كيف توزن الدربيل بدون ما تطلق أي طلقة

[الخبير]

السلام عليكم
اولاً احب اشكر اخوي شقران على إتاحة الفرصه لي لتصوير العده إلي تبون تشوفونها بعد شوي.
انا قريت موضوع واحد من الشباب : كيف توزن الشاخوفه بطلقة واحدة ، لكن مع العدة ذي ما تحتاج تطلق ولا طلقة.
العدة عبارة عن مسامير ( خلوا نسميها كذا ) و شبه دربيل .

http://nobody.jeeran.com/scop_2.jpg

طريقة الوزن هي كالتالي :
اول شئ تشوف وش عيار البندق إلي عندك ، خلنا نقول خرازة و الخرازة عيارها 22 ، تقوم تاخذ مسمار رقم 22 و تربطه بشبه الدربيل.
ثم تحط اول المسمار في فتحة السبطانه كذا
http://nobody.jeeran.com/scop_fixer_1.jpg

ثم تاظر في دربيلك ، طبعاً تبي تلقى قدامك شبه الدربيل و في داخله ورقة مربعات ، و في وسط الورقة رسمة الزائد المعروفة في الدرابيل كلها.
إلعب في فرارات الدربيل حقك لين تجي زائد الدربيل على زائد الدربيل الثاني .
اذا تطابقوا ، هذا معناه ان العملية انتهت و صرت بواردي .
هذي صورة تفصيلية مبسطة للعدة و طريقة استعمالها ، مع العلم ان هذه العدة تصلح لاي بندق و أي فرد ما دام عليه دربيل طبعاً :D
http://nobody.jeeran.com/scop_3.jpg

[شقران]

عشت والله يالخبير أنا اشهد أنك خبير جبتها كامله ووفيت وكفيت ماشاء الله شرح بدون بعد الكتالوج
تحياتي لك وبالتوفيق ياغالي

[راعي الجيوب]

كفو والله انك خبير من جد والصراحة الموضوع ممتاز

[عبدالعزيز الدباسي]

بارك الله فيكم يالخبير وياشقران وما قصرتو على المجهود الرائع ، والحقيقة ان هالعدة تريح بالمرة ،
بس ما قلت لي يالخبير وين نلقاها فيه بالرياض ، ومشكور على هالخدمات الجليلة في منتدى الاسلحة .

بس حلوة الدعاية على ساعة ابو فجر:p :p


<CENTER><P><IFRAME WIDTH=65% HEIGHT=240
SRC="http://shagrdi.jeeran.com/shegardi1.swf"></IFRAME><BR></CENTER>

[الخبير]

السلام عليكم
و الله يا الحبيب هذي العدة تطلبها طلب من الشركة لاني ما اعرف احد في الرياض يبيعها ، يمكن لو درو عنها يجيبونها.
وعلى فكرة ترى ابو فجر مواهب مهوب بس في الاجهزة ولكن في اشياء واجد :light:

[الجافي]

اخوي الخبير حقيقه معلومات قيمه
ولكن كيف نطلب هذه العده نرجو كتابة عنوان الشركه وهل تصل الى الرياض بسهوله او ممنوووووووووووع
عندي اقتراح تعزمنا في هالمجلس الزين ونجيب سلاحنا ونضبطه عندك وش رايك
اخوك الجافي

[المهتوي]

ألسلام عليكم ورحمة الله وبركاته............

مشكور يالخبير على الجهود الكبيرة لافادة الجميع

العده ذي جميلة وجيده ولكنها غير دقيقة إطلاقا .....

لأنه ببساطة الفشق يختلف عن بعضه من حيث القوه ...

فأنا جربت وزن الدربيل بواسطة هذا المنظار من شركة تاسكو ...

ولكنه ممتاز في وزن الجوانب وليس المسافه يعني تستطيع الاعتماد

عليه في الوزن فالطلقه لن تذهب لا يمين ولا يسار ........

ولكنها :( سوف تكون فوق أو تحت :)

حتى كما ذكرت سابقا كل فشق له وزنيه خاصه ....

فمثلا الستنقر المخرّق أقوى من الفشق التشيكي لذلك لما ترمي

على برميل مثلا تجد الستنقر فوق التشيكي بأكثر من شبرين أو ثلاثة

لذلك لا بد من الرمي ومن ثم الوزن :)

[الخبير]

السلام عليكم
اخوي الجافي : هذا الجهاز تطلبه من الشركة نفسها تقدر تكتب اسمها في الياهو و يطلع لك عنوانها مباشرة.

