أريد سيارة للبر معقولة وش تنصحوني يا أهل الخبرة النشامى ؟

[كشات غربي]

السلام عليكم
أريد سيارة للبر فقط معقولة بسعرها ومستخدمة
وش تنصحوني يا أهل الخبرة النشامى ؟
أريد النوع والموديل وتقريبا سعرها بالسوق كم
مشكورين مقدما

[hally]

كم دراهمك أخوي بالظبط

[عاشق السيل]

كم فلوسك ؟؟

عزوبي وإلا متزوج ؟؟

كم عدد عيالك ؟؟

وش كثر طلعاتك للبر ؟؟

أنت راعي نفود وإلا فياض وربيع أكثر ؟؟

تبيها لحالها وإلا مع سيارة ثانية ؟؟

أنت جاوب على الأسئلة وأبشر بعزك .....

[بو خليفه]

عطنا التفاصيل

[Mekshaati@]

كم فلوسك ؟؟ 50

عزوبي وإلا متزوج ؟؟ متزوج

كم عدد عيالك ؟؟ 1

وش كثر طلعاتك للبر ؟؟ كل اسبوعين

أنت راعي نفود وإلا فياض وربيع أكثر ؟؟ كلهن

تبيها لحالها وإلا مع سيارة ثانية ؟؟ وش رايك انت

أنت جاوب على الأسئلة وأبشر بعزك ..... كفو

[COBRA999]

كم فلوسك ؟؟ 50

عزوبي وإلا متزوج ؟؟ متزوج

كم عدد عيالك ؟؟ 1

وش كثر طلعاتك للبر ؟؟ كل اسبوعين

أنت راعي نفود وإلا فياض وربيع أكثر ؟؟ كلهن

تبيها لحالها وإلا مع سيارة ثانية ؟؟ وش رايك انت

أنت جاوب على الأسئلة وأبشر بعزك ..... كفو


يا أبو موسى

انا ماراح امدح لك سياره بحد ذاتها لاكن بقولك تجربه وانت خذ كلام الاخوان الي بيكتبون تجاربهم وشف وش يصلح لك

انا اشتريت اكسبلورر 2009 دفع رباعي قيمته جديد ب 96000 ريال فئه متوسطه
السياره ابداع فوق ما انا كنت اتوقع مركب مريح للعائله وثبات رهيب و مكيف بارد و دفع رباعي جيد جداا وثلاث صفوف مقاعد تنطوي وصيانه مريحه وقطع غيار مايحتاج صار الفورد مشهور ارخص قطع غيار في وكالاتنا كلها و مردود سعر رائع جدا بعد الاستخدام حسب ماهو باين في السوق والطلب عليه كبير جداا

وفي الختام ماشالله والله اكبر ولاحول ولاقوة الا بالله

استخير وربك يكتب لك الي فيه الخير ااامين

[ابو فهد حاايل]

خذ لك جي اكس
مديل 92 تقريبا
اتوقع انه يصلح لك

[جـرح الشمـال]

خذ فتك اافضل

[فتك ابوفهد]

برتبها حسب الموديل :

1_ باجيرو موديل 2005
2_ باث فندر موديل 2004
3_ برادو موديل 2004 < 4 سلندر
4_ باترول موديل 2001
5_ Gx موديل 97

كلها سيارات جيده ويابانيه
و أسعارها أتوقع حول الـ 50 ألف طبعاً نظيفه بشكل عام
وأنت أبخص

[NEWASSER]

الله يوفقك للسياره اللى تسرك
مثل راي الاخوان بس ما انصحك بالموديلات القديمه يعني من2003 وطالع
وبالخمسين تجيب لك باجيرواا2005-2006 سياره مكده ولا يردها شي
ولا هايلكس دبل سياره جباره
والجموس بعد ما هي شينه في الطلعات
والله يوفقك

[Traveller]

اخوي اذا تحب الامريكي انصحك فورد اكسبلورر 2006 بداية الشكل الجديد تحصل امريكي بنفس القيمة اللى معك ونظيف

