راح البر الأول.. انفجار يكشف المستور!

[حفرلوجيا]

سلام يامكشاتيين

شلل الاستراحات او الشبة أو الجمعات ( المحترمة ) تجدهم مجموعة متجانسين ومتآلفين , ولا تخلو الشلل من أن ينضم لهم بين وقت وآخر عضو جديد فيصبح منهم.

شلة الكشتات الذين يسعدني الانتظام معهم يجمعهم رابط أنهم ( مفطومين على الشيح والقيصوم) , ولو مضت المربعانية ماكشتوا, انحاس واحدهم وما هي بعيدة من تأثير الإدمان تلقاه مسيان بطرف الديرة شاب ضويته وعليها دلته ويفرك جبهته بالعشب , ويعزى له يشم هواء ويثغي..من النشوة.:)

قدر الله الصيف الماضي وانتظم معنا ( أحدهم ) , تحتار أمامه , ففي حواراته ( يدربي ) الكلام ويصفصفه بما يضفي عليه هالة وحجة .. فلا تتجرأ أن تتورط معه في التمادي بالنقاش ..

* فلو كان الحديث عن الجي بي إس ( وش أنت ياللي صممت خرائط الصحراء ) :eek:, ماهو لأنه يعرف , كلا وألف حاشا أن يتعب فكره بهذه النتف البسيطة , إذ أن الجي بي إس على قولته وهو يشير لراسه ( بهالكور ) !.:(

* اما الخرايط فـ مخليها للي رايحين في خرايطها .. فـ مالها داعي مادام الارض خابرها حصاة بوسط شغية ,, ويضحك باستمرار مما يسمعه عن اللي يضيعون بالبر ويكفي أن تعرف ( حسب روايته يقول > كنت مرة مع ربعي بالصمان ضيعوا بالليل والجو غيم وأنا نيم .. ( طلع شعر ياولد) :p يوم تدبسوا ويصحوني , وأشوف والا ماحولك نجوم وأنزل من السيارة ( واكحش ) من التراب بايدي , وأفركه , وأفركه , وعرفت الأرض اللي حنا فيها , ووجهتهم الوجهة الصحيحة ورجعت نمت بالسيارة , يوم وصلنا الديرة قعدوا الزقرت ساعة يحبون خشمي , قلت لهم مايبي لها حب خشوم , هذي وهايب من الله , ولا أنا جاحدها عنكم ).:looney:

* ولو كان الكلام عن الطوالع والنجوم فـ العجيري والزعاق مايقايشون معه. أما المقناص والشعر , فـ مرحوم يالحويفي .. ( وهايب من الله ).:eek:

باختصار مهما أوتيت من معرفة فأنت لن تستطيع أن تتورط أمام من سفط ( العلوم ) تحت إبطه , أنت أمام
أبو حمد = ( خبير بري ) .

بمربعانية العام الماضي كنا وسط الأسبوع اتصل علي ( ابو لطيفة ) زعيمنا بالاستراحة طالب الشلة يحضرون ذاك الليل وبسرعة!.

قلت بالمكالمة وقتها : اليوم ما هو موعد جمعتكم . رد : أسرع , تعال , الذيب بالقليب!.

هاه يالربع عسى جمعة خير : روعتونا , ظنينا الاستراحة احترقت أو الحارس مقتول !:(

الأمر أكبر من هذا ..الخبير ابو حمد .. ترى تماست الحبال ونبي نتورط قدامه ونتفشل .

عطوني السالفة باختصار وش اللي صاير؟:(

------------------------------ يتبع

[أيمن]

بتستاثم يا أبو سليمان في الضعيّف محاكيك إذا ما حطيت ردك التكملة عَجِل ..
ورم اصبعي وانا أضغط على F5 ما جا شي :D ..
تسلم والله يا أبو سليمان هالسرد الرائع، وأنا مبتهج لأننا مع قصة وعبر جديدة يسردها لنا حبيبنا أبو سليمان، سلمه الله من كل مكروه ..

