عادات سيئة في القيادة [الأرشيف]

wrs3975

01/10/2009, 11:54 AM

صبحكم الله بالخير جميعا ..:o وحياكم الله .... كما هو واضح من العنوان .. عادات سيئة وتصرفات غريبة نشاهدها من بعض سائقي السيارات ... والهدف من ذكرها هنا هو تجنبها وتذكير الآخرين بأن هذا التصرف مرفوض ... ولا شك أن بعض هذه التصرفات فيها إساءة للذوق العام أو فيها خطورة على الآخرين ... فمثلا :confused: عندما تشاهد من يضع طفله الصغير في حضنه وهو يقود السيارة :D وشخص آخر جالس يسولف بالجوال وماعليه من أحد يمكن واقف عند إشارة ومعطل الآخرين :no: وهكذا .... نبي منكم إثراء هذا الموضوع من خلال مشاهداتكم ... :director:

معن1420

01/10/2009, 12:54 PM

عندما تشاهد من يضع طفله الصغير في حضنه وهو يقود السيارة :D وشخص آخر جالس يسولف بالجوال وماعليه من أحد يمكن واقف عند إشارة ومعطل الآخرين :no: وهكذا .... نبي منكم إثراء هذا الموضوع من خلال مشاهداتكم ... :director:

كلنا نخطأ بحق اطفالنا فيجب تعويدهم على الجلوس في الكراسي المخصصه لهم فقد تحدث مالا تحمد عقباه لو حدث اي طاري في حركة السير

وكذلك الجوال يجب ان يكون استخدامه كما نصت عليه انظمة المرور باستخدام السماعه او التوقف بالسياره للحديث في الجوال

وايضا هناك مخالفات اخرى من بعض السائقين خصوصا صغار السن الله يهديهم وهو السرعه العاليه وطلب الطريق مع اننا نسير بسرعة 120 كلم /ساعه فكيف اترك الطريق له وانا من يميني ومن شمالي سيارات ؟؟؟؟

ايضا وقوف البعض بطريقه خاطئه عند الاسواق وقد اجد لهم عذرا لان بعض المواقف غير مخططه ولكن الوقوف بشكل راسي مع الوقف بشكل طولي هذا مايسبب زحاما وعدم توفر مواقف

اتمنى للجميع السلامه شاكرا لك هذا الموضوع المميز

الوافي99

01/10/2009, 01:14 PM

اعتقد انا مبتلى بالناس هذي دايم عند الاشاره يطلعون براسي نخل ويمشون ببرود انواع الهوشات معهم

smsm007

01/10/2009, 01:17 PM

لا حياة لمن تنادي .

روح شف القيادة في دبي وتعرف إنه إحنا ولا شي في أنظمة المرور والقيادة ..

وشكراً لك

.أبوعبدالرحمن

01/10/2009, 01:37 PM

اشياء اكرهها وهي من الاشياء التي اعتبرها من قلة الادب والذوق والتعلم

1/ وهذا الشيء من الاشياء التي تفقع مرارتي يجيك ورع من الورعان مطول على المسجل

لا أنت تقدر تتكلم بالجوال ولا تقدر تستمع لأي شيء بالرادو في سيارتك ولا المسجل ولا تقدر

تسوي اي شيء بسبب الازعاج وفوق هذا كله يعتبر مجاهر بالمعاصي ويعتبر من المرضى

2/ اذا انت ماسك اليسار ويجيك برضوه ورع ابوه معطيه قروش وركب له زنون يشغلك اشغال

ماهوب طبيعي الا توخر والمشكلة انه في المسار الايمن مليان سيارات يعني ما فيه امل انك

تقدر تبعد عنه وكأنه اعمى الا توخر يعني وين يبيني اروح والسيارات جنبي يعني اذا مستعجل

على عيني وراسي من فوق لكن انتظر الى أن القا لي مكان اخش فيه عشان تقلع

3/ يجيك واحد توه متعلم السواقه وطايح ( ن ) يعرف يسرق سيارات ويجيك يزعجك بالتفحيط

داخل الحارة ولا شاف ابوه نايم وسرق الموتر ويجيك مكيم داخل حارة كأن ذا البيوت ما فيها

اوادم نايمة او ناس تعبانة أو بزران ما يطلعون في الشوارع ولا شايب رايح يصلي

4/ يجيك واحد وهذا الشيء في حارتنا اذا وقف عند باب البيت عشان يدخل سيارته داخل البيت

يعلق البواري كأن بيته ما فيه جرس ولا معه مفتاح والمشكلة لو تشوفون سيارته اللي بيدخلها البيت

