مسرحية آخر حبة في جده للروائي عبداللطيف جميل

[Riyadh City]

السلام عليكم أخواني المكشاتيه وأسعد الله أوقاتكم بكل خير

أخواني لي تجارب عديدة مع شركات السيارات حبيت أقدم بعض الملاحظات على شركة جميل أتمنى تشاركوني فيها ..

شركة عبداللطيف جميل قدرت بصراحة على غسل أدمغة العامة وذلك عن طريق عدة وسائل :

1- الإعتماد على سمعة الشركة لدى الزبائن حيث كانت تقدم سيارات بجودة عالية وبأسعار مقبولة لدى الجميع .

2 - الإنتشار حيث أصبحت فروع تويوتا مثل صرافات الراجحي تجدها في كل مكان .

3 - إستخدام إسلوب البيع حتى نفاذ الكمية وذلك عن طريق مقدمي الخدمة في الفروع ( وهنا مربط الفرس)

أعتقد والله أعلم بأن شركة جميل نصفها خاص ونصفها حكومي <== لا تقولون أني قلت هالكلام :j
ويتضح هالشي من خلال التسويق وهو مأخوذ من الشركات والسيطرة وهي مأخوذه من الحكومات ..

أتخذت شركة جميل سياسة تسويق بالسيطرة على عقل الزبون , ممكن تروح للشركة تبي كامري ابيض جير اوتو
تطلع من الشركة وأنت ماخذ كامري جير عادي لون أخضر :eek: وطبعاً هالشي يسونه بأيهام الزبون بأن طلبه
غير موجود وما بقى غير هالمواصفات ويا تلحق يا ماتلحق ..
والمشكلة أن راويتهم ما تغيرت ومن الممكن أنها تغطي على روايات شكسبير من كثر ترديدها
والرواية الشهيرة هي ما بقى غير حبة وفي جده :D

لي زميل عمل أجنبي وشاورني أنه ياخذ سيارة من تويوتا قلت له أهم شي لا يعطونك سيارة على كيفهم أنت حدد السيارة والمواصفات الي تبغاها ولا تقبل بغيرها لأن من الممكن يقولون لك ما فيه الا حبه وفي جده بس مواصفات غير الي طلبت إما لون مختلف أو أقل مواصفات ..

والله يا أخوان أنه جاني اليوم الثاني يقول قالولي مافيه الا حبه وحده في جده :D المهم صبر إلى أن نفذلوه طلبه

كلمني ولد أخوي من تويوتا وقال أبي كامري بس مالقيت إلا جير عادي قلت تراهم نصابين المستودع مليان
لكن إذا بتصبر أو تشد عليهم عطوك وإذا عجل عالسيارة الله يعينك ,, عاد هو عجل عالسيارة وخذاها جير عادي
وهو مسكين ماله بالعادي ركبت معه والله أنه يعشق الثالث في الثلاثين والرابع في الأربعين والخامس عالخمسين ههههه تسببوا فيه حسبي الله عليهم ..

رحت لهم في 2008 أبي أف جي قالوا تنتظر شهر ونص خييير طالب بنتلي على غفله :no:

يعني ما عندهم مشكلة يطيرون زبون بس في مقابل أنهم يفرضون نظرية أن سيارات تويوتا الشركة مو ملحقة
على زباينها ...

في الحقيقة هالأسلوب أفاد حتى عملاء تويوتا بأن صارت مواترهم شيك في مخابيهم كما روجت الشركة والمنتفعين منها ,, لدرجة أن سيارات تويوتا صارت تباع برى الوكالة أغلى
يعني الإف جي 2008 كان يباع بالوكالة بـ 103000 وفي المعارض على 113000 والفل بالوكالة بـ 112000 وبرى ينباع بـ 120000 والبركة طبعاً في إسلوب الشركة وهو إخراج السيارات بالقطارة ..