او شوف لك باترول فتك نظيف واعيد واكرر نظيف لانه النيسان اذا مااخذته نظيف والله لايتعبك اسئل مجرب كنت بقول لك لاندكرورز من 98 بس اسعارها غالية اذا تقدر شوف لك في اكس ار 99 وفوق والله موتر والجي اكس ار حلو بس ثقيل وخاصة لوجاء اتوماتيك والله يوفقك يارب في الاختيار

[فتك ابوفهد]

^^^ اصلاً ماراح يلقا فتك بـ 50 الف لا ونظيف بعد مستحيل

المكينه لحالها حقت الفتك في التشليح بـ 30 الف

[Traveller]

من قال لك ماراح يلقى وربي فيه واحد 2003 سوبر سفاري لونه زيتي قير عايدي صاحبه طالب فيه 55 الف ويمكن بعد ينقص خالي من الرشوش ماعدا الصدام الامامي وموضب مكينته في الوكاله وانا كنت قبل فترة في المعارض ماحصلتك اقل من 65 الى واحد وذكرته قبل شوي

[فتك ابوفهد]

عندي رجال له نظر عطني رقم صاحب السياره او المعرض اللي هي فيه الله يجزاك خير

وانا ماكذبتك بس اقول مستحيل تلقا فتك بـ 50 الف

يا خي جارنا شاري باترول سوبر موديل2001 56 الف وهو 4500

[فتك ابوفهد]

طبعاً بعد اذن صاحب الموضوع

ارسل لي الرقم عالخاص

[Traveller]

اقسم بالله اني صادق في كلامي واتصلت عليه وقال لي ان الموتر ماشي فوق 300 الف وموضب في الوكالة ومعه الفواتير ولون السيارة زيتي والصدام الامامي مرشوش وهذا الكلام قبل فترة لكن اوعدك اذا حصلت رقمه لكتبه هنا على العام لان مشاركاتي قليلة

[فتك ابوفهد]

خلاص الله يجزاك خير مايحتاج تحلف والدعوا وانا اخوك حوار اخذ وعطا لا تظايق عشان كسرت حديد
وانا والله العظيم مصدقك وردي الاول والثاني عليك مجرد رأي واضح مافيه لا تكذيب ولا غيره
وكلامي قلته حسب خبرتي عن اسعار المستعمل ان وجد تراه نادر تحصله في معارض الرياض تنعد عالاصابع
ومن كثر الدوران بالمعارض اعرف اسعارها وانا اخوك

وبرسل لك رقم جوالي عالخاص اذا حصلت رقم الرجال ارسله لي ولا عليك امر

[Traveller]

ابدا ماتضايقت ولا زعلت اخوي ابو فهد وكلامك صحيح ان الفتك نادرا تحصل ب50 الف وانا برضه دورت ماحصلت اقل من 65 الى هذا الى قلت لك عليه واتصلت عليه واعطاني حده 55 الف طبعا القير عايدي فتحة انوار زينون كامل المواصفات وقال لي موضب في الوكالة وفيه صوت لما يعشق في النمرة الرابع وتهريب في الصوفة كنت باخذه لك استشرت اكثر من واحد وقال لي لونه غير مرغوب والمكينة موضبة وفيه صوت لما تعشق الرابع وكلهم اعطى في الموتر من 55-60 والرجال بياع 55 وهو في جدة وكنت بروح له ورقمه بشوفه اذا حصلته في جوالي الاول او في الايميل وبعطيه لك انت ارسل لي رقمك على الخاص وباذن الله احصله وابدا مازعلت ولا جاء في خاطري اي شي واسف اخوي صاحب الموضوع على خروج عن موضوعك

[Traveller]

سوف يتم ارسال الرقم

[عاشق السيل]

كم فلوسك ؟؟ 50

عزوبي وإلا متزوج ؟؟ متزوج

كم عدد عيالك ؟؟ 1

وش كثر طلعاتك للبر ؟؟ كل اسبوعين

أنت راعي نفود وإلا فياض وربيع أكثر ؟؟ كلهن

تبيها لحالها وإلا مع سيارة ثانية ؟؟ وش رايك انت

أنت جاوب على الأسئلة وأبشر بعزك ..... كفو

الشباب ماقصروا الله يعافيهم ،،

لكن وجهة نظري إنك تاخذ باثفايندر 2003 أو 2004 هي الأنسب لك بس احرص على النظيف !!