تحيتي

[حفرلوجيا]

سلامة اصيبعاتك يابو حمد , تصدق النت عندي جاها بلا , وهذا اللي خلاني اطق اللطمة وانصى المقهى اللي بالحارة , بس المشكلة حنا متأخرين , لكن استلم الجزء الثاني , أما اللي ( ببالك) ;) فاسمح لي إذا رجعت البيت وصلحت كمبيوتري , لأن ( الشغل ) يبي له رواق;)
-------------------------- الجزء الثاني ( قبل الأخير)

خبير البر مقترح علينا كشتة ويقول مانبي كشتة خميس وجمعة اللي يسميها ( طلعات بسكوت ) ومصر على ( كشتة مفطحة) , يبينا نأخذ اجازات من شغلنا وحريمنا وعيالنا ولا نرجع حسب كلامه إلا شعورنا مثل ربطات اسيام الحديد وإذا حكيتها طاح منها جذوع رمث وكنكري.

طيب حدد لكم مكان المكشات ؟
رد ابو لطيفة : اقترحت عليه روضة التنهاة وعلمته انك كبير بعيوننا ولا يناسبك إلا شي ملكي, ولا أيدني لكنه ماعارض .

استمرينا إلى قريب الفجر وتمخضت تلك القمة الطارئة عن القرارات التالية :

1- خبير البر هذا من الأنسب نختار له روضة حسناء بالصمان , على اعتبار لها وقع خاص عند راعين مقناص أول يوم الصقور تطرح حباري بالأجوال ( ايه صقور أول اللي ماهي هجين كانت تراجل الحباري مراجل ) :)

2- يوم الثلاثاء يتقدمنا لتجهيز المكان هناك أصغر اثنين من الشلة بعد مايستاذنون من عملهم أو يفصلون ( قلعة الوظيفة , كلها كم سنة وتتقاعد لكن فشلتنا مع الخبير تلحقنا تالي العمر).:(

3- وصينا هالأثنين مايشيلون الخيام مثل كل مرة .. ويستاجرون بيت شعر مع درزن عمال يشدونه هناك ولا يجي صباح الاربعاء إلا انتم طالبين الفزعة من أكبر الشيبان بالصمان وتقولون له : داخلين على الله ثم عليك تعال شف بيت الشعر إذا لك عليه منقود.:(

4- يوم الاربعاء مسيان نطلع بالسيارة الثانية ويكون معنا الخبير , وقالوا خلك السواق حيث انك دليلة بالسفلت .. قلت أنا حدي بعد ماتعدى عرق جهام , بعدها طرفوا لي القارمن , ولا تغزونه قدامي , يعني يكون مع واحد منكم بمرتبة ورى , وإذا لاحظ إنى قربت أدخل الأثل وأضيع الجادة ينغزني ويقول :
( شف السعلو وش هو مسوي باصداره الأخير .. أو.. شف الألوان اللي حاطها ابو عبد العزيز )
وإذا شفتني مضيع بالمرة قل :
(أنا أشهد إنك سعلو يابو عبدالعزيز ) .. المهم لاتخلون الرجال يحس اننا حقين خرايط وجي بي اس.:(

5- اللاسلكيات واريالها تكون تحت المراتب واللي وده يدور ربعه وينشد عن علوم البر او يبي يتسلى بعد مانكون بحسناء ( ينقلع ) بالسيارة بعيد لا يسمع الخبير من بعض الملقف شي يكدره .:mad:

6- توزعون المهام بكل دقة ويكون الأمير ابو لطيفة , واللي يخطي قدام الخبير البري , ترى يرجع للديرة رجلية ( مافيه رحمة ).:mad:

أول ليلة كانت الأمور تمام والقدر الكاتم بعد صلاة العشاء يدهر, أمرنا ابو لطيفه نتطرف شوي نجهز الفطور , هذا خبير ويمكن يقوم قبل صلاة الفجر فيكون كل شي جاهز.:(

وعلى إعتبار إن الخبير هو الوحيد اللي ماعنده شغل ذيك الليلة قال ابو لطيفة (بحياء) للخبير : انتبه للكاتم .

ورغم إن أبو لطيفة كان الأمير ألحقناه التنقد والشماتة .. اللحين وش لون تتجرأ وتطلب منه هالطلب وتحطه أمام القدر, هذا خبير ماهو مثلنا :(, اللحين يلاحظ شي غلط حنا ماعرفناه .. و...

