تغريز الباترول

[الشوق]

السلام عليكم ورحمة الله وبركاته


اخواني أنا عندي مشكله وهي:
أنا شريت باترول SGL_E
VTC 4800

موديل 2002

وررحت أجربه في الثمامه في طعس مستوي مع الشارع وكان هواء الكفرات 40 ولما دخلت شوي بس وقف الموتر وشبكت الدبل الخفيف ورجعت ريوس وطلعت ثم دخلت ومشيت شوي اكثر ثم وقف بعد وبدأ يحفر ثم طلعت وأنا منقهر والظاهر اني أببيعه



فوش رأيكم هل المشكله في الكفرات والهواء او المشكله في الدبل والدفرنسات



وشكرا لكم

[أيام العبور]

هلا والله ...........؟ يا شوق

اول شي مبروك الموتر الله يعطيك خيره وكفيك شره

ثاني شي اقولك لاتنقهر ولا شي الامر هذا طبيعي اذا الهوا 40 في اي موتر

ثالث شي اسأل مجرب ولا تسأل طبيب انا جربت كذا موتر اهم شي الكفرات تكون كل ما قل هواها كل ما صارت احسن فالبر من ناحية الغراز والقرشعه

25/30/35/ وتنسا الدبل

وسلامتك

[القماري]

أفا باترول ويغرز (كبيرة على SGL) بس ولا يهمك
40 ضغط عالى وعالي كثير على موتر تخصصه الرمال والطعوس
أخوي في معظم الضروف (الرملية) نزل ضغط الهواء من 12-20 (صيفا) وفي الشتاء بعد المطر أفضل أن لا تتعدى 25 (حتى تقلل الرجة ) وسترى أن ماتملكه غاية في الروعة وسيأخذك حيث (لايجرؤ إلا الصقور) .
جرب وعطنا الجواب
وبما أنك مبتدى (بحسب ماذكرت) فالأفضل أن يكون معك منفاخ هواء قوي (CAMEL) مثال جيد وأن يكون معك حبل للسحب قوي وطويل نوعا ما أيضا وأن يكون معك مصباح يدوي وعدة وشيول وماء أيضا. وحاول في البدايات أن تسوق في مناطق آمنه وقريبه ويفضل أن يكون معك رفقه.
وضع الدبل في التعشيق الخفيف 4H أذا نويت السير في طرق أكثر وعورة

[Che Guevara]

الأصل كُتب بواسطة الشوق



اخواني أنا عندي مشكله وهي:
أنا شريت باترول SGL_E
VTC 4800

موديل 2002



أولا ( وعليكم السلام ورحمة الله وبركاته)

ثاني شيء موديل 2002 غيروا اسمه من SGL_E إلى SGL_V خ :rolleyes:

ثالث شيء اذا كل واحد غرزت سيارته يبيعها , عز الله غصت المعارض بالجيوب والدداسن

رابع شيء ( واهم شيء ) لايغرك موترك ولا تنس التوكل على الله في كل شيء

و اخيرا اذا جيت تطعس يابعدي لازم تنزل ضغط الهواء الى 15 - 25 حسب صعوبة المنطقة

اما 40 :confused: حتى وانت على الازفلت كثيره 35 تكفي ...

وسلامتكم

[جميل جمال]

الله يهديك اخوي الشوق بس ..

40 مره وحده ..

مثل ما قالوا الشباب الـ 40 واجد على السفلت حتى :D

لالا وانا اخوك تعوذ من بليس بس وانس سالفة البيع ..

اذا جا يوم الخميس حمل عزبتك واطلع انت والربع وقلهم باوريكم عزم الموتر ..

حط هوا الكفرات على 15 وانسى انه يوقف واصعب طعس بالثمامه ما راح يوقف معك ..


وتذكر وانا اخوك ان نص السواقه بالنفود تنسيم ..

[بركان]

الاخ / شوق

يا شوق انا عنك ظروفي حدتني!!!!

افا باترول ويغرز وبعد جديد ....معك حق هذا الموتر ما يصلح لك بعه وانا باشتريه وترى فلوسي جاهزه.!!!

اخوي شوق
لا تقلق الامر طبيعي
انا اشبه موقفك بمن يملأ كرشه بالطعام حتى بلعومه ثم يلحفه بطاسة لبن ثم يطلب منه ان يركض ويحصل على المركز الاول.

النفود يبي تنسيم هواء اولا ومسايس وحرفنه وخفة رجل على البنزين واذا شفت الكفرات تحفر فارفع رجلك وانزل وتفحص وضع العجلات قبل ان يتعلق الموتر ويربض على بطنه بعدها لن ينفع الا السحب بسيارة اخرى حتى تنسيم العجلات لن يجدي ابدا لان الموتر متعلق ومتكي على بطنه!!! حلوه متكي على بطنه.

افضل طريقه لتجنب التغريز:
اولا تنسيم العجلات قبل الدخول في الرمل.
ثانيا لا تحن الموتر وتهدي خل الموتر دايم شايل نفسه يعني خلك دايم مسرع ولا تتردد. او تمسك فرامل او تهدي وقبل ذلك الخبره في كيفية الطلوع والنزول في الطعوس.

هاه وش قلت تبيع الموتر؟؟؟
بعد هذه النصائح لا اضنك تبيعه.
تحياتي

[الربذي]

شوق الله يهديك بس 40 يا!!
صدق هذا ظلم للجيب
المفروض 15 وانسى
اما 40حتى على الاسفلت لان الهوى الموصى بة هو 2.3يعني 38
و40حتى لو كانت همر مارايح تنفع
وانا ادري ان قصدك تستفز الاخوان
والا احد يطعس والهواء 40
عد الى الصواب 15 وراح تشوف
امنياتي بعدم التغريز
ياشوق

[مخاوي الجيب]

الأصل كُتب بواسطة الربذي
شوق الله يهديك بس 40 يا!!
صدق هذا ظلم للجيب
المفروض 15 وانسى
اما 40حتى على الاسفلت لان الهوى الموصى بة هو 2.3يعني 38
و40حتى لو كانت همر مارايح تنفع
وانا ادري ان قصدك تستفز الاخوان
والا احد يطعس والهواء 40
عد الى الصواب 15 وراح تشوف
امنياتي بعدم التغريز
ياشوق

[الشوق]

السلام عليكم ورحمة الله وبركاته


أبشركم جرت الجيب بعد مانسمت الكفرات الى 20 والحمد لله كويس بس الظاهر بأركب كفرات شاهين أفضل وشكرا على تواصلكم

[ابو ايمن]

حيا الله اخونا الشوق

وعليكم السلام ورحمة الله وبركاته

الحقيقة عنوان موضوعك خلاني أدخل وانا زعلااااااااااااان

باترول راع السمعة الطيبة والجرأة يغرز ..

قلت أكيد هذا عنوان إستثارة ..

مثل ماقالوا الربع .

شف خويك اللي في الصورة <<-- بس عاد ماهوب 2002

ماشاء الله لاتنشد عن الرمال ولا الشعبان .

مثل ماقال اخونا الخبير بركان .( ولا يهونون الربع
الجيب أو اي سيارة إذا تماهنت او تهاونت في الرمل يبي يصير على بطنه خاصة إذا واصلت المحاولات قبل أن تتأكد من وضعية الكفرات والارض .

خلك عزوم من ساعة دخولك .. والله يوفقك ..

آسف نسيت أبارك لك بالسيارة الله يطعمك من خيرها ويكفيك شرها .

تحياتــي