وموفق لكل خير أخوي ...


أخوي كشات غربي بانتظار أجوبتك ياصاحب الموضوع !!!!

[االعتيبي]

انابالنسبه لي انصحك تاخذ لك هايلكس دبل 2007او2008 سياره جديده وعلى قد فلوسك ومع ذلك قويه ومريحه وماسكه سعرها والله يرزقك

[االعتيبي]

انا من رايي تاخذ لك هايلكس دبل 2007او2008 استخدامها حلو ومريحه واقتصاديه وعلى قد فلوسك وموديل جديد والله يرزقك بالموتر الطيب

[برق الشتاء]

تويوتا Gْx والحق اهلك
فليساتك طيبه الله يبارك لك فيها تجيب لك جيب تويوتا Gx موديل 99 او 2000
طيب لكن نصيحه لاتفكر الا بتويتا لك وللزمن . وشيك في جيبك

ولاتهون مشاركة بقية الزملاء

[abo ruof]

والله وانا اخوك وال شيء الله يوفقك في السياره ويعطيك خيرها ويكفيك شرها ان شاء الله

بس انا انصحك في الدرجه الاولى تويوتا والثانيه نيسان وبعدها الباجيرو

تويوتا خذ تحمل ومكده وفخامه Gxr

نيسان الباترول اقل فخامه بكثير لكن خفيف في النفود ومكينه قويه لكن يعيبه صرفيه البنزين اكثر من الاندكروزر

الباجيرو قطع غياره غاليه بحكم انه متسوبيشي لكن ماجربته للامانه

اما من يتحدث عن الامريكي الكسبلورر انا انصحك تبعد عنه لاني وجدت موقع في النت امريكي يحدد اكثر السيارات اعطال واحتلت الاكسبلورر المرتبه الاولى في اعطال وخصوصا القير بعدها الدوج ثم الهوندا


انا كنت ابحث مثلك وجلست فتره وشاورت ناس كثير لا تستعجل انا مثلك ماعندي الى طفله

والحمد لله شريت المفخره لاندكروزر Gxr2006ومايحتاج في الخط راسي جدا افضل من الباترول

هذا الي قدرت افيدك به وسامحني على القصور

[ahmad995]

انصحك بالباترول
تلقى شي نظيف موديل 2001 فل كامل

[تاج1426]

ليش ما تريح بالك وتشتري لك جيب gx من موديل 92 الى 97 وصدقني تبي ترتاح وتنسى المناطق الصناعيه لان صيانته معروفه عند اي واحد ولا فيه مشاكل مثل السيارات اللي اذا شافتك ابتعدت عن الناس تعطلت وبهذلتك بقطع الغيار

[wafian]

والله يرزقك و يرضيك

[برق الشمال 11]

^^^ اصلاً ماراح يلقا فتك بـ 50 الف لا ونظيف بعد مستحيل

المكينه لحالها حقت الفتك في التشليح بـ 30 الف
والله لوهي مكينة طياره 30 ألف !!

[تناهيت]

غرضك جمس أو شفر غمارتين 2005أو غمارة ونص 1500 مركبه مركب يوكن وصندوقه يشيل اغراضك كلها وتفصل عليه شد وتركب تانكي موية ووووالخ صدقني بيريحك وتحصله بهالقيمة

تحياتي

[شحفان القطو]

السلام عليكم

اخوي خذ الراي الطيب

هايلكس دبل مديل 2006 -2007

1- قوة
2-سعرة ماسك في السوق
3-فية حوض للتحميل
4- ما يتفكك

[ابوطاقية]

اذا هي سياره ثانويه لاتبعد عن الربع التايوتا والا النيسان

[فتك ابوفهد]

والله لوهي مكينة طياره 30 ألف !!


اي نعم بـ 30 ألف :mad: :mad: :mad:
وازيدك من الشعر بيت المكينه حقت فتك قديم من موديل 2002 الى 2004


واذا حصلت نظيفه ومامشت كثير الموديلات الجديده 2009 _ 2008 والله ماتشدها دون 35 ألف الى 40 ألف بعد

[ابوعوض009]

انصحك خذ ددسن 85