها الأمور منتبة عليها00

[**ابوعمر**]

صدقت يابو متعب مرّه حصلت لي على خط الشرقيه وبالتحديد في محطة ابو هيثم واخذمني ميه ولا دريت الا بعد مارحت البيت المهم وبعد مده يمكن سبوعين واروح لروضة الخريم وبالطريق اجي للمحطه وأمسك الهندي من يوم ماشافني وهو خايف المهم واجيه قلت جب فلوسي اهو قالك يصرّف قال لي كم؟ قلت انت اخبر جب ميه راح يفتّح دفتر معه المهم شوي ويعطيني الميه قلت له والله انك نصاب

[abo_hoor]

لك الف شكر على النصيحه والله يجزاك خير يالغالي

[سلطان الغدرا]

الله يجزاك خير ويجعلها في موازين حسناتك

[rolze]

بيض الله وجهك يالغالي

[احساس الصمت]

جزاك الله خيراَ على تنبيهك لإخوانك المسســــلميـــن

[big boss]

حسبي الله ونعم الوكيل
قد صارت لي وانتبهت له لانه كان واقف الغبي قدامي ولا راح كان يمثل انه كان شاك في نفسه بالعد الفلوس وعديت الفلوس ورجعهن لي على طول بدون ما اعرف الناقص كم


ومره في محطه بالرياض اول محطه تجيك على طريق القصيم عند جمعيه الهلال الاحمر كان عامل المحطه يجي لمي ويقول هذا زيون حرامي راح ولا عطاني الفلوس وسئلته كم قال 20 ريال ولا انتبهت له الا بعد اسبوع ويقول نفس المسرحيه ولاكثر من مره عشان يسرق الفلوس بخبث نيته واستغلال للطيبة الناس


ولا ننسى سالفه الهلل يعبي ويترك كم هلله وياخذ عليك ريال
وبهذه الطريقه على بالهم العمال يضحكون علينا ويقول مافي هلل
وتروح عليك وتنجبر ريال وينخصم الهلل على المحطه ويدخل بجيب العامل

[المغترب292]

يعطيك العافية ابو متعب
والله كفو
العمالة هذول يضحكوا علينا في كل شي لان احنا دايم مستعجلين الواحد يبغى يعبي ويمشي على مشواره
والى يشتري ويطلع بسرعه الله يفكنا منهم انشاءالله

[غارب النملة]

وعليكم السلام

وضعتها ب3منتديات مشهورة

ماعليش بنا على طلبك قاهرتني السالفة

[ابو متعب 100]

وعليكم السلام

وضعتها ب3منتديات مشهورة

ماعليش بنا على طلبك قاهرتني السالفة


مشكور وجزاك الله خير,بس ياليت تذكر لنا هالمنتديات حتى نشوف كيف تجاوب الناس هناك.

ابو متعب 100

[STEVENS]

انا صارت معي بطريقه اخبث من طريقتك
كنت قاعد اعبي عند محطة الحجاز اللي قبل تفتيش القديه وانت نازل من الرياض على سريع الحجاز
عبيت فل بحوالي 72 تقريبا وعطيته 500 ريال قام البنقالي ورجع لي 28 ريال يعني باقي الـ100 ريال
يعني بيزرفني بـ400 ريال وانا امشي يمكن 5 متر واناظر الفلوس قبل ادخلها جيبي والى ناقص 400 واريوس وهو يطلع لي 400 بدون مااكلمه وقبل مافتح افمي معه خذت الدراهم وتفلت بوجهه وسفلت فيه ولعنت سقافه
انتبهوامن محطة الحجاز

[امبراطوور]

العماله ذولا حراميه
ودك لو يسفرونهم لبلادهم ونفتك من المشاكل

[البوعينين99]

الله يجزيك كل خير على التنبيه
تصدق ترى حتى البقالات تصير فيها هالحركه

[مهاجر161]

اشكرك اخوي على التنويه .. وانا بعد قد حصلت لعبة عمال .. ولكن كذا .. اللي حصل قام احد العمال في محطة شوية على طريق الصمان بالتعبئة ولم يقم بتصفير العداد وبالطبع يزيد المبلغ ..ولكن انا اعرف مقياس سيارتي كم تاخذ وكم تستهلك وعندما هاوشته قال صديق انا مافيه معلوم ممكن صديق غلطان .. والحركة الثانية دايم يقولك عامل المحطة صديق شويا قدام علشان ماتشوف العداد .. ويلعب لعبته .. ارجو الحذر من العماله .. حسبي الله على كل ظالم لايخاف الله ..تحياتي للجميع مهاجر161

[سعد777]

الرجال المقرش والي مايحسب للريال ويصرف الـ 500 كانها ريال
صدقني مايهمه
اما نحن اللي نعتمد على رواتبنا و100 الريال آخر الشهر نعد معه 100 مره

وشااااااااااكر لك

[بدر الوسمي]

يعطيك العافية ابو متعب

[حرعلى كف صقار]

جزاك الله خير

[التعـ King ـديل]

الله يجزاك خير على التنبيه ..

[أبو عابد2000]

الله يجزاك خير يالغالي على هالتنبيه .

[CARL ZEISS]

لا تعدى الطرمبه ...