عشان ما تنسرق كان جيتوا شبيتوا فيها جمس 1500 ابيض ما لون وردي الظاهر انه ازرق

لكن من الشمس قلب وردي ولا فيه مرتبه للراكب وكل كفر شكل ومقاس

انا يمكن طلعت عن الموضوع شوي لكن طريتوا علي شيء واجد

لكن والله العظيم لو اكتب لمدة 3 ساعات والله ما اخلص

نشمي الحوطة

01/10/2009, 01:41 PM

2/ اذا انت ماسك اليسار ويجيك برضوه ورع ابوه معطيه قروش وركب له زنون يشغلك اشغال

ماهوب طبيعي الا توخر والمشكلة انه في المسار الايمن مليان سيارات يعني ما فيه امل انك

تقدر تبعد عنه وكأنه اعمى الا توخر يعني وين يبيني اروح والسيارات جنبي يعني اذا مستعجل

على عيني وراسي من فوق لكن انتظر الى أن القا لي مكان اخش فيه عشان تقلع

هذي اللي والله من جد تفقع المرارة ..

انا اللي كذا اعطيه فرامل فجأه معناته تراني ما نيب موخر ;)

لأنك قليل أدب .. :no2:

سوبر مكشات

01/10/2009, 03:11 PM

طول بالك
خلك بارد
انت في ديرة حرق الاعصاااااااب

وسع صدرك
والله يصلح الحال

هويدي

01/10/2009, 05:18 PM

دايم الواحد يشوف مواقف تفقع مرارته ويتمنى ان معه صلطه :mad:

اكره حركه عندي البزر اللي يبتل يكبس ورا بعض ويمينك سيارات وخاصه حقين الزنون الصيني

الوقوف الخاطىء واكثر مايسوونها حقين الليموزينات

* اللي يسكر المسار الايمن عند الاشارات ويعطل المسلمين او اللي يخطم على الناس عند الاشارات بكل وقاحه وبدون اسأذان تقل شارع ابوه ..

لو بنحسّي مراح نخلص وحقين الجوال ذولا عالم ثاني

او بعض الاجانب يجيك معه سياره بخمسميه ريال وماسك اقصى اليسار يمشي 60

كساب الطيب

01/10/2009, 06:27 PM

الله تخليني اولع وتاصل معي
اللي يشطفك ويتجاوز مع اليمين هذا افز منه
والثاني اللي يجي عاكس السير بالحواري ومسرع
والثالث اللي يتجاوز بالدوار ياخي اصبر لين اطلع من الدوار

جيبي جايزلي

01/10/2009, 07:44 PM

من امن العقوبه اساء الادب

وانا مايقهرني الا اللي عند الاشاره وصرت ابلف يمين انس انك تلف يمين الا بعد ما تفضي البطاريه من البواري طيب انا ابلف يمين ليش تجبرني انتظر الاشاره لين تولع والف علشان حضرتك ما عندك استعداد انك تحترم الاخرين وتلتزم بالنظام
ما فيه احد يقدم تنازلات ابدا عند الاشاره اي واحد يبغى يصير الاول وش المشكله اذا صرت الثالث او الخامس يعني لازم تقفل المسار الايمن عشان تصير الاول صار سباق رالي ولا فيه امل نتطور وفيه ناس بهالهمجيه والتخلف ولا اذا وقفت عند الاشاره
سبحان الله ما تجي الثقافه الا عند الاشاره يفل الجريده كنه يقول اذا قضت اشارتكم علموني تراني مشغول بالجريده الله يخلف بس

wrs3975

02/10/2009, 12:40 AM

أخواني الأفاضل معن 1420 الوافي 99 smsm007 تشرفت كثيرا بمروركم بارك الله فيكم :)

أخوي الغالي أبو عبدالرحمن الصفيان أشكرك على هذا التفاعل وقد لمست من كلامك الحلم وحسن الخلق وخفة الدم ... تشرفت كثيرا بمرورك :)

إخواني الأفاضل نشمي الحوطة وسوبر مكشات ... أشكركم على المرور:)

أخوي الغالي هويدي إضافات رائعة وجميلة أشكرك :)

أخوي الغالي كساب الطيب و جيبي جايزلي .. أشكركم على المرور والإضافات الرائعة :)

أشكر الجميع ...... والهدف من ذكر هذه السلبيات والتصرفات الخاطئة هو الإبتعاد عنها والتحذير منها لما فيها من الخطورة على صاحبها والآخرين... ولازلنا بانتظار المزيد :)

مشعل العيسى

02/10/2009, 12:48 AM

موضوع مميز ..