دييي , تششش , طخخخ ,,, ياجماعة وش هالإنفجار ؟
----------------------------- يتبع

[ذيب مجيرة]

يا ويلك من صهاد الظالمين

ابك انت خليتنا عقب ما قطرت السعبولة من ها الخبير وقدره الكاتم

ايه والله من خبير ياكتررررررررررررررررررررهم عندنا وعندك خير

وكله يهون ولا يصير معك اكثر من دليلة والا الحوسه ويزعلون من القارمن الى شغل

البر راح مع اهله وشيابه الا كل شغلهم تكاااااااااز بلا عمال بلا هم

عجل علينا يا لوجيا تراك اسرفت فينا

عوووووووووووو

[ابو شكاع]

هههههههههههههههه

يهالخبير اللي صايرن تقل بسرة برحية من هكاللي ينشبن بالحلق ما يدفعه ولا وايت ماء

اما اللي يبي يخابر بالكنوود يبعد هذي شي

ننتظر وش صار عليكم مع هالخبير

تسلم

[راع الكحيلة]

يا هنيكم به
تصدق انكم حظيظين بذا الدليلة

لانكم بتضحكون عليه ضحك لين تفقع بطونكم.. وواضح انكم ما خذينه معكم للضحك :)

يا خوك أنا احب ها النوعيات تكون معك في بعض الرحلات .. تدري ليه؟؟؟

حق المقالب :D :D

هذا بتشبع وانت تخطط له مقالب.

يقول الخبير:
===========================================
يوم تدبسوا ويصحوني , وأشوف والا ماحولك نجوم وأنزل من السيارة ( واكحش )
من التراب بايدي , وأفركه , وأفركه , وعرفت الأرض اللي حنا فيها , ووجهتهم
الوجهة الصحيحة ورجعت نمت بالسيارة , يوم وصلنا الديرة قعدوا الزقرت ساعة
يحبون خشمي , قلت لهم مايبي لها حب خشوم , هذي وهايب من الله , ولا أنا جاحدها عنكم ).
===========================================
والله انها قوية بالحيل جدا

يقول انه حدد المكان من من فركه لترابه وصحيح إن فيه أدلاّء كانوا يعرفون الارض من تربتها ومن لونها...لكن المصيبة وشلون وجههم الوجهه الصحيحة وهو لا يدري وين الشمال ووين الجنوب ما هو يقول ان الجو غيم وكان نيم لكن الظاهر إن النهار والليل عنده سيم سيم

طيب خوفك ينزل يوم من السيارة بليل مظلم ويفرك له شي مِروِح بالحيل :D

... يا ترى وين بيوجه ربعه عقبها

[سنتافي]

السلام عليكم ورحمة الله وبركاته
الظاهر خويك عنده سونار بري بجبهتهhttp://www.ezboard.com/images/emoticons/roll.gif

http://www.mekshat.com/pix/upload/images5/mk8041_1121.JPG

[المترو]

والله اني طحت من الكرسي من الضحك الله يغربل شيطانك عيالي يقولون عسى ماشر

انهبل الرجال اجل يفرك الارض ويعرف الوجهه

ابي اتوقع سبب الانفجار تلقا هالخبير سد الكاتم من زود الخبره يحسبه مشقوق القدر

بأنتظار الباقي على احر من الجمر اللي تحت قدر الخبير

تحيتي للجميع

الرحال2003

[حفرلوجيا]

ذيب مجيرة : المعذرة , ومثل ماتفضلت من قصدتهم متعدين التكاز , لكن بلاك بمن يتوهم إنه تكاز.
أبو شكاع : وايت يا مفتري ! :D جاك وش صار , وأنت سالم.
الريس ابو طلال : مافيها شي إذا فركها , يودي ربعه للبل !
سنتافي : إما السونار ! أشوا إنه في جبهته ماهو بيده , فـ لو فرك اللي قال ابو طلال وش يصير؟
الرحال 2003 : سلامتك ياشاعر , جاك وش صار!
ومعذرة البلا من الكمبيوتر ماهو مني
الريس أيمن : وش لون اصيبعاتك ياغالي, ترى عندي لك لزقة اصلية.

------------------------------------ الجزء الثالث والأخير

حتى لايعتبرنا مخفات بعد ماسمعنا الإنفجار قلنا : شف وش اللي صار عند الخبير يااميرنا .
رجع ابو لطيفة مختبص, اللي حصل إن الخبير فك غطاء القدر وهو ( ينجش ) والكبسة تبعثرت بالتراب ويقول ابو لطيفة بدأ يتغزني قلبي من الخبير!:rolleyes:
* ماعليك يابو لطيفة هذا ضاري على قدور النحاس القديمة اللي تبي له عشر رجال مرودنيين يركدونه على المركاب , ماهو كاتم وعلى غاز ! ( هذولي قدور بسكوت ماهي مفطحة ).