اخوي المهتوي : الدربيل يوازن يمين و يسار و فوق و تحت . لان فرارات الدربيل تسمح لك بتحريكه في اي اتجاه ( لاحظ اني اتكلم عن الدرابيل الجيدة ) .
ما يتعلق بطلقة الستنجر ، من استعمالي لطلقات ستنجر لقيت انه ترتفع بشئ بسيط بعد ما تطلقها ، يعني اذا طلقت بشكل مستقيم على هدف امامك تلقى ان الطلقة ترتفع شوي عن الهدف.
و على فكرة كلنا نخطي و المويه تكذب الغطاس

[شقران]

ممكن اشارك يالربع.

ياالمهتوي ردي سيكون عليك اذا سمحت لي.

من المعلوم بحال ان أي منظار أو دربيل كما قال اخي العزيز الخبير يكون وزنه للهدف يمين او شمال تحت او فوق هذا للوزن.
بالأضافة لذلك يكون في اي منظار محترف (ولست هنا اعطي دعاية لمنظاري ياخوان) يجب ان يكون فيه زوم مسافه ونقاط تحديد للهدف. الزوم يقوم بالتقريب لتوضيح الرؤيا ونقطة تحديد الهدف هذه قبل الرمي تقوم بتقدير المسافة التي عليها الهدف ومن ثم تحرك نقطة التحديد هذه وتكون عادة في مقدمة الدربيل او المنظار واللي عندي نوعه ابو طير الياباني الأصلي قيمته اغلى من البندق حاليا فعندما تكون مواجها لهدفك تقدر المسافة ومن ثم تفر فرار نقطة التحديد لمسافة الهدف التقريبية وبناء عليها لن تخطي الهدف انشاء الله مثال على ذلك تم اصابة هدف على بعد 150 -200 متر في كبر راس الضب وذلك بواسطة وزن الدربيل المذكور بوازن الدرابيل الذاتي تاسكو ونوع الفشق لازال عندي وهو الأسترالي ابو ارنب المخرق اللي اظن ان ستنجر مايجي عنده شي في القوة حسب رائيي المتواضع
لااحتجاج انشاء الله على كلامك لاكن احببت اوضح وجهة نظر من صاحب البندق والدربيل الوازن الذاتي والرامي بنفسة وبشحمه ولحمه تحياتي لكم جميع وآسف على هذه المداخلة .
تحياتي لكم جميع

[المهتوي]

المنظار ألي يازن هذا موجود لدى الهدف فرع القصيم ،وقد قمت بوزن

خرازتي :) عندهم وتسحلن كفرات سيارتي وأنا رايح جاي

أدهر على الزول حق المحل يقول أن الدربيل موزون لكن

أروح أرمي بحوش بيتنا :) (ألحين التلييص راح) من العجله

ألقى الرمي يافوق يا تحت ، أكيد إني أقدر أزن الدربيل بنفسي أنزله وأرفعه

لكن وش خانت وزن السوداني لاني صراحة مليت ، خاصة بعد أن تبين لي

أن الفشق يختلف وأنا لا أستخدم نوع معين -بالمناسبة الاستنجر أقول من أبو أرنب-

حتى أني بغيت أكسر الدربيل لكن وزنته بنفسي بعد تثبيت البارود ورمي رميه

والوزن عليها كما ذكر الأخوان ،طبعا أخذت أحسابي لكل نوع يعني التشيكي مثلا

أرفع الوزنية خمسة فركات مثلا ، وبكذا بلا منّت الزول ودرابيله :) ما فّر مني لا ضب

ولا قميرية-يابعدي بعد- :cool:

[الجافي]

هذي طريقه مجربه ولا نستغني عن راي اخي الخبير

لوزن الخرازه نحضر جهاز ليزر صغير متوفر بكثره ثم نجعله يشتغل بلف شطرطون على زر التشغيل ثم ننزع تعشيق بيت النار ونضع الجهاز بدلن منه بحيث ان نور الليزر يخرج من فوهة الخرازه بدون ان يلامس جوانب الماسوره ثم نثبت الخرازه على ملزمه ونوجهها الى جدار بعيد بحيث ان نقطة الليزر تكون واضحه ثم تبدا بفر وزنية الدربيل الى ان يكون الزايد على النقطه وبهذا تنتهي العمليه .

