ابي اشري برادوا

[ابوعبدالمجيد1]

السلام عليكم وكل عام ونتم بخير,اخواني ابي اشري جيب ونا عائلتي مو كثير,وشوف ان حجم البرااادوا والفور شنر مناسب لعائلتي وكذلك مبلغها مو غالي زي الاندكروزر,لكن سقت الفور شنر لاخويه ووجده ممتاز لكن مو مريح,وسمعت انه كان حوض وحوله جيب,المهم رسيت على البرااادوا,وحبيت استشيركم فيه وهل هو سريع الانقلاب زي ماسمعت,ووش عيوبه,انا مرتااح له,بس مترددد,ودي شرح مفصل عنه,وشكرا لكم

[أبو فيصل 99]

البرادو الله يكفينا الشر قلبه سريع .. فخل هالنقطة براسك
لو تشريلك لاندكروزر G احسن وأفضل
والقرار الأخير لك

[سوبر مكشات]

انت بتسوق رالي؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
بتشيل اهلك وتمشيهم وتونسهم منتب مقلع بهم

انا كنت اسمع زي كذا لكن ماعمري سمعت او شفت(حتى مقاطع الجولات برادو منقلب)

ومر عالتشاليح واسال واكثر مابالتشاليح اللاند كروزر


البرادو قليل


واذا كنت متخوف مره خذ فتك


واسال اصحاب البرادو يفيدونك اكثر
موفق حبيبي

[راعي المجهم]

البرادو غير مرغووووووب في السوق أبداً بسبب مشاكل الدبل حقه

يقولون أن موديل 2010 عدلوا هذه المشكلة

وأيضاً يعتبر خطر جداً سريع الأنقلاب

[ماجد1234]

يارجال مافيه موتر ماينقلب

الكابرس ينقلب والكامري ينقلب

تبي الجيب ماينقلب

والله انا من رايي انك تصلي لك صلاه استخاره

والله منت خسران

وانا انصحك بالبرادو

عز الله انه يعجبني

وانه الحين مرغوب

[البرحه]

كل الجيوب فيها خطر تنقلب

والبرادو من أرسى الجيوب على التجربه (الفل كامل) ..

[راس الرعيلة]

أعجب من بعض الأخوة الذين يتكلمون بلا دليل ولا برهان ولا تجربة !!!!

عن تجربة مني ومن زملائي ومن كثير ممن استخدموا هذه السيارة أقول لك توكل على الله وحاااااول قدر الامكان أنك تاخذ الفل كامل (مريح جدا وانظمته ممتازه )
السيارة عمليه وراسيه وعزم قوي (6 سلندر)

على كثر ما شفت من جيوب منقلبه ,,لم يسبق ان رأيت برادو منقلب ,,
(ما يعني انه ما ينقلب لكن أكيد قليل واقل من غيره)

أستخدمت 2005 واستخدمت 2009 وكلها فل كامل و الاستخدام قاسي بصراحة ولكن السيارة جباره -ما شاء الله تبارك الله-
(نفود - جبال - عقبات - طرق سريعة -استخدام سلس داخل المدينة)

وبالتوفيق ,,,, لا تنس الاستخارة وانا اخوك ..

[kroz]

الله يرزقك

[رابح999]

البرادو غير مرغووووووب في السوق أبداً بسبب مشاكل الدبل حقه

يقولون أن موديل 2010 عدلوا هذه المشكلة

وأيضاً يعتبر خطر جداً سريع الأنقلاب

كلام غير صحيح اطلاقاً واول مره اسمع ان دبله فيه مشكلة والظاهر انك شريطي تعذرب المواتر
البرادو سيارة عمليه جداً وصبورة معي 2005 ولاتوجد به اي مشكلة والحمد الله

[ahmad995]

البرادو واحد من العيال معه 2007 تماتيك
بالبر ماشاء الله على خفه الله لا يضره
انا معي ربع 2006 ووالله انه مثل الربع بالخفه والنشاط والفزة
وبالخطوط كل عيد يروح عليه لسوريا هو واهله مع العلم انه عنده جي اكس 98

والثاني
واحد معنا بالدوام شرا 2005 برادو قبل سنه سالته عنه وعن استخدامه
قال جربت الباترول وجربت اليوكن وجربت الجي اكس
هو افضلهن مع العلم انه راعي صيد
بس بشرط اشتر الجديد ولو انه غالي

[كادر]

البرادو ومن واقع تجربة ثلالث سنوات 2005 فل كامل
نشيط
مريح
ممتع
عملي
اقتصادي ولكن
طامن
ضيق
اذا ماطلعه الخفيف تتعب مايطلعك الثقيل
قطع الغيار متعبه شوي
وبالنهاية اذا عائلتك لاتتعدى 5 اشخاص استخر واشتره واحرص على الفل لانه هيدروليك
تحياتي

[أبوعبدالله202]

البرادو سيارة ممتازة للمدينة والبر ،وجميع السيارات تقلب
عليك بالفل الكامل (ستة سرندل) توكل على الله

[بو جريس 73]

والله انا اشوفه ان البرادو ممتاز اذا عائلتك اقل من 5 اشخاص والصراحه احد زملائي عنده واحد صارله 4سنوات وكارفه كرف سفر + كشتات + استعمال يومي وتخيل يطلع من مركز الحدود الرقعي معبي ويوصله حتى السيل الكبير بالطايف مايعبي بنزين طبعا هذا للموديل VX 6سلندر وبالنسبه للأنقلاب ترى اهل الخليج ماخلو شي ماقلبوه !! اهم شي الواحد لا يمشي بسرعة مجنونه وخصوصا اذا كان معاك عائله ولاتنسى اخي العزيز الأستخاره والله يوفقك

[بو خليفه]

البرادو جيد و الوكالة و القطع في جميع المدن وفي البيع يوجد من يشتري و يحلم به

لكن لا يقارن بالجيبات الاوروبية الاروبي فيه رساوة و في المطبات والسرعات العالية ثابت

انا عندي برادو 2007 جيراتوماتيك ديزل vx دركسون طبعاً يمين

[التعـ King ـديل]

مااقولك مع فلان ولا فلان .. بقولك معي برادو 2004 فل كامل بس اربعه سلندر

توني جاي عليه من الكويت انا والاهل .. للعلم انا ميولي نيسان واول مره اسوق موتر تويوتا ويعجبني ..

لكن بقولك شي الموتر عملي جدآ وراسي واللي يقول ينقلب ومدري وشو احب اقوله انه ارسى مواتر تويوتا وعن تجربه ..

لكن عيبه الوحيد قطع غياره غاليه بعطيك فكره المساعد الواحد ب 450 ريال اصلي

يعني الطقم بيطلع عليك ب1800 ريال بدون تركيب طبعا اعطيك اسعار قطع

ولا يجي منه مونرو ولا جبريال مافيه الابديل الا الاسترالي اولد مان ب 550 الواحد

لكن اذا انت تبي موتر وماتهمك اسعار القطع تراه موتر تحطه على يمناك واطلق من الفكسار بعد