بالله عليكم كم مره سمعتوا مافيه الا حبه في جده من جميل فروع الرياض ؟؟
وأكيد أهل جده يقولهم مافيه الا حبه بالدمام وأهل الدمام يقولهم مافيه الا حبه في ,,, إلخ

من غباء تويوتا يعني معقوله شركة طول بعرض مافيها غير هالحبه :rolleyes: على مدى الأعوام السابقة ما شفت جميل
وهو يتخلى عن كبريائه إلى بداية هالعام من بعد الأزمة الإقتصادية وخففوا واجد من كلمة مافيه الا بجده :)

نسمع منكم

[راعي المجهم]

ههههههههههه

والله أنك صادق وأناخوك

أنت واحد فاهم ولم تتأثر بغسيل الدماغ الذي تقوم به وكالة تويوتا

وهناك مليون مغفل مسكين يحسبه بيموت إذا ماركب سيارة جديدة

مع أن البدائل غير الكامري والهايلوكس والجيب كثيييييييييييييييرة

فيه السوبارو والهوندا والنيسان والمرسدس سيارات أفضل من صنادق تويوتا

[السنع كله]

يكفي هذه الشركة سمعة سيئة تدخلها السافر في محتويات السيارة وطلبها من المصنع خاليه من كل الاكسسوارات وتكريب بدلها تايواني او تركي وصل الحال تغيير الجنوط الى ماركات مجهولة والمكيف من زمان وهم يلعبون ولذا فان اهل السيارات ال
بصراء بلعب هؤلاء صاروا يستوردونها من الدول المجاورة0000000000


0000ان حكينا ندمنا وان سكتنا قهر

[ابرق نثيل]

فعلا حكاية الحبه مرت علي
رحت باخذ 2008 جكسار قلت له كم قال 155 قلت هات حبه
فتح الكمبيوتر وقال مافيه ادفع عربونك بعد اربع اشهور انتظااااار

طلعت للمعارض وحصلت الجكسارات كثر الترااااب ب 166 نفس المواصفات اللي ابي

تركت حركاتهم ورحت خذت لي فتك اصرف مليون مره

[قرم العيال]

والله انا ابقول لك قصه وقعت معي ومع اخوي

رحنا نطلع له موتر من نيسان ..

شفنا الموتر وجاز لنا واخترنا المواصفات والنوع

المهم مسؤول المبيعات (( سعودي )) قال خلاص تم

طلعنا من عنده ودق علينا لازم تجون بكر

جينا قال .. مدري وشلون الموتر هذا مبيوع باعه خويي ومدري كيف

فيه مثله بس المواصفات الفلانيه واللون الفلاني

تدري وش قلت له


خلاص .. سلام عليكم ما نبي شي ..

وقبل ما اطلع


ويلحقن تعال تعال .. ابشوف الرجال يبي يدفع كاش ولا اقساط

قلت خلاص .. امس قلت لك وش ابي

ويقنع فيني ..

ويدق علي بعد يومين يقول خلاص تعال خذا الي تبي ..

[عاشق البر والصيد]

اعتقادك يا أخ رياض ستي في محله
تايوتا نصفها حكومي يعني الشي اللي تشوفه في تايوتا مو من عبداللطيف جميل وحده لاتضلمه
وشكرااا

[البوعينين99]

والله أنك صدقت في كل كلمه قلتها وخاصه هالنقطه:
"يعني ما عندهم مشكلة يطيرون زبون بس في مقابل أنهم يفرضون نظرية أن سيارات تويوتا الشركة مو ملحقة
على زباينها "

[الادعج]

وش تقول ,,,وش تخلي,,,,حالنا الحال المولي,,,

[القناص الأسود]

الحل الوحيد في حملة خلوها تصدى

[ابويارا1001]

سيارات بو جميل قراطيس كل شي مصنع في جهه والظاهر ان التجميع بالباخرة وهي جايه

انا اشوف الهونداي السوناتا افضل من الكامري كجودة وسعر طبعا

لانها صناعة كورية

وشغلة آخر حبه هذي متعارف عليها عندهم بس عاد يشكل لك مره بالرياض ومره بجده ومره بالمدينه :D