الحقيقة انا كنت في السابق اتضايق جداً و" اتهاوش معهم " وفي الاخير حسيت ان افضل شي انك تشوف وتسكت وتمشي في طريقك .. لانك ما تقدر تصلح العالم كله .. واي شي تشوفه سو نفسك ما شفت شي وامش ...

wrs3975

02/10/2009, 12:53 AM

عين العقل أخوي مشعل .... بس وش رايك في واحد ماسك اليسار ويمشي 20 ؟؟ هذا وش الحل معه ؟؟:p :p

northstar46

02/10/2009, 12:58 AM

اسوأ عادة اللي يجيك عند الاشارة ويتعدى الناس ويعترض قدام

مشعل العيسى

02/10/2009, 01:33 AM

عين العقل أخوي مشعل .... بس وش رايك في واحد ماسك اليسار ويمشي 20 ؟؟ هذا وش الحل معه ؟؟:p :p

هلا باخوي ... اللي ماسك اليسار وماشي 20 امسك انت اليمين وكأنك ما شفته .. واعتبر اليمين هو اليسار وما فيه خط يسار ...

او امش وراه وخلك ماشي 15 لين تاصل .... ههههه

(( من جد يجيك عجايب في الطرق والشوارع وخاصة من المراهقين .. لكن ما لنا الا الصبر وقلة الحيلة ))

الباترولي

02/10/2009, 04:14 AM

السلام عليكم....
فيه اشياء واجد لكن اشدها عندي/
1_ انت واقف بالاشاره يجي واحد يفتح الباب او من الدريشه ويبدا يبصق بالأرض:no2:
2_ واحد يمشي قدامك ويرمي بقايا اطعمه او قطفه الزقارة:hot: هذا يرفع الضعط

فيه اشياء واجد لكن اذكروها الذيابه قبلي
والسلام خير الختام....

محمد-الرس

02/10/2009, 05:23 AM

شكلي بأشتري مدرعة بدون مدفع علشان اذا جا واحد بيصدمني أقرشعة قرشعة
أخلي سيارته قوطى صلصله خله لايوخر أما أصحاب السيارات الصغيرة الله يعينهم
======================================

N أبورغد N

02/10/2009, 06:48 AM

والله المواقف واجد
لكن انا مره ماسك الدايري بالرياض وفيه جمس اخر مديل ماسك اليسار يمشي 60
والي على اليمين اتوقع يمشون 100 وعليها ومعيي يوخر عجزت فيه
بس بصراحة صرت اقل منه ادب لاني نطلته يمين وشطفته شطفه عورت قلبه
وجيت قدامه ووقفت وقفت لانه حاط العالي ومشيت ولا فك العالي وجلستله مهدي امشي 20
وكل ما جاء يصقط حديته يمين يسار جلست له وما كنت ناوي افكه لكن في الاخير
شفت معه عائله يوم جاء جنبي
خليته يصقط ودعس كأنه منحاش

الثاني كنت ماشي في الدايري وزحمه موت والساعة تقريبا 12 الليل وغريبة المفروض الخط ماشي المهم بعد نص ساع وصلت للي مسوي زحمة
واحد معرس ومعه يوكنين مسوين موكب وقدامهم سيارة تصور تدرون وش سويت فيهم
دخلت بين سيارت المعرس واليوكن الايمن بالقوة يعني بدخل والا بصدم
وجيت قدامهم وحطيت العالي على الكميرة لا وكان معي سيارة قديمة ووصخة بعد وجلس لهم الين انحاشوا ويحمدون ربهم موتري ما كان فيه بنزين والا والله لاخرب عليه تصويرة لبيت العرس

اعذروني انا اتحمل بعض المخالفات لكن قليل الادب يبي تأديب
وخذوي هذي بعد راعي اف جي قاعد يغازل جمس مظلل مدري وش السالفة وماسك اليسار وراعي الجمس سواق ماسك النص المهم وراه شوي احسب انه بيصقط او قدامه زحمه
يوم شفت قدامه الطريق فاضي والاخ يمشي 60 دخلت بالقوة بينه وبين الجمس ووالله شوي وادخله في الصبة راعي الف جي
ويحط العالي وادق بريك قوي بغى يبكي المهم دعست ويدعس قلت افتحله الخط اشوف البطل
هوز بالسيارة ويبي ينحاش وادعس وراه انحاش الغبي لمخرج ما درى الا انا داخل عليه من المخرج الي بعده ولو ماني مستعجل كان وريته