تحياتي للجميع

[السكب]

(بعد أذنك يالخبير) ممكن أسأل ياأخوان............. عن أفضل دربيل مستخدم ......وما رأيكم بالدربيل الياباني أبو 250 ريال تقريباً.........وشكرأ

[دربيل]

تسلم اخوي على المعلومات المفيدة

[شمســـان]

رائعة رائعة فكرتك يالجافي
ماشاءالله عليك ولاهي على البال
بارك الله فيك

[جساس]

السلام عليكم ورحمة الله الله وبركاته .
أرحب بجميع أخواني الأعضاء والمشرفين .
بالمناسبة العدة هذه موجودة في محل الرماية بالرياض وأنا أمس ( الأحد ) أخذت وحدة ، وهذا كله بفضل أخوي الخبير ، بالمناسبة سعرها 280ريال .
واليوم وزنت دربيل الخرازة لكن ما بعد جربتها ، بس في ملاحظة في تركيبها : إذا وزنت الصليب على الصليب لا تخليه مطابق له ، ولكن خله مطابق عمودي بس الأفقي خليه على الخط رقم 2 من أسفل على الشبكه .
ولكم جزيل الشكر .

[ALmorsaoi]

بسم الله الرحمن الرحيم
السلام عليكم
الحقيقة موضوع شيق وحبيت ان اشارك من واقع تجربه
مثل ما تفضل اخوي الجافي وذكر نعقب شوي بس
اذا ما كان عندك ليزر حاول ان تضبط على ورقة او أي شي تشوفة مع الماسوره اما ضبط الصليب على نقطة الليزر فهو الخطاء بعينه وعلمه والسبب ان هناك مسافة بين تقاطع سعرات الدربيل ونصف فتحة الماصوره حوالى 2 سم على حسب حجم الدربيل فعندما يكون الهدف قريب يرتفع الرمي والعكس
اما اذا زادت مسافة الهدف عن المسافة وقت الوزن تعال وشوف الفرق وكل ما زاد الفرق سواء زود او نقص زاد الفرق بشكل يفشل و وينك يالي تضحك
اما الطريقة الصحيحة هي اخذ هذه المسافة في الاعتبار وقت الوزن وسوف تستمر الوزنية معك الى ان تصل الطلقة الى النقطة التي تبداء فيها بالنزول والنزول يكون متراكم وغير منتظم وهذه المسافة يحددها نوع البارود وقوته بمعنى نوع الفشق وبهذا نحصل على مسافة مضمونة وهي مسافة نشاط الطلقة اما الوزنية في الاتجاه الجانبي فهي لا تتغير معك مادام المنظار ثابت والماصورة مستقيمة وخالية من العيوب مع العلم ان بعض الدرابيل تتأثر بالحرارة وتختلف الوزنية فيها
http://almorsaoi.jeeran.com/images/mors2.jpg

[الجافي]

تسلم اخوي الباجيرو

تصدق ان المشاركه لها شهرين واول واحد يعقب على المشاركه هو انت .

اشكرك وتحياتي لك ,,,,,,,,,,,,,,

[الخبير]

السلام عليكم
اخوي جساس ما قصرت على المعلومة ، لكن اتمنى لو تعلمنا اذا فادك او لا .
وش السبب إلي ما يخليني اطابق الصليب على الصليب ؟
و جربها تكفى و علمنا

[جساس]

السلام عليكم ورحمة الله وربركاته .

مرحبا بالربع كلهم .
أخوي الخبير : هذه المعلومة أخذتها من فني الرماية ، لأني شرطة علية قبل ما أشتري العدسة ، أعرف كيف أوزن الدربيل عليها ، طبعا كما هو معلوم لديكم أن الدربيل لازم توزنه على مسافه معينة ومن ثم أنت تقدر مسافة الهدف الي ترميه ، قلتله أبي احدد المسافة على 50 متر، قال : حدد الهدف على خط الشبكه رقم 2 من تحت .
وأنا والله ما بعد أجربها إلى اليوم ولكن كل هذا استعداد للربيع إن شاء الله .
ولكن خلال هذا الاسبوع إن شاء الله راح اعطيك التجربه ، وإذا كان في هناك أي ملاحظات .
والله الموفق .

[الضلع]

بسم الله الرحمن الرحيم
ـــ في بداية الامر نحن وغيرنا عانينا من إختلاف الدربيل وتغير وزنه وبالذات اذا كان على بندق كبيره
مثل: ( قناصه برنو ) ( ام خمس بلجيك ) وغيرها ....
ومن المشاكل ايضا هي صعوبة وزنه بسرعه وزروف اقل, حتى وجدنا هذا الدربيل الأسطوره
وبسعر مناسب , الدربيل صناعه عراقيه ويفضل للبنادق الكبيره لما له من قوة تحمل عجيبه
حتى ان بعض الاوقات تسقط البندق وتتجرح وهو لا يتأثر ولله الحمد , ومن مميزاته انه
ليس صليبا من الداخل ولكن على شكل ثمنيات ( نفس دربيل الشاخوفه تقريبا ) وهناك ميزه
لهذه الثمنيات لا يعرفها ولا يصدقها الا خبرا الدرابيل هي ان الصليب يغطي الهدف اذا كان
صغيرا وبعيدا بينما هذه الثمنيات لا تغطيه لانك ترمي على رأسها .
ـــ وبالنسبه لوزنه فهو سهل لان مفاتيح الوزن ذات عدد محدد , فارمي رميه على هدف معين ثم اصوب
البندق مره اخرى وارى موقع الرميه من الهدف ثم اثبت البندق على هذا الوضع واحرك الثمانيه من
الهدف الى ان تنطبق على موضع الرميه عن طريق مفاتيح الوزن وبذلك إنتهة عملية الوزن.,,,,

ـــ ملاحظه: * نوعية القواعد لها دور كبير جدا في اختلافه,,,

والله أعلم...
http://www.mekshat.com/pix/upload/images/160.jpg

[((( الحر)))]

حيالله الجميع وشكراً لكم على هالمعلومات القيمه جداً وبدون مبالغه ووالله لواخذ شهر ادور هالملومات عن الدرابيل والفشق مالقيتها :
وعندي مشاركه من واقع تجربه وهي
من ناحية الفشق فانا انصح كل اخواني نصيحة اخويه بعدم استخدام فشق الاستنقر لانه كما قال اخوي المهتوي يرتفع عن الهدف يعني توزن عليه ولاكن لا تصيب بانواع الفشق الاخرى مع العلم انه اغلى الانواع سعر
من ناحية فكرة اخوي الجافي الوزن بواسطة جهاز ليزر مشابه للقلم فانا شخصياً لي ثلاث سنوات وانا اوزن بهالطريقه ولا احسن منها بشرط !!!! انك تبعد نقطة الليزر بعيد حوالي 150 الى 200 متر ولا زم تكون بالليل علشان تكون النقطه واضحه وتحط الصليب في منتصف النقطه بالضبط انتبه لازم تكون بوسطه بالضبط لان المسافه بعيده واي انحراف عن منتصف النقطه يغير الوزنه وبكذا صيد على راحك باذن الله منتب مخطي
وسلامت الجميع!!!!!!!!!!!!!!!!!!

[الفارس]

بصراحة اخوي الجافي
فنتـــــــــــــــــــــــاستييييييييييك
احلى طريقة من احسن ناس
توزن البندق وانت تشرب الشاي في ليلة قمارية
ولامن شاف ولا من سمع
:cool:
:cool:
:cool:
:cool:
:cool:
وحيا الله الجماعة
بس ما لنا غنى عن الوزن بالطلقة مع احترامي للجميع
لانة مايبرد الخاطر حتى تجرب الوزنية بالطلقة يعني
ما تطلع وانت مغمض على الوزنية(بالعدة .او الليزر)

[salih9]

الله يعطيكم العافيه شباب ماقصرتوا

وفيتو وكفيتو

والى الامام وعلى القوة

[ابوذيب]

اما انا فجربت كل هذه الطرق وماجازت لي ،، الا بعدما قررت عدم استخدام الدربيل والتعود على الرمي بشكل عادي مع مواصلة التمرينات اثناء استرحة المحارب كان اضع نيشان وارميه بعدة طرق ،،،،،،،،،،تحياتي للجميع

[القنيص]

بصراحة هذا الميزان ( تاسكو ) ممتاز قد جربته لكن يلزمك أنك تجرب مسافة بعيدة وقريبه والأفضل من ذلك مسافة متوسطة لأنك ماراح ترمي الطير على مسافات بعيدة أذا طالت متوسطة المسافة


لكم تحياتي ,,,,

[راع الحبارى]

من يفيدنا يقيمة دربيل الوزن هذا

[الرامح]

كلامك عين الصواب الله يجزاك خير

[زين السجايا]

مشكوووووووووووووووووووور يالخبير


ممكن الصور الله يعطيك العافية


تراني محتاج الموضوع