تهقاه صحيح؟

* يارجال رح اعتذر منه واذبحو الهرفي الثاني ( رضاوة له ) .

تعشينا وسمرنا , ونبي سوالف ( نجوم وفلك على الطبيعة ) حتى نستفيد!؟ ماحصل لنا , قلبها الخبير سياسة وبترول وشرق أوسط..:( >>>> ماعلينا , الرجاء في بكرا !

صلينا الفجر وأقفى الخبير مع طلعة الشمس يبي يتمشى رجلية , صرخ فينا ( ابو لطيفة ) : جهزوا القهوة والفطور , وأنا بس اللي أرافق الخبير بالتمشية ! ( ياحظك يابو لطيفة ) ..
قبل عودتهم من التمشية قال أصغرنا ياجماعة خبيركم هذا البارح كل ماسمع خرفشة او طقطقة أو صوت حصني شال فراشة وتوسطكم وأنتم نايمين ..
* اصصصص , لايسمعك ياغشيم , هذا من الاولين , يبي يتوسط ويستعد لو كانت خرفشة حنشل وصار عينه أواذنه يكون هوا الوالم وبالوسط يحمي المجموعة .. وش دراك ياصغير!

عاد الخبير واميرنا من التمشية, وكان ابو لطيفة مبحلق عويناته , كنه سامع شي مكدره ؟! ماصبرت سحبت ابو لطيفة : وش إنت مسوي , سود الله وجه العدو؟
قال الشق والبعج ؟ الخبير سألني : ماأشوف من أمس الزحمة والتفحيط اللي يقولون عنها بروضة التنهاة ؟ .. أفا وأنا أبو لطيفة , قلت له ماحنا بالتنهاة الله يسلمك ! تدرون وش رد الخبير مع ارتباكه :
يقول : اعذروني , أنا خبير صمان , هو اللي أعرفه حصاة حصاة ؟:mad:

والله يوم بدينا نفرك ايديننا ( بس بدون تراب )! :p وقلنا لاتعلمون الضعيف وين حنا فيه لاتصدمونه.......

جلسنا مسيان واستلمنا الخبير من سوالفه عن الصمان وخذ من : وكنا هاك السنة قانصين بحسناء بالصمان .. يوم كان مايعرفها إلا اللي مثلي وشرواي , ماهو مثل اللحين صارت مكشات لكل من هب ودب ..... :eek:
هنا قمز أبو لطيفة فوق سلة الموتر يقول : آن لأبو لطيفه يمد الاريل ولايبالي , وأردف : تعال اسمعك أخبار الصمان كلها من أهل الكنود والايكوم , وخل نعلمك بباقي علوم الخرايط قبل تروح في خرايطها ..
لكن الخبير كأنه حس ! و ماعاقت معه , قلبها شعر وألغاز !
قاطعه ابو لطيفة: جت منك , وش رايك ياخبيرنا بقصيدة احمد الناصر الشايع اللي يقول فيها :
يابو حمــــــد هذا زمـــــان التهاويل :: اثر الرجـــــــال اشكال ذيب ونعامـــــه
إلى أن يقول فيها :
إليا اشتبهت بوزن بعض الرجاجيل :: اسمع كلامه واوزنه في كلامه
وختمتها بيت أهديه لك يالخبير البري:
السالفـــة تحتاج شرح وتفصيل :: دايم يغر الناس كبر الجهامـــــــه

رد الخبير : ماهي بطالة ؟ ( لا ياشيخ ). :mad:

صح لسانك يابن شايع :
دايم يغر الناس كبر الجهامة! يــ الخبير البربري ( الكلمة الأخيرةغلطة مطبعية)!:mad:

وسلامة الجميع

[عبدالعزيز الدباسي]

والله يا ابو سليمان ما قويت نفسي اني ادخل الى المنتدى بعد الاجازة ( الطويلة) الا بواحد من مواضيعك ، ويازينها من سعادة يوم شفت هالموضوع ( الحليو) اللي يخلي الواحد يزهد بعلومه ومعرفته عن الصمان ، من الخوف ان رفيقكم يحطه بابطه ، ،
بس عسى الرجال ما تأثر من فتحة القدر وما جته اصابات وحروق ،،،، وشلون لو انكم مسوين مطازيز ذيك الليه كانت صارت العاب نارية والا حفلة تنكرية :p

وعلى فكرة لا يغرق الريس ايمن انه مستعجل على السالفة ،،، الامر انه شاف انك تكرر ابو حمد ابو حمد ، ويحسب نفسه هو بطل القصة ،،، ما درى ان البطل بهالفلم يبي يموت على غير العادة .

