المساعد الشخصي الرقمي

مشاهدة النسخة كاملة : الهدد فييه صوت في الكارونه! (gx1997)


بـــ نجد ـــرق
17/10/2009, 12:50 PM
السلام عليكم ورحمة الله وبركاته

قدرالله علي وتليقفت ورحت اغير زيت الدفرنس الامامي للاند كروزر GX97 مع العلم ان الموتر كل شي فيه وكاله واستخدام الوالد ومحافظ عليه ولابعد مشا الا 200 الف

المهم غير الزيت وصبيت زيت جديد لكن العامل ماسكر صرة الزيت مضبوط وقعدت تهرب ولا انتبهنا لها

من بكره دق سلف الوالد راح يقنص يم الجنوب ويوم رجع قال الموتر كأن فيه صوت رمان خفيف يالله تسمعه


وديناه المهندس وقال الدفرنس الامامي مافيه زيت والصوت هذا احتمال انه صوت رمان الكارونه

لكن تصليح الكارونه مو اي واحد يعرفله ويبيلها وزن مضبوط

حاليا ركبت فرارات (لوك) واذا فصلت الفرار وحطيت على وضعية 4X2 راح الصوت لانه يفصل العمود الامامي

فألان محتار وين اوديه اي ورشه لان الموتر يبيله فني مختص

بغيت اوديه لعبداللطيف جميل لكن قلت ابوجميل بيحط علي فاتوره وش طولها

فياليت اللي يعرف ورشه متخصصه وسعرها معقول في الرياض يدلني عليها

تحيتي للجميع
بـــ نجد ـــرق
17/10/2009, 06:04 PM
للرفع رفع الله مقداركم
عيضه
17/10/2009, 07:39 PM
الله يكون بعونك

اناعندي نفس المشكلة
لبيد بن ربيعة
17/10/2009, 09:05 PM
اخي الكريم خذ مني نصيحة محب

اترك السيارة لا تغير ولا تصلح فيها شيء ما دام الصوت في الدفرنس الأمامي وأنت مركب فرارات :no2:
(يعني ما يطلع الصوت إلا مع تشغيل الدبل فترات وجيزة)

أهم شيء يستحسن أنك تزيد الزيت بزيت ثقيل ولا مانع أن تضع معه بعض الشحم الأصلي
وبإذن الله سيعيش معك زمنا طويلا

ودمت موفقاً :)
hamido
17/10/2009, 10:45 PM
اذا كنت تبي الصوت يروح مالك الا كارونه من التشليح وامرها سهل بس انتبه لا تقعد تغير بالتروس والرمان لان هالطريقه دائما ماتنجح خذه نصيحة مجرب
سوبر VTC
18/10/2009, 12:35 AM
و عليكم السلام و رحمة الله

الله ييسر امرك اخوي

مر على ورشة البريدي شرق معارض النسيم
على نفس الشارع العام

الجمس و الفورد و الشيروكي و المرسيدس
على سبيل المثال
يحطون بالكارونة شحم و يروح الصوت :good:
بعضهم يحط برداة و نشارة خشب
بعضهم اكرم الله النعمه يحط قشر موز

لو تجي للقصيم
عندنا ببريده ورشة ابو عبدالله الصمعاني تخصص كوراين
و ايضا ورشة ابو خالد الخضير

موفق
بـــ نجد ـــرق
18/10/2009, 12:37 AM
اخوي عيضه

جزاك الله خير وان شاء الله تساهيل

--------

اخوي لبيد بن ربيعه

الصوت خفيف مره ماينتبه له اللي يبخص فيها زين وحنا ماعندنا مشكله نخليه على هالوضع لكن

السياره جايها زبون ولا ودنا نبيعه وفيه شي

---------
اخوي hamido

فيه كم واحد اكدولي نفس كلامك لكن كم تتوقع ابلقى سعر الكارونه الاماميه ؟؟

لان تصليح الرمان بيكلف مع شغل اليد حوالي 800ريال

-----------
اخوي سوبر VTC

مثل ماقلت السياره جايها زبون ولا ودي اغشه ودي ما اسلمه الموتر الا وهو بحالة الوكاله.