[سعيد حظ]

كلامك سليم 100%100
أحس إن الناس بدأت تكره سيارات تويوتا بسبب سياسة عبداللطيف جميل

[abu_nayf]

اي والله انك صادق هذا اسلوبهم واذكر ان الاندكروزر الشكل الجديد كان يحجز من الوكالة بدفع المبلغ كامل والانتظار بالشهور وزيادة على ذلك هناك من يقوم بشراء الحجز منك بزيادة 10الاف على قيمة السيارة او كثر من ذلك بكثير ,,

ولا ننسى الاستغلال بأسعار قطع الغيار ,,

يعطيك العافية اخي الكريم على ماتطرقت له من خلال موضوعك الجميل عن ابو جميل ,,

[راعي النياسين]

وش الله حاد هالعالم تشتري منه وهو اصلا السياره يابانيه يقلبها كلها قطع صينيه جعله ينقلب جني

قسم بالله شي يحوم الكبد وينرفزك على الاخر عندك البازعي يااخي الي يبغى تويوتا يشتريها منه

والله افضل منه

[دمعي كفن]

الله يعيـن على طاري ان الحكومه لها نسبه والله الظاهر هيك شئ لن بعد بكره السبت افتتاح صالة عبدالطيف جميل الي على خريص وبحضـور الامير سلمآن كـلام رجال شغال عندهم والعلم عند الراوي

[غارب النملة]

والرواية الشهيرة هي ما بقى غير حبة وفي جده :D


صدقت اخوي ياحبهم لهالكلمه اخر حبه دجاج ولا ايش

يبيعون الف سياره بعد كلمه اخر حبه

تدري ليه عشان الزبون يصمل ويقول ايه اخر حبه
كم واحد من الزملاء قاله اخر حبه وشكلها ماتقضي اخر حبه هذي ههههههههههههههه

حتى انا كم مره قالي وتراها اخر حبه

[FJ3230]

قسما بالله رافع ضغطي ذا الوكيل

[راعي المجهم]

يا أخوان الي يبي يشتري سيارة تويوتا

يشتريها من اليحى أو البازعي مواصفات يابانية 100 % من المصنع مو صيني !!!

نحن بدعمنا لهذين الناشئين نضرب عبداللطيف ونخليه يقتدي بهم

وإذا كثروا المنافسين أنخفضت الأسعار

[نيتروجين xp]

سلملي على اليحيى والبازعي

سيارتهم أحسن من أبو جميل ولا فررررق ..


وسالفة آخر حبة ونجيبه لك من جده هذي كلن يسمعه هههه


يعطيك العافية ع الموضوع الملامس للحقيقة تماماً ..


عوافي ..

[ensaaan]

حسبي ربي وكفى
راح يجي يوم وتكتشف الناس حقيقة الوكلاء عندنا
وراح يخسر من باع ذمته عشان حفنة فلوس
في الدنيا وفي الآخره

والحمدلله اني ماشريت من تويوتا

واهم شيء عندي في السياره تكون عمليه
ويكون السعر مقابل المواصفات
مو سعر مبالغ فيه بشكل جنوني

تحياتي لك
الإنسان

[أبوهشام2]

تايوتا أغلب سياراتهم تجميع تايلندي وصيني
وما فيه إلا الكورلا واللاند اللي يجي ياباني (معلومة سمعتها من أحد الشباب وما أدري عن صحتها)

وإذا مره ضاقت وتبي تشتري سياره
في نظري تجميع الكوري ولا تجميع التايلندي
خصوصا إن الكوري أرخص وجودته لا بأس بها
بعكس التايلندي اللي من مطب يطيح الصدام

وجهة نظر

[سوبر152]

خلوها تصدى

[مجالس الرجال]

