لحقوا على يالرجال مشيت على الدبل 140

[Hakamy]

السلام عليكم ورحمة الله وبركاته
وكل عام وأنتم بخير


ما بطول عليكم وسامحوني خذيت من وقتكم

موتري ناتيفا ماكينة 3000
طلعت من البر ونسيت الدبل على وضع الخفيف ومشيت بسرعه 140 تقريباً مسافة 15 كيلو
والسبب ان مؤشر الدبل ( الحساس ) عندي عطلان

المهم اللي حصل جيت اعشق الدبل وامشي على السفلت عادي الوضع لاكن مقدر لاجيت الف ( اكسر الطاره ) يوقف ومايمشي ويطلع صوت يشبه كأنه صوت تروس

هل مرت عليكم ؟
ولا وش الحل ؟
أنتظر فزعتكم

ولكم مني جزيل الشكر والعرفان

[طبعي شمالي]

والله ماعندي علم

بس لازم توديه الصيانهـ او الصناعيه عشان مايتطور الخراب ويصير شي اكبر

[abo_abdalah]

يا اخوي تطمن ما فيه مشاكل لو مشيت فيه 140 ان شاء الله

بس تأكد انه الحين فصل .. لانك لو طولت وانت تمشي عليه بيتضرر

[الوانيت1]

الدبل لازال مشبوك تأكد منه ثم أرجع بالسيارة مسافة 5 أمتار للخلف ليتم تماما فك أشتباك المسننات ................ /////.

[هلالي متعصب]

عادي وانا اخوك انا قبل 4 سنين

مشيت بالدبل مسافة ما يقارب 15 كيلو

وما دريت الا دخنت الموتر وراي


وما ادري وش صار بالضبط لاكن اني حملته على صطحه ووديته ورشه

ولقا الخراتيش متفككه وحاجات ما كلفت 300 ريال


والموتر ماشي الحين زي العسل


وشكراً

[هلالي متعصب]

نسيت اوضح الموتر



السياره يوكن 2000

[7767]

يبدو لي ان الدبل مافصل
لكن ترى مشكلته مشكله اذ اخرب
لانك ماتقدر تفصل الدبل وخلاص
يكون مشبوك بالقير
ولاتتأخر عليه

[البرااااوي]

مافيه مشكلة

لو كان الدبل ثقيل كان يتضرر

انت شف دليل المالك وشف كم يقول اقصى سرعه تمشيها

[فهد الفراج]

انا كن معي جيب نيسان شاص ماشيبه من حفرالعتش للرياض ناسي الدبل واذا لفيت احس بثقل في السياره احسب الكفر مبنشر ما طرا على بالي انه الدبل والحمد لله ما تاثر وابشرك اليوم الثاني مداوم والدبل شغال وانتبهت ان الدبل شغال يوم رحت اجيب فطور للشباب في العمل لان الدور كان علي واعتقد انه مايضره اذا كانك ما اسرعت

[قمة افرست]

مايضر دام على الخفيف
لاكن ات تقول فيه صوت اذا لفيت هذي والله اعلم رمان العكس
وده اقرب صيانة قبل مايصلب العكس
ولاتعشق الدبل ابدا لين تاكد من الرمان الي بالعكس اورمان الفلنجه الامامي

[سوبر مكشات]

ان شاء الله ماضره
لكن اذا صار شغال تحتمي المكينة

اذا ما احتمت عليك افصل الدبل وامورك زينه ان شاء الله

[فتك ابوفهد]

الدبل لازال مشبوك تأكد منه ثم أرجع بالسيارة مسافة 5 أمتار للخلف ليتم تماما فك أشتباك المسننات ................ /////.