و الغبن و الاستغفال شين

[راعي سمنان]

بارك الله فيك اخوي ابو متعب 100 ..... الحمد لله اذا بقى ربع التانكي عبيت فل بـ 20 ريال ولا ياخذ غيرهن معزولات على جنب بالبوك اسميهن حقات البنزين :d زي ريال الفسحه :d حق العيال الله يصلحهم

[مرامر]

أولاً مشكور ابو متعب 100 على هالتحذير, نعم والله ضحك على الذقون.على فكره ترى هذي منتشره خصوصاُ على الطرق السريعه.


المفروض اننا نقاطع المحطات اللي تتكرر فيها هالحركه ونبين لأهل المحطه اننا نبي نقاطع اذا ما شافوا لهم حل لها. وانا اوافق ابو متعب 100 الرأي بان ابسط حل هو وضع لافتات كبيره واضحه للعيان تنبه الزبائن الى عد دراهمهم قبل مغادرة المحطه.


--------------------------------
----------------------
--------------

[الدبل الثقيل]

جزاك الله خير على التنبيه

[الرهيب2000]

جزاك الله خير يا بو متعب
انا نصب علي في محطة القصيم اللي بعد جسر بريده وعنيزه اعتقد الحمرا اسمها وقفت السياره والتانكي الثاني فيه تقريبا اكثر من النص وقلتله عب فل وتركت السياره ورحت للبقاله يوم جيت قالي صديق 55ريال
قلت وشلون 55 يا نصاب انا اعبي فل والتانكي مصفر ما يتعدى 57 بأي حال 0وانا اروح للبقاله واتكلم مع اليماني وين المسؤل عن المحطه قالي وشتبغى قلتله السالفه قالي شوي ويدورون واحد الاوهو داخل علينا
قلتله السالفه ويروح معي ويسأل الهندي قال 55 قلتله التانكي يانصاب فيه نصه
قال اليماني شوف انت متأكد لاتظلم العامل قلت تقول هالكلام رح لا بارك الله فيك ولا بهنديك خذ فلوسك
الله لا يربحكم والله يا جماعة الخير انه راح له وساله بس ولا كلمه زود ولا شدمعه ولا شي كأنه عنده خبر
بس انتبهوا يا جماعه اذا بغيتو تعبون شوفو العداد قبل يبدا
وتقبل الله منا ومنكم صيامكم وقيامكم وكل عام وانتم بخير

[وليد العاطفه]

يعطيك العافيه اخوي على التنبيه وحرصا على اخوانك تحياتي

[محب الخيال]

نعم وانا معاك صحيح انا سيارتي تيوتا هيلوكس2008 احد المحطات علي طريق الرياض الدمام السريع سيارتي كان فيه ربع وانا افللها اذكانت مصفره حمسه وثلاثين تقربن الوكد وصالت المحطه وفيه ربع رحت البقاله رجعت قالي خمسين ريال شلون صديق ؟؟؟؟والله مدريوين المسولين والله ماعطيته اي ريال وتالت علي الدوريات وجو

[الهواوي]

بيض الله وجهك

[ابولولو]

السلام عليكم
ومن المقبولين وعيد سعيد وفرح وسعاده للجميع وصاحب الموضوع
اخواني تذكرت موقف صارلي وانا كاشت ومعي جد العيال وبعض الاخوان قبل 3سنوات علي طريق القصيم وقبل مفرق الحفر اذا ماني ناسي حركه جديد والي الان يطبقونه المهم دخلت المحطه وقفت اعبي ومن الله قمت اراقب العامل من خلف التظليله يوم جي يعبي ضرب وطلع صوت حقت التصفير يعني اللسان كانه صفر والعاده يحطون باقي 10ريال ببعض المكاين ويحطك بجنبه ويوم شفت الحركه بشواني عبه 10عشره ريال وعلي طوال انزل ووقف المكينه وامسك العامل واقوله ليش هذي الحركه قال ايش فيه ينفخ والله يااخوان مسكته وينزل الخال قال وراك عليه قلتله يسرق ويغش بالبنزين قال عليك فيه الحمدلله مامديت يدي عليه طلبنا راعي المحطه بالجوال وقلتله السالفه قال عاملي كويس مايسرق قلت اجل الشرطه نبلغه وجت قالت وش السالفه علمته وراعي المحطه يوم شاف الجد تغير وغير اسلوبه بالكلام قلت هين الوعد ابوزعبل معي واحد من الاخوان ضابط وتابع القضيه مع العسكري الزبده اننا نغفل ونتساهل ونثق بالعمال الي متي الغفله والنوم الله المستعان وشكرا للجميع وتقبل منكم الصيام والقيام وعيد سعيد وفرح دائم

[مرامر]

الله يجزاك خير

وعلى طاري الغش والنصب في المحطات
اقترح لو يتم وضع قسم خاص بالمنتدى
اي محطه يتم فيها طمس التسعيره وكتابتها بالطامس او تلاعب في ارجاع الباقي او تلاعب في تصفير العداد
يتم وضعها في هالقسم
اسم المحطه والمدينه والشارع والحي وكلش عنها
حتى يرتدعون ملاكها وينبهون على العماله بعدم التلاعب

كلام سليم كاشت وحداني. والله ما يرتدعون اذا ما شافوا اننا وراهم وراهم او على الأقل مقاطعتهم. وانا اعتقد ان المقاطعه هي اقوى وسيله, ويا كثر المحطات وبدال الوحده عشر.


--

[سعودي اول]

يقوووووووووووول المثل

الماااااااااااال الساااااااااااااااااايب ........... يعلم السرقة

وشكرا على التنبية