لا واليوم بزر يمشي 90 قدامي ماسك اليسار ورمى قراطيس وبقايا اكل ظربي موتري وادك له بوري واحط عليه العالي ويفتح الخط ويجي وراي ويحط العالي دقيت بريك وعلى طول نزله يعني شين وقوي عين
المشكله انا اشغالي كثيرة فدايم فذا الشوارع والله يستر
وصدقوني ناوي انقل قرية اريح راسي من الرياض والمدن
في اقرب فرصه
ولا احد يفهمني خطاء انا امشي 120 دايم واربط الحزام وافوت كثر
واغلب من يدق اشارة اخليه يعدي لكن بعض الاحيان ما يمدي

هويدي

02/10/2009, 07:55 AM

نشكر الاخوان على الاضافات الرائعه اللي نتمنى ان تزول

وادري اني قطيت معك ياصاحب الموضوع بس تحمست من المواقف اللتي لا يخلو مشوار منها
اما الدورات عندنا حدث ولا حرج
( الافضليه عندنا للجزوم ) دول الخليج اذا شفت احد خاطم بالدوار على العالم تدري انه من ربعنا بدون ما تشوف اللوحه !!

بشوارع الرياض علشان تريح راسك شوي لازم تمسك نفسك وتتغاضى .. بالعربي لاتدقق ــ مثل تفضلو الاخوان اذا بتهوش وتعصب ماراح تخلص

عن نفسي اللي يخطي بدون قصد يعلم الله ما اقوله شي لابوري ولا نور الا ان كان ذواقه بوري او كبسه خفيفه علشان ينتبه ..

واذا الله سترو عدت على خير اكمل طريقي ولا كأن شي صار .. لانك لو علقت البوري او هاوشت فيه احتمالين وكل واحد اشين من الثاني

* يا انه يعتذرلك ويطيح وجهك :D

* او يكابر ويطلع عبيط ولا بزر اوخبل وتتلاقط انت وياه .. ويا يفرشك ياتفرشه.. . وبكل الحالتين منت مستفيد شي

والنقطتين اللي بطحها اخونا باترولي تنرفز بقوه خاصه الاوله الله يكرمكم

1_ انت واقف بالاشاره يجي واحد يفتح الباب او من الدريشه ويبدا يبصق بالأرض:no2:

2_ واحد يمشي قدامك ويرمي بقايا اطعمه او قطفه الزقارة

وكله كوم قواطي توصيل طلبات المطاعم كوم يجلعدون بالحواري على غشامه

وعلى طاري الحواري :

ماتلاحظون شوارع شمال الرياض صارت رصيف وشوي شارع ...

ومن زين الزفلت حسبي الله على بعض الشركات اللي مايخافون الله
بعض الشوارع لو هو ردميه ارحم :confused:

واعتذر على الاطاله يا اخوان والله يجزاك خير ياراعي الموضوع المفيد واللي فتحلنا مجال للتنفيس عن غضب القياده المكبوت

واقترح عليك بعد ماياخذ حقه الموضوع من الردود تلخص النقاط السيئه على فقرات وتحفظها بملف على صيغه صوره وبين كل نقطه ونقطه صوره لشد انتباه القاريء ونوزعها على القروبات والايملات لعل صداها يصل لمن تكون فيه نقطه من النقاط المذكوره و يستحي على وجهه ويتخلص منها

خن بط

02/10/2009, 11:33 AM

الله يرحم الحال

وينا ووين اعط الطريق حقه
يبغالنا 100 سنه او اكثر لين تشوف قياده راقيه بكل المعايير

براد نجد

02/10/2009, 12:51 PM

أشكرك أخوي على الموضوع وأشكر أيضاً كل كن شارك ورد ولكن نلاحض على الطرق السريعة أذا كنت على الخط الأيسر تبي تسقط على سيارة طبعاً مالك أي مجال يسارك رادمية ويمينك سيارة ويجيك واحد ويكبس ويشغلك بالنور العالي الا تفتح غصب ماعندة أي صبر وألا يسقط على الكتف ويعميك بالغبار والحصى هذي الظاهرة اللي كلن يشتكي ويعاني منها الناس 00 واسف على الأطالة وتحياتي00

راعي الطلعات

02/10/2009, 01:30 PM

لدينا عادات كثيره للاسف انها عايشه معنا

وان شاءالله هذا الموضوع يفتح عقول اصحاب هذه العادات الخطاء

بيضا القاع

02/10/2009, 02:08 PM

اكثر الي يقهرني في الاشارات بروده دم ولاكن على الطريق تقول وراه قوم بيذبحونه يكبس وحالته لله

