اللي عنده ربع يفزع لي تكفون

[ترتر]

اخواني انا ودي اشتري لي جيب ربع 2003 تويوتا لاكن ماعندي خلفيه عنهن يعني بصراحه كل مابغيت اجزم اشتري اتراجع والسبب اني مااعرف فيهن شي واخاف اتوهق.

سؤالي هل 2003 (خط توقيع) فيه مشاكل قير او ماشبهه .

كما وارجوا منكم اخواني راعين الربوع التكرم بمساعدتي يعني اذا بغيت اشتري وش ادقق فيه غير البدي والمحركات , يعني اكيد فيه اشياء كثيره يجب انتبه لها واحرص عليها قبل ما اشتريه , ارجوا منكم الفزعه الله يعافيكم

وشكرا

[الوايلي]

السلام عليكم ورحمة الله وبركاته
اخوي ترتر لا تستعجل خل لين 2005 ينزل علشان ينزل سعر المديل الي قبله
وبعدين الربع لا زم تشوف التنده هو فيه طقه شي اذا قفبه طقه انحش عنه منقلب
وشف وقفت الموتر هو متمايل وشف السست الي وراء مغيره او رافعه راعيه علشان يكون رافع عليه وشف الكتاوت هي مغيره ولا لاواهم شي شف القير عشقه مره مرتين انتبه لا يكون له صوتوشف الكفرات هي متساويه لان واحد مني شريت الربع حقي نافخ الهواء 60 والجه الثانيه 25 علشان الموتر متمايل لانه يرفع عليه
واخيرا انتبه لا تشري من القصيم عليك بتبوك وحايل واللون بيج والخليجي احسن ويتحمل

[ابـو علـي]

ياهلا وغلا بأخوي ترتر
بصراحه ماودي اضيف شي على كلام
اخووي الوايلي لان كل كلامه صح
لكن انت بتشتري موديل 2003 يعني جديد
واكيد انك من اللي يجلس معهم الموتر لفتره طويله
لكن انتبه لحاجتين وهم اهم شي
انتبه لتنده الجيب لايصير مقلوب
انتبه لوجهيته لايصير مصدوم من الامام
هذا اهم شي
وقبل تشريه افحص القير والدبل اشتله شف يطلع صوت او لا
والجيب النظيف النظيف لايتجاوز 74 الف اذا كان موديل 2003
تحياتي لك

[جميل جمال]

السلام عليكم ورحمة الله وبركاته ..

ترتر تبي نصيحة اخو ..

لا تشتري جيب ربع مستعمل الا (( من احد تعرفه)) غيره انحش ..

لان اغلبهن اذا ما كان كلهن وانا اخوك ملعوب بها .. يعني باختصار مفجره تفجير .. ومركب عليها هدرز وفلاتر والخ ...

لا يغرك حتى لو كان البدي نظيف ووقفة الموتر ما عندك باحسن منها ..

وعلى قولة الوايلي ابعد عن القصيم لان الشباب عندنا الله يهديهم راعين لعب بالمواتر وجلد ..

وعلى فكره ترى بعض الشباب حقين القصيم يروحون يبيعون في حايل :) وواجد بعد ..

اما اللي يقول انتظر 2005 فانا على ما سمعت انه الامن العام برضوه هالسنه حاجزين اغلب الجيوب الربع .. يعني باختصار ما راح تلقى بالمعارض الا خليجي واسعاره نار بالتسعين وانت طالع ..

على العموم اتمنى اكون افدتك ..

[أبوأحمد98]

السلام عليكم ورحمة الله وبركاته

أعووووووووذبالله سمعة شبااااب القصيم بالجيووووووووب دمااااااار ......خخخخخخ والله من الجلد والعلك بهالجيوووووووووووب

لكن يالغالي اذا كنت تبي مستعمل اتبع ما هو التالي :-

انتبه للقزوز شف اذا كا نت قد انفكت ترر هذا جايه هدرز ...

انتبه للفلتر تا كد انه ما فك ...

انتبه لجنب الموتر نا ظره من بعيد وتشووووف اذا كا ن جايه شي ...

على فكررررره تلقاء بالقصيم نظيف بس انتبه .....

والله يوفق الجميع ......:)

[ترتر]

الاخوه الوايلي , ابـو علـي , جميل جمال , أبوأحمد98

اشكر لكم مروركم وهذه المعلومات الطيبه وبصراحه اشياء مهمه

واتمنى من الاخوان المشاركة

[ترتر]

الاخوان الاعزاء

انا قال لي واحد من الشباب انتبه احيانا يصير فيه صوت بالعمود ( صوت حَََره ) كيف اميز هالصوت ؟؟!!

ايضا عرض علي ربع 2003 توقيع مرتبة خلفيه بالعرض وونش بــ 74000 وماشي 106000 كم والموتر بديه فيه حكوك بسيطه وطقه معدله بباب السواق لاكن مافيه سمكره , هل الموتر سعره مناسب؟؟؟؟


وشكرا لكم

[أبوأحمد98]

السلام عليكم ورحمة الله وبركاته

فعلا اخي الكريم يكوون فيه حره لا كن لا ادري واحد من الشباب قبل فتررره شراء ربع مستعمل يقووول فيه حره بس ما فهمت عليه لكن اساله واعلمك ......بالنسبه للجيب الي شفة غالي بالحيل ......واااااااااوك 74000 .......وماشي 106000 كم .......والله غالي بالحيل .......:rolleyes:

[شاص]

الأخوان ما قصروا وأضيف أنك إذا بغيت ربع مستعمل ونظيف فعليك بالجنوب خميس مشيط أو الباحة وغيرها لا تحرص سواء بنجران أو حتى حائل وتبوك واحد من الشباب مار على هالديار كلها وهو رجال باخص بالربع ويقول النظيف بالباحة أو خميس مشيط وجاب له واحد ماشاء الله لقطه أخو الجديد استعمال شايب شراه من الباحة وبالمناسبة 2005 نزل وسعره عند الشيباني 98ألف ومعرض الصقر احتمال ينزله باخر رمضان وإذا حبيت2004 على الصفر فتلقاه عند معرض أضواء الحرمين بالشفا لونه اشهب , وعنده أبيض وأشهب 2004 ماشيات حدود 3000 برفارف وجنوط وونش لكن ترا الأبيض موضب والأشهب حليو..
والله يدبر لك الصالح
(ياليت تبين لنا وش المقصود بصوت الحرة اللي يقول خويك)

[ترتر]

الاخ أبوأحمد98

اشكر لك مرورك وانا بنظري ان الموتر غالي وسعره نار لاكن مالقيت بالمعارض شي زين ( الصبر زين) لاكن الشتاء على الابواب والاسعار في زياده وشكلي ابصرف النظر عن هالغالي والله يرزقنا غيره وشكرا .

الاخ شاص

الجنوب مواترهم زينه لانهم ماعندهم رمال لاكن اسعارهم اعتقد غاليه ومشوار علي

بالنسبه لصوت الحَره ناس يقولون رجه اذا هديت , وناس يقولون تطلع رجه اذا عشقت الدبل , وناس يقولون صوت مثل صوت حنة الكرونه ...