استفسار هام بخصوص ممشى السياره

[اول المشوار]

بسم الله الرحمن الرحيم
السلام عليكم ورحمة الله وبركاته

عندي استفسار ياجماعه لاهل الخبره بالسيارات

كثير مانسمع سياره مخزنه ويكون ممشاها شي غير معقول يعني يبي يمشي بضاعته بالنصب :p
وقد يكون صادق ومامشت الا الممشى الي بالعداد

سوالي كيف نتاكد انه صادق يعني كيف نعرف ان العداد ماوقف سواء تعطل او اي شي ورجع شغله او صفر العداد يعني يعيده من جديد بعد كل فتره ؟

وبسراحه ماسالت هالسوال الا لني متاكد انه فيه ناس ثانيه تبي تعرف :D ومتاكد انه عندكم اجابه:)

والسلام عليكم

[التعـ King ـديل]

الغالي بعض المواتر يوضح عليها من الشكل ومن المحركات حتى لو الطبلون اصفار

وبيني وبينك انا عن تجربه اكلت مقلب بموتر مخزن ودفعت نص قيمته اصلاحات

لذلك احسب لكل موتر 20 الف كيلو بالسنه على اقل تقدير واحسبه من الموديل اللي انت فيه

اذا الفرق واجد اعرف ان الموتر فيه علم ياخراب ولا العداد موقف

[عاشق الفرعه]

مالي علم لاكن من نقشة الكفرات وشكل الموتر

[الستانس]

شف مرتبه السواق

بطن الموتر

شكل الموتر

وإذا كان يدعي انها ماشيه 20000 الف واقل شيك على فلتر الهواء

لون الشكمان

عندك اشياء واجد لو تدقق فيها عرفت تاريخ الموتر

موفق

[(((.ابوتميم .))))]

لون الشكمان من الداخل النور الامامي البيبان تشوفهاا مخروعه جنوب الموتر تشوفهاا مرتخية اذا كان الموتر رايح فيهاا هذاا الي اعرفه بحكم تجربة

[vip000]

والله يا اخوان السياره النظيفه واضحه من شكلها ومركبها ....وسالفة احد يعرف كم ممشاها صعب ...وهالسؤال محيرني صار له سنين !!!!!!؟

[اول المشوار]

مشكورين على المرور جميعا
كفيتم ووفيتم

بس انا كنت اتوقع انه فيه طريقه يعرف بها العداد شغال ولا لا

وعلومكم افادتني

مشكورين جميعا مره اخرى

[ffrr]

تاكد من الفحص الدوري تحصل رقم العداد

[مالك- لوا]

تاكد من الفحص الدوري تحصل رقم العداد
الرجال كفى ووفى

[راعي المجهم]

أخوي فك الكبوت ودقق بالقزوز حقت السيارة وجنوب المكينة وراسها من فوق

عند اليات الي رايحة للقربة إذا القزوز منحرقة ومسودة أنحشششششش

وإذا جنوب المكينة وراسها مندي زيوت أنحششششششش

وأيضاً الشكمان إذا مصدي ومهتري أنحشششششش

وأيضاً أذا شفت البيبان تقرقع وفيها هزهزة أنحشششششش

[ابرق نثيل]

مالك الا تفحص راعي الموتر
اما اساليب الغش واكتشافها فحدث ولا حرج

[ابو تمام]

السلام عليكم ورحمة الله وبركاته


هذي قصة واحد من ربعي


يقول رحت المعارض انا وواحد من ربعه يدورون سياره المهم وهم يدورون في المعارض الا ويشوف سيارة خويه اللي معه قال له يابوفلان شف سيارتك اللي بعت قبل شهرين


السياره جيب لاندكروزر م 2006


قال له راعيها اللي باعها مشينا خل نشوفها راحو لقوها مع شريطي قالو له السياره للبيع قال نعم وترى السياره نظيفه وبإسم راعيها وكاله هو الحين يكلم راعيها اللي طلعها وكاله ومايدري المهم شافو السياره يوم طالع للطبلون الا السياره ماشيه 170000 الف كيلو !!! صاحبها يوم يبيعها ماشيه فوق 200000 الف!!!!




بصراحه ودي أشتري سياره من واحد أعرفه لو يرفع السعر ولا سياره مع واحد ماييخاف الله



في النهايه الشريطي انحش عنه لا في البيع ولا في الشرا



دمت بكل الود

[شبح الصحراء]

فيه حركة طاحوا فيها اللي ماعندهم ذمة وضمير اول ما يشتري السيارة يفصل الطبلون وتتوقف العدادات بما فيها عداد الكيلومترات ويكد السيارة سنتين ثلاثة على هالوضع وبعدين يبيعها على ممشاها الأول ، لا تعتمد كثير على عدادات السيارة ولا يغرك كلمة مخزنة السيارات المخزنة عادتاً تكون سيارات دبلوماسية او سيارة مناسبات لا تستخدم إلا نادراً وهذي تباع في مزاد علني ونادر تنزل المعارض ، لذلك ركز على نظافة محرك السيارة والجير والدفرنسات ولا تثق بالشريطية وافحص السيارة بنفسك او في ورشة متخصصة او اصطحب اي شخص عنده خبرة بالسيارات المستعملة .