ما اقول الى الله يصلح شبابانا وشبنا الي يعطونهم

ERIC7

02/10/2009, 02:38 PM

جزاك الله خير بس الموضوع من الردود المفروض يتغير الى فش خلقك على قولت اللبنانيين
من كلام الشباب اخاف اطلع واقابل اجد منهم اخاف يصدمني من كثر ماهو مرتفع ضغطه
انا عن نفسي من اول دابة سليمه ولا اسرع لى للحاجة لاكن طلعو الشيب في راسي اللي قدامك موقف الخط
ولا عليه من احد ولا تقدر تتجاوزه لان الثانين طايرين واذا امورك زينه ومشيت اباري الساس جاني واحد يزورق خطر ان يصدمني ومن عاشر قوما صار منهم للاسف ارتحت بعد ماصرت امشي بسرعة لو اوصل قبل الموعد واقعد ادور لاني ارتحت من العالم اللمسرعة والمهديه الكلام هذا داخل مدينة الرياض برى لا لان للاسف
حنا ماعندنا احترام للاخرين ولا مرور صاحي
اكثر موقف يرفع ضغطي الدوارات محد يوقف فيها واذا وقفت اللي وراي يضرب بوري ويهاوش كن الطريق له
تتعب من كثر العادات السيئة اللي يرمي مخلفات او زقاير مع الدريشه اللي يكلم بالجوال وهو يسوق ويفهي ويسكر الخط
واللي يمشي ماسك مسارين كنه شارع ابوه واللي يزعجك بالنور العالي وكثير غيرهم

سوبر VTC

02/10/2009, 03:03 PM

مشكلة بعض الشعب السعودي
المكابرة و عدم الاعتراف بالخطا :mad:

على سبيل المثال
الاشارة حمراء و يجي شخص واقف بالمسار الايمن الاخير
يجي شخص يضرب بوري عدة مرات يبي يلف يمين
و هذا من حقه
للاسف الشخص المخطئ يكابر و تاخذه العزة بالاثم :mad:
و تفتح الاشارة همن اذا صارت الاشارة حمراء تحرك :mad:
شين و قوي عين (تصرف طفل و الصغير ما يسوي سواته :mad:)
الجرم جرم رجال وشنب الثوب مابه احد لكن العقل فاضي ما عندك احد
مخ مافيه
لو تمسك راسه و تخضه ما تحصل الا
قراشيع عسبان نخل مرابيع خشب قراطيس :p

***

احيانا تفتح الاشارة و الشخص يمسك المسار الايسر و يمشي 50
وراه جيش سيارات بواري و تكبيس
و السبب غافل يكلم بالجوال سكبة شنب :mad:
(ما جعل الله لرجل من قلبين من جوفه)
قيادة و جوال
ما تجتمع التركيز يقل و سبب للحوادث :no2:

***

قلة حياء و سوء تربيه :mad:
من اصحاب الدخان
يرمي الزقارة و وراه سيارات :mad:
سواء بالخطوط السريعه او داخل المدن
(ياخي احترم مشاعر الاخرين)
(المسلم من سلم المسلمون من لسانه و يده)

***

اصحاب الهايلوكسات الغمارة بزارين :mad:
جدع السيكل و طق موتر ب70الف او جيب ب100الف
لو تسطره رشق نخروره بالجدار :p
ساءني و احزنني و اغضبني ===> كلهن
تصرفات اصحاب الهايلوكس بالذات الغمارة :mad:
على سبيل المثال
قبل شهر غمارة م2007 عند الاشارة صادم كابرس من الخلف م2005
السيارة غدت قوطي صلصله
الاشارة مسكرة و جايك ابو الشباب مسرع و صدمه بزر :mad:
***
قبل 4شهور غمارة قدام عيني م2008
يوم افتحت الاشارة لنا (اشاره غربيه) جا من يميننا على السرعه
و يصبخ كامري من الاشارة الجنوبيه و يصدم جدار و يطيح راعي الغمارة من عند الباب الايمن (انفتح الباب او مع الدريشه)
و صار الكفر الخلفي فوق صدره :no::no:
طبعا كتب الله له السلامه
***
عسكري برمضان بنقطه مرور عند جامع يهدي السيارات عشان الرجال و النساء يعبرون الشارع الى الجامع
جاء بزر على السرعه غمارة و يصدم العسكري من عند رجوله و تكسرت رجلينه :no:
***
شارع بداخل المدينه مسرع و يكبس للعالم افتحوا الخط و باقي على الاشارة 200متر و الاشارة حمراء
يوم فتحت مشى 100متر و وقف على اليمين يسولف مع راعي جيب :mad:
على بالي معه حالة اسعافيه
***
و مافيه شايب او شباب الا يسبون راعين الهايلوكسات
حتى بالخطوط السريعه ازعاج للعالم بنور الزنون تكبيس :no:

***

على فكرة

الاحظ بعض الناس عند اشارات المخارج
يرميون بقايا الاكل و الشرب عند عمود الاشارة
او حتى في المسطحات الخضراء
ياخوان هل هذا من شكر النعم ؟؟؟
النعم لاتدوم و تحتاج الى شكر
ضع بقايا الاكل في كيس و ضعها في البراميل المخصصه للطعام
حتى لو تضطر ان تضعها بالسيارة

***

اعتذر لخروجي عن صلب الموضوع
كلام كان ودي اقوله من زمان

موفقين

wrs3975

02/10/2009, 11:43 PM

الباترولي ــ محمد الرس ــ أبورغد ــ هويدي ــ خن بط ــ براد نجد ــ راعي الطلعات ــ بيضاء القاع ــ ERIC7 ــ سوبر VTC أسعدني مروركم واقتراحاتكم الجميلة وإضافاتكم الرائعة :) ولكن عندي همسة وهي أن لانعالج الخطأ بخطأ مثله :no2: ... لأننا سنصبح كلنا مخطئين وبالتالي لن يتم تعديل مثل هذه التصرفات الخاطئة .... تشرفت كثيرا بمروركم ... وبانتظار المزيد

هاوي غماره

03/10/2009, 12:48 AM

اللي يقهرك هههههههههه

اللي توه معرس مسووي رمنسي تقل الشارع له تلقاوه يسولف مع المدام ومطيز العالم

كاشت وحداني

03/10/2009, 12:54 AM

اكره شئ عندي اللي لما تكون بخط سريع
ويكون قدامك واحد ماشي 60 وتكبس له علشان يفتح الطريق وتلاقيه يكع فرامل بوجهك
بس معاي ماله الا من يدفه بالصدام واذا بامه خير يمسك سيارته

ابوعبد الرحمن الصفيان
في فقره 4 شكلك من جيراني
نفس الوضع بالحاره بالضبط والسياره

تسوي اي شيء بسبب الازعاج وفوق هذا كله يعتبر مجاهر بالمعاصي ويعتبر من المرضى

2/ اذا انت ماسك اليسار ويجيك برضوه ورع ابوه معطيه قروش وركب له زنون يشغلك اشغال

ماهوب طبيعي الا توخر والمشكلة انه في المسار الايمن مليان سيارات يعني ما فيه امل انك

تقدر تبعد عنه وكأنه اعمى الا توخر يعني وين يبيني اروح والسيارات جنبي يعني اذا مستعجل

على عيني وراسي من فوق لكن انتظر الى أن القا لي مكان اخش فيه عشان تقلع

3/ يجيك واحد توه متعلم السواقه وطايح ( ن ) يعرف يسرق سيارات ويجيك يزعجك بالتفحيط

داخل الحارة ولا شاف ابوه نايم وسرق الموتر ويجيك مكيم داخل حارة كأن ذا البيوت ما فيها

اوادم نايمة او ناس تعبانة أو بزران ما يطلعون في الشوارع ولا شايب رايح يصلي

4/ يجيك واحد وهذا الشيء في حارتنا اذا وقف عند باب البيت عشان يدخل سيارته داخل البيت

يعلق البواري كأن بيته ما فيه جرس ولا معه مفتاح والمشكلة لو تشوفون سيارته اللي بيدخلها البيت

عشان ما تنسرق كان جيتوا شبيتوا فيها جمس 1500 ابيض ما لون وردي الظاهر انه ازرق

لكن من الشمس قلب وردي ولا فيه مرتبه للراكب وكل كفر شكل ومقاس

انا يمكن طلعت عن الموضوع شوي لكن طريتوا علي شيء واجد

لكن والله العظيم لو اكتب لمدة 3 ساعات والله ما اخلص
[/quote]

wrs3975

04/10/2009, 12:23 AM

أخوي الغالي هاوي غمارة وكاشت وحداني ... تشرفت كثيرا بمروركما .... :)

الوافي99

04/10/2009, 06:30 AM

اللي يقهرك هههههههههه

اللي توه معرس مسووي رمنسي تقل الشارع له تلقاوه يسولف مع المدام ومطيز العالم

هههههههههههههههههههههههههههههههه

والله انك كذا :good:

الوافي99

04/10/2009, 06:32 AM

مشاركه مكرره

ahmad995

04/10/2009, 08:27 AM

اشين عادة اننا نلفلف يمين ويسار بالخط بدون ما ندق اشارة

ماسك الخط

04/10/2009, 10:32 AM

انا مايقهرن الا سواقين العوايل تلقاه بديرته يسوق سيكل وفجئه عطوه جمس جديد
لاسمع احد ضرب بوري مسك فرامل على طول ولا يعرف يتصرف مع الزحمه ودك تنزله وتطلعله الجمس وتقوله يالله فارق
والشي الثاني لا سرت بالسريع وانت ماسك المسار الايسر ومسرع همن يجيك راعي فورد والا ماركيز هو واشارته اللي تجيب النوم همن تبدا انت انواع التكبيس وابو الشباب يدخل عليك تقل انت واقف ويالله انواع الفرامل والروعه ولا اذا انت مسرع بموتر ديزل واوك متى يرجعله عقله يمشي مثل قبل

awod

04/10/2009, 10:50 AM

نصييييييييييييييحة يا اخوان
اذا حبيت انك تلف يمين او يسار لا تعطي إشارة وانما اطمر في الخط الي جنبك كانك هاج من داب لييييييييييييييييش ؟؟؟:confused:
لانك اذا اعطيت اشارة بيقوم الي جنبك يدووووووووس عشان لاتلف ويلزك ويضايقك كانك طامر في بيت ابوه .
انا عندي بليزر قديم مافيه من الزين شي مخليه لهالاشكال والحمد لله مئمن .:rolleyes:

Abdulaziz-25

04/10/2009, 11:01 AM

wrs3975

09/10/2009, 04:23 PM

أخوي الغالي الوافي أحمد 995 ماسك خط awod عبدالعزيز 25 أشكركم جزيل الشكر على المرور والإضافات الجميلة :) وهنا أعيد التأكيد أن الهدف من الموضوع تلافي هذه التصرفات :no2: ... بانتظار المزيد

بو خالد77

10/10/2009, 06:29 PM

اكره شي عندي,,

1-اللي يمسك المسار الايمن عند الاشاره ويسكر الخط.

2-انك ماسك اليسار تتجاوز ويجيك واحد مقلع ويكبس ويعلق على الكبس,,ياخي وين اروووووووح!!!انزل الردميه ولا تحت السياره اللي يميني ولا ويييييييييين!!,,,هالاشكال ذي على طووول بريييك محترم ولا افتح له الين يهجد وان راح يمين اسكر عليه ماأخليه,,,

وبالنسبه للانوار العاليه خلاص تعودت اول ماأمسك خط بالليل ارفع المرايه وانساها اليييين اوصل داخل الديره..

وسلامتكم....

wrs3975

22/10/2009, 01:46 AM

أخوي أبو خالد 77 تشرفت كثيرا بمرورك .... بانتظارالمزيد .....

الوتر الحزين

22/10/2009, 01:57 AM

فيه حكمه متداوله وهي

حط في بالك ان جميع اللي يسوقون بالشارع مجانين وانت عاقل!!

وفعلا اذا فكر الواحد في الشي هذا بيستانس ولايهمه شي

الستانس

22/10/2009, 02:07 AM

تبون الحل

حط راسك بثلاجه وانس العالم وخلك معهم ترتاح

ونصيحه خلك نظامي بس انس الإشاره هههههههههه

ازين واريح لموترك

واريح لك نفسيا

وانا اطبق هذا النظام حاليا

وشكلي انا اللي غاثكم:p

الادعج

22/10/2009, 03:33 AM

الصراحة الشباب اللي قبلي ماقصروا كفوا وفوا وادق ملاحظة واحسنها بنفس الوقت >>> حقين الزنون الصيني ومحنة التكبيس ...خلاص يابابا درينا انك مركب زنون ...مافية الا انت مركب يعني:mad: ....لا واللي يشب تسبدي تلقا الزنون الظاهر اغلى من السيارة:p بعض الاحيان لكن الحقيقة فيه عادة الشباب ما اذكورها هي الصراحة مالها دخل بقيادة السيارة ...لكنها تصير دائما عند الاشارات تدرون وشي
.
.
.
.
.
.
.
.
.
.
.
.
صيد الــــســمك عند الاشارة:p :D :p >>>ياسلااااااام تلتفت يمين او يسار وتلقى ابو الشباب دااااخل جو .....ما بقى الا المخ ويطلع....ياخوي فية اختراع اسمة منديل....اه اه اه اه لكن يله وش تسوي....يقولون ^غير جبل ولا تغير طبع^

PATHFINDER 4

22/10/2009, 12:42 PM

صيد الــــســمك عند الاشارة:p :D :p >>>ياسلااااااام تلتفت يمين او يسار وتلقى ابو الشباب دااااخل جو .....ما بقى الا المخ ويطلع....ياخوي فية اختراع اسمة منديل....اه اه اه اه لكن يله وش تسوي....يقولون ^غير جبل ولا تغير طبع^

