سؤال لملاك الباترولات

[الجش]

السلام عليكم ورحمة الله وبركاته
اما بعد اسعد الله صباحكم بالمسرات والخيرات يالربع ابي فزعتكم الله لايخليني من هالوجيه عندي بترول موديله 93خرب السلف ودورت في المحلات ولقيت الاصلي غالي ولقيت ماليزي 290 ويمدحونه قلت مالي الا مكشات وابي رايكم يالنشاما الماليزي يكد\ والا اتوكل على الله واخذ الاصلي

[taal0]

صباح الخير توكل على الله واخذ الاصلي احسن

[PATROL]

نصيحه لوجه الله لاتركب الا اصلي
تخسر ميه او ميتين زياده بس تطول معك سنين وتمشي وانت مرتاح البال ولاتخاف انها تخرب فيك ثاني مره بعد الله سبحانه وتعالى
اما اللي ماهو اصلي يخونك ويمكن يخونك في بر وفي مكان ماحولك احد!
انا كذا مره اركب تقليد ومايخذ معي شهرين الا هو خربان ثم اشتري ثاني مره الا انا خسران قيمة الاصلي!
تقبل تحياتي

[المويزري]

عندنى بالكويت يجفدونه والسفاري السلف التجاري يخرب ركب اصلي والله يعينك على سعره

[سفاري959]

اولاً السلف اذا يتصلح صلحه ما فيه احسن من البلد بالنسبه للماليزي انا ركبته جلس سنه ونص وخرب وركبت ياباني يجي بعد الاصلي يمدحونه اما الماليزي ما انصحك فيه والاصلي غالي

[باترول 4500]

وعليكم السلام

انا شريت سلف أصلي من التشليح بـ 350 ريال يعني زوود لك 60 ريال أزين من يخرب عليك السلف الماليزي وتبلش

[hamido]

فيه نوعيه اسمه ( سار ) ممتازه ركبته وقعد سنه وبعت الموتر وهو به

[صيادالجبيل]

الاصلي احسن

[majed_92]

السلام عليكم
توكل على الله وخذ اصلي

[الخالدي..]

اخوي اذا كنت بالرياض عندي لك ورشة يولفة لك ب50 ريال بس
كانت عندي نفس مشكلتك كنت كل فترة اغير السلف طفشني رحت لورشة ذي قال بجددة لك وبغير القلب من عندي وبـ50 وضمان شهر قلت بجرب ومن يومها وهو يرن الا يومك الحمد لله هالكلام من يجي سنة وثمان شهور

[هويدي]

كانك راعي فك وربط إعادة الحياة لسلفك الاصلي بتكلفك 70 ريال


خرب علي سلف الباترول قبل 4 سنوات تقريباً وشريت الماليزي بـ 230


وخليت الاصلي عندي .. استعداداً للحبرشه :)


فكيته واكتشفت ان الخلل من الفحمات ... شريتها من الوكاله بسبعين ريال
فكيته وشفت الفحمات القديمه صايره كنه سنون عجوز لاعبنبهن السوس ( متئاكله))
ركبت الفحمات الجديده وصنفرت النحاسات همن دحيت سره شحم
وطبقته لفيته بكيس وخليته عندي تحسباً لخراب الماليزي :)


وماقصر تحملنا 4 سنوات وخرب الاسبوع اللي طاف وركبت الاصلي ومشا الحال ولله الحمد


اهم نقطه قبل التركيب تسوي تجربه للسلف
تشبكه بأشتراك واذا مالك بالفك والربط اشتر الفحمات واقرب كهربائي

[ابو خالد 1992]

تأكد من فحمات السلف اول شي 90% الخراب منها و تروح للورش يقول لك سلف يبي يسرق سلفك ومخباك

[التعـ King ـديل]

عزيزي شيك على الفحمات وتلاقيها عند بن شبيب ب 65 ريال يالصناعيه القديمه ومر على ورشه الحوطه تلاقيها بين ميزان اليرموك وميزان المجد واسئل عن عبدالله