[أبو تركي القطامي]

ستاذنا القدير حفرلوجيا:

الله محييك وجعلك سالم وغانم

وبيض الله وجهك على الأجزاء الثلاثه الى مايتخصص فيها الا أنت ولا يجيدها الا أنت

أضحك الله سنك وجزيت خيراً ورحم الله والديك ووالدينا وجميع المسلمين

[الطبيب]

لان الكثير من الناس لما تسأله وين رحت ها الموسم يبدا يقص عليك بطولاته ووش سوى من العلوم الغانمه

والحقيقه انه دبل كبود اخوياه

ولاصاد

ولا حتى شارك بالنتف ولا الطبخ ولا غسيل الصحون

مثل خويكم ( بناخي فتو ) :)

واذا جاك هنا

قام يكبر ....... بالرقع >> اكيد فاهمين وعارفين المثل

ولما تقوله .... (( يا اخي والله اني شفقان على خوة مثلك من ( الذيابه )... والنشاما ))

يرد عليك بكل ثقه وعدم تردد

(( حياك الله بس ما اظن انك تصبر على التعب )) >> شعنده طرزان

وبعدين تبادره بسؤال
لــــيـــه ؟؟؟؟؟؟؟

يقول لك

حنا ناس نشقى ونتعب.......... ويبدأ بسرد امجاده من جديد

وتلاحظ زيادات واضحه بالقصص اللي قالها لك قبل خمس دقايق

واذا كتب الله وخاويته

عز الله انك تبي تبتلش به

لانه هو العارفه والدليله والكل في الكل

وهو داج مايدري الشرق من الغرب

اقول

الله يرحم شايب من الربع

قال لي مرة

(( يا ولدي ..... اذا شفت اللي يمدح نفسه.......... لا تصدقه تراه كذوب ولاتخاويه ))

ويوم سألته

ليه ؟؟؟؟؟

قال (( هذا رجال يحب نفسه

ويبدي نفسه عليك

والخوي الصحيحي والحقيقي

هو اللي يشيل هم اخوياه اكثر من نفسه ولا يتكلم خاف تظيق صدورهم

وبعدين يا ولدي

ترا الرجا يحكي عنه فعله ما هو لسانه))

ومن يومها والكلمه هذي ( ترن ) باذني

والظاهر اني على اول فظاوه

ابي اكتب (( طقوسنا )) انا واخوياي

اللى من ستة سنوات ما غثوني ولا غثيتهم ومرتاحين مع بعض - ولله الحمد - على الآخر

لان متى ما عرفت ما لك وما عليك

انتهى النقاش

وتتحمل الملامه اذا قصرت

اما (( تدربي الكلام )) فما يصلح

لان حبل الكذب

(( والمهايط )) >> يقولون ما لا يفعلون

قصير جدا

واسرع ما ينكشف صاحبه (( بانفجار ))

سواءا

من القدر الكاتم

او من احد اخوياه اللي ينفجر فيه ويوجه له (( اللكمات )) الكلاميه

هذا والله اعلم

والسلام ختام

[ميراج]

حياك الله اخوى ابو سليمان

خبيركم ذكرنى بواحد فى الفلك ما فوقه إلا الله سبحانه سئله واحد عن نجم سهيل قال هذا هو اللى نوره قوى

من بد النجوم يوم خذنا 5 دقايق ولا يوم نزل سهيل فى مطار الملك خالد

تحياتى

[صقر]

السلام عليكم

آن لأبو لطيفه يمد الاريل ولايبالي


ههههههه والله زين ما سوى ولا صبر ... سلملي عليه..

وهالنوعية من الناس يا كثرهم تلقاه بالمدينة طير بر والبر أحسن وصف له انه ضايع في خرايمها..

تسلم ابو سليمان على هالقصة الرائعة وهالخيال الواسع ..

ولا عدمناك. يالغالي.

[المربد]

سلمني على بو لطيفه اللي طول باله عليه ووسع صدره وهو يتمشى معه،، زين اللي ما رفسه باحد هالدحول ...