[السنع كله]

لكن انحش عن السيارة المخزنه ماوراها الا انها تعرفك على جميع ورش الصيانه وتدلك على اماكن قطع غيار تراثية ترى الوقفه مدة طويلة تنهي اجزاءها وتنهك ربلاتها

[saad52]

افحص وشوف نسبة استهلاك المكينه وهذا افضل شي

[aljthab]

انا معي باترول عداد اكتروني
وكنت قبل كم يوم عند كهربائي شاطر بالحيل
المهم وانا اسولف وياة قلت لة تقدر تعدل قرائة العداد ودي انزلة شوي
قال لي ممكن وعادي والحين اسوية لك لو تبي !!!!!
الحقيقة استغربت وسؤالي كان لمجرد معرفة اذا ممكن تتلاعب بقرائة العداد الالكتروني

انتبهو يا شباب ولا يغركم الممشى الي مهوب طبيعي

[هواوي صيد]

اساليب الغش كثيره واكتشافها صعب

وجهة نظري ان السيارة المخزنة

تبي لها صيانه من جديد لأن التخزين

يضر السيارة من حيث الربر

والليات وما إلى ذلك

يعني لابد تدفع عليها من جديد

ولا تنسى انك بتاخذها غاليه

[Rapture]

والله النصب هالأيام صار شي عاااادي

ما لك الا سيارة وكالة على اييييييييدك

بلا مستعمل بلا هممممممممممم


أو تشتري السيارة من واحد تعرفه !!

[اول المشوار]

شاكر لكم تفاعلكم جميعاا


كفيتم ووفيتم

[معدي المرقاب]

اشري سيارة ماشية 200000الف والا اشري نفسها ماشية 20000الف لانه مارجعها الا ان فيها بلا,

[ذيب عالية نجد]

أخي عند عدة علامات تساعد في الكشف على التلاعب الحاصل في عداد الممشى للسيارات ومنها الدركسون تبين فيه كثرة الإمساك به و دعسات الفرامل والبنزين والكلتش إذاكان قير عادي والكفرات تاريخ الإنتاج ومقارنة إستهلاكها
هذا اللي أعرفه
تحياتي لك

[ابويارا1001]

التلاعب سهل وطبيعي جدا

وصعب تعرفه الا من حالة السيارة زي ما أفادوك الشباب
انت يهمك في الموتر نظافته بشكل عام من الى

وشوف لك شي ممشاه بالطبيعي يكون يعني حول 20 ألف كيلو بالسنه يكون ممشى عادي او قليل نوعا ما

ومريت علي مواتر ما تصدق ان هذا ممشاها
لقيت مكسيما 2004 ماشية 400 ألف ومن نظاقتها
ما صدقنا الا بعد ما شفنا الطبلون

وغيرها انا جبت لكزس الماني من زمان ماشي 180 ألف خلال 3 سنوات يعتبر كثير جدا بس لو تشوف نظافة الموتر تحلف انه ما تعدى 30 الف

وغيرها عندي اكورد 2008 الان ماشية فوق 100ألف مع انه كان واقف 4 شهور بسبب حادث

عشان كذا اقولك صعب انك تعرف لانه ما عندنا مصدر يعتمد عليه في التأكد من ممشى الموتر

عندك الفحص الدوري
الصيانة بالوكالة

وبالنسبة للمواتر وارد امريكا امرها جدا سهل خذ تقرير car fax

يعطيك آخر قراءة للسيارة قبل تطلع من امريكا

وعسى ربي يوفقك وعذرا على الاطالة

[السارحي]

كلمة مخزنة طالما اضحكتني

يعني تلقى سياره موديل 79 ماشيه 50 الف هل الكلام هذا معقول

طيب لو فرضنا انه معقول كيف اتاكد ... طبعا لايوجد طريقه ... اذا المخزنه والغير مخزنه سواسيه لانك فاحص فاحص

تصدق احد اقربائي عنده جيب بورش نزل عداده في الامارات ولما دخله الوكاله على السيرفس تعجبو وقالو كيف نزلتها قالهم بطريقتي الخاصه فكملو معاه السيرفس والضمان لازال ساري لانهم ماقدرو يثبتون انه نزل العداد!!!

دائما انصح القريبين مني انهم مايشغلون نفسهم بعداد السياره وكم ماشيه لان ممكن يشتري سياره ماشيه مليون ومنزلينها 100 الف وغيرها ماشيه 400 باقل من سعرها لان صاحبها امين!!!

[اول المشوار]

بارك الله فيكم جميعا

ومروكم جميعا فيه من الفائده لي مالايعلمها الا الله


جزاكم الله خير

[ابومشخص]

انحش ههههههههههههههههههههه
طيب ونا اخوك سو فحص مثل ما يقولون الربع
وبعدين الموتر لا وقف سنين الوقفه تضر كذلك

[مزهب الطراقي2]

السيارة المخزنة تبي تغير فيها لين يدوخ راسك


والتخزين ماهو شرط لنظف السيارة

والحين الدنيا تطورت رح اقرب محل فحص وافحص من الصدام للصدام وخصوصاً هالحين

طالع جهاز يفحص السمكرة.