اوافق الاخ على كلامه افصل الدبل وعشق السياره على R وارجع مسافه لا تقل عن 10 امتار

وان شاء الله يفصل


أما من ناحية السرعه مايضر اذا المسافه قصيره

انا بعض الاحيان في المقاومات :j

اشغل الدبل الخفيف من صفر الى 200كلم والحمد لله ماضر الدبل بس لمسافات قصيره والسبب عشان مايفحط محله يفز على طووول :good:

سلام

[سيف الظفير]

عطي الله الباترول نمشى عليه 120 الى 140 مايضره ابد

[Hakamy]

يعطيكم العافيه وبيض الله وجيهك جميع
المشكله عندي يوم اشبك الدبل الخفيف وامشي بدون البنزين يمشي تمام لاكن اذا كسرت للأخير يثقل دوران الكفر الين توقف السياره
الظاهر والله اعلم انه على ماقال خوينا قمة أفرست
بتأكد بكره واردلكم خبر
ونلتقي على خير

[MSAHMM]

عادي اخوي لا لفيت الطارة على اخر شي مايمشي تقل ماسك الكفر هذا اي دبل كذا وخاصة لا صرت في الزفلت ( يكرم السامع )

ما فيها الا العافيه ان شاء الله والصوت اللي تقصده اتوقع زي لفت الطارة على اخر شي يطلع صوت وهذا طبيعي جدآ مثل ما قالو الشباب افصل الدبل وتأكد

[ابوطاقية]

اي سياره دفع رباعي يكون الالتفاف صعب وثقيل اذا الدبل مشبوك

[GMC79]

صارت معي مسافة 75 كلم والسرعة 140-160 ك/س
ولا صار شي لله الحمد بس البنزين راح الموتر جمس حوض قير عادي 2500موديل 2002
وان شا الله موترك ما فيه شي

[الكونترولCONTROL]

عادي كونك تمشي على الاسفلت و مشغل الدبل انه ما يمشي
الموتر مضبوط ... و يطلع صوت ... شيء طبيعي جدا
؟لأن الدبل لا يشغل على الاسفلت ... المهم : ما هناك الا العافية !
مشيت مسافة اكثر من 100 كم بسرعة 130 و لا صار شيء

[روحي شمالية]

انا مشيت على باترول 2001
مشيت عليه 160 والدبل الخفيف شغال ولا ضرة ماشاء الله طبعا ماكنت داري
الكلام هذ باول العيد والحين مثل اول وازين

[مواسي الطعوس]

طبيعي جدا جدا .

المسافه قصيره والسرعه غير عاليه .

لكن احذر يسوق الموتر غيرك لانه رايح ينسى الدبل لازم تصلح اللمبه (يمكن حساس او السلك منقطع )

** المشكله فقط : اذا انت لفيت بقوه على الاسفلت (اذا لفيت فوق تحت) هذا سبب خراب جنزير الدبل او التروس حسب السياره .

** الان في الربع الخالي باتجاه الرمله يفضلون الشاص النيسان لتحمله السير لمسافات تصل الى 90 كيلو بالدبل الثقيل لكثرة الرباضات .والثقيل يعطيك العزم بسرعه .

[قمة افرست]

يعطيكم العافيه وبيض الله وجيهك جميع
المشكله عندي يوم اشبك الدبل الخفيف وامشي بدون البنزين يمشي تمام لاكن اذا كسرت للأخير يثقل دوران الكفر الين توقف السياره
الظاهر والله اعلم انه على ماقال خوينا قمة أفرست
بتأكد بكره واردلكم خبر
ونلتقي على خير

كما سبق وذكرت لك اذا الصوت زي ماوصفت صوت صرقعه تروس
يكون والله اعلم الرمان
ولازم تاكد عن اقرب ورشة للاطمئنان وان شاء الله يطلع سليم مافيه شي

[Hakamy]

يعطيكم الف عافيه يالرجال
والله اني سعيد جداً بمشاركتكم جميعاً
واتشرف بالتعامل مع هالوجيه الطيبه
وجزاكم الله خير الدنيا والأخره


وابشركم موتري زبط ولا فيه الا العافيه بس زي ماتخبرون خويكم عليمي في الجيوب

واكرر لكم الف شكر وجعلها في ميزان حسناااااااتكم:d :d :d :d :d :d :d