هاع هاع هاع :p أضحك الله سنك <<لامن جد استانست عليها خخخخ:D

wrs3975

04/11/2009, 12:12 AM

الوتر الحزين ــ الستانس ــ الأدعج ــ أبو سعود أشكركم جزيل الشكر على المرور وإثراء الموضوع .. تحياتي للجميع

ألنشمي

04/11/2009, 12:22 AM

السلام عليكم

وش رايكم بالي يسوق السياره ورافع رجله اليسار على الطبلون ولا مطلعها مع الشباك, لا ورجال كبير ومعه عيله.
يعلمنا ان موتره تماتيك

النوفي 3535

04/11/2009, 12:44 AM

بصراحه الواحد يفكر يجيب سواق ويركب وراء
والله يرتاح
تعبنا من الرياض وزحمة وقلة الادب والله ماطلع من البيت من الي اشوفه
اليوم الصباح رايح للعمل وراي مصري امشي 120 يكبس تدورن وش سويت خليته
يروح تعدني اكبس العالي وامش وراء واضرب بواري ابي اخليه يطلع
يم تعديته خليته
بصراحه حزت في خاطري
ورحت يمين وهديت بصراحه نحن شعب يزعل بسرعه
الله يحفظنا ويحمينا من كل شر
بالمحبة نلتقي

wrs3975

04/11/2009, 06:15 PM

أخوي الغالي النشمي والنوفي 3535 تشرفت كثيرا بمروركم وإضافتكم ... وهنا أكرر لانريد أن نعالج الخطأ بخطأ مثله .. تحياتي للجميع

خزان الوادي

06/11/2009, 04:13 AM

دعوة لجميع (العملاء والاعضاء )

للمشاركة بمسابقة المنتدى لافضل 3 مواضيع للاطلاع على الشروط الرابط :
http://www.mekshat.com/vb/showthread.php?t=236655 (http://www.mekshat.com/vb/showthread.php?t=236655)

مع تمنياتنا للجميع بالتوفيق
خزان الوادي

أبو مشعل

06/11/2009, 10:37 AM

موضوع هام

ولكن قال لي واحد له اكثر من 50 سنه يسوق ..ما شاء الله عليه لا حادث ولا مخالفه

مده السواقه

يقول خل في ذهنك انك انت العاقل كل الي يسوقون مهبل (المعذره هذا مثل ) وسع صدرك

تراء ما حد اخد من الدنيا الي العمل الصالح

و دمتم

bader_2.0.1.0

06/11/2009, 01:19 PM

شامخ ألهيلا

06/11/2009, 01:35 PM

الي يقهر بجددد

تلقا قدامك زحمه طولها كيلوو وكآآآن قداام حادث
واخر شي واحد واقف يمين يغير الكفر
والعالم يهدوون ويناظروون فيه وكااانهم ماشافوا احد يغير بنشر
ياليت نرتااح من هالشي
لو تشوفون حادث بسيط او تعطل سياره
الي نبيه منكم تشموون ولا تهدون عندهم
لان بالاسلووب هذا عطلتوا الموظفين
والمرضى والحوامل

shaheenshah

07/11/2009, 02:05 PM

فيه بعد نوعيه بذيئه وعين قويه يكون مخطي عليك ويهاوش بعد من قوة الوجه

موضوع مميز ..

الحقيقة انا كنت في السابق اتضايق جداً و" اتهاوش معهم " وفي الاخير حسيت ان افضل شي انك تشوف وتسكت وتمشي في طريقك .. لانك ما تقدر تصلح العالم كله .. واي شي تشوفه سو نفسك ما شفت شي وامش ...

كلام عين العقل وازيد عليه وسع صدرك بعد

هذا احسن حل

أطلال نجد

07/11/2009, 04:37 PM

السرعة والتجاوز الخاطئ والتلحيم في سيارتك من الخلف لدرجة إنك لو تلمس الفرامل شمع فيك
والوقوف في المسار الأيمين عند الأشارة وتقفيل الطريق والبصق عند الأشارات أعزكم الله ورمي المعلبات والزبايل من شباك السيارة وهي ماشيه هذا كله كوم ووقوف المراهقين بسياراتهم في منتصف الشارع وتقفيل الطريق ودق حنك في صورة تنم عن عدم أحترام حق الطريق والذوق العام كوم ثاااني
والغريب لو تضرب بوري أو تأشر بالنور قالوا لك أطلع يمين ولا يسار :confused: !!!!!
يا رجال هذا شعب ماله حل