عساكم تركتو له مكان بالسيارة يرجع معاكم؟

الف شكر يا بو سليمان على هالمشاركة.
والله انك خففت علي جمرة الصيف بذكريات الكشتات. وطاري الصمان !!!
الله يلحقنا وياكم خير ويرزقنا الوسم والربيع

[نفل]

السلام عليكم ورحمة الله وبركاته

اخوي حفرلوجيا
ما شاءالله متميز دائما بمواضيعك وطريقة الطرح باسلوب السهل الممتنع وحقيقة
اشعرعند قرائتي لاي موضوع لحفرلوجيا اني امام كاتب متمرس ( حلوة متمرس :) )
واسلوبك اصبح مميز خاصة وان جميع مواضيعك تحتوي على ملاحظة او فكرة هادفة
تحاول باسلوبك ان توصلها لنا او تقوم بوضع الحلول لها .
اخوي ابوسليمان.
جازلي موضوعك هذا بالمرة ولو تفتش حولك تجد الخبراء واجد وتصدق عاد كنت احسب
نفسي خبير بالكامرات الرقمية لاكن بعد موضوعك هذا هونت اخاف يصيرلي مثل ما صار
لخبير روضة حسناء :D ;) .
ومشكور وما قصرت وجزاك الله اف خير .

اخوك ابو محمد.

[القماري]

هذا والله يهون على الكثير الكثير من الخبراء ( شف عندك نشرات الأخبار ) كم خبير يطلع لك فيها بطل 69 و79 و 99 ومدري كم تسعة وراهم.... والقهر يكتبون خبير إستراتيجي (مدري متى أسترج الرجال) وهو طول عمره ما فارق بيته.
سلم لي على خبيركم يابو سليمان وقل له فيه جماعة من الشرقية محتاجين خبراته في رحلتهم القادمة إلى جزر الواق واق والدفع بالإسترليني

[حفرلوجيا]

الحمدلله على السلامة ياريس شقردي : ولا كل ابو حمد مثل ابو حمدنا , ريسنا بلسم , ياليت الخبير بريحة اخلاق ريسنا ,, فيه ناس تأسرك وتسرك , وفيه ناس تفضخ القلب وتفقع سرك .

ابو هنا : وهالوجه ابيض , بس عاد شوي شوي علينا بعض المرات , يمكن الواحد يتوهق وتصفقه مثل مجاملاتك اللطيفة , والخوف يطيح بمطب خبير حسنا.

الطبيب : تبي الصحيح لك كم رد تقنص الفكرة وتختصرها وتطلع اللب وتخلي القشور :good:
إلا يقولون ياطبيب إن الفيتامينات بالقشور ,, هو صحيح؟

الريس ميراج : سلط الله على الشيطان ,, والله شوي ويغشى علي من هالخبير ..
أجل مافوقه إلا سبحانة ,, وسهيل بعد خمس دقايق بالمطار.. :D:good:

الريس صقر : وانت سالم ,, نعم هذا خبير ( إمنقى ) اللي تقول رايح في خرايمها.:)

المربد : وش نسوي لازم نحط له مكان بالسيارة لانه تحول يفهم سيارات .. وخبرك هذا خبير مانستغني عنه على طريقة الريس راع الكحيلة..;)
آمين الله يلحقنا وإياك والجميع الخير.

ابو محمد : الحمد لله يوم جازلك .
حلوة متمرس انتشيت بعدها وخوفتي على وزنها أصير ( متمرد ) .
لكن يابو محمد خبير عن خبير يفرق , خبير ينطبق عليه المثل اللي ذكره الطبيب :p, أما أنت ياعيوني حنا اللي نحكم عليك لان صفحات المنتدى والمكشاتيين شايفين الشغل العدل ملموس :good: الله يجيب الخير ونستمتع.

ابو احمد : وينك ياغالي صايرة طلاتك بالمنتدى لمحات :rolleyes:
أما إنكم تبون الخبير بالشرقية , ماهي بعيدة , أسهل ماعليه حرف واحد من خبير بري إلى خبير بحري :mad:
بس ودك هذا تحطه عندك يابواحمد بطراد وتلبس أنت ملابس الغوص وتأخذه معك وإذا غابت الأرض تغيب يابو احمد بالغبة , هنا يمكن تغيب الخبرة.:D