البريدي هو كرامه ولاغيره ؟؟

شكلي الله العالم ابدق سلف للقصيم لكن اخاف اروح واحصل عنده زحمه وحجز مثل ماصار معي قبل امس

رحت للدوادمي لورشة مادحها لي واحد ولقيت عنده زحمه وقال لي المهندس كلمني بعد اربع ايام يمكن اكون فاضي

والله رجعت ما استفدت شي


الله يعطيكم العافيه ياشباب عالردود

تحيتي للجميع
Magellan
18/10/2009, 12:59 AM
رح لتشليح آل موسى بالصناعيه القديمه
فيه لبناني يطبق الكوارين صح بالميزان
طبعا أخبره يضبّط الأمريكي من جموس وشفر وأتوقع نفس الشيء مع اللاند
واحدأعرفه معه افلانش طق عليه عكس خلفي بسبب إنه إنظل في الموتر
والمسكين صلّحه بميزان المجد وأعدم عليه الكارونة بسبب التركيب الخطأ
وصفله واحد تشليحآل موسى وجاء لمهم وهاوشه اللبناني قال المفروض ماتركّب العكس بدون ماتسوي وزن للسنن داخل الكارونه
وأتذكر إنه يمدح شغلهم بالحيل
سوبر VTC
18/10/2009, 01:25 AM
جزاك الله خير

ازرق هلالي :D:p:D

لا :no2:
كرامه الفعيم ورشته بمخرج 17 تخصص شيروكي

ورشة البريدي رجال كبير بالسن و عنده عماله فلبينيه
ورشته شرق المعارض مباشره
بجنب و حول حقين تلميع السيارات

لو حصل تجي لبريده افضل

ان بغيت رقم الخضير او الصمعاني
بخصوص الحل و السعر تكلمهم
علمن :)
بدوي جنوبي
18/10/2009, 01:44 PM
الكارونه فيها ثلاث رمانات
وصعب تحديد اى واحد منها خربان
الا بعد الفك
اذا الصوت بسيط اتركه وان شاء الله ما عندك مشكله

اقرأموضوعى هذا وان شاء الله تستفيد

°° °°☼ •• كارونة دفرنس توضيبها بالصور اكثر من 108 صورة ••☼ °° °° (http://www.mekshat.com/vb/showthread.php?t=229302)
بـــ نجد ـــرق
19/10/2009, 01:00 PM
magellan
والله اللبنانيين لي مواقف معهم فعشان كذا ماعاد احب اصلح

----------
سوبر VTC
ههههههه انا شبابي للنخاع بس معجبني ذا اللون:D

ايه صح كرامه الفعيم عاد دايم اصلح الشروكي عنده بس نسيت اسمه:)

لاهنت اخوي سوبر ارسلي ارقام الورش اللي تقول عنها في بريده
وان كان شغلهم ممتاز على كلامك ماعندي مشكله اروح لبريده جعلها السيل

--------------

بدوي جنوبي

الصوت خفيف جدا ولا منه اي تأثير

لكن مثل منت عارف الــGX97 مرغوب عند اهل البر والنظيف منه يوصولونه لسعر اعلى من سعر 2003 او 2004 والموتر جاب لنا سعر طيب والصوت هذا يمكن يطرح من قيمته شي واجد وبرضو اللي سايم الموتر عزيز وغالي ولا ودنا نسلمه الموتر وفيه شي حتى لو بسيط


الله يعطيكم العافيه ياشباب عالردود
سوبر VTC
19/10/2009, 01:20 PM
ياخوي ما تصلح لنا :no::p

احسبك هلالي :D

الاقارم تحصله على الخاص

موفق
بـــ نجد ـــرق
20/10/2009, 10:34 PM
الله يبيض وجهك اخوي سوبر فتك

واللون هذا لعيونك:D