صحيح مانرضى بالإستغفال والأسعار المبالغ فيها ماتقبل
لكن تويوتا مع إنه حصل فيها تصنيع بأكثر من دولة وتبديل قطع من الوكلاء
إلا أنها الأفضل والعمليه
ولو نعمل مقارنة بين سعر فتك الفل 188 الف وحولة ولاند فل جي اكس آر 8 سلندر 190 الف مع إن الاند
فيه ونش والمفتاح الذكي ومواصفات أخرى مثل الحساسات وغيره
وقصدي من ذا المقارنة علشان اللي حاطين العين على تويوتا يشوفون اسعار غيرهم
وحكاية الخليجي -البازعي واليحيى والله لو يجزم 100 شخص إن يخلصون الجيوب اللي عندهم
وتبدا سالفة الحجز وايضا هم حاطين حيلهم بالجيوب فقط

[راعي السيل]

السياسة هذي متبعة في جميع المحلات ماهي محدودة عند وكالة جميل او غيره ، هذي هي التجارة..

[الجذع المتحرك]

كلام سليم 100%100
حسبنا الله ونعم الوكيل
اصرف شي تروح للامارات وتاخز الموتر اللي تبيه
وسعر اقل ولا انلعب بالديكور والمحرك وغيره

[بحرالحياة]

تصدق السيارة إلي معي كانت آخر حبة في جدة ...
تأخرت عليهم يومين .. راحت علي السيارة
طلبت مرة ثانية وحدة آخر حبة في جدة .. لكن هالمرة دفعت عربون ...
وأبشرك لحقت عليها ...
ولا تتخيل الشعور الجميل وأنت تسوق السيارة .. تحس أنها الوحيدة في العالم
وأنك يمكن تبيعها بعد شهر بزيادة 10 الآف ...

[الجندي2005]

انت صادق بكلامك ،،،،،،،،،،،،،،،،،،،،،، لكن

لا تنسى اسهام المستهلك المغفل بمعنى آخر حنا اللي شجعناهم على هالمنواااااااااااااااااااااااال ،،،،

شاكر لك موضوعك

[smsm007]

يا شباب أقولكم شئ يمكن بعضكم ما يعرف عن سيارات تويوتا

اللي في جده يروح للمستودع الرئيسي حقهم في الخمره ويشوف بنفسه ..!!! عجايب
تعرفون إن الكامري والهايلكس تجي كلها بدون أي أكسسوارات نهائياً !! يعني حديد وبس خام ( ساده )
المعلومات هذي مؤكده ... يعني حكاية اكس ال وجي ال وجي ال اكس ومدري شنو !! كلها معمولة هنه في مستودعات جده ..
وعلى فكره إذا فيه إصرار على سيارة من نوع معين كان يبغاها الزبون لعلمكم إذا كانت مثلاً اكس ال يقلبوها جي ال وكلها تجاري قطع صيني .
وزي ما قلت لكم معلوماتي هذي مؤكده شخصياً مني لكم بدون نقل من أحد .
وسلامتكم

[softy]

صباح الخير للجميع هذا الكلام من زمان اذكر ايام 99 كنت ابي كامري

وصدمت بنفس العبارة المشهورة مافية انتظر شهرين

ولا فية لون غير المطلوب الي معة فلوس الله يرزقة يروح للخليج يشتري

[ahmad995]

غريبه طريقة التسويق هذي ..!!
يقول ما عندنا الا حبه والشوارع مليانه ؟؟
ما انكر طرقهم الملتويه وتحايلهم لكن بنفس الوقت شركة مالها منافس بالسوق

عموما نبي شركة بجودة وقوة تويوتا ومن بكرا انا اغير سيارتي

[Riyadh City]

السلام عليكم ورحمة الله


أشكركم أخواني كلن بإسمه وما قصرتوا على التفاعل وطرح تجاربكم مع شركة جميل

أما الأخوان الي يقولون أنها سياسة شركات فأقول مالكم لوا أنا ما شفت مثل هالأمور الا عند تويوتا

تصدقون فيه واحد من الزملاء راح يشتري اكسبلورر ودفع قيمة السيارة كاش وطلب المواصفات الوسط

يوم جاء يستلمها بعد كم يوم تفاجئا أن معطينه اكسبلورر فل كامل يعني وفروا عليه حول عشر الآف ريال

ما يبون يطيرون الزبون بالرغم ان اللون الي يبيه مو متوفر بالمواصفات الي يبيها فصلحوله ترقية في المواصفات

وما قالوا مافيه الا حبه مع الرز عفواً اقصد حبه في جده مثل حركات ابوجميل :(

مشكورين اخواني

[عاشق السناف]

والله صادق

[س6ك7ب]

ما أدري أضحك ولا أبكي
صدقت وأنا أخوك خلوها مسرحية
مرة تضحك منها لما تسمعها ولما تصير فيك تموت قهر وغبنة
الشكوى على الله
على العموم الله لايحوجنا لأحد
وإن طلبنا طلبنا الله
مشكووووووووور

[ونش]

انا من الرياض ويوم جيت اشتري الي بالتوقيع من نيسان فرع طريق الامام شمال الرياض قال لي مندوب المبيعات مافيه عندنا في هذا الفرع لاكن موجود في فرع خريص قلت خلاص اروح طريق خريص قال لا تتعب نفسك اجيب السياره لك بسطحه من فرع خريص الى فرع طريق الامام شف كيف التعامل يجيب السياره لى بسطحه عشان اشوف بس . ويمكن اشتري ويمكن لا

[غاوي رومانس]

بالنسبة لي قبل كم سنة

كنت بشتري كورولا وقلت ابا اللون كذا والقير كذا

قالوا لي مافي الا اللون كذا والقير كذا والمواصفات كذا

المهم اني مااعطيتهم وجه وقلت لهم يسوون لي طلب


وبعد 9 شهوور وبعد مااشتريت لي ماكسيما بالمواصفات اللي ابيها

دقوا علي وقالوا لي حصلنا لك كورولا بس اللون مو اللي انت تبيه


قلت لهم اشترينا سيارة وخلوا سيارتكم عندكم

صحيح لاقالوا شر البلية مايضحك

[سيف الظفير]

عطي الله البريمي ولو انه غالي

[بندر]

ايه والله انك صادق

العام كنت أبوي تويوتا فورتشنر 2009، وأنواع التسحيب من الوكالة يقولون انه غير متوفر، المشكلة اني أشوفه صاف مع السيارات المباعة في الحوش حقهم باستمرار، المهم يوم شافوني صامل قالوا لازم تركب عازل ب 1950، قلت الشرهه مهوب عليكم على اللي يضيع وقته معكم، والحمد لله صارت خيره شريت اكسبلورر 2009 وكالة أرخص بعشرة آلاف من الفورتشنر وأزين بعد.

[شبح الصحراء]

اللي قاهرني الإكسسوارات الصينية اللي يركبونها ابو جميل وغيره في سيارات تويوتا ، اذكر الهايلوكسات قديم كانت تجي مسجلاتها صينية ونصها لونه اسود ونصها الثاني فضي وشكلها بشع مرة ماهو راكب على الطبلون ابد خصوصاً المسجل الفضي تحس انه ترقيع ومش حالك ! .


السياسة هذي متبعة في جميع المحلات ماهي محدودة عند وكالة جميل او غيره ، هذي هي التجارة..
قصدك هذا هو الإستغلال والكذب ، التجارة أمانة قبل كل شي وللأسف الأمانة شبه معدومة والسبب هو الإحتكار اللعين سواءً عند ابو جميل أو غيره ولا في السيارات بس حتى في وكلاء الكاميرات منتشر عندهم الإحتكار كل وكيل يحتكر ماركة ولا